อรรถกถาเล่มที่ ๑๐ หน้าที่ ๑๔๓.

วิเหสาติ เสฺวว กิลมโถ วุตฺโต. ยถาสเก ติฏฺเฐยฺยาสีติ อตฺตโน อชานนโกฏฺฐาเสเยว ติฏฺเฐยฺยาสีติ. [๒๑๔] เทเสสีติ จิตฺเตกคฺคตํ นาม เอวํ ลภติ, สมาปตฺตึ เอวํ นิพฺพตฺเตตีติ อปฺปนาอุปจารํ ปาเปตฺวา เอกกสิณปริกมฺมํ กเถสิ. ปเวเทตฺวาติ ปกาเสตฺวา. เนกฺขมฺเมน ญาตพฺพนฺติ กามโต นิสฺสฏคุเณน ญาตพฺพํ. กามโต นิสฺสฏคุเณ ฐิเตน ปุคฺคเลน เอกคฺคํ นาม ชานิตพฺพนฺติ อธิปฺปาเยเนตํ วุตฺตํ. เสสานิ ตสฺเสว เววจนานิ. กาเม ปริภุญฺชนฺโตติ ทุวิเธปิ กาเม ปริภุญฺชมาโน. [๒๑๕] หตฺถิทมฺมา วา อสฺสทมฺมา วา โคทมฺมา วาติ เอตฺถ อทนฺตหตฺถิทมฺมาทโย วิย จิตฺเตกคฺครหิตา ปุคฺคลา ทฏฺฐพฺพา. ทนฺตหตฺถิอาทโย วิย จิตฺเตกคฺคสมฺปนฺนา. ยถา อทนฺตหตฺถิทมฺมาทโย กูฏาคารํ อกตฺวา ธุรํ อฉฑฺเฑตฺวา ทนฺตคมนํ วา คนฺตุํ, ทนฺเตหิ วา ปตฺตพฺพํ ภูมึ ปาปุณิตุํ น สกฺโกนฺติ, เอวเมว จิตฺเตกคฺครหิตา สมฺปนฺนจิตฺเตกคฺเคหิ นิพฺพตฺติตคุณํ วา นิพฺพตฺเตตุํ ปตฺตภูมึ วา ปาปุณิตุํ น สกฺโกนฺติ. [๒๑๖] หตฺถวิลงฺฆเกนาติ หตฺเถน หตฺถํ คเหตฺวา. ทิฏฺเฐยฺยนฺติ ^๑- ปสฺสิตพฺพยุตฺตกํ. อาวุโฏติ ^๒- อาวริโต. นิวุโฏติ ^๓- นิวาริโต. โอผุโฏติ โอนทฺโธ. [๒๑๗] นาควนิกนฺติ หตฺถิปโทปเม ^๔- นาควนจรโก ปุริโส "นาควนิโก"ติ วุตฺโต, อิธ หตฺถิสิกฺขาย กุสโล หตฺถึ คเหตุํ สมตฺโถ. อติปสฺสิตฺวาติ ทิสฺวา. เอตฺถเคธาติ เอตสฺมึ ปวตฺตเคธา. สรสงฺกปฺปานนฺติ ธาวนสงฺกปฺปานํ. ^๕- มนุสฺสกนฺเตสุ สีเลสุ สมาทปนายาติ เอตฺถ ยถา นาโค อิตฺถิปุริเสหิ กุมารกุมาริกาหิ โสณฺฑาทีสุ คเหตฺวา อุปเกฬยมาโน วิการํ น กโรติ สุขายติ, ตทาเนน มนุสฺสกนฺตานิ สีลานิ สมาทินฺนานิ นาม โหนฺติ. @เชิงอรรถ: ^๑ ฉ.ม. ทฏฺเฐยฺยนฺติ ^๒ ฉ.ม. อาวุโตติ ^๓ ฉ.ม. นิวุโตติ @^๔ ม.มู. ๑๒/๒๘๘-๒๙๙-๒๕๒-๒๖๑ ^๕ สี. วจนสงฺกปฺปานํ, ม. พาธนสงฺกปฺปานํ

เนื้อความอรรถกถาฉบับภาษาบาลี อักษรไทย เล่มที่ ๑๐ หน้าที่ ๑๔๓. http://84000.org/tipitaka/read/attha_page.php?book=10&page=143&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=10&A=3641&modeTY=2&pagebreak=1 http://84000.org/tipitaka/atthapali/th_line.php?B=10&A=3641&modeTY=2&pagebreak=1#p143