อรรถกถาเล่มที่ ๑๑ หน้าที่ ๑๘๕.

๖. พฺรหฺมสํยุตฺต ๑. ปฐมวคฺค ๑. พฺรหฺมายาจนสุตฺตวณฺณนา [๑๗๒] พฺรหฺมสํยุตฺตสฺส ปฐเม ปริวิตกฺโก อุทปาทีติ สพฺพพุทฺธานํ อาจิณฺโณ สมาจิณฺโณ อยํ เจตโส ปริวิตกฺโก ^๑- อุทปาทิ. กทา อุทปาทีติ? พุทฺธภูตสฺส อฏฺฐเม สตฺตาเห ราชายตนมูเล สกฺเกน เทวานมินฺเทน อาภตํ ทนฺตกฏฺฐญฺจ โอสถหรีตกญฺจ ขาทิตฺวา มุขํ โธวิตฺวา จตูหิ โลกปาเลหิ อุปนีเต ปจฺจคฺเฆ เสลมเย ปตฺเต ตปุสฺสภลฺลิกานํ ปิณฺฑปาตํ ปริภุญฺชิตฺวา ปุน ปจฺจาคนฺตฺวา อชปาลนิโคฺรเธ นิสินฺนมตฺตสฺส. อธิคโตติ ปฏิวิทฺโธ. ธมฺโมติ จตุสจฺจธมฺโม. คมฺภีโรติ อุตฺตานปฏิกฺเขป- วจนเมตํ. ทุทฺทโสติ คมฺภีรตฺตาว ทุทฺทโส ทุกฺเขน ทฏฺฐพฺโพ, น สกฺกา สุเขน ทฏฺฐุํ. ทุทฺทสตฺตาว ทุรานุโพโธ ทุกฺเขน อวพุชฺฌิตพฺโพ, น สกฺกา สุเขน อวพุชฺฌิตุํ. สนฺโตติ นิพฺพุโต. ปณีโตติ อตปโก. ^๒- อิทํ ทฺวยํ โลกุตฺตรเมว สนฺธาย วุตฺตํ. อตกฺกาวจโรติ ตกฺเกน อวจริตพฺโพ โอคาหิตพฺโพ น โหติ, ญาเณเนว อวจริตพฺโพ. นิปุโณติ สโณฺห. ปณฺทิตเวทนีโยติ สมฺมาปฏิปทํ ปฏิปนฺเนหิ ปณฺฑิเตหิ เวทิตพฺโพ. อาลยรามาติ สตฺตา ปญฺจกามคุเณสุ อลฺลียนฺติ, ตสฺมา เต อาลยาติ วุจฺจนฺติ. อฏฺฐสตตณฺหาวิปรีตานิ ^๓- อลฺลียนฺติ, ตสฺมาปิ อาลยาติ วุจฺจนฺติ. เตหิ อาลเยหิ รมนฺตีติ ^๔- อาลยรามา. อาลเยสุ รตาติ อาลยรตา. อาลเยสุ สุมุทิตาติ ^๕- อาลยสุมุทิตา. ยเถว หิ สุสชฺชิตํ ปุปฺผผลภริตรุกฺขาทิสมฺปนฺนํ อุยฺยานํ ปวิฏฺโฐ ราชา ตาย ตาย สมฺปตฺติยา รมติ, สุมุทิโต อาโมทิตปโมทิโต ^๖- โหติ, น อุกฺกณฺฐติ. สายํปิ นิกฺขมิตุํ น อิจฺฉติ, เอวมิเมหิ ^๗- กามาลยตณฺหาลเยหิ สตฺตา รมนฺติ, สํสารวฏฺเฏ สุมุทิตา อนุกฺกณฺฐิตา @เชิงอรรถ: ^๑ ฉ.ม. วิตกฺโก ^๒ ฉ.ม. อตปฺปโก อิ. อนปฺปโก ^๓ ฉ.ม....... วิจริตานิ @^๔ อิ. รมตีติ ^๕ ฉ.ม. สุฏฺฐุ มุทิตาติ อิ. สมฺมุทิตา ^๖ ม. อาโมทิตสมฺโมทิโต @^๗ ฉ.ม. เอวมิเมหิปิ

เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๑๘๕. http://84000.org/tipitaka/read/attha_page.php?book=11&page=185&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=4800&modeTY=2&pagebreak=1 http://84000.org/tipitaka/atthapali/th_line.php?B=11&A=4800&modeTY=2&pagebreak=1#p185