อรรถกถาเล่มที่ ๑๔ หน้าที่ ๔๓๔.

มชฺเฌ ปน ^๑- ติโยชนสติโก, ปริยนฺตปริกฺเขเปน นวมตฺตโยชนสติโก โหติ. เอตฺตเก ฐาเน พุทฺธปจฺเจกพุทฺธพุทฺธุปฏฺฐากพุทฺธสาวกา ^๒- พุทฺธมาตา พุทฺธปิตา จกฺกวตฺติราชาติ อิเม สตฺตา นิพฺพตฺตนฺติ. อปิจ อุปาทายาปิ ^๓- มชฺฌิมปฺปเทเส ^๔- ลพฺภติ. สกโลปิ หิ ชมฺพูทีโป มชฺฌิมปฺปเทโส นาม, เสสทีปา ปจฺจนฺติมา ชนปทา. ตามฺพปณฺณิทีเป ^๕- อนุราธปุรํ มชฺฌิมปฺปเทโส นาม, เสโส ปจฺจนฺโตติ เอวํ นโย เวทิตพฺโพ. [๓๒๔] ปญฺญวนฺโต อชฬา อเนฬมูคาติ เอตฺถ กมฺมสฺสกตปญฺญา ฌานปญฺญา วิปสฺสนาปญฺญา มคฺคปญฺญา ผลปญฺญาติ เอตาหิ สมนฺนาคตา ปญฺญวนฺโต นาม, อมูฬฺหา อชฬา นาม. เยสํ เอฬา มุขโต น คลติ, เต อเนฬมูคา นาม, อเนฬมุขา นิทฺโทสมุขาติ อตฺโถ. ปฏิพลาติ สมตฺถา, กายพเลน เจว ญาณพเลน จ สมนฺนาคตา. อตฺถมญฺญาตุนฺติ ^๖- อตฺถานตฺถํ การณาการณํ ชานิตุํ. ทุปฺปญฺญาติ อปญฺญา นิปฺปญฺญา. ชฬาติ มนฺทา ^๗- โมหา. ^๘- [๓๒๕] อริเยน ปญฺญาจกฺขุนาติ สห วิปสฺสนามคฺเคน. ^๙- อวิชฺชาคตาติ อวิชฺชนฺธกาเรน สมนฺนาคตา. [๓๒๖] เย ลภนฺติ ตถาคตํ ทสฺสนายาติ เย ตถาคตสฺส คุเณ ชานิตฺวา ตถาคตํ จกฺขุวิญฺญาเณน ปสฺสิตุํ ลภนฺติ. [๓๒๗] ตถาคตปฺปเวทิตนฺติ ตถาคเตน ปเวทิตํ ปกาเสตฺวา กถิตํ. สวนายาติ โสตวิญฺญาเณน โสตุํ. [๓๒๘] ธาเรนฺตีติ ตํ น ปมุสฺสนฺติ. ^๑๐- @เชิงอรรถ: ^๑ ฉ.ม. กตฺถจิ ทฺวิโยชนสติโก, มชฺเฌ ปน ^๒ ฉ.ม. พุทฺธปจฺเจกพุทฺธา มหาสาวกา @พุทฺธุปฏฺฐากา พุทฺธสาวกา ^๓ สี. อุปาทาย อุปาทายาปิ, ฉ.ม. อุปาทายุปาทายาปิ @^๔ ฉ.ม. มชฺฌิมปเทโส ^๕ สี.,ฉ.ม. ตมฺพปณฺณิทีเป ^๖ ก. อญฺญาตุนฺติ ^๗ สี. ทนฺธา @^๘ ฉ.ม. โมมูหา ^๙ ฉ. สหวิปสฺสเนน มคฺเคน ^๑๐ ฉ.ม. ปมฺมุสฺสนฺติ

เนื้อความอรรถกถาฉบับภาษาบาลี อักษรไทย เล่มที่ ๑๔ หน้าที่ ๔๓๔. http://84000.org/tipitaka/read/attha_page.php?book=14&page=434&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=14&A=10366&modeTY=2&pagebreak=1 http://84000.org/tipitaka/atthapali/th_line.php?B=14&A=10366&modeTY=2&pagebreak=1#p434