อรรถกถาเล่มที่ ๑๖ หน้าที่ ๓๑๘.

ทสกนิปาตวณฺณนา ๑. ปฐมปณฺณาสก ๑. อานิสํสวคฺค ๑. กิมตฺถิยสุตฺตวณฺณนา [๑] ทสกนิปาตสฺส ปฐเม กุสลานิ สีลานีติ อนวชฺชสีลานิ. อมงฺกุภาวสฺส อวิปฺปฏิสารสฺส อตฺถาย สํวตฺตนฺตีติ อวิปฺปฏิสารตฺถานิ. โสปิ ^๑- เนสํ อานิสํโสติ อวิปฺปฏิสารานิสํสานิ. ยถาภูตญาณทสฺสนตฺโถติอาทีสุ ยถาภูตญาณทสฺสนํ นาม ตรุณวิปสฺสนา, นิพฺพิทา นาม พลววิปสฺสนา, วิราโค นาม มคฺโค, วิมุตฺติ นาม อรหตฺตผลํ, ญาณทสฺสนํ นาม ปจฺจเวกฺขณญาณํ. อรหตฺตาย ปูเรนฺตีติ ^๒- อรหตฺตตฺถาย คจฺฉนฺติ. ๒. เจตนากรณียสุตฺตวณฺณนา [๒] ทุติเย น เจตนาย กรณียนฺติ น เจเตตฺวา กปฺเปตฺวา ปกปฺเปตฺวา กาตพฺพํ. ธมฺมตา เอสาติ ธมฺมสภาโว เอโส, การณนิยโม อยํ. อภิสนฺเทนฺตีติ ปวตฺเตนฺติ. ปริปูเรนฺตีติ ปริปุณฺณํ กโรนฺติ. อปราปรํ ^๓- คมนายาติ โอริมตีรภูตา เตภูมิกวฏฺฏา นิพฺพานปารํ คมนตฺถาย. ๓-๕. อุปนิสสุตฺตตฺตยวณฺณนา [๓-๕] ตติเย หตูปนิโสติ หตการโณ. จตุตฺถปญฺจเมสุ ทฺวีหิ เถเรหิ กถิตภาโวว วิเสโส. @เชิงอรรถ: ^๑ ฉ.ม. โสว ^๒ ฉ.ม. อคฺคาย ปเรนฺตีติ ^๓ ฉ.ม. อปรา ปารํ

เนื้อความอรรถกถาฉบับภาษาบาลี อักษรไทย เล่มที่ ๑๖ หน้าที่ ๓๑๘. http://84000.org/tipitaka/read/attha_page.php?book=16&page=318&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=16&A=7151&modeTY=2&pagebreak=1 http://84000.org/tipitaka/atthapali/th_line.php?B=16&A=7151&modeTY=2&pagebreak=1#p318