อรรถกถาเล่มที่ ๑๖ ภาษาบาลี อักษรไทย
องฺ.อ. (มโนรถ.๓)
หน้าที่ ๓๕๒.

ตถา สมฺปตฺติญฺจ วิปตฺติญฺจ. โลกสฺส สมุทยญฺจ อตฺถงฺคมญฺจาติ ปน สงฺขารโลกํ
สนฺธาย วุตฺตํ, ขนฺธานํ นิพฺพตฺติญฺจ เภทญฺจ ญตฺวาติ อตฺโถ. ๑-
                       ๑๐. คิริมานนฺทสุตฺตวณฺณนา
     [๖๐] ทสเม อนุกมฺปํ อุปาทายาติ คิริมานนฺทตฺเถเร อนุกมฺปํ ปฏิจฺจ.
จกฺขุโรโคติอาทโย วตฺถุวเสน เวทิตพฺพา. นิพฺพตฺติตปฺปสาทานญฺหิ โรโค นาม นตฺถิ.
กณฺณโรโคติ พหิกณฺณโรโค. ปินาโสติ พหินาสิกาย โรโค. รชสาติ ๒- นเขหิ
วิเลขิตฏฺฐาเน โรโค. ปิตฺตสมุฏฺฐานาติ ปิตฺตสมุฏฺฐิตา. เต กิร ทฺวตฺตึส โหนฺติ.
เสมฺหสมุฏฺฐานาทีสุปิ เอเสว นโย. อุตุปริณามชาติ อุตุปริณาเมน อจฺจุณฺหาติสีเตน
อุปฺปชฺชนกโรคา. วิสมปริหารชาติ อติจิรฏฺฐานนิสชฺชาทินา วิสมปริหาเรน ชาตา.
โอปกฺกมิกาติ วธพนฺธนาทินา อุปกฺกเมน ชาตา. กมฺมวิปากชาติ พลวกมฺมวิปากสมฺภูตา.
สนฺตนฺติ ราคาทิสนฺตตฺตา สนฺตํ. อตปฺปกฏฺเฐน ปณีตํ. เสสํ สพฺพตฺถ
อุตฺตานตฺถเมวาติ.
                         สจิตฺตกวคฺโค ปฐโม.
                         --------------
                          ๗. ๒. ยมกวคฺค
                       ๑. อวิชฺชาสุตฺตาทิวณฺณนา
     [๖๑-๖๒] ทุติยสฺส ปฐเม สาหารนฺติ สปจฺจยํ. วิชฺชาวิมุตฺตินฺติ ๓- ผลญาณญฺเจว
เสสสมฺปยุตฺตธมฺเม จ. โพชฺฌงฺคาติ มคฺคโพชฺฌงฺคา. ทุติเย ภวตณฺหายาติ ภวปตฺถนาย.
เอวํ ทฺวีสุปิ สุตฺเตสุ วฏฺฏเมว กถิตํ, วฏฺฏญฺเจตฺถ ปฐเม สุตฺเต อวิชฺชามูลกํ
วฏฺฏํ กถิตํ, ทุติเย ตณฺหามูลกํ.
@เชิงอรรถ: ๑ ฉ.ม. เภทญฺจาติ อตฺโถ
@๒ ฉ.ม. นขสาติ, ขุ. มหา. ๒๙/๒๒/๑๔, ขุ. จูฬ. ๓๐/๖๘/๑๔  ๓ สี. วิชฺชาวิมุตฺตีติ


เนื้อความอรรถกถาฉบับภาษาบาลี อักษรไทย เล่มที่ ๑๖ หน้าที่ ๓๕๒.
http://84000.org/tipitaka/read/attha_page.php?book=16&page=352&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=16&A=7919&modeTY=2&pagebreak=1
http://84000.org/tipitaka/atthapali/th_line.php?B=16&A=7919&modeTY=2&pagebreak=1#p352