อรรถกถาเล่มที่ ๑๖ ภาษาบาลี อักษรไทย
องฺ.อ. (มโนรถ.๓)
หน้าที่ ๔๘.

                        ๑๒. ๒. อนฺธกวินฺทวคฺค
                         ๑. กุลุปกสุตฺตวณฺณนา
     [๑๑๑] ทุติยสฺส ปฐเม อสนฺถววิสฺสาสีติ อตฺตนา สทฺธึ สนฺถวํ อกโรนฺเตสุ
วิสฺสาสํ อนาปชฺชนฺเตสุเยว วิสฺสาสํ กโรติ. อนิสฺสรวิกปฺปีติ อนิสฺสโรว สมาโน
"อิมํ เทถ, อิมํ คณฺหถา"ติ อิสฺสโร วิย วิกปฺเปติ. พฺยตฺถุปเสวีติ วิสฺสฏฺฐานิ ๑-
ภินฺนกุลานิ ฆฏนตฺถาย อุปเสวติ. อุปกณฺณกชปฺปีติ กณฺณมูเล มนฺตํ คณฺหาติ.
สุกฺกปกฺโข วุตฺตวิปริยาเยน เวทิตพฺโพ.
                       ๒. ปจฺฉาสมณสุตฺตวณฺณนา
     [๑๑๒] ทุติเย ปตฺตปริยาปนฺนํ น คณฺหาตีติ อุปชฺฌาเย นิวตฺติตฺวา ฐิเต
อตฺตโน ตุจฺฉปตฺตํ ทตฺวา ตสฺส ปตฺตํ น คณฺหาติ, ตโต วา ทิยฺยมานํ น
คณฺหาติ.  น นิวาเรตีติ อิทํ วจนํ อาปตฺติวีติกฺกมวจนํ นามาติ น ชานาติ,
ญตฺวาปิ ๒- "ภนฺเต เอวรูปํ นาม วตฺตุํ น วฏฺฏตี"ติ น นิวาเรติ. กถํ
โอปาเตตีติ ตสฺส กถํ ฉินฺทิตฺวา ๓- อตฺตโน กถํ ปเวเสติ. ชโฬติ ชโฑ. ๔-
เอฬมูโคติ ปคฺฆริตเขฬมูโค. ๕- ตติยํ อุตฺตานเมว.
                       ๔. อนฺธกวินฺทสุตฺตวณฺณนา
     [๑๑๔] จตุตฺเถ สีลวา โหถาติ สีลวนฺโต โหถ. อารกฺขสติโนติ ทฺวาร-
รกฺขิกาย สติยา สมนฺนาคตา. นิปกฺกสติโนติ ทฺวารรกฺขนเกเนว ญาเณน
สมนฺนาคตสติโน. สตารกฺเขน เจตสา สมนฺนาคตาติ สตารกฺเขน จิตฺเตน
สมนฺนาคตา. อปฺปภสฺสาติ อปฺปกถา. สมฺมาทิฏฺฐิกาติ กมฺมสฺสกตชฺฌานวิปสฺสนา-
มคฺคผลวเสน ปญฺจวิธา สมฺมาทิฏฺฐิยา สมนฺนาคตา. อปิจ ปจฺจเวกฺขณญาณํปิ
สมฺมาทิฏฺฐิเยวาติ เวทิตพฺพํ.
@เชิงอรรถ: ๑ สี. วิยตฺถูปเสวีติ วิยตฺถานิ, ฉ.ม. วิสฺสฏฺฐุปเสวีติ วิสฺสฏฺฐานิ
@๒ ฉ.ม. ญตฺวา วาปิ  ๓ ฉ.ม. ภินฺทิตฺวา ๔ สี.ขโฬติ ชโฬ, ม. เอโฬติ ชโฬ
@๕ ฉ.ม. ปคฺฆริตเขฬมุโข


เนื้อความอรรถกถาฉบับภาษาบาลี อักษรไทย เล่มที่ ๑๖ หน้าที่ ๔๘.
http://84000.org/tipitaka/read/attha_page.php?book=16&page=48&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=16&A=1071&modeTY=2&pagebreak=1
http://84000.org/tipitaka/atthapali/th_line.php?B=16&A=1071&modeTY=2&pagebreak=1#p48