อรรถกถาเล่มที่ ๒ ภาษาบาลี อักษรไทย
วินย.อ. (สมนฺต.๒)
หน้าที่ ๕๐๘-๕๐๙.

หน้าที่ ๕๐๘.
                    ภิกฺขุนีวิภงฺเค
                  ปาราชิกกณฺฑวณฺณนา
        โย ภิกฺขูนํ วิภงฺคสฺส      สงฺคหิโต อนนฺตรํ
        ภิกฺขุนีนํ วิภงฺคสฺส        ตสฺส สํวณฺณนากฺกโม
        ปตฺโต ยโต ตโต ตสฺส    อปุพฺพปทวณฺณนํ ฯ
        กาตุํ ปาราชิเก ตาว     โหติ สํวณฺณนา อยํ ฯ
     {๖๕๖} เตน สมเยน พุทฺโธ ภควา สาวตฺถิยํ วิหรติ ฯเปฯ สาฬฺโห
มิคารนตฺตาติ สาฬฺโหติ ตสฺส นามํ มิคารมาตาย ปน นตฺตา
โหติ ฯ เตน วุตฺตํ มิคารนตฺตาติ ฯ นวกมฺมิกนฺติ นวกมฺมํ
อธิฏฺฐายิกํ ฯ ปณฺฑิตาติ ปณฺฑิจฺเจน สมนฺนาคตา ฯ พฺยตฺตาติ
เวยฺยตฺติเยน สมนฺนาคตา ฯ เมธาวินีติ ปาลิคฺคหเณ สติปุพฺพงฺคมาย
ปญฺญาย อตฺถคฺคหเณ ปญฺญาปุพฺพงฺคมาย สติยา สมนฺนาคตา ฯ
ทกฺขาติ เฉกา อวิรชฺฌิตฺวา สีฆกตฺตพฺพการินีติ อตฺโถ ฯ
อนลสาติ อาลสฺยวิรหิตา ฯ ตตฺรูปายายาติ เตสุ กมฺเมสุ
อุปายภูตาย ฯ วีมํสายาติ กตฺตพฺพกมฺมูปปริกฺขาย ฯ สมนฺนาคตาติ
สมฺปยุตฺตา ฯ อลํ กาตุนฺติ สมตฺถา ตํ ตํ กมฺมํ กาตุํ ฯ
อลํ สํวิธาตุนฺติ เอวญฺจ อิทํ เอวญฺจ อิทํ โหตูติ เอวํ สํวิทหิตุํปิ
สมตฺถา ฯ กตากตํ ชานิตุนฺติ กตญฺจ กตญฺจ ชานิตุํ ฯ เตติ
เต อุโภ สา จ สุนฺทรีนนฺทา โส จ สาฬฺโหติ อตฺโถ ฯ
ภตฺตคฺเคติ ปริเวสนฏฺฐาเน ฯ นิกฺกุฑฺเฑติ โกณสทิสํ กตฺวา
---------------------------------------------------------------------------------------------
หน้าที่ ๕๐๙.
ทสฺสิเต คมฺภีเร ฯ วิสฺสโร เม ภวิสฺสตีติ วิรูโป เม สโร
ภวิสฺสติ วิปฺปการสทฺโท ภวิสฺสตีติ อตฺโถ ฯ ปฏิมาเนนฺตีติ
อเปกฺขมานา ฯ กฺยาหนฺติ กึ อหํ ฯ ชราทุพฺพลาติ ชราย
ทุพฺพลา ฯ จรณคิลานาติ ปาทโรเคน สมนฺนาคตา ฯ {๖๕๗-๖๕๘} อวสฺสุตาติ
กายสํสคฺคราเคน อวสฺสุตา ตินฺตา กิลินฺนาติ อตฺโถ ฯ ปทภาชเน
ปนสฺส ตเมว ราคํ คเหตฺวา สารตฺตาติอาทิ วุตฺตํ ฯ ตตฺถ สารตฺตาติ
วตฺถํ วิย รงฺคชาเตน กายสํสคฺคราเคน สุฏฺฐุ รตฺตา ฯ
อเปกฺขวตีติ ตสฺเสว ราคสฺส วเสน ตสฺมึ ปุริเส ปวตฺตาย
อเปกฺขาย สมนฺนาคตา ฯ ปฏิพทฺธจิตฺตาติ เตน ราเคน ตสฺมึ
ปุริเส พนฺธิตฺวา ฐปิตจิตฺตา วิย ฯ เอส นโย ทุติยปทวิภงฺเคปิ ฯ
ปุริสปุคฺคลสฺสาติ ปุริสสงฺขาตสฺส ปุคฺคลสฺส ฯ อธกฺขกนฺติ อกฺขกานํ
อโธ ฯ อุพฺภชานุมณฺฑลนฺติ ชานุมณฺฑลานํ อุปริ ฯ ปทภาชเน
ปน ปทปฏิปาฏิยาเอว เหฏฺฐกฺขกํ อุปริชานุมณฺฑลนฺติ วุตฺตํ ฯ
เอตฺถ จ อุพฺภกุปฺปรํปิ อุพฺภชานุมณฺฑเลเนว สงฺคหิตํ ฯ เสสํ
มหาวิภงฺเค วุตฺตนเยเนว เวทิตพฺพํ ฯ ปุริมาโย อุปาทายาติ
สาธารณปาราชิเกหิ ปาราชิกาโย จตสฺโส อุปาทายาติ อตฺโถ ฯ
อุพฺภชานุมณฺฑลิกาติ อิทํ ปน อิมิสฺสา ปาราชิกาย นามมตฺตํ
ตสฺมา ปทภาชเน น วิจาริตํ ฯ {๖๕๙} เอวํ อุทฺทิฏฺฐสิกฺขาปทํ ปทานุกฺกเมน
วิภชิตฺวา อิทานิ อวสฺสุตาทิเภเทน อาปตฺติเภทํ ทสฺเสตุํ อุภโต
อวสฺสุเตติอาทิมาห ฯ ตตฺถ อุภโต อวสฺสุเตติ อุภโต
อวสฺสเว ฯ ภิกฺขุนิยา เจว ปุริสสฺส จ กายสํสคฺคราเคน อวสฺสุตภาเว


เนื้อความอรรถกถาฉบับภาษาบาลี อักษรไทย เล่มที่ ๒ หน้าที่ ๕๐๘-๕๐๙.
http://84000.org/tipitaka/read/attha_page.php?book=2&page=508&pages=2&modeTY=2&pagebreak=1&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=2&A=10689&modeTY=2&pagebreak=1
http://84000.org/tipitaka/atthapali/th_line.php?B=2&A=10689&modeTY=2&pagebreak=1#p508