อรรถกถาเล่มที่ ๒๔ ภาษาบาลี อักษรไทย
ธ.อ.๗ มล-นาควคฺค
หน้าที่ ๕๖.

มยํ เอวรูปา จ เอวรูปา จ; ตสฺมา `อิจฺฉิติจฺฉิตกฺขเณเยว อรหตฺตํ
ปตฺตุํ สมตฺถมฺหาติ จินฺเตตฺวา วิหรามาติ. สตฺถา เตสํ วจนํ สุตฺวา
"ภิกฺขเว ภิกฺขุนา นาม ปริสุทฺธสีลาทิมตฺตเกน วา อนาคามิสุข-
มตฺตเกน วา `อปฺปกํ โน ภวทุกฺขนฺติ ทฏฺฐุํ น วฏฺฏติ, อาสวกฺขยํ
ปน อปฺปตฺวา `สุขิโตมฺหีติ จิตฺตํ น อุปฺปาเทตพฺพนฺติ วตฺวา อิมา
คาถา อภาสิ
       "น สีลพฺพตมตฺเตน      พาหุสจฺเจน วา ปน
        อถวา สมาธิลาเภน    วิวิตฺตสยเนน วา
       `ผุสามิ เนกฺขมฺมสุขํ     อปุถุชฺชนเสวิตํ'
        ภิกฺขุ  วิสฺสาสมาปาทิ   อปฺปตฺโต อาสวกฺขยนฺติ.
       ตตฺถ "สีลพฺพตมตฺเตนาติ: จตุปาริสุทฺธิสีลมตฺเตน วา
เตรสธุตงฺคคุณมตฺเตน วา. พาหุสจฺเจน วาติ: ติณฺณํ ปิฏกานํ
อุคฺคหิตมตฺเตน วา. สมาธิลาเภนาติ: อฏฺฐสมาปตฺติลาเภน วา.
เนกฺขมฺมสุขนฺติ: อนาคามิสุขํ. ตสฺมา `อนาคามิสุขํ ผุสามีติ
เอตฺตกมตฺเตน วา. อปุถุชฺชนเสวิตนฺติ: ปุถุชฺชเนหิ อเสวิตํ
อริเยหิ เสวิตเมว. ภิกฺขูติ: เตสํ อญฺญตรมาลปนฺโต อาห.
วิสฺสาสมาปาทีติ: วิสฺสาสํ น อาปชฺเชยฺย. อิทํ วุตฺตํ โหติ
"ภิกฺขุ อิมินา สมฺปนฺนสีลาทิภาวมตฺตเกเนว `มยฺหํ ภโว อปฺปโก
ปริตฺตโกติ อาสวกฺขยสงฺขาตํ อรหตฺตํ อปฺปตฺโต หุตฺวา ภิกฺขุ
นาม วิสฺสาสํ น อาปชฺเชยฺย; ยถา หิ อปฺปมตฺตโกปิ คูโถ
ทุคฺคนฺโธ, เอวํ อปฺปมตฺตโกปิ ภโว ทุกฺโขติ.


เนื้อความอรรถกถาฉบับภาษาบาลี อักษรไทย เล่มที่ ๒๔ หน้าที่ ๕๖.
http://84000.org/tipitaka/read/attha_page.php?book=24&page=56&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=24&A=1128&modeTY=2&pagebreak=1
http://84000.org/tipitaka/atthapali/th_line.php?B=24&A=1128&modeTY=2&pagebreak=1#p56