อรรถกถาเล่มที่ ๓ ภาษาบาลี อักษรไทย
วินย.อ. (สมนฺต.๓)
หน้าที่ ๒๗๘-๒๗๙.

หน้าที่ ๒๗๘.
     {๒๑} อสฺสชิปุนพฺพสุกวตฺถุํ สงฺฆาทิเสสวณฺณนายํ วุตฺตํ ฯ {๒๗} กายิเกน
ทเวนาติอาทีสุ ปเนตฺถ กายิโก ทโว นาม กายิกกีฬา วุจฺจติ ฯ
เสสปททฺวเยปิ เอเสว นโย ฯ กายิโก อนาจาโร นาม กายทฺวาเร
ปญฺญตฺตสิกฺขาปทวีติกฺกโม วุจฺจติ ฯ เสสปททฺวเยปิ เอเสว นโย ฯ
กายิกํ อุปฆาติกํ นาม กายทฺวาเร ปญฺญตฺตสิกฺขาปทสฺส อสิกฺขน-
ภาเวน อุปหนนํ วุจฺจติ ฯ นาสนํ วินาสนนฺติ อตฺโถ ฯ
เสสปททฺวเยปิ เอเสว นโย ฯ กายิโก มิจฺฉาชีโว นาม ปฏิกฺขิตฺต-
เวชฺชกมฺมาทิวเสน เตลปจนาริฏฺฐปจนาทีนิ ฯ วาจสิโก มิจฺฉาชีโว
นาม คิหีนํ สาสนสมฺปฏิจฺฉนฺนาโรจนาทีนิ ฯ กายิกวาจสิโก
มิจฺฉาชีโว นาม ตทุภยํ ฯ เสสํ ตชฺชนีเย วุตฺตนยเมว ฯ
     {๓๓} สุธมฺมวตฺถุสฺมึ ปน ฯ อนปโลเกตฺวาติ อนาปุจฺฉิตฺวา ฯ
เอตทโวจาติ กินฺเต ตํ คหปติ เถรานํ ปฏิยตฺตนฺติ สพฺพํ
วิวราเปตฺวา ทิสฺวา เอตํ อโวจ ฯ เอกา จ โข อิธ นตฺถิ ยทิทํ
ติลสงฺคุฬิกาติ ยา อยํ ติลสงฺคุฬิกา นาม วุจฺจติ สา นตฺถีติ
อตฺโถ ฯ ตสฺส กิร คหปติโน วํเส อาทิมฺหิ เอกา ปูววิกติ
อโหสิ ฯ เตน ตํ เถโร ชาติยา ขุํเสตุกาโม เอวมาห ฯ ยเทว
กิญฺจีติ เอวํ พหุพุทฺธวจนํ รตนํ ปหาย ยงฺกิญฺจิเทว ติลสงฺคุฬิกวจนํ
ภาสิตํ ฯ กุกฺกุฏโปตกอุทาหรเณน อิทํ ทสฺเสติ ยถา
โส เนว กากวสฺสิตํ น กุกฺกุฏวสฺสิตํ อกาสิ เอวํ ตยา เนว
ภิกฺขุวจนํ น คิหิวจนํ วุตฺตนฺติ ฯ {๓๗} อสมฺมุขา กตนฺติอาทโย
ติกา วุตฺตปฺปการาเยว ฯ {๓๙} องฺคสมนฺนาคโต ปุริเมหิ อสทิโส ฯ
---------------------------------------------------------------------------------------------
หน้าที่ ๒๗๙.
คิหีนํ อลาภายาติอาทีสุ ตตฺถ ยถา ลาภํ น ลภนฺติ เอวํ
ปริสกฺกนฺโต ปรกฺกมนฺโต อลาภาย ปริสกฺกติ นาม ฯ เอส นโย
อนตฺถาทีสุ ฯ ตตฺถ อนตฺโถติ อตฺถภงฺโค ฯ อนตฺถายาติ
อตฺถวินาสาย ฯ อนาวาโสติ ตสฺมึ ฐาเน อวสนํ ฯ คิหีนํ พุทฺธสฺส
อวณฺณนฺติ คิหีนํ สนฺติเก พุทฺธสฺส อวณฺณํ ภาสติ ฯ ธมฺมิกํ
ปฏิสฺสวํ น สจฺจาเปตีติ ยถา สจฺโจ โหติ เอวํ น กโรติ
วสฺสาวาสํ ปฏิสฺสุณิตฺวา น คจฺฉติ อญฺญํ วา เอวรูปํ น กโรติ ฯ
ปญฺจนฺนํ ภิกฺขเวติอาทิ เอกงฺเคนปิ กมฺมารหภาวทสฺสนตฺถํ วุตฺตํ ฯ
เสสเมตฺถ อุตฺตานตฺถญฺเจว ตชฺชนีเย จ วุตฺตนยเมว ฯ
     {๔๖} ฉนฺนวตฺถุสฺมึ ฯ อาวาสปรมฺปรญฺจ ภิกฺขเว สํสถาติ สพฺพา-
วาเสสุ จ อาโรเจถ ฯ {๕๐} ภณฺฑนการโกติอาทีสุ ภณฺฑนาทิปจฺจยา
อาปนฺนํ อาปตฺตึ อาโรเปตฺวา ตสฺสา อทสฺสเนเยว กมฺมํ
กาตพฺพํ ฯ ติกา วุตฺตปฺปการา เอว ฯ {๕๑} สมฺมา วตฺตนายํ ปเนตฺถ
เตจตฺตาฬีส วตฺตานิ ฯ ตตฺถ น อนุทฺธํเสตพฺโพติ น โจเทตพฺโพ ฯ
น ภิกฺขุ ภิกฺขูหีติ อญฺโญ ภิกฺขุ อญฺเญหิ ภิกฺขูหิ น ภินฺทิตพฺโพ ฯ
น คิหิธโชติ โอทาตวตฺถานิ อจฺฉินฺนทสานิ ปุปฺผทสานิ จ น
ธาเรตพฺพานิ ฯ น ติตฺถิยธโชติ กุสจีราทีนิ น ธาเรตพฺพานิ ฯ
น อาสาเทตพฺโพติ น อปสาเทตพฺโพ ฯ อนฺโต วา พหิ วาติ
วิหารสฺส อนฺโต วา พหิ วา ฯ น ติตฺถิยาทิ ปทตฺตยํ อุตฺตานเมว ฯ
เสสํ สพฺพํ ปาริวาสิกกฺขนฺธเก วณฺณยิสฺสาม ฯ เสสํ ตชฺชนีเย
วุตฺตนยเมว ฯ อาปตฺติยา อปฺปฏิกมฺเม อุกฺเขปนียกมฺมํ อิมินา


เนื้อความอรรถกถาฉบับภาษาบาลี อักษรไทย เล่มที่ ๓ หน้าที่ ๒๗๘-๒๗๙.
http://84000.org/tipitaka/read/attha_page.php?book=3&page=278&pages=2&modeTY=2&pagebreak=1&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=3&A=5712&modeTY=2&pagebreak=1
http://84000.org/tipitaka/atthapali/th_line.php?B=3&A=5712&modeTY=2&pagebreak=1#p278