ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๔๖ ภาษาบาลี อักษรไทย นิทฺ.อ.๒ (สทฺธมฺมปชฺ.)

หน้าที่ ๑๑๗.

"เมตฺตาสหคเตนา"ติ วุตฺตํ. ยสฺมา วา เอตฺถ โอธิโส ผรเณ วิย ปุน
ตถาสทฺโท วา อิติสทฺโท วา น วุตฺโต, ตสฺมา ปุน "เมตฺตาสหคเตน
เจตสา"ติ วุตฺตํ. นิคมนวเสน วา เอตํ วุตฺตํ. วิปุเลนาติ เอตฺถ จ
ผรณวเสน วิปุลตา ทฏฺฐพฺพา. ภูมิวเสน ปน ตํ มหคฺคตํ. ปคุณวเสน
อปฺปมาณสตฺตารมฺมณวเสน จ อปฺปมาณํ. พฺยาปาทปจฺจตฺถิกปฺปหาเนน อเวรํ.
โทมนสฺสปฺปหาเนน อพฺยาปชฺฌํ. นิทฺทุกฺขนฺติ วุตฺตํ โหติ. ๑- กรุณา เหฏฺฐา
วุตฺตตฺถาเยว. โมทนฺติ ตาย ตํสมงฺคิโน, สยํ วา โมทติ, โมทนมตฺตเมว วา
สาติ มุทิตา. "อเวรา โหนฺตู"ติอาทิพฺยาปาทปฺปหาเนน มชฺฌตฺตภาวูปคมเนน
จ อุเปกฺขตีติ อุเปกฺขา.
      ลกฺขณาทิโต ปเนตฺถ หิตาการปฺปวตฺติลกฺขณา เมตฺตา, หิตูปสํหารรสา,
อาฆาตวินยปจฺจุปฏฺฐานา, สตฺตานํ มนาปภาวทสฺสนปทฏฺฐานา. พฺยาปาทูปสโม
เอติสฺสา สมฺปตฺติ, สิเนหสมฺภโว วิปตฺติ. ทุกฺขาปนยนาการปฺปวตฺติลกฺขณา
กรุณา, ปรทุกฺขาสหนรสา. อวิหึสาปจฺจุปฏฺฐานา, ทุกฺขาภิภูตานํ
อนาถภาวทสฺสนปทฏฺฐานา. วิหึสวูปสโม ตสฺสา สมฺปตฺติ, โสกสมฺภโว วิปตฺติ.
ปโมทลกฺขณา มุทิตา, อนิสฺสายนรสา, อรติวิฆาตปจฺจุปฏฺฐานา. สตฺตานํ
สมฺปตฺติทสฺสนปทฏฺฐานา. อรติวูปสโม ตสฺสา สมฺปตฺติ, ปหานสมฺภโว วิปตฺติ.
สตฺเตสุ มชฺฌตฺตาการปฺปวตฺติลกฺขณา อุเปกฺขา, สตฺเตสุ สมภาวทสฺสนรสา,
ปฏิฆานุนยวูปสมปจฺจุปฏฺฐานา, "กมฺมสฺสกา สตฺตา, เต กสฺส รุจิยา
สุขิตา วา ภวิสฺสนฺติ. ทุกฺขโต วา มุจฺจิสฺสนฺติ, ปตฺตสมฺปตฺติโต วา น
ปริหายิสฺสนฺตี"ติ เอวํ ปวตฺตกมฺมสฺสกตาทสฺสนปทฏฺฐานา. ปฏิฆานุนยวูปสโม
ตสฺสา สมฺปตฺติ, เคหสิตาย อญฺญาณุเปกฺขาย สมฺภโว วิปตฺติ.
      ตตฺถ สนฺตุฏฺโฐ โหตีติ ปจฺจยสนฺโตสวเสน สนฺตุฏฺโฐ โหติ.
อิตรีตเรน จีวเรนาติ น ถูลสุขุมลูขปณีตถิรชิณฺณาทีสุ เยน เกนจิ. ๒- อถ โข
ยถาลทฺธานํ  อิตรีตเรน เยน เกนจิ สนฺตุฏฺโฐ โหตีติ อตฺโถ. จีวรสฺมึ หิ
ตโย สนฺโตสา:- ยถาลาภสนฺโตโส ยถาพลสนฺโตโส ยถาสารุปฺปสนฺโตโสติ.
@เชิงอรรถ:  วิสุทฺธิ. ๒/๑๑๑ (สฺยา), อภิ.อ. ๒/๔๐๕
@ ฉ.ม.....ถิรชิณฺณานํ เยน เกนจิ จีวเรน



เนื้อความอรรถกถาฉบับภาษาบาลี อักษรไทย เล่มที่ ๔๖ หน้าที่ ๑๑๗. http://84000.org/tipitaka/read/attha_page.php?book=46&page=117&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=46&A=2977&modeTY=2&pagebreak=1 http://84000.org/tipitaka/atthapali/th_line.php?B=46&A=2977&modeTY=2&pagebreak=1#p117


จบการแสดงผล หน้าที่ ๑๑๗.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]