อรรถกถาเล่มที่ ๔๖ ภาษาบาลี อักษรไทย
นิทฺ.อ.๒ (สทฺธมฺมปชฺ.)
หน้าที่ ๙.

อธิปฺปาโย รุจิ เอเตสนฺติ เอกาธิปฺปายา, เอกรุจิกาติ อตฺโถ. เอกวาสนวาสิตาติ
อตีตพุทฺธสาสเน เตน สทฺธึ ภาวิตภาวนา. อเนกปาณสหสฺสานนฺติ อเนเกสํ
เทวมนุสฺสสงฺขาตานํ ปาณสหสฺสานํ. วิรชํ วีตมลนฺติ ราคาทิรชวิรหิตํ
ราคาทิมลวิรหิตญฺจ.
      ธมฺมจกฺขุนฺติ อิธ โสตาปตฺติมคฺโค อธิปฺเปโต. อญฺญตฺถ เหฏฺฐามคฺคตฺตยํ.
ตสฺส อุปฺปตฺติการณทสฺสนตฺถํ "ยํ กิญฺจิ สมุทยธมฺมํ, สพฺพนฺตํ นิโรธธมฺมนฺ"ติ
อาห. ตํ หิ นิโรธํ อารมฺมณํ กตฺวา กิจฺจวเสน เอวํ สพฺพสงฺขตํ ปฏิวิชฺฌนฺตํ
อุปฺปชฺชติ. ตสฺส จ ๑- พฺราหฺมณสฺส อนุปาทาย อาสเวหิ จิตฺตํ วิมุจฺจีติ
ตสฺส จ อชิตพฺราหฺมณสฺส อนฺเตวาสิกสหสฺสสฺส จ ๒- ตณฺหาทีหิ อคฺคเหตฺวา
กามาสวาทีหิ มคฺคกฺขเณ จิตฺตํ วิมุจฺจมานํ ผลกฺขเณ วิมุจฺจิ.  สห อรหตฺตปฺปตฺตาติ
อรหตฺตปฺปตฺติยา จ สเหว อายสฺมโต อชิตสฺส จ อนฺเตวาสิกสหสฺสสฺส
อชินชฏาวากจีรติทณฺฑกมณฺฑลุอาทโย อนฺตรธายึสุ. สพฺเพว อิทฺธิมยปตฺตจีวรธรา
ทฺวงฺคุลเกสา เอหิภิกฺขู หุตฺวา ภควนฺตํ นมสฺสมานา ปญฺชลิกา นิสีทึสุ.
ปาฬิยํ ปน อชิตตฺเถโรว ปญฺญายติ. ตตฺถ อนฺวตฺถปฏิปตฺติยาติ สยํ
ปจฺจาสีสิตลทฺธปฏิปตฺติยา, ๓- นิพฺพานํ ลทฺธภาเวนาติ อตฺโถ. เสสํ สพฺพตฺถ
ปากฏเมว. เอวํ ภควา อรหตฺตนิกูเฏน เทสนํ นิฏฺฐาเปสีติ.
                  สทฺธมฺมปฺปชฺโชติกาย จูฬนิทฺเทสฏฺฐกถาย
                   อชิตมาณวสุตฺตนิทฺเทสวณฺณนา นิฏฺฐิตา.
                              ปฐมํ.
                          -------------
                 ๒. ติสฺสเมตฺเตยฺยมาณวสุตฺตนิทฺเทสวณฺณนา
      [๙] ทุติเย ติสฺสเมตฺเตยฺยสุตฺตนิทฺเทเส:- โกธ สนฺตุสิโตติ นิฏฺฐิเต
ปน อชิตสุตฺเต "กถํ โลกํ อเวกฺขนฺตํ, มจฺจุราชา น ปสฺสตี"ติ ๔- เอวํ
โมฆราชา ปุจฺฉิตุํ อารภิ. "น ตาวสฺส อินฺทฺริยานิ ปริปากํ คตานี"ติ ญตฺวา
@เชิงอรรถ: ๑  ฉ.ม. จสทฺโท น ทิสฺสติ  ๒ ฉ.ม..........สหสฺสานญฺจ
@๓ ก. สจฺจาภิสิตฺตลทฺธ...   ๔ ขุ.สุ. ๒๕/๑๑๒๕/๕๔๙,
@ขุ.จูฬ. ๓๐/๕๐๓/๒๔๕ (สฺยา)


เนื้อความอรรถกถาฉบับภาษาบาลี อักษรไทย เล่มที่ ๔๖ หน้าที่ ๙.
http://84000.org/tipitaka/read/attha_page.php?book=46&page=9&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=46&A=197&modeTY=2&pagebreak=1
http://84000.org/tipitaka/atthapali/th_line.php?B=46&A=197&modeTY=2&pagebreak=1#p9