ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๕๓ ภาษาบาลี อักษรไทย สงฺคณี.อ. (อฏฺฐสาลินี)

หน้าที่ ๙๐.

     [๔] อุปาทินฺนุปาทานิยตฺติเก อารมฺมณกรณวเสน ตณฺหาทีหิ ๑- อุเปเตน
กมฺมุนา อาทินฺนา ผลภาเวน คหิตาติ อุปาทินฺนา, อารมฺมณภาวํ อุปคนฺตฺวา
อุปาทานสมฺพนฺธเนน อุปาทานานํ หิตาติ อุปาทานิยา, อุปาทานสฺส อารมฺมณปจฺจยภูตานํ
เอตํ อธิวจนํ. อุปาทินฺนา จ เต อุปาทานิยา จาติ อุปาทินฺนุปาทานิยา,
สาสวกมฺมนิพฺพตฺตานํ รูปารูปธมฺมานเมตํ อธิวจนํ. อิติ อิมินา นเยน เสสปททฺวเย
ปฏิเสธสหิโต อตฺโถ เวทิตพฺโพ.
     [๕] สงฺกิลิฏฺฐสงฺกิเลสิกตฺติเก สงฺกิเลเสตีติ สงฺกิเลโส, วิพาธติ
อุปตาเปตีติ อตโถ. สงฺกิเลเสน สมนฺนาคตาติ สงฺกิลิฏฺฐา. อตฺตานํ อารมฺมณํ กตฺวา
ปวตฺตเนน สงฺกิเลสํ อรหนฺติ, สงฺกิเลเส วา นิยุตฺตา ตสฺส อารมฺมณภาวานติกฺกมนโตติ
สงฺกิเลสิกา, สงฺกิเลสสฺส อารมฺมณปจฺจยภูตานํ เอตํ อธิวจนํ. สงฺกิลิฏฺฐา จ เต
สงฺกิเลสิกา จาติ สงฺกิลิฏฺฐสงฺกิเลสิกา. เสสปททฺวยํ ปุริมตฺติเก วุตฺตนเยเนว
เวทิตพฺพํ.
     [๖] วิตกฺกตฺติเก สมฺปโยควเสน วตฺตมาเนน สห วิตกฺเกน สวิตกฺกา.
สห วิจาเรน สวิจารา. สวิตกฺกา จ เต สวิจารา จาติ สวิตกฺกสวิจารา. อุภยรหิตา
อวิตกฺกอวิจารา. วิตกฺกวิจาเรสุ วิจาโรว มตฺตา ปมาณํ เอเตสนฺติ วิจารมตฺตา,
วิจารโต อุตฺตรึ วิตกฺเกน สทฺธึ สมฺปโยคํ น คจฺฉนฺตีติ อตฺโถ. อวิตกฺกา จ เต
วิจารมตฺตา จาติ อวิตกฺกวิจารมตฺตา.
     [๗] ปีติตฺติเก ปีติยา สห เอกุปฺปาทาทิภาวํ คตาติ ปีติสหคตา,
ปีติสมฺปยุตฺตาติ อตฺโถ. เสสปททฺวเยปิ เอเสว นโย. อุเปกฺขาติ เจตฺถ อทุกฺขมสุขา
เวทนา วุตฺตา, สา หิ สุขทุกฺขาการปฺปวตฺตึ อุเปกฺขติ, มชฺฌตฺตาการสณฺฐิตตฺตา
เตนากาเรน ปวตฺตตีติ อุเปกฺขา. อิติ เวทนาตฺติกโต ปททฺวยเมว คเหตฺวา
นิปฺปีติกสฺส สุขสฺส สปฺปีติกสุขโต วิเสสทสฺสนวเสน อยํ ติโก วุตฺโต.
     [๘] ทสฺสนตฺติเก ทสฺสเนนาติ โสตาปตฺติมคฺเคน. โส หิ ปฐมํ นิพฺพานํ
ทสฺสนโต "ทสฺสนนฺ"ติ วุตฺโต. โคตฺรภู ปน กิญฺจาปิ ปฐมตรํ ปสฺสติ, ยถา
ปน รญฺโญ สนฺติกํ เกนจิเทว กรณีเยน อาคโต ๒- ปุริโส ทูรโตว รถิกาย จรนฺตํ
@เชิงอรรถ:  ฉ.ม. ตณฺหาทิฏฺฐีหิ       ม. ทูราคโต



เนื้อความอรรถกถาฉบับภาษาบาลี อักษรไทย เล่มที่ ๕๓ หน้าที่ ๙๐. http://84000.org/tipitaka/read/attha_page.php?book=53&page=90&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=53&A=2197&modeTY=2&pagebreak=1 http://84000.org/tipitaka/atthapali/th_line.php?B=53&A=2197&modeTY=2&pagebreak=1#p90


จบการแสดงผล หน้าที่ ๙๐.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]