อรรถกถาเล่มที่ ๕๕ หน้าที่ ๑๔๖.

ตํ ลทฺธึ ภินฺทิตุํ สนฺธาวตีติ ปุจฺฉา สกวาทิสฺส. ตตฺถ สนฺธาวตีติ สํสรติ คมนาคมนํ กโรติ. อตฺตโน ลทฺธิวเสน ปฏิญฺญา ปรวาทิสฺส. โส ปุคฺคโลติอาทโย อนุโยคาปิ สกวาทิสฺส, ปฏิกฺเขโป ปรวาทิสฺส. ตตฺถ โสติ โสเยวาติ อตฺโถ. เอวํ ปน อนุยุตฺโต สสฺสตทิฏฺฐิภเยน ปฏิกฺขิปติ. อญฺโญติ ปุฏฺโฐ อุจฺเฉททิฏฺฐิภเยน. โส จญฺโญ จาติ ปุฏฺโฐ เอกจฺจสสฺสตทิฏฺฐิภเยน. เนว โส น อญฺโญติ ปุฏฺโฐ อมราวิกฺเขปทิฏฺฐิภเยน. ปุน จตฺตาโรปิ ปเญฺห เอกโต ปุฏฺโฐ จตุนฺนมฺปิ ทิฏฺฐีนํ ภเยน ปฏิกฺขิปิตฺวา ปุน ยานิสฺส สุตฺตานิ นิสฺสาย ลทฺธิ อุปฺปนฺนา, ตานิ ทสฺเสนฺโต เตน หิ ปุคฺคโล สนฺธาวตีติอาทิมาห. [๗๖] ปุน สกวาทินา "ยฺวายํ ตว ลทฺธิยา สนฺธาวติ, กึ โส อสฺมิญฺจ ปรสฺมิญฺจ โลเก เอโกเยวา"ติ อธิปฺปาเยน เสฺววาติ นิยเมตฺวา ปุฏฺโฐ สสฺสตภยา ปฏิกฺขิปิตฺวา ปุน ทฬฺหํ กตฺวา ตเถว ปุฏฺโฐ ยสฺมา โส ปุคฺคโลว น อญฺโญ ภาโว, "โส ตโต จุโต อิธูปปนฺโน"ติ อาทิสุตฺตมฺปิ ^๑- อตฺถิ, ตสฺมา ปฏิชานาติ. เสฺวว มนุสฺโสติ ปุฏฺโฐ มนุสฺสสฺเสว เทวตาภาวโต ปฏิกฺขิปติ. [๗๗] ปุน ปุฏฺโฐ "อหํ เตน สมเยน สุเนตฺโต นาม สตฺถา อโหสินฺ"ติอาทิสุตฺตวเสน ^๒- ปฏิชานาติ. อถสฺส สกวาที เทวมนุสฺสูปปตฺตีนํ นานตฺตโต ตํ ^๓- วจนํ มิจฺฉาติ ปกาเสนฺโต มนุสฺโส หุตฺวาติอาทิมาห. [๗๘] ตตฺถ เหวํ มรณํ น เหหิตีติ เอวํ สนฺเต มรณํ น ภวิสฺสตีติ อตฺโถ. อิโต ปรํ ยกฺโข เปโตติ อตฺตภาวนานตฺตวเสน อนุโยคนานตฺตํ เวทิตพฺพํ. [๘๒] ขตฺติโยติอาทีนิ ชาติวเสน เจว องฺคเวกลฺลาทิวเสน จ วุตฺตานิ. @เชิงอรรถ: ^๑ วินย. ๑/๑๒/๖, ที.สี. ๙/๒๔๔/๘๒, ม.มู. ๑๒/๕๒/๓๐ @^๒ องฺ. สตฺตก. ๒๓/๖๓-๗๐/๑๐๕,๑๓๗ อตฺถโต สมานํ (สฺยา) @^๓ ฉ.ม. "ตนฺ"ติ ปทํ น ทิสฺสติ

เนื้อความอรรถกถาฉบับภาษาบาลี อักษรไทย เล่มที่ ๕๕ หน้าที่ ๑๔๖. http://84000.org/tipitaka/read/attha_page.php?book=55&page=146&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=55&A=3261&modeTY=2&pagebreak=1 http://84000.org/tipitaka/atthapali/th_line.php?B=55&A=3261&modeTY=2&pagebreak=1#p146