ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๙ ภาษาบาลี อักษรไทย ม.อ. (ปปญฺจ.๓)

หน้าที่ ๓๕.

ปติฏฺฐาย จินฺเตสิ "มยา ทิวสสฺส ทฺวตฺติกฺขตฺตุํ พุทฺธุปฏฺฐานํ คนฺตพฺพํ,
อิทญฺจ เวฬุวนํ อติวิย ทูเร, ๑- มยฺหํ อุยฺยานํ อมฺพวนํ อาสนฺนตรํ,
ยนฺนูนาหํ เอตฺถ ภควโต วิหารํ กาเรยฺยนฺ"ติ. โส ตสฺมึ อมฺพวเน
รตฺติฏฺฐานทิวาฏฺฐานเลณกุฏิมณฺฑปาทีนิ สมฺปาเทตฺวา ภควโต อนุจฺฉวิกํ คนฺธกุฏึ
กาเรตฺวา อมฺพวนํ อฏฺฐารสหตฺถุพฺเพเธน ตมฺพปตฺตวณฺเณน ปากาเรน ปริกฺขิปาเปตฺวา
พุทฺธปฺปมุขํ ภิกฺขุสํฆํ จีวรภตฺเตน สนฺตปฺเปตฺวา ทกฺขิโณทกํ ปาเตตฺวา
วิหารํ นิยฺยาเทสิ. ตํ สนฺธาย วุตฺตํ "ชีวกสฺส โกมารภจฺจสฺส อมฺพวเน"ติ.
     อารภนฺตีติ ฆาเตนฺติ. อุทฺทิสฺสกตนฺติ อุทฺทิสิตฺวา กตํ. ปฏิจฺจกมฺมนฺติ
อตฺตานํ ปฏิจฺจ กตํ. อถวา ปฏิจฺจกมฺมนฺติ นิมิตฺตกมฺมสฺเสตํ อธิวจนํ, ตํ ปฏิจฺจ
กมฺมํ เอตฺถ อตฺถีติ มํสํ "ปฏิจฺจกมฺมนฺ"ติ วุตฺตํ โหติ. โย หิ ๒- เอวรูปํ มํสํ
ปริภุญฺชติ, โสปิ ตสฺส กมฺมสฺส ทายาโท โหติ, วธกสฺส วิย ตสฺสาปิ ปาณฆาตกมฺมํ
โหตีติ เตสํ ลทฺธิ. ธมฺมสฺส จ อนุธมฺมํ พฺยากโรนฺตีติ ภควตา วุตฺตการณสฺส
อนุการณํ กเถนฺติ. เอตฺถ จ การณํ นาม ติโกฏิปริสุทฺธมจฺฉมํสปริโภโค,
อนุการณํ นาม มหาชนสฺส ตถา พฺยากรณํ. ยสฺมา ปน ภควา อุทฺทิสฺส กตํ
น ปริภุญฺชติ, ตสฺมา เนว ตํ การณํ โหติ, น ติตฺถิยานํ ตถา พฺยากรณํ
อนุการณํ. สหธมฺมิโก วาทานุวาโทติ ปเรหิ วุตฺตการเณน สการโณ หุตฺวา
ตุมฺหากํ วาโท วา อนุวาโท วา วิญฺญูหิ ครหิตพฺพการณํ โกจิ อปฺปมตฺตโกปิ
กินฺนุ โข อาคจฺฉติ. ๓- อิทํ วุตฺตํ โหติ "กึ สพฺพากาเรนปิ ตุมฺหากํ วาเท
คารยฺหการณํ นตฺถี"ติ. อพฺภาจิกฺขนฺตีติ อภิภวิตฺวา อาจิกฺขนฺติ.
     [๕๒] ฐาเนหีติ การเณหิ. ทิฏฺฐาทีสุ ทิฏฺฐํ นาม ภิกฺขูนํ อตฺถาย
มิคมจฺเฉ วธิตฺวา คยฺหมานํ ทิฏฺฐํ. สุตํ นาม ภิกฺขูนํ อตฺถาย มิคมจฺเฉ
วธิตฺวา คหิตนฺติ สุตํ. ปริสงฺกิตํ นาม ทิฏฺฐปริสงฺกิตํ สุตปริสงฺกิตํ
ตทุภยวิมุตฺตปริสงฺกิตนฺติ ติวิธํ โหติ.
     ตตฺรายํ สพฺพสงฺคาหกวินิจฺฉโย:- อิธ ภิกฺขู ปสฺสนฺติ มนุสฺเส
ชาลวาคุราทิหตฺเถ ๔- คามโต วา นิกฺขมนฺเต อรญฺเญ วา วิจรนฺเต. ทุติยทิวเส ปน ๕-
@เชิงอรรถ:  ม. อวิทูเร, ฉ. อติทูเร  ฉ.ม. อยํ สทฺโท น ทิสฺสติ  ฉ.ม. กึ น อาคจฺฉติ
@ สี. ชาลวากราทิหตฺเถ        ฉ.ม. จ



เนื้อความอรรถกถาฉบับภาษาบาลี อักษรไทย เล่มที่ ๙ หน้าที่ ๓๕. http://84000.org/tipitaka/read/attha_page.php?book=9&page=35&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=9&A=856&modeTY=2&pagebreak=1 http://84000.org/tipitaka/atthapali/th_line.php?B=9&A=856&modeTY=2&pagebreak=1#p35


จบการแสดงผล หน้าที่ ๓๕.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]