ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๙ ภาษาบาลี อักษรไทย ม.อ. (ปปญฺจ.๓)

หน้าที่ ๗.

หิตาหิตํ ชานามีติ ทสฺเสตุํ อิมํ เทสนํ อารภิ. เหฏฺฐา กนฺทรกสฺส กถาย
สทฺธึ ปโยเชตุํปิ วฏฺฏติ. เตน วุตฺตํ "ยาวญฺจิทํ โภตา โคตเมน สมฺมา ภิกฺขุสํโฆ
ปฏิปาทิโต"ติ. อถสฺส ภควา "ปุริเม ตโย ปุคฺคเล ปหาย อุปริ จตุตฺถปุคฺคลสฺส
หิตปฏิปตฺติยํเยว ปฏิปาเทมี"ติ ทสฺเสนฺโตปิ อิมํ เทสนํ อารภิ. สนฺโตติ อิทํ
สํวิชฺชมานาติ ปทสฺเสว เววจนํ. "สนฺตา โหนฺติ สมิตา วูปสนฺตา"ติ ๑- เอตฺถ
หิ นิรุทฺธา สนฺตาติ วุตฺตา. "สนฺตา เอเต วิหารา อริยสฺส วินเย วุจฺจนฺตี"ติ
เอตฺถ ๒- นิพฺพุตา. "สนฺโต หเว สพฺภิ ปเวทยนฺตี"ติ ๓- เอตฺถ ปณฺฑิตา. อิธ
ปน วิชฺชมานา อุปลพฺภมานาติ อตฺโถ.
     อตฺตนฺตปาทีสุ อตฺตานํ ตปติ ทุกฺขาเปตีติ อตฺตนฺตโป. อตฺตโน
ปริตาปนานุโยคํ อตฺตปริตาปนานุโยคํ. ปรํ ตปติ ทุกฺขาเปตีติ ปรนฺตโป. ปเรสํ
ปริตาปนานุโยคํ ปรปริตาปนานุโยคํ. ทิฏฺเฐว ธมฺเมติ อิมสฺมึเยว อตฺตภาเว.
นิจฺฉาโตติ ฉาตํ วุจฺจติ ตณฺหา, สา อสฺส นตฺถีติ นิจฺฉาโต. สพฺพกิเลสานํ
นิพฺพุตตฺตา นิพฺพุโต. อนฺโตตาปนกิเลสานํ อภาวา สีตโล ชาโตติ สีติภูโต.
ฌานมคฺคผลนิพฺพานสุขานิ ปฏิสํเวเทตีติ สุขปฏิสํเวที. พฺรหฺมภูเตน อตฺตนาติ
เสฏฺฐภูเตน อตฺตนา. จิตฺตํ อาราเธตีติ จิตฺตํ สมฺปาเทติ, ปริปูเรติ คณฺหาติ
ปสาเทตีติ อตฺโถ.
     [๕] ทุกฺขปฏิกฺกูลนฺติ ทุกฺขสฺส ปฏิกฺกูลํ, ปจฺจนีกสณฺฐิตํ, ทุกฺขํ
อปตฺถยมานนฺติ อตฺโถ.
     [๖] ปณฺฑิโตติ อิธ จตูหิ การเณหิ ปณฺฑิโตติ น วตฺตพฺโพ, สติปฏฺฐาเนสุ
ปน กมฺมํ กโรตีติ ปณฺฑิโตติ วตฺตุํ วฏฺฏติ. มหาปญฺโญติ อิทํปิ มหนฺเต อตฺเถ
ปริคฺคณฺหาตีติอาทินา มหาปญฺญาลกฺขเณน น วตฺตพฺพํ, สติปฏฺฐานปริคฺคาหิกาย
ปญฺญาย ปน สมนฺนาคตตฺตา มหาปญฺโญติ วตฺตุํ วฏฺฏติ. มหตา อตฺเถน สํยุตฺโต
อภวิสฺสาติ ๔- มหตา อตฺเถน สํยุตฺโต หุตฺวา คโต ภเวยฺย, โสตาปตฺติผลํ
ปาปุเณยฺยาติ อตฺโถ. กึ ปน เยสํ มคฺคผลานํ อุปนิสฺสโย อตฺถิ, พุทฺธานํ
@เชิงอรรถ:  อภิ. วิภงฺค. ๓๕/๕๔๖/๓๐๖ ฌานวิภงฺค          ม. มูล. ๑๒/๘๒/๕๕ สลฺเลขสุตฺต
@ ขุ. ชา. ๒๘/๓๕๒/๙๓๖ มหาสุตโสมชาตก (สฺยา)  ฉ.ม. อคมิสฺสาติ



เนื้อความอรรถกถาฉบับภาษาบาลี อักษรไทย เล่มที่ ๙ หน้าที่ ๗. http://84000.org/tipitaka/read/attha_page.php?book=9&page=7&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=9&A=158&modeTY=2&pagebreak=1 http://84000.org/tipitaka/atthapali/th_line.php?B=9&A=158&modeTY=2&pagebreak=1#p7


จบการแสดงผล หน้าที่ ๗.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]