ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๔ ภาษาบาลี อักษรไทย พระสุตตันตปิฎกเล่มที่ ๖ สุตฺต. ม. อุปริปณฺณาสกํ
                     มหาจตฺตารีสกสุตฺตํ
     [๒๕๒]   เอวมฺเม   สุตํ   เอกํ  สมยํ  ภควา  สาวตฺถิยํ  วิหรติ
เชตวเน   อนาถปิณฺฑิกสฺส   อาราเม   ฯ   ตตฺร   โข   ภควา  ภิกฺขู
อามนฺเตสิ   ภิกฺขโวติ  ฯ  ภทนฺเตติ  เต  ภิกฺขู  ภควโต  ปจฺจสฺโสสุํ  ฯ
ภควา    เอตทโวจ   อริยํ   โว   ภิกฺขเว   สมฺมาสมาธึ   เทสิสฺสามิ
สอุปนิสํ   สปริกฺขารํ   ตํ   สุณาถ   สาธุกํ  มนสิกโรถ  ภาสิสฺสามีติ  ฯ
เอวมฺภนฺเตติ โข เต ภิกฺขู ภควโต ปจฺจสฺโสสุํ ฯ
     [๒๕๓]   ภควา    เอตทโวจ   กตโม   จ   ภิกฺขเว   อริโย
สมฺมาสมาธิ     สอุปนิโส     สปริกฺขาโร     เสยฺยถีทํ     สมฺมาทิฏฺฐิ
สมฺมาสงฺกปฺโป      สมฺมาวาจา      สมฺมากมฺมนฺโต      สมฺมาอาชีโว
สมฺมาวายาโม  สมฺมาสติ  ยา  โข  ภิกฺขเว  อิเมหิ  สตฺตงฺเคหิ  จิตฺตสฺส
เอกคฺคตา  ปริกฺขตา  อยํ  วุจฺจติ  ภิกฺขเว  อริโย  สมฺมาสมาธิ สอุปนิโส
อิติปิ สปริกฺขาโร อิติปีติ ๑- ฯ
     [๒๕๔]   ตตฺร  ภิกฺขเว  สมฺมาทิฏฺฐิ  ปุพฺพงฺคมา  โหติ  ฯ  กถญฺจ
ภิกฺขเว   สมฺมาทิฏฺฐิ   ปุพฺพงฺคมา   โหติ   ฯ   มิจฺฉาทิฏฺฐึ  มิจฺฉาทิฏฺฐีติ
ปชานาติ    สมฺมาทิฏฺฐึ    สมฺมาทิฏฺฐีติ   ปชานาติ   ฯ   สาสฺส   โหติ
สมฺมาทิฏฺฐิ ฯ
     [๒๕๕]   กตมา   จ  ภิกฺขเว  มิจฺฉาทิฏฺฐิ  ฯ  นตฺถิ  ทินฺนํ  นตฺถิ
ยิฏฺฐํ    นตฺถิ    หุตํ   นตฺถิ   สุกตทุกฺกฏานํ   กมฺมานํ   ผลํ   วิปาโก
@เชิงอรรถ:  ม. ยุ. อิติปิ ฯ
นตฺถิ  อยํ  โลโก  นตฺถิ  ปโร  โลโก  นตฺถิ  มาตา  นตฺถิ  ปิตา  นตฺถิ
สตฺตา    โอปปาติกา    นตฺถิ    โลเก    สมณพฺราหฺมณา   สมฺมคฺคตา
สมฺมาปฏิปนฺนา    เย   อิมญฺจ   โลกํ   ปรญฺจ   โลกํ   สยํ   อภิญฺญา
สจฺฉิกตฺวา ปเวเทนฺตีติ อยํ ภิกฺขเว มิจฺฉาทิฏฺฐิ ฯ
     [๒๕๖]   กตมา   จ   ภิกฺขเว   สมฺมาทิฏฺฐิ   ฯ   สมฺมาทิฏฺฐึปหํ
ภิกฺขเว    ทฺวยํ    วทามิ    อตฺถิ    ภิกฺขเว    สมฺมาทิฏฺฐิ   สาสวา
ปุญฺญภาคิยา    อุปธิเวปกฺกา    อตฺถิ    ภิกฺขเว    สมฺมาทิฏฺฐิ   อริยา
อนาสวา โลกุตฺตรา มคฺคงฺคา ฯ
     [๒๕๗]   กตมา   จ   ภิกฺขเว  สมฺมาทิฏฺฐิ  สาสวา  ปุญฺญภาคิยา
อุปธิเวปกฺกา    ฯ   อตฺถิ   ทินฺนํ   อตฺถิ   ยิฏฺฐํ   อตฺถิ   หุตํ   อตฺถิ
สุกตทุกฺกฏานํ   กมฺมานํ   ผลํ   วิปาโก  อตฺถิ  อยํ  โลโก  อตฺถิ  ปโร
โลโก   อตฺถิ   มาตา   อตฺถิ   ปิตา  อตฺถิ  สตฺตา  โอปปาติกา  อตฺถิ
โลเก    สมณพฺราหฺมณา    สมฺมคฺคตา    สมฺมาปฏิปนฺนา   เย   อิมญฺจ
โลกํ   ปรญฺจ   โลกํ   สยํ   อภิญฺญา   สจฺฉิกตฺวา   ปเวเทนฺตีติ   อยํ
ภิกฺขเว สมฺมาทิฏฺฐิ สาสวา ปุญฺญภาคิยา อุปธิเวปกฺกา ฯ
     [๒๕๘]   กตมา  จ  ภิกฺขเว  สมฺมาทิฏฺฐิ อริยา อนาสวา โลกุตฺตรา
มคฺคงฺคา    ฯ    ยา    โข   ภิกฺขเว   อริยจิตฺตสฺส   อนาสวจิตฺตสฺส
อริยมคฺคสมงฺคิโน     อริยมคฺคํ     ภาวยโต     ปญฺญา     ปญฺญินฺทฺริยํ
ปญฺญาผลํ   ธมฺมวิจยสมฺโพชฺฌงฺโค   สมฺมาทิฏฺฐิ   มคฺคงฺคํ   อยํ   ภิกฺขเว
สมฺมาทิฏฺฐิ  อริยา  อนาสวา  โลกุตฺตรา มคฺคงฺคา ฯ โส ๑- มิจฺฉาทิฏฺฐิยา
@เชิงอรรถ:  ยุ. โย ฯ
ปหานาย   วายมติ   สมฺมาทิฏฺฐิยา   อุปสมฺปทาย   ฯ   สฺวาสฺส   โหติ
สมฺมาวายาโม   ฯ   โส   สโต   มิจฺฉาทิฏฺฐึ  ปชหติ  สโต  สมฺมาทิฏฺฐึ
อุปสมฺปชฺช   วิหรติ   ฯ   สาสฺส   โหติ  สมฺมาสติ  ฯ  อิติสฺสิเม  ตโย
ธมฺมา     สมฺมาทิฏฺฐึ     อนุปริธาวนฺติ     อนุปริวตฺตนฺติ     เสยฺยถีทํ
สมฺมาทิฏฺฐิ สมฺมาวายาโม สมฺมาสติ ฯ
     [๒๕๙]   ตตฺร  ภิกฺขเว  สมฺมาทิฏฺฐิ  ปุพฺพงฺคมา  โหติ  ฯ  กถญฺจ
ภิกฺขเว     สมฺมาทิฏฺฐิ     ปุพฺพงฺคมา     โหติ    ฯ    มิจฺฉาสงฺกปฺปํ
มิจฺฉาสงฺกปฺโปติ      ปชานาติ      สมฺมาสงฺกปฺปํ      สมฺมาสงฺกปฺโปติ
ปชานาติ ฯ สาสฺส โหติ สมฺมาทิฏฺฐิ ฯ
     [๒๖๐]   กตโม   จ   ภิกฺขเว  มิจฺฉาสงฺกปฺโป  ฯ  กามสงฺกปฺโป
พฺยาปาทสงฺกปฺโป วิหึสาสงฺกปฺโป อยํ ภิกฺขเว มิจฺฉาสงฺกปฺโป ฯ
     [๒๖๑]   กตโม  จ  ภิกฺขเว  สมฺมาสงฺกปฺโป  ฯ  สมฺมาสงฺกปฺปํปหํ
ภิกฺขเว    ทฺวยํ    วทามิ   อตฺถิ   ภิกฺขเว   สมฺมาสงฺกปฺโป   สาสโว
ปุญฺญภาคิโย     อุปธิเวปกฺโก     อตฺถิ     ภิกฺขเว     สมฺมาสงฺกปฺโป
อริโย อนาสโว โลกุตฺตโร มคฺคงฺโค ฯ
     [๒๖๒]   กตโม  จ  ภิกฺขเว  สมฺมาสงฺกปฺโป  สาสโว  ปุญฺญภาคิโย
อุปธิเวปกฺโก       ฯ       เนกฺขมฺมสงฺกปฺโป      อพฺยาปาทสงฺกปฺโป
อวิหึสาสงฺกปฺโป      อยํ      ภิกฺขเว     สมฺมาสงฺกปฺโป     สาสโว
ปุญฺญภาคิโย อุปธิเวปกฺโก ฯ
     [๒๖๓]   กตโม   จ   ภิกฺขเว  สมฺมาสงฺกปฺโป  อริโย  อนาสโว
โลกุตฺตโร  มคฺคงฺโค  ฯ  โย  โข  ภิกฺขเว  อริยจิตฺตสฺส  อนาสวจิตฺตสฺส
อริยมคฺคสมงฺคิโน      อริยมคฺคํ      ภาวยโต     ตกฺโก     วิตกฺโก
สงฺกปฺโป   อปฺปนา   พฺยปฺปนา   เจตโส  อภินิโรปนา  วจีสงฺขาโร  ๑-
อยํ  ภิกฺขเว  สมฺมาสงฺกปฺโป  อริโย  อนาสโว  โลกุตฺตโร  มคฺคงฺโค  ฯ
โส     มิจฺฉาสงฺกปฺปสฺส     ปหานาย     วายมติ     สมฺมาสงฺกปฺปสฺส
อุปสมฺปทาย    ฯ   สฺวาสฺส   โหติ   สมฺมาวายาโม   ฯ   โส   สโต
มิจฺฉาสงฺกปฺปํ   ปชหติ   สโต   สมฺมาสงฺกปฺปํ   อุปสมฺปชฺช   วิหรติ   ฯ
สาสฺส   โหติ  สมฺมาสติ  ฯ  อิติสฺสิเม  ๒-  ตโย  ธมฺมา  สมฺมาสงฺกปฺปํ
อนุปริธาวนฺติ    อนุปริวตฺตนฺติ    เสยฺยถีทํ   สมฺมาทิฏฺฐิ   สมฺมาวายาโม
สมฺมาสติ ฯ
     [๒๖๔]   ตตฺร  ภิกฺขเว  สมฺมาทิฏฺฐิ  ปุพฺพงฺคมา  โหติ  ฯ  กถญฺจ
ภิกฺขเว   สมฺมาทิฏฺฐิ   ปุพฺพงฺคมา   โหติ   ฯ  มิจฺฉาวาจํ  มิจฺฉาวาจาติ
ปชานาติ    สมฺมาวาจํ   สมฺมาวาจาติ   ปชานาติ   ฯ   สาสฺส   โหติ
สมฺมาทิฏฺฐิ ฯ
     [๒๖๕]   กตมา  จ  ภิกฺขเว  มิจฺฉาวาจา  ฯ  มุสาวาโท  ปิสุณา
วาจา ผรุสา วาจา สมฺผปฺปลาโป อยํ ภิกฺขเว มิจฺฉาวาจา ฯ
     [๒๖๖]   กตมา  จ  ภิกฺขเว  สมฺมาวาจา  ฯ สมฺมาวาจํปหํ ภิกฺขเว
ทฺวยํ    วทามิ   อตฺถิ   ภิกฺขเว   สมฺมาวาจา   สาสวา   ปุญฺญภาคิยา
อุปธิเวปกฺกา   อตฺถิ  ภิกฺขเว  สมฺมาวาจา  อริยา  อนาสวา  โลกุตฺตรา
มคฺคงฺคา ฯ
@เชิงอรรถ:  ยุ. วาจาสงฺขาโร ฯ   ม. อิติยิเม ฯ
     [๒๖๗]   กตมา   จ  ภิกฺขเว  สมฺมาวาจา  สาสวา  ปุญฺญภาคิยา
อุปธิเวปกฺกา   ฯ   มุสาวาทา   เวรมณี   ปิสุณาย   วาจาย   เวรมณี
ผรุสาย    วาจาย   เวรมณี   สมฺผปฺปลาปา   เวรมณี   อยํ   ภิกฺขเว
สมฺมาวาจา สาสวา ปุญฺญภาคิยา อุปธิเวปกฺกา ฯ
     [๒๖๘]   กตมา  จ  ภิกฺขเว สมฺมาวาจา อริยา อนาสวา โลกุตฺตรา
มคฺคงฺคา    ฯ    ยา    โข   ภิกฺขเว   อริยจิตฺตสฺส   อนาสวจิตฺตสฺส
อริยมคฺคสมงฺคิโน  อริยมคฺคํ  ภาวยโต  จตูหิปิ  วจีทุจฺจริเตหิ  อารติ วิรติ
ปฏิวิรติ  เวรมณี  อยํ  ภิกฺขเว  สมฺมาวาจา  อริยา  อนาสวา โลกุตฺตรา
มคฺคงฺคา   ฯ   โส   มิจฺฉาวาจาย   ปหานาย   วายมติ  สมฺมาวาจาย
อุปสมฺปทาย  ฯ  สฺวาสฺส  โหติ  สมฺมาวายาโม  ฯ  โส  สโต มิจฺฉาวาจํ
ปชหติ    สโต   สมฺมาวาจํ   อุปสมฺปชฺช   วิหรติ   ฯ   สาสฺส   โหติ
สมฺมาสติ    ฯ   อิติสฺสิเม   ตโย   ธมฺมา   สมฺมาวาจํ   อนุปริธาวนฺติ
อนุปริวตฺตนฺติ เสยฺยถีทํ สมฺมาทิฏฺฐิ สมฺมาวายาโม สมฺมาสติ ฯ
     [๒๖๙]   ตตฺร  ภิกฺขเว  สมฺมาทิฏฺฐิ  ปุพฺพงฺคมา  โหติ  ฯ  กถญฺจ
ภิกฺขเว     สมฺมาทิฏฺฐิ     ปุพฺพงฺคมา     โหติ    ฯ    มิจฺฉากมฺมนฺตํ
มิจฺฉากมฺมนฺโตติ      ปชานาติ      สมฺมากมฺมนฺตํ      สมฺมากมฺมนฺโตติ
ปชานาติ ฯ สาสฺส โหติ สมฺมาทิฏฺฐิ ฯ
     [๒๗๐]   กตโม   จ   ภิกฺขเว  มิจฺฉากมฺมนฺโต  ฯ  ปาณาติปาโต
อทินฺนาทานํ กาเมสุมิจฺฉาจาโร อยํ ภิกฺขเว มิจฺฉากมฺมนฺโต ฯ
     [๒๗๑]   กตโม  จ  ภิกฺขเว  สมฺมากมฺมนฺโต  ฯ  สมฺมากมฺมนฺตํปหํ
ภิกฺขเว    ทฺวยํ    วทามิ   อตฺถิ   ภิกฺขเว   สมฺมากมฺมนฺโต   สาสโว
ปุญฺญภาคิโย    อุปธิเวปกฺโก   อตฺถิ   ภิกฺขเว   สมฺมากมฺมนฺโต   อริโย
อนาสโว โลกุตฺตโร มคฺคงฺโค ฯ
     [๒๗๒]   กตโม    จ    ภิกฺขเว    สมฺมากมฺมนฺโต    สาสโว
ปุญฺญภาคิโย   อุปธิเวปกฺโก   ฯ   อตฺถิ  ภิกฺขเว  ปาณาติปาตา  เวรมณี
อทินฺนาทานา    เวรมณี   กาเมสุมิจฺฉาจารา   เวรมณี   อยํ   ภิกฺขเว
สมฺมากมฺมนฺโต สาสโว ปุญฺญภาคิโย อุปธิเวปกฺโก ฯ
     [๒๗๓]   กตโม   จ   ภิกฺขเว  สมฺมากมฺมนฺโต  อริโย  อนาสโว
โลกุตฺตโร  มคฺคงฺโค  ฯ  ยา  โข  ภิกฺขเว  อริยจิตฺตสฺส  อนาสวจิตฺตสฺส
อริยมคฺคสมงฺคิโน     อริยมคฺคํ     ภาวยโต    ตีหิปิ    กายทุจฺจริเตหิ
อารติ   วิรติ   ปฏิวิรติ   เวรมณี  อยํ  ภิกฺขเว  สมฺมากมฺมนฺโต  อริโย
อนาสโว   โลกุตฺตโร   มคฺคงฺโค   ฯ   โส  มิจฺฉากมฺมนฺตสฺส  ปหานาย
วายมติ     สมฺมากมฺมนฺตสฺส     อุปสมฺปทาย    ฯ    สฺวาสฺส    โหติ
สมฺมาวายาโม    ฯ    โส    สโต    มิจฺฉากมฺมนฺตํ    ปชหติ   สโต
สมฺมากมฺมนฺตํ   อุปสมฺปชฺช   วิหรติ   ฯ   สาสฺส   โหติ   สมฺมาสติ  ฯ
อิติสฺสิเม   ตโย   ธมฺมา   สมฺมากมฺมนฺตํ   อนุปริธาวนฺติ   อนุปริวตฺตนฺติ
เสยฺยถีทํ สมฺมาทิฏฺฐิ สมฺมาวายาโม สมฺมาสติ ฯ
     [๒๗๔]   ตตฺร  ภิกฺขเว  สมฺมาทิฏฺฐิ  ปุพฺพงฺคมา  โหติ  ฯ  กถญฺจ
ภิกฺขเว     สมฺมาทิฏฺฐิ     ปุพฺพงฺคมา     โหติ     ฯ    มิจฺฉาอาชีวํ
มิจฺฉาอาชีโวติ   ปชานาติ   สมฺมาอาชีวํ   สมฺมาอาชีโวติ   ปชานาติ  ฯ
สาสฺส โหติ สมฺมาทิฏฺฐิ ฯ
     [๒๗๕]   กตโม   จ   ภิกฺขเว  มิจฺฉาอาชีโว  ฯ  กุหนา  ลปนา
เนมิตฺตกตา   นิปฺเปสิกตา   ลาเภน   ลาภํ   นิชิคึสนตา   อยํ  ภิกฺขเว
มิจฺฉาอาชีโว ฯ
     [๒๗๖]   กตโม   จ   ภิกฺขเว  สมฺมาอาชีโว  ฯ  สมฺมาอาชีวํปหํ
ภิกฺขเว   ทฺวยํ   วทามิ   อตฺถิ   ภิกฺขเว   สมฺมาอาชีโว   ปุญฺญภาคิโย
อุปธิเวปกฺโก  อตฺถิ  ภิกฺขเว  สมฺมาอาชีโว  อริโย  อนาสโว  โลกุตฺตโร
มคฺคงฺโค ฯ
     [๒๗๗]   กตโม  จ  ภิกฺขเว  สมฺมาอาชีโว  สาสโว  ปุญฺญภาคิโย
อุปธิเวปกฺโก   ฯ   อิธ   ภิกฺขเว   อริยสาวโก   มิจฺฉาอาชีวํ   ปหาย
สมฺมาอาชีเวน   ชีวิกํ   กปฺเปติ   อยํ   ภิกฺขเว  สมฺมาอาชีโว  สาสโว
ปุญฺญภาคิโย อุปธิเวปกฺโก ฯ
     [๒๗๘]   กตโม  จ ภิกฺขเว สมฺมาอาชีโว อริโย อนาสโว โลกุตฺตโร
มคฺคงฺโค    ฯ    ยา    โข   ภิกฺขเว   อริยจิตฺตสฺส   อนาสวจิตฺตสฺส
อริยมคฺคสมงฺคิโน   อริยมคฺคํ   ภาวยโต   มิจฺฉาอาชีวา   อารติ   วิรติ
ปฏิวิรติ  เวรมณี  อยํ  ภิกฺขเว  สมฺมาอาชีโว  อริโย อนาสโว โลกุตฺตโร
มคฺคงฺโค   ฯ   โส   มิจฺฉาอาชีวสฺส  ปหานาย  วายมติ  สมฺมาอาชีวสฺส
อุปสมฺปทาย    ฯ   สฺวาสฺส   โหติ   สมฺมาวายาโม   ฯ   โส   สโต
มิจฺฉาอาชีวํ   ปชหติ   สโต  สมฺมาอาชีวํ  อุปสมฺปชฺช  วิหรติ  ฯ  สาสฺส
โหติ    สมฺมาสติ    ฯ    อิติสฺสิเม    ตโย    ธมฺมา    สมฺมาอาชีวํ
อนุปริธาวนฺติ    อนุปริวตฺตนฺติ    เสยฺยถีทํ   สมฺมาทิฏฺฐิ   สมฺมาวายาโม
สมฺมาสติ ฯ
     [๒๗๙]   ตตฺร  ภิกฺขเว  สมฺมาทิฏฺฐิ  ปุพฺพงฺคมา  โหติ  ฯ  กถญฺจ
ภิกฺขเว   สมฺมาทิฏฺฐิ   ปุพฺพงฺคมา   โหติ   ฯ   สมฺมาทิฏฺฐิสฺส   ภิกฺขเว
สมฺมาสงฺกปฺโป     ปโหติ     สมฺมาสงฺกปฺปสฺส    สมฺมาวาจา    ปโหติ
สมฺมาวาจสฺส       สมฺมากมฺมนฺโต       ปโหติ       สมฺมากมฺมนฺตสฺส
สมฺมาอาชีโว     ปโหติ     สมฺมาอาชีวสฺส    สมฺมาวายาโม    ปโหติ
สมฺมาวายามสฺส   สมฺมาสติ   ปโหติ   สมฺมาสติสฺส   สมฺมาสมาธิ  ปโหติ
สมฺมาสมาธิสฺส     สมฺมาญาณํ    ปโหติ    สมฺมาญาณสฺส    สมฺมาวิมุตฺติ
ปโหติ   ฯ   อิติ   โข   ภิกฺขเว   อฏฺฐงฺคสมนฺนาคโต   เสโข  [๑]-
ทสหงฺคสมนฺนาคโต อรหา โหติ ฯ [๒]-
     [๒๘๐]   ตตฺร  ภิกฺขเว  สมฺมาทิฏฺฐิ  ปุพฺพงฺคมา  โหติ  ฯ  กถญฺจ
ภิกฺขเว   สมฺมาทิฏฺฐิ   ปุพฺพงฺคมา   โหติ   ฯ   สมฺมาทิฏฺฐิสฺส   ภิกฺขเว
มิจฺฉาทิฏฺฐิ   นิชฺชิณฺณา   โหติ   ฯ   เย  จ  มิจฺฉาทิฏฺฐิปจฺจยา  อเนเก
ปาปกา   อกุสลา   ธมฺมา   สมฺภวนฺติ   เต   จสฺส   นิชฺชิณฺณา  โหนฺติ
สมฺมาทิฏฺฐิปจฺจยา  จ  อเนเก  กุสลา  ธมฺมา  ภาวนาปาริปูรึ  คจฺฉนฺติ ฯ
สมฺมาสงฺกปฺปสฺส    ภิกฺขเว   มิจฺฉาสงฺกปฺโป   นิชฺชิณฺโณ   โหติ   ฯเปฯ
สมฺมาวาจสฺส  ภิกฺขเว  มิจฺฉาวาจา  นิชฺชิณฺณา  โหติ ... สมฺมากมฺมนฺตสฺส
ภิกฺขเว    มิจฺฉากมฺมนฺโต    นิชฺชิณฺโณ    โหติ   ...   สมฺมาอาชีวสฺส
ภิกฺขเว    มิจฺฉาอาชีโว    นิชฺชิณฺโณ    โหติ   ...   สมฺมาวายามสฺส
@เชิงอรรถ:  ยุ. ปฏิปโท ฯ   โป. ม. ตตฺรปิ สมฺมาญาเณน อเนเก ปาปกา อกุสลา ธมฺมา
@วิคตา ภาวนาปาริปูรึ คจฺฉนฺติ ฯ
ภิกฺขเว   มิจฺฉาวายาโม   นิชฺชิณฺโณ   โหติ  ...  สมฺมาสติสฺส  ภิกฺขเว
มิจฺฉาสติ   นิชฺชิณฺณา   โหติ  ...  สมฺมาสมาธิสฺส  ภิกฺขเว  มิจฺฉาสมาธิ
นิชฺชิณฺโณ   โหติ   ...   สมฺมาญาณสฺส   ภิกฺขเว   มิจฺฉาญาณํ  นิชฺชิณฺณํ
โหติ   ...   สมฺมาวิมุตฺตสฺส  ภิกฺขเว  มิจฺฉาวิมุตฺติ  นิชฺชิณฺณา  โหติ  ฯ
เย  จ  มิจฺฉาวิมุตฺติปจฺจยา  อเนเก  ปาปกา  อกุสลา  ธมฺมา  สมฺภวนฺติ
เต    จสฺส    นิชฺชิณฺณา    โหนฺติ   สมฺมาวิมุตฺติปจฺจยา   จ   อเนเก
กุสลา   ธมฺมา   ภาวนาปาริปูรึ   คจฺฉนฺติ  ฯ  อิติ  โข  ภิกฺขเว  วีสติ
กุสลปกฺขา    วีสติ   อกุสลปกฺขา   ฯ   มหาจตฺตารีสโก   ธมฺมปริยาโย
ปวตฺติโต   อปฺปฏิวตฺติโย   สมเณน  วา  พฺราหฺมเณน  วา  เทเวน  วา
มาเรน วา พฺรหฺมุนา วา เกนจิ วา โลกสฺมินฺติ ฯ
     [๒๘๑]   โย  หิ  โกจิ  ภิกฺขเว  สมโณ  วา  พฺราหฺมโณ  วา อิมํ
มหาจตฺตารีสกํ    ธมฺมปริยายํ    ครหิตพฺพํ    ปฏิกฺโกสิตพฺพํ    มญฺเญยฺย
ตสฺส   ทิฏฺเฐว   ธมฺเม   ทส   สหธมฺมิกา  วาทานุวาทา  คารยฺหฏฺฐานํ
อาคจฺฉนฺติ   ฯ   สมฺมาทิฏฺฐิญฺเจ   ภวํ   ครหติ   เย   จ   มิจฺฉาทิฏฺฐี
สมณพฺราหฺมณา    เต    โภโต   ปุชฺชา   เต   โภโต   ปาสํสา   ฯ
สมฺมาสงฺกปฺปญฺเจ   ภวํ   ครหติ  เย  จ  มิจฺฉาสงฺกปฺปา  สมณพฺราหฺมณา
เต   โภโต   ปุชฺชา   เต   โภโต   ปาสํสา  ฯ  สมฺมาวาจญฺเจ  ภวํ
ครหติ  ...  สมฺมากมฺมนฺตญฺเจ  ภวํ  ครหติ  ...  สมฺมาอาชีวญฺเจ  ภวํ
ครหติ   ...   สมฺมาวายามญฺเจ  ภวํ  ครหติ  ...  สมฺมาสติญฺเจ  ภวํ
ครหติ   ...   สมฺมาสมาธิญฺเจ  ภวํ  ครหติ  ...  สมฺมาญาณญฺเจ  ภวํ
ครหติ   ...   สมฺมาวิมุตฺติญฺเจ   ภวํ  ครหติ  เย  [๑]-  มิจฺฉาวิมุตฺตี
สมณพฺราหฺมณา  เต  โภโต  ปุชฺชา  เต  โภโต  ปาสํสา  ฯ เยเกจิ ๒-
ภิกฺขเว    สมณา    วา    พฺราหฺมณา    วา    อิมํ   มหาจตฺตารีสกํ
ธมฺมปริยายํ   ครหิตพฺพํ   ปฏิกฺโกสิตพฺพํ  มญฺเญยฺยุํ  ตสฺส  ทิฏฺเฐว  ธมฺเม
อิเม   ทส   สหธมฺมิกา   วาทานุวาทา   คารยฺหฏฺฐานํ   อาคจฺฉนฺติ  ฯ
เยปิ   เต  ภิกฺขเว  อเหสุํ  อุกฺกลา  ๓-  วสฺสภญฺญา  ๔-  อเหตุวาทา
อกิริยวาทา    นตฺถิกวาทา    เตปิ   มหาจตฺตารีสกํ   ธมฺมปริยายํ   น
ครหิตพฺพํ     น     ปฏิกฺโกสิตพฺพํ    มญฺเญยฺยุํ    ตํ    กิสฺส    เหตุ
นินฺทาพฺยาโรสอุปารมฺภภยาติ ฯ
     อิทมโวจ    ภควา    อตฺตมนา   เต   ภิกฺขู   ภควโต   ภาสิตํ
อภินนฺทุนฺติ ฯ
               มหาจตฺตารีสกสุตฺตํ นิฏฺฐิตํ สตฺตมํ ฯ
                       --------
@เชิงอรรถ:  ยุ. เอตฺถนฺตเร จสทฺโท อตฺถิ ฯ   ยุ. โย หิ โกจิ ฯ โป. ม. โย
@โกจิ ฯ  ม. ยุ. โอกฺกลา ฯ    ม. วยภิญฺญา ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๑๔ หน้าที่ ๑๘๐-๑๘๙. http://84000.org/tipitaka/pitaka_item/pali_item_s.php?book=14&item=252&items=30&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=14&item=252&items=30&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=14&item=252&items=30&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=14&item=252&items=30&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=14&i=252              The Pali Atthakatha in Thai :- http://84000.org/tipitaka/atthapali/read_th.php?B=10&A=2368              The Pali Atthakatha in Roman :- http://84000.org/tipitaka/atthapali/read_rm.php?B=10&A=2368              สารบัญพระไตรปิฎกเล่มที่ ๑๔ http://84000.org/tipitaka/read/?index_14

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :