พระไตรปิฎกเล่มที่ ๒๐ ภาษาบาลี อักษรไทย
พระสุตตันตปิฎกเล่มที่ ๑๒ สุตฺต. องฺ. (๑): เอก-ทุก-ติกนิปาตา

     [๕๓๙]   ๑๐๐   นโวปิ   ภิกฺขเว  โปตฺถโก  ทุพฺพณฺโณ  จ  โหติ
ทุกฺขสมฺผสฺโส    จ    อปฺปคฺโฆ    จ   มชฺฌิโมปิ   ภิกฺขเว   โปตฺถโก
ทุพฺพณฺโณ    จ    โหติ   ทุกฺขสมฺผสฺโส   จ   อปฺปคฺโฆ   จ   ชิณฺโณปิ
ภิกฺขเว   โปตฺถโก   ทุพฺพณฺโณ   จ   โหติ  ทุกฺขสมฺผสฺโส  จ  อปฺปคฺโฆ
จ   ฯ   ชิณฺณมฺปิ   ภิกฺขเว   โปตฺถกํ   อุกฺขลิปริมทฺทนํ   วา   กโรนฺติ
สงฺการกูเฏ  วา  นํ  ฉฑฺเฑนฺติ  ฯ  เอวเมว  โข  ภิกฺขเว  นโว  เจปิ
ภิกฺขุ    โหติ    ทุสฺสีโล   ปาปธมฺโม   อิทมสฺส   ทุพฺพณฺณตาย   วทามิ
เสยฺยถาปิ   โส   ภิกฺขเว   โปตฺถโก   ทุพฺพณฺโณ   ตถูปมาหํ   ภิกฺขเว
อิมํ   ปุคฺคลํ  วทามิ  ฯ  เย  โข  ปนสฺส  เสวนฺติ  ภชนฺติ  ปยิรุปาสนฺติ
ทิฏฺฐานุคตึ   อาปชฺชนฺติ   เตสนฺตํ   โหติ   ทีฆรตฺตํ   อหิตาย   ทุกฺขาย
อิทมสฺส   ทุกฺขสมฺผสฺสตาย   วทามิ   เสยฺยถาปิ  โส  ภิกฺขเว  โปตฺถโก
ทุกฺขสมฺผสฺโส   ตถูปมาหํ   ภิกฺขเว   อิมํ  ปุคฺคลํ  วทามิ  ฯ  เยสํ  โข
ปน   [๑]-  ปฏิคฺคณฺหาติ  จีวรปิณฺฑปาตเสนาสนคิลานปจฺจยเภสชฺชปริกฺขารํ
เตสนฺตํ   น   มหปฺผลํ   โหติ   น   มหานิสํสํ   อิทมสฺส   อปฺปคฺฆตาย
วทามิ    เสยฺยถาปิ   โส   ภิกฺขเว   โปตฺถโก   อปฺปคฺโฆ   ตถูปมาหํ
ภิกฺขเว อิมํ ปุคฺคลํ วทามิ ฯ
     {๕๓๙.๑}   มชฺฌิโม  เจปิ  ภิกฺขเว  ภิกฺขุ  โหติ ฯเปฯ เถโร เจปิ
ภิกฺขเว    ภิกฺขุ   โหติ   ทุสฺสีโล   ปาปธมฺโม   อิทมสฺส   ทุพฺพณฺณตาย
วทามิ    เสยฺยถาปิ   โส   ภิกฺขเว   โปตฺถโก   ทุพฺพณฺโณ   ตถูปมาหํ
ภิกฺขเว  อิมํ  ปุคฺคลํ  วทามิ  ฯ เย โข ปนสฺส เสวนฺติ ภชนฺติ ปยิรุปาสนฺติ
ทิฏฺฐานุคตึ   อาปชฺชนฺติ   เตสนฺตํ   โหติ   ทีฆรตฺตํ   อหิตาย   ทุกฺขาย
อิทมสฺส     ทุกฺขสมฺผสฺสตาย    วทามิ    เสยฺยถาปิ    โส    ภิกฺขเว
โปตฺถโก   ทุกฺขสมฺผสฺโส   ตถูปมาหํ   ภิกฺขเว   อิมํ  ปุคฺคลํ  วทามิ  ฯ
เยสํ    โข   ปน   [๒]-   ปฏิคฺคณฺหาติ   จีวรปิณฺฑปาตเสนาสนคิลาน-
ปจฺจยเภสชฺชปริกฺขารํ   เตสนฺตํ   น   มหปฺผลํ   โหติ   น   มหานิสํสํ
อิทมสฺส   อปฺปคฺฆตาย   วทามิ   เสยฺยถาปิ   โส   ภิกฺขเว   โปตฺถโก
@เชิงอรรถ: ๑-๒ ม. โส ฯ
อปฺปคฺโฆ   ตถูปมาหํ   ภิกฺขเว  อิมํ  ปุคฺคลํ  วทามิ  ฯ  เอวรูโป  จายํ
ภิกฺขเว   เถโร   ภิกฺขุ  สงฺฆมชฺเฌ  ภณติ  ฯ  ตเมนํ  ภิกฺขู  เอวมาหํสุ
กึ   โข   ๑-  ตุยฺหํ  พาลสฺส  อพฺยตฺตสฺส  ภณิเตน  ตฺวํ  นาม  ภณิตพฺพํ
มญฺญสีติ  ฯ  โส  กุปิโต  อนตฺตมโน  ตถารูปึ  วาจํ นิจฺฉาเรติ ยถารูปาย
วาจาย   สงฺโฆ  [๒]-  อุกฺขิปติ  สงฺการกูเฏว  นํ  โปตฺถกํ  ฯ  นวมฺปิ
ภิกฺขเว     กาสิกํ    วตฺถํ    วณฺณวนฺตญฺเจว    โหติ    สุขสมฺผสฺสญฺจ
มหคฺฆญฺจ   มชฺฌิมมฺปิ   ภิกฺขเว   กาสิกํ   วตฺถํ   วณฺณวนฺตญฺเจว   โหติ
สุขสมฺผสฺสญฺจ     มหคฺฆญฺจ     ชิณฺณมฺปิ     ภิกฺขเว    กาสิกํ    วตฺถํ
วณฺณวนฺตญฺเจว   โหติ   สุขสมฺผสฺสญฺจ   มหคฺฆญฺจ   ฯ  ชิณฺณมฺปิ  ภิกฺขเว
กาสิกํ   วตฺถํ   รตนปลิเวฐนํ   วา   กโรนฺติ   คนฺธกรณฺฑเก   วา  นํ
นิกฺขิปนฺติ ๓- ฯ
     {๕๓๙.๒}   เอวเมว  โข  ภิกฺขเว  นโว  เจปิ  ภิกฺขุ โหติ สีลวา
กลฺยาณธมฺโม   อิทมสฺส   สุวณฺณตาย   วทามิ   เสยฺยถาปิ   ตํ  ภิกฺขเว
กาสิกํ   วตฺถํ   วณฺณวนฺตํ   ตถูปมาหํ   ภิกฺขเว  อิมํ  ปุคฺคลํ  วทามิ  ฯ
เย   โข   ปนสฺส  เสวนฺติ  ภชนฺติ  ปยิรุปาสนฺติ  ทิฏฺฐานุคตึ  อาปชฺชนฺติ
เตสนฺตํ    โหติ   ทีฆรตฺตํ   หิตาย   สุขาย   อิทมสฺส   สุขสมฺผสฺสตาย
วทามิ   เสยฺยถาปิ   ตํ   ภิกฺขเว   กาสิกํ  วตฺถํ  สุขสมฺผสฺสํ  ตถูปมาหํ
ภิกฺขเว   อิมํ   ปุคฺคลํ  วทามิ  ฯ  เยสํ  โข  ปน  [๔]-  ปฏิคฺคณฺหาติ
จีวรปิณฺฑปาตเสนาสนคิลานปจฺจยเภสชฺชปริกฺขารํ เตสนฺตํ
มหปฺผลํ   โหติ   มหานิสํสํ   อิทมสฺส   มหคฺฆตาย   วทามิ   เสยฺยถาปิ
ตํ ภิกฺขเว กาสิกํ วตฺถํ มหคฺฆํ ตถูปมาหํ ภิกฺขเว อิมํ ปุคฺคลํ วทามิ ฯ
@เชิงอรรถ: ๑ ม. ทึ นุ โข ฯ  ๒ ม. ยุ. ตํ ฯ  ๓ ม. ปกฺขิปนฺติ ฯ  ๔ ม. โส ฯ
     {๕๓๙.๓}   มชฺฌิโม  เจปิ  ภิกฺขเว  ภิกฺขุ  โหติ ฯเปฯ เถโร เจปิ
ภิกฺขเว   ภิกฺขุ  โหติ  สีลวา  กลฺยาณธมฺโม  อิทมสฺส  สุวณฺณตาย  วทามิ
เสยฺยถาปิ  ตํ  ภิกฺขเว  กาสิกํ  วตฺถํ  วณฺณวนฺตํ  ตถูปมาหํ  ภิกฺขเว  อิมํ
ปุคฺคลํ  วทามิ  ฯ  เย  โข  ปนสฺส เสวนฺติ ภชนฺติ ปยิรุปาสนฺติ ทิฏฺฐานุคตึ
อาปชฺชนฺติ    เตสนฺตํ    โหติ    ทีฆรตฺตํ    หิตาย   สุขาย   อิทมสฺส
สุขสมฺผสฺสตาย  วทามิ   เสยฺยถาปิ  ตํ  ภิกฺขเว  กาสิกํ  วตฺถํ สุขสมฺผสฺสํ
ตถูปมาหํ  ภิกฺขเว  อิมํ  ปุคฺคลํ  วทามิ  ฯ  เยสํ  โข  ปน  ปฏิคฺคณฺหาติ
จีวรปิณฺฑปาตเสนาสนคิลานปจฺจยเภสชฺชปริกฺขารํ      เตสนฺตํ     มหปฺผลํ
โหติ   มหานิสํสํ   อิทมสฺส   มหคฺฆตาย  วทามิ  เสยฺยถาปิ  ตํ  ภิกฺขเว
กาสิกํ   วตฺถํ   มหคฺฆํ   ตถูปมาหํ   ภิกฺขเว   อิมํ   ปุคฺคลํ  วทามิ  ฯ
เอวรูโป  จายํ  ภิกฺขเว  เถโร  ภิกฺขุ  สงฺฆมชฺเฌ  ภณติ  ฯ ตเมนํ ภิกฺขู
เอวมาหํสุ   อปฺปสทฺทา   อายสฺมนฺโต   โหถ   เถโร   ภิกฺขุ   ธมฺมญฺจ
วินยญฺจ   ภณตีติ   ตสฺมา  ติห  ภิกฺขเว  เอวํ  สิกฺขิตพฺพํ  กาสิกวตฺถูปมา
ภวิสฺสาม น โปตฺถกูปมาติ เอวญฺหิ โว ภิกฺขเว สิกฺขิตพฺพนฺติ ฯ
     [๕๔๐]   ๑๐๑  โย โข ๑- ภิกฺขเว เอวํ วเทยฺย ยถา ยถายํ ปุริโส
กมฺมํ   กโรติ  ตถา  ตถา  ตํ  ปฏิสํเวทิยตีติ  ๒-  เอวํ  สนฺตํ  ภิกฺขเว
พฺรหฺมจริยวาโส   น   โหติ   โอกาโส   น  ปญฺญายติ  สมฺมา  ทุกฺขสฺส
อนฺตกิริยาย  ฯ  โย  จ  โข  ภิกฺขเว  เอวํ  วเทยฺย ยถา ยถา เวทนิยํ
อยํ   ปุริโส   กมฺมํ  กโรติ  ตถา  ตถาสฺส  วิปากํ  ปฏิสํเวทิยตีติ  เอวํ
สนฺตํ   ภิกฺขเว   พฺรหฺมจริยวาโส   โหติ   โอกาโส   ปญฺญายติ  สมฺมา
@เชิงอรรถ: ๑ ม. ยุ. โขสทฺโท นตฺถิ ฯ  ๒ ม. ปฏิสํเวเทตีติ ฯ อิโต ปรํ อีทิสเมว ฯ
ทุกฺขสฺส    อนฺตกิริยาย    ฯ    อิธ   ภิกฺขเว   เอกจฺจสฺส   ปุคฺคลสฺส
อปฺปมตฺตกมฺปิ   ปาปกมฺมํ   กตํ   ตเมนํ   นิรยํ   อุปเนติ  ฯ  อิธ  ปน
ภิกฺขเว    เอกจฺจสฺส    ปุคฺคลสฺส   ตาทิสํเยว   อปฺปมตฺตกํ   ปาปกมฺมํ
กตํ ทิฏฺฐธมฺมเวทนียํ โหติ นานุปิ ขายติ [๑]- พหุเทว ฯ
     {๕๔๐.๑}   กถํรูปสฺส  ภิกฺขเว  ปุคฺคลสฺส  อปฺปมตฺตกมฺปิ  ปาปกมฺมํ
กตํ  ตเมนํ  นิรยํ  อุปเนติ ฯ อิธ ภิกฺขเว เอกจฺโจ ปุคฺคโล อภาวิตกาโย
โหติ  อภาวิตสีโล  อภาวิตจิตฺโต  อภาวิตปญฺโญ  ปริตฺโต  อปฺปตุโม  ๒-
อปฺปทุกฺขวิหารี     เอวรูปสฺส    ภิกฺขเว    ปุคฺคลสฺส    อปฺปมตฺตกมฺปิ
ปาปกมฺมํ กตํ ตเมนํ นิรยํ อุปเนติ ฯ
     {๕๔๐.๒}   กถํรูปสฺส   ภิกฺขเว  ปุคฺคลสฺส  ตาทิสํเยว  อปฺปมตฺตกํ
ปาปกมฺมํ   กตํ  ทิฏฺฐธมฺมเวทนียํ  โหติ  นานุปิ  ขายติ  พหุเทว  ฯ  อิธ
ภิกฺขเว   เอกจฺโจ  ปุคฺคโล  ภาวิตกาโย  โหติ  ภาวิตสีโล  ภาวิตจิตฺโต
ภาวิตปญฺโญ  อปริตฺโต  มหตฺตา  ๓-  อปฺปมาณวิหารี  เอวรูปสฺส  ภิกฺขเว
ปุคฺคลสฺส   ตาทิสํเยว  อปฺปมตฺตกํ  ปาปกมฺมํ  กตํ  ทิฏฺฐธมฺมเวทนียํ  โหติ
นานุปิ  ขายติ  พหุเทว  ฯ  เสยฺยถาปิ ภิกฺขเว ปุริโส โลณผลํ ๔- ปริตฺเต
อุทกมลฺลเก   ๕-  ปกฺขิเปยฺย  ตํ  กึ  มญฺญถ  ภิกฺขเว  อปินุ  ตํ  ปริตฺตํ
อุทกมลฺลเก  อุทกํ  อมุนา  โลณผเลน  ๖-  โลณํ อสฺส อเปยฺยนฺติ ฯ เอวํ
ภนฺเต  ฯ  ตํ  กิสฺส  เหตุ  ฯ  อทุํ  หิ  ภนฺเต  ปริตฺตํ อุทกมลฺลเก อุทกํ
ตํ   อมุนา  โลณผเลน  โลณํ  อสฺส  อเปยฺยนฺติ  ฯ  เสยฺยถาปิ  ภิกฺขเว
@เชิงอรรถ: ๑ ม. กึ ฯ อิโต ปรํ อีทิสเมว ฯ ๒ ม. ยุ. อปฺปาตุโม ฯ อิโต ปรํ อีทิสเมว ฯ
@๓ ม. มหตฺโต ฯ ๔ ม. โลณกปลลํ ฯ  ๕ ม. อุทกกปลฺลเก ฯ อิโต ปรํ อีทิสเมว ฯ
@๖ ม. โลณกปลฺเลน ฯ อิโต ปรํ อีทิสเมว ฯ
ปุริโส   โลณผลํ   คงฺคาย   นทิยา  ปกฺขิเปยฺย  ตํ  กึ  มญฺญถ  ภิกฺขเว
อปินุ  สา  คงฺคา  นที  อมุนา  โลณผเลน  โลณํ  ๑- อสฺส อเปยฺยนฺติ ฯ
โนเหตํ  ภนฺเต  ฯ  ตํ  กิสฺส  เหตุ  ฯ  อสุ  หิ  ภนฺเต  คงฺคาย นทิยา
มหาอุทกกฺขนฺโธ  โส  อมุนา  โลณผเลน  โลโณ [๒]- อสฺส อเปยฺโยติ ฯ
เอวเมว   โข  ภิกฺขเว  อิเธกจฺจสฺส  ปุคฺคลสฺส  อปฺปมตฺตกมฺปิ  ปาปกมฺมํ
กตํ  ตเมนํ  นิรยํ  อุปเนติ  ฯ  อิธ  ปน  ภิกฺขเว  เอกจฺจสฺส  ปุคฺคลสฺส
ตาทิสํเยว   อปฺปมตฺตกํ   ปาปกมฺมํ   กตํ  ทิฏฺฐธมฺมเวทนียํ  โหติ  นานุปิ
ขายติ พหุเทว ฯ
     {๕๔๐.๓}   กถํรูปสฺส    ภิกฺขเว    ปุคฺคลสฺส    อปฺปมตฺตกมฺปิ
ปาปกมฺมํ  กตํ  ตเมนํ  นิรยํ  อุปเนติ  ฯ  อิธ  ภิกฺขเว เอกจฺโจ ปุคฺคโล
อภาวิตกาโย     โหติ    อภาวิตสีโล    อภาวิตจิตฺโต    อภาวิตปญฺโญ
ปริตฺโต    อปฺปตุโม   อปฺปทุกฺขวิหารี   เอวรูปสฺส   ภิกฺขเว   ปุคฺคลสฺส
อปฺปมตฺตกมฺปิ ปาปกมฺมํ กตํ ตเมนํ นิรยํ อุปเนติ ฯ
     {๕๔๐.๔}   กถํรูปสฺส   ภิกฺขเว  ปุคฺคลสฺส  ตาทิสํเยว  อปฺปมตฺตกํ
ปาปกมฺมํ   กตํ  ทิฏฺฐธมฺมเวทนียํ  โหติ  นานุปิ  ขายติ  พหุเทว  ฯ  อิธ
ภิกฺขเว   เอกจฺโจ  ปุคฺคโล  ภาวิตกาโย  โหติ  ภาวิตสีโล  ภาวิตจิตฺโต
ภาวิตปญฺโญ    อปริตฺโต    มหตฺตา   ๓-   อปฺปมาณวิหารี   เอวรูปสฺส
ภิกฺขเว     ปุคฺคลสฺส     ตาทิสํเยว    อปฺปมตฺตกํ    ปาปกมฺมํ    กตํ
ทิฏฺฐธมฺมเวทนียํ  โหติ  นานุปิ  ขายติ  พหุเทว  ฯ  อิธ ภิกฺขเว เอกจฺโจ
อฑฺฒกหาปเณนปิ    พนฺธนํ    นิคจฺฉติ    กหาปเณนปิ   พนฺธนํ   นิคจฺฉติ
กหาปณสเตนปิ   พนฺธนํ   นิคจฺฉติ   ฯ   อิธ   ปน   ภิกฺขเว  เอกจฺโจ
อฑฺฒกหาปเณนปิ       น       พนฺธนํ      นิคจฺฉติ      กหาปเณนปิ
@เชิงอรรถ: ๑ ยุ. โลณา ฯ ๒ ม. ยุ. น ฯ  ๓ ม. มหตฺโต ฯ
น พนฺธนํ นิคจฺฉติ กหาปณสเตนปิ น พนฺธนํ นิคจฺฉติ ฯ
     {๕๔๐.๕}   กถํรูโป   ภิกฺขเว   อฑฺฒกหาปเณนปิ  พนฺธนํ  นิคจฺฉติ
กหาปเณนปิ   พนฺธนํ   นิคจฺฉติ  กหาปณสเตนปิ  พนฺธนํ  นิคจฺฉติ  ฯ  อิธ
ภิกฺขเว  เอกจฺโจ  ทฬิทฺโท  โหติ  อปฺปสฺสโก อปฺปโภโค เอวรูโป ภิกฺขเว
อฑฺฒกหาปเณนปิ    พนฺธนํ    นิคจฺฉติ    กหาปเณนปิ   พนฺธนํ   นิคจฺฉติ
กหาปณสเตนปิ พนฺธนํ นิคจฺฉติ ฯ
     {๕๔๐.๖}   กถํรูโป  ภิกฺขเว  อฑฺฒกหาปเณนปิ  น  พนฺธนํ  นิคจฺฉติ
กหาปเณนปิ  น  พนฺธนํ  นิคจฺฉติ  กหาปณสเตนปิ  น  พนฺธนํ  นิคจฺฉติ  ฯ
อิธ  ภิกฺขเว  เอกจฺโจ  อฑฺโฒโหติ  มหทฺธโน มหาโภโค เอวรูโป ภิกฺขเว
อฑฺฒกหาปเณนปิ   น   พนฺธนํ  นิคจฺฉติ  กหาปเณนปิ  น  พนฺธนํ  นิคจฺฉติ
กหาปณสเตนปิ   น   พนฺธนํ   นิคจฺฉติ   ฯ   เอวเมว   โข   ภิกฺขเว
อิเธกจฺจสฺส   ปุคฺคลสฺส   อปฺปมตฺตกมฺปิ   ปาปกมฺมํ   กตํ   ตเมนํ  นิรยํ
อุปเนติ  ฯ  อิธ  ปน  ภิกฺขเว  เอกจฺจสฺส ปุคฺคลสฺส ตาทิสํเยว อปฺปมตฺตกํ
ปาปกมฺมํ   กตํ   ทิฏฺฐธมฺมเวทนียํ  โหติ  นานุปิ  ขายติ  พหุเทว  ฯเปฯ
เสยฺยถาปิ  ภิกฺขเว  โอรพฺภิโก  วา  อุรพฺภฆาตโก  วา  อปฺเปกจฺโจ ๑-
อุรพฺภํ   อทินฺนํ   อาทิยมานํ   ปโหติ   หนฺตุํ  วา  พนฺธิตุํ  วา  ฌาเปตุํ
วา  ยถาปจฺจยํ  วา  กาตุํ  อปฺเปกจฺโจ  ๒-  อุรพฺภํ  อทินฺนํ  อาทิยมานํ
นปฺปโหติ หนฺตุํ วา พนฺธิตุํ วา ฌาเปตุํ วา ยถาปจฺจยํ วา กาตุํ ฯ
     {๕๔๐.๗}   กถํรูโป  ๓-  ภิกฺขเว  โอรพฺภิโก วา อุรพฺภฆาตโก วา
อุรพฺภํ  อทินฺนํ  อาทิยมานํ ปโหติ หนฺตุํ ว พนฺธิตุํ วา ฌาเปตุํ วา ยถาปจฺจยํ
วา  กาตุํ  ฯ  อิธ  ภิกฺขเว  เอกจฺโจ ทฬิทฺโท โหติ อปฺปสฺสโก อปฺปโภโค
@เชิงอรรถ: ๑-๒ ม. ยุ. อปฺเปกจฺจํ ฯ ๓ ม. ยุ. กถํรูปํ ฯ
เอวรูโป  ๑-  ภิกฺขเว  โอรพฺภิโก  วา  อุรพฺภฆาตโก  วา อุรพฺภํ อทินฺนํ
อาทิยมานํ  ปโหติ  หนฺตุํ  วา  พนฺธิตุํ  วา  ฌาเปตุํ  วา  ยถาปจฺจยํ วา
กาตุํ ฯ
     {๕๔๐.๘}   กถํรูโป  ๒-  ภิกฺขเว  โอรพฺภิโก วา อุรพฺภฆาตโก วา
อุรพฺภํ  อทินฺนํ  อาทิยมานํ  นปฺปโหติ  หนฺตุํ  วา  พนฺธิตุํ  วา ฌาเปตุํ วา
ยถาปจฺจยํ  วา  กาตุํ  ฯ  อิธ  ภิกฺขเว  เอกจฺโจ  อฑฺโฒ โหติ มหทฺธโน
มหาโภโค  ราชา  วา ราชมหามตฺโต วา เอวรูโป ๓- ภิกฺขเว โอรพฺภิโก
วา  อุรพฺภฆาตโก  วา  อุรพฺภํ  อทินฺนํ  อาทิยมานํ  นปฺปโหติ  หนฺตุํ  วา
พนฺธิตุํ   วา   ฌาเปตุํ   วา   ยถาปจฺจยํ   วา   กาตุํ   ฯ  อญฺญทตฺถุ
ปญฺชลิโกว  นํ  ยาจติ  เทหิ  เม  มาริส  อุรพฺภํ  วา  อุรพฺภธนํ วาติ ฯ
เอวเมว   โข   ภิกฺขเว  อิเธกจฺจสฺส  ปุคฺคลสฺส  อปฺปมตฺตกํปิ  ปาปกมฺมํ
กตํ  ตเมนํ  นิรยํ  อุปเนติ  ฯ  อิธ  ปน  ภิกฺขเว  เอกจฺจสฺส  ปุคฺคลสฺส
ตาทิสํเยว   อปฺปมตฺตกํ   ปาปกมฺมํ   กตํ  ทิฏฺฐธมฺมเวทนียํ  โหติ  นานุปิ
ขายติ   พหุเทว   ฯเปฯ   โย   โข   ภิกฺขเว   เอวํ  วเทยฺย  ยถา
ยถายํ   ปุริโส   กมฺมํ   กโรติ   ตถา   ตถา  ตํ  ปฏิสํเวทิยตีติ  เอวํ
สนฺตํ   ภิกฺขเว   พฺรหฺมจริยวาโส   น   โหติ   โอกาโส  น  ปญฺญายติ
สมฺมา   ทุกฺขสฺส  อนฺตกิริยาย  ฯ  โย  จ  โข  ภิกฺขเว  เอวํ  วเทยฺย
ยถา   ยถา  เวทนียํ  อยํ  ปุริโส  กมฺมํ  กโรติ  ตถา  ตถาสฺส  วิปากํ
ปฏิสํเวทิยตีติ   เอวํ   สนฺตํ   ภิกฺขเว  พฺรหฺมจริยวาโส  โหติ  โอกาโส
ปญฺญายติ สมฺมา ทุกฺขสฺส อนฺตกิริยายาติ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๒๐ หน้าที่ ๓๑๗-๓๒๔.
http://84000.org/tipitaka/pitaka_item/pali_item_s.php?book=20&item=539&items=2&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=20&item=539&items=2&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=20&item=539&items=2&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=20&item=539&items=2&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=20&i=539
             The Pali Atthakatha in Thai :-
http://84000.org/tipitaka/atthapali/read_th.php?B=15&A=5827
             The Pali Atthakatha in Roman :-
http://84000.org/tipitaka/atthapali/read_rm.php?B=15&A=5827
             สารบัญพระไตรปิฎกเล่มที่ ๒๐
http://84000.org/tipitaka/read/?index_20