พระไตรปิฎกเล่มที่ ๒๐ ภาษาบาลี อักษรไทย
พระสุตตันตปิฎกเล่มที่ ๑๒ สุตฺต. องฺ. (๑): เอก-ทุก-ติกนิปาตา

     [๕๔๐]   ๑๐๑  โย โข ๑- ภิกฺขเว เอวํ วเทยฺย ยถา ยถายํ ปุริโส
กมฺมํ   กโรติ  ตถา  ตถา  ตํ  ปฏิสํเวทิยตีติ  ๒-  เอวํ  สนฺตํ  ภิกฺขเว
พฺรหฺมจริยวาโส   น   โหติ   โอกาโส   น  ปญฺญายติ  สมฺมา  ทุกฺขสฺส
อนฺตกิริยาย  ฯ  โย  จ  โข  ภิกฺขเว  เอวํ  วเทยฺย ยถา ยถา เวทนิยํ
อยํ   ปุริโส   กมฺมํ  กโรติ  ตถา  ตถาสฺส  วิปากํ  ปฏิสํเวทิยตีติ  เอวํ
สนฺตํ   ภิกฺขเว   พฺรหฺมจริยวาโส   โหติ   โอกาโส   ปญฺญายติ  สมฺมา
@เชิงอรรถ: ๑ ม. ยุ. โขสทฺโท นตฺถิ ฯ  ๒ ม. ปฏิสํเวเทตีติ ฯ อิโต ปรํ อีทิสเมว ฯ
ทุกฺขสฺส    อนฺตกิริยาย    ฯ    อิธ   ภิกฺขเว   เอกจฺจสฺส   ปุคฺคลสฺส
อปฺปมตฺตกมฺปิ   ปาปกมฺมํ   กตํ   ตเมนํ   นิรยํ   อุปเนติ  ฯ  อิธ  ปน
ภิกฺขเว    เอกจฺจสฺส    ปุคฺคลสฺส   ตาทิสํเยว   อปฺปมตฺตกํ   ปาปกมฺมํ
กตํ ทิฏฺฐธมฺมเวทนียํ โหติ นานุปิ ขายติ [๑]- พหุเทว ฯ
     {๕๔๐.๑}   กถํรูปสฺส  ภิกฺขเว  ปุคฺคลสฺส  อปฺปมตฺตกมฺปิ  ปาปกมฺมํ
กตํ  ตเมนํ  นิรยํ  อุปเนติ ฯ อิธ ภิกฺขเว เอกจฺโจ ปุคฺคโล อภาวิตกาโย
โหติ  อภาวิตสีโล  อภาวิตจิตฺโต  อภาวิตปญฺโญ  ปริตฺโต  อปฺปตุโม  ๒-
อปฺปทุกฺขวิหารี     เอวรูปสฺส    ภิกฺขเว    ปุคฺคลสฺส    อปฺปมตฺตกมฺปิ
ปาปกมฺมํ กตํ ตเมนํ นิรยํ อุปเนติ ฯ
     {๕๔๐.๒}   กถํรูปสฺส   ภิกฺขเว  ปุคฺคลสฺส  ตาทิสํเยว  อปฺปมตฺตกํ
ปาปกมฺมํ   กตํ  ทิฏฺฐธมฺมเวทนียํ  โหติ  นานุปิ  ขายติ  พหุเทว  ฯ  อิธ
ภิกฺขเว   เอกจฺโจ  ปุคฺคโล  ภาวิตกาโย  โหติ  ภาวิตสีโล  ภาวิตจิตฺโต
ภาวิตปญฺโญ  อปริตฺโต  มหตฺตา  ๓-  อปฺปมาณวิหารี  เอวรูปสฺส  ภิกฺขเว
ปุคฺคลสฺส   ตาทิสํเยว  อปฺปมตฺตกํ  ปาปกมฺมํ  กตํ  ทิฏฺฐธมฺมเวทนียํ  โหติ
นานุปิ  ขายติ  พหุเทว  ฯ  เสยฺยถาปิ ภิกฺขเว ปุริโส โลณผลํ ๔- ปริตฺเต
อุทกมลฺลเก   ๕-  ปกฺขิเปยฺย  ตํ  กึ  มญฺญถ  ภิกฺขเว  อปินุ  ตํ  ปริตฺตํ
อุทกมลฺลเก  อุทกํ  อมุนา  โลณผเลน  ๖-  โลณํ อสฺส อเปยฺยนฺติ ฯ เอวํ
ภนฺเต  ฯ  ตํ  กิสฺส  เหตุ  ฯ  อทุํ  หิ  ภนฺเต  ปริตฺตํ อุทกมลฺลเก อุทกํ
ตํ   อมุนา  โลณผเลน  โลณํ  อสฺส  อเปยฺยนฺติ  ฯ  เสยฺยถาปิ  ภิกฺขเว
@เชิงอรรถ: ๑ ม. กึ ฯ อิโต ปรํ อีทิสเมว ฯ ๒ ม. ยุ. อปฺปาตุโม ฯ อิโต ปรํ อีทิสเมว ฯ
@๓ ม. มหตฺโต ฯ ๔ ม. โลณกปลลํ ฯ  ๕ ม. อุทกกปลฺลเก ฯ อิโต ปรํ อีทิสเมว ฯ
@๖ ม. โลณกปลฺเลน ฯ อิโต ปรํ อีทิสเมว ฯ
ปุริโส   โลณผลํ   คงฺคาย   นทิยา  ปกฺขิเปยฺย  ตํ  กึ  มญฺญถ  ภิกฺขเว
อปินุ  สา  คงฺคา  นที  อมุนา  โลณผเลน  โลณํ  ๑- อสฺส อเปยฺยนฺติ ฯ
โนเหตํ  ภนฺเต  ฯ  ตํ  กิสฺส  เหตุ  ฯ  อสุ  หิ  ภนฺเต  คงฺคาย นทิยา
มหาอุทกกฺขนฺโธ  โส  อมุนา  โลณผเลน  โลโณ [๒]- อสฺส อเปยฺโยติ ฯ
เอวเมว   โข  ภิกฺขเว  อิเธกจฺจสฺส  ปุคฺคลสฺส  อปฺปมตฺตกมฺปิ  ปาปกมฺมํ
กตํ  ตเมนํ  นิรยํ  อุปเนติ  ฯ  อิธ  ปน  ภิกฺขเว  เอกจฺจสฺส  ปุคฺคลสฺส
ตาทิสํเยว   อปฺปมตฺตกํ   ปาปกมฺมํ   กตํ  ทิฏฺฐธมฺมเวทนียํ  โหติ  นานุปิ
ขายติ พหุเทว ฯ
     {๕๔๐.๓}   กถํรูปสฺส    ภิกฺขเว    ปุคฺคลสฺส    อปฺปมตฺตกมฺปิ
ปาปกมฺมํ  กตํ  ตเมนํ  นิรยํ  อุปเนติ  ฯ  อิธ  ภิกฺขเว เอกจฺโจ ปุคฺคโล
อภาวิตกาโย     โหติ    อภาวิตสีโล    อภาวิตจิตฺโต    อภาวิตปญฺโญ
ปริตฺโต    อปฺปตุโม   อปฺปทุกฺขวิหารี   เอวรูปสฺส   ภิกฺขเว   ปุคฺคลสฺส
อปฺปมตฺตกมฺปิ ปาปกมฺมํ กตํ ตเมนํ นิรยํ อุปเนติ ฯ
     {๕๔๐.๔}   กถํรูปสฺส   ภิกฺขเว  ปุคฺคลสฺส  ตาทิสํเยว  อปฺปมตฺตกํ
ปาปกมฺมํ   กตํ  ทิฏฺฐธมฺมเวทนียํ  โหติ  นานุปิ  ขายติ  พหุเทว  ฯ  อิธ
ภิกฺขเว   เอกจฺโจ  ปุคฺคโล  ภาวิตกาโย  โหติ  ภาวิตสีโล  ภาวิตจิตฺโต
ภาวิตปญฺโญ    อปริตฺโต    มหตฺตา   ๓-   อปฺปมาณวิหารี   เอวรูปสฺส
ภิกฺขเว     ปุคฺคลสฺส     ตาทิสํเยว    อปฺปมตฺตกํ    ปาปกมฺมํ    กตํ
ทิฏฺฐธมฺมเวทนียํ  โหติ  นานุปิ  ขายติ  พหุเทว  ฯ  อิธ ภิกฺขเว เอกจฺโจ
อฑฺฒกหาปเณนปิ    พนฺธนํ    นิคจฺฉติ    กหาปเณนปิ   พนฺธนํ   นิคจฺฉติ
กหาปณสเตนปิ   พนฺธนํ   นิคจฺฉติ   ฯ   อิธ   ปน   ภิกฺขเว  เอกจฺโจ
อฑฺฒกหาปเณนปิ       น       พนฺธนํ      นิคจฺฉติ      กหาปเณนปิ
@เชิงอรรถ: ๑ ยุ. โลณา ฯ ๒ ม. ยุ. น ฯ  ๓ ม. มหตฺโต ฯ
น พนฺธนํ นิคจฺฉติ กหาปณสเตนปิ น พนฺธนํ นิคจฺฉติ ฯ
     {๕๔๐.๕}   กถํรูโป   ภิกฺขเว   อฑฺฒกหาปเณนปิ  พนฺธนํ  นิคจฺฉติ
กหาปเณนปิ   พนฺธนํ   นิคจฺฉติ  กหาปณสเตนปิ  พนฺธนํ  นิคจฺฉติ  ฯ  อิธ
ภิกฺขเว  เอกจฺโจ  ทฬิทฺโท  โหติ  อปฺปสฺสโก อปฺปโภโค เอวรูโป ภิกฺขเว
อฑฺฒกหาปเณนปิ    พนฺธนํ    นิคจฺฉติ    กหาปเณนปิ   พนฺธนํ   นิคจฺฉติ
กหาปณสเตนปิ พนฺธนํ นิคจฺฉติ ฯ
     {๕๔๐.๖}   กถํรูโป  ภิกฺขเว  อฑฺฒกหาปเณนปิ  น  พนฺธนํ  นิคจฺฉติ
กหาปเณนปิ  น  พนฺธนํ  นิคจฺฉติ  กหาปณสเตนปิ  น  พนฺธนํ  นิคจฺฉติ  ฯ
อิธ  ภิกฺขเว  เอกจฺโจ  อฑฺโฒโหติ  มหทฺธโน มหาโภโค เอวรูโป ภิกฺขเว
อฑฺฒกหาปเณนปิ   น   พนฺธนํ  นิคจฺฉติ  กหาปเณนปิ  น  พนฺธนํ  นิคจฺฉติ
กหาปณสเตนปิ   น   พนฺธนํ   นิคจฺฉติ   ฯ   เอวเมว   โข   ภิกฺขเว
อิเธกจฺจสฺส   ปุคฺคลสฺส   อปฺปมตฺตกมฺปิ   ปาปกมฺมํ   กตํ   ตเมนํ  นิรยํ
อุปเนติ  ฯ  อิธ  ปน  ภิกฺขเว  เอกจฺจสฺส ปุคฺคลสฺส ตาทิสํเยว อปฺปมตฺตกํ
ปาปกมฺมํ   กตํ   ทิฏฺฐธมฺมเวทนียํ  โหติ  นานุปิ  ขายติ  พหุเทว  ฯเปฯ
เสยฺยถาปิ  ภิกฺขเว  โอรพฺภิโก  วา  อุรพฺภฆาตโก  วา  อปฺเปกจฺโจ ๑-
อุรพฺภํ   อทินฺนํ   อาทิยมานํ   ปโหติ   หนฺตุํ  วา  พนฺธิตุํ  วา  ฌาเปตุํ
วา  ยถาปจฺจยํ  วา  กาตุํ  อปฺเปกจฺโจ  ๒-  อุรพฺภํ  อทินฺนํ  อาทิยมานํ
นปฺปโหติ หนฺตุํ วา พนฺธิตุํ วา ฌาเปตุํ วา ยถาปจฺจยํ วา กาตุํ ฯ
     {๕๔๐.๗}   กถํรูโป  ๓-  ภิกฺขเว  โอรพฺภิโก วา อุรพฺภฆาตโก วา
อุรพฺภํ  อทินฺนํ  อาทิยมานํ ปโหติ หนฺตุํ ว พนฺธิตุํ วา ฌาเปตุํ วา ยถาปจฺจยํ
วา  กาตุํ  ฯ  อิธ  ภิกฺขเว  เอกจฺโจ ทฬิทฺโท โหติ อปฺปสฺสโก อปฺปโภโค
@เชิงอรรถ: ๑-๒ ม. ยุ. อปฺเปกจฺจํ ฯ ๓ ม. ยุ. กถํรูปํ ฯ
เอวรูโป  ๑-  ภิกฺขเว  โอรพฺภิโก  วา  อุรพฺภฆาตโก  วา อุรพฺภํ อทินฺนํ
อาทิยมานํ  ปโหติ  หนฺตุํ  วา  พนฺธิตุํ  วา  ฌาเปตุํ  วา  ยถาปจฺจยํ วา
กาตุํ ฯ
     {๕๔๐.๘}   กถํรูโป  ๒-  ภิกฺขเว  โอรพฺภิโก วา อุรพฺภฆาตโก วา
อุรพฺภํ  อทินฺนํ  อาทิยมานํ  นปฺปโหติ  หนฺตุํ  วา  พนฺธิตุํ  วา ฌาเปตุํ วา
ยถาปจฺจยํ  วา  กาตุํ  ฯ  อิธ  ภิกฺขเว  เอกจฺโจ  อฑฺโฒ โหติ มหทฺธโน
มหาโภโค  ราชา  วา ราชมหามตฺโต วา เอวรูโป ๓- ภิกฺขเว โอรพฺภิโก
วา  อุรพฺภฆาตโก  วา  อุรพฺภํ  อทินฺนํ  อาทิยมานํ  นปฺปโหติ  หนฺตุํ  วา
พนฺธิตุํ   วา   ฌาเปตุํ   วา   ยถาปจฺจยํ   วา   กาตุํ   ฯ  อญฺญทตฺถุ
ปญฺชลิโกว  นํ  ยาจติ  เทหิ  เม  มาริส  อุรพฺภํ  วา  อุรพฺภธนํ วาติ ฯ
เอวเมว   โข   ภิกฺขเว  อิเธกจฺจสฺส  ปุคฺคลสฺส  อปฺปมตฺตกํปิ  ปาปกมฺมํ
กตํ  ตเมนํ  นิรยํ  อุปเนติ  ฯ  อิธ  ปน  ภิกฺขเว  เอกจฺจสฺส  ปุคฺคลสฺส
ตาทิสํเยว   อปฺปมตฺตกํ   ปาปกมฺมํ   กตํ  ทิฏฺฐธมฺมเวทนียํ  โหติ  นานุปิ
ขายติ   พหุเทว   ฯเปฯ   โย   โข   ภิกฺขเว   เอวํ  วเทยฺย  ยถา
ยถายํ   ปุริโส   กมฺมํ   กโรติ   ตถา   ตถา  ตํ  ปฏิสํเวทิยตีติ  เอวํ
สนฺตํ   ภิกฺขเว   พฺรหฺมจริยวาโส   น   โหติ   โอกาโส  น  ปญฺญายติ
สมฺมา   ทุกฺขสฺส  อนฺตกิริยาย  ฯ  โย  จ  โข  ภิกฺขเว  เอวํ  วเทยฺย
ยถา   ยถา  เวทนียํ  อยํ  ปุริโส  กมฺมํ  กโรติ  ตถา  ตถาสฺส  วิปากํ
ปฏิสํเวทิยตีติ   เอวํ   สนฺตํ   ภิกฺขเว  พฺรหฺมจริยวาโส  โหติ  โอกาโส
ปญฺญายติ สมฺมา ทุกฺขสฺส อนฺตกิริยายาติ ฯ
     [๕๔๑]   ๑๐๒  สนฺติ  ภิกฺขเว  ชาตรูปสฺส  โอฬาริกา  อุปกฺกิเลสา
@เชิงอรรถ: ๑-๓ ม. ยุ. เอวรูปํ ฯ ๒ ม. ยุ. กถํรูปํ ฯ
ปํสุวาลิกา  ๑-  สกฺขรกถลา  ตเมนํ  ปํสุโธวโก วา ปํสุโธวกนฺเตวาสี วา
โทณิยํ   อากิริตฺวา   โธวติ   สนฺโธวติ   นิทฺโธวติ  ตสฺมึ  ปหีเน  ตสฺมึ
พฺยนฺตีกเต   สนฺติ   ชาตรูปสฺส   มชฺฌิมสหคตา  อุปกฺกิเลสา  สุขุมสกฺขรา
ถุลฺลวาลิกา ๒- ตเมนํ ปํสุโธวโก วา ปํสุโธวกนฺเตวาสี วา โธวติ สนฺโธวติ
นิทฺโธวติ  ตสฺมึ  ปหีเน  ตสฺมึ  พฺยนฺตีกเต  สนฺติ  ชาตรูปสฺส  สุขุมสหคตา
อุปกฺกิเลสา   สุขุมวาลิกา   กาฬิชลฺลิกา   ๓-   ตเมนํ  ปํสุโธวโก  วา
ปํสุโธวกนฺเตวาสี   วา  โธวติ  สนฺโธวติ  นิทฺโธวติ  ตสฺมึ  ปหีเน  ตสฺมึ
พยนฺตีกเต   อถาปรํ   สุวณฺณสิกตาวสิสฺสนฺติ  ฯ  ตเมนํ  สุวณฺณกาโร  วา
สุวณฺณการนฺเตวาสี  วา  ชาตรูปํ  มุสายํ  ๔-  ปกฺขิปิตฺวา  ธมติ  สนฺธมติ
นิทฺธมติ  ฯ  ตํ  โหติ  ชาตรูปํ  อธนฺตํ  อสนฺธนฺตํ  ๕-  อนิทฺธนฺตํ  อนิหิตํ
อนินฺนีตกสาวํ  ๖-  น  เจว  มุทุํ  โหติ  น  จ  กมฺมนิยํ  น  จ ปภสฺสรํ
ปภงฺคุ   จ   น   จ   สมฺมา  อุเปติ  กมฺมาย  ฯ  โหติ  โส  ภิกฺขเว
สมโย   ยํ  โส  สุวณฺณกาโร  วา  สุวณฺณการนฺเตวาสี  วา  ตํ  ชาตรูปํ
ธมติ   สนฺธมติ   นิทฺธมติ   ตํ   โหติ  ชาตรูปํ  ธนฺตํ  สนฺธนฺตํ  นิทฺธนฺตํ
นิหิตํ    นินฺนีตกสาวํ   มุทุํ   จ   โหติ   กมฺมนิยญฺจ    ปภสฺสรญฺจ   น
จ   ปภงฺคุ   สมฺมา  อุเปติ  กมฺมาย  ยสฺสา  ยสฺสา  จ  ปิลนฺธนวิกติยา
อากงฺขติ  ยทิ  ปฏฺฏิกาย ยทิ กุณฺฑลาย ยทิ คีเวยฺยเก ๗- ยทิ สุวณฺณมาลาย
ตญฺจสฺส อตฺถํ อนุโภติ ฯ
     {๕๔๑.๑}   เอวเมว   โข   ภิกฺขเว   สนฺติ   อธิจิตฺตมนุยุตฺตสฺส
ภิกฺขุโน     โอฬาริกา     อุปกฺกิเลสา     กายทุจฺจริตํ    วจีทุจฺจริตํ
มโนทุจฺจริตํ     ตเมนํ     สเจตโส    ภิกฺขุ    ทพฺพชาติโก    ปชหติ
@เชิงอรรถ: ๑ ม. ปํสุวาลุกา ฯ ๒ ม. ถูลวาลุกา ฯ  ๓ ม. กาฬชลฺลิกา ฯ ๔ มูสายํ ฯ ๕ ยุ.
@ธนฺตํ สนฺธนฺตํ ฯ ๖ ม. ธนฺตํ สนฺธนฺตํ นิทฺธนฺตํ อนิทฺธนฺตกสาวํ ฯ
@๗ ม. คีเวยฺยเกน ฯ
วิโนเทติ   พฺยนฺตีกโรติ  อนภาวํ  คเมติ  ตสฺมึ  ปหีเน  ตสฺมึ  พฺยนฺตีกเต
สนฺติ     อธิจิตฺตมนุยุตฺตสฺส     ภิกฺขุโน    มชฺฌิมสหคตา    อุปกฺกิเลสา
กามวิตกฺโก   พฺยาปาทวิตกฺโก   วิหึสาวิตกฺโก   ตเมนํ   สเจตโส  ภิกฺขุ
ทพฺพชาติโก   ปชหติ   วิโนเทติ   พฺยนฺตีกโรติ   อนภาวํ   คเมติ  ตสฺมึ
ปหีเน     ตสฺมึ    พฺยนฺตีกเต    สนฺติ    อธิจิตฺตมนุยุตฺตสฺส    ภิกฺขุโน
สุขุมสหคตา        อุปกฺกิเลสา       ชาติวิตกฺโก       ชนปทวิตกฺโก
อนวญฺญตฺติปฏิสํยุตฺโต      วิตกฺโก      ตเมนํ      สเจตโส     ภิกฺขุ
ทพฺพชาติโก    ปชหติ    วิโนเทติ    พฺยนฺตีกโรติ    อนภาวํ    คเมติ
ตสฺมึ   ปหีเน   ตสฺมึ  พฺยนตีกเต  อถาปรํ  ธมฺมวิตกฺกาวสิสฺสนฺติ  ฯ  ๑-
โส  โหติ  สมาธิ  น  เจว  สนฺโต  นปฺปณีโต  นปฺปฏิปฺปสฺสทฺธลทฺโธ  ๓-
น เอโกทิภาวาธิคโต สสงฺขารนิคฺคยฺหวาริตวโต ๔- ฯ
     {๕๔๑.๒}   โหติ  โส  ภิกฺขเว  สมโย  ยนฺตํ  จิตฺตํ  อชฺฌตฺตํเยว
สนฺติฏฺฐติ   สนฺนิสีทติ  เอโกทิภาโว  ๕-  โหติ  สมาธิยติ  ฯ  โส  โหติ
สมาธิ    สนฺโต    ปณีโต   ปฏิปฺปสฺสทฺธลทฺโธ   เอโกทิภาวาธิคโต   น
สสงฺขารนิคฺคยฺหวาริตวโต    ยสฺส    ยสฺส    จ    อภิญฺญาสจฺฉิกรณียสฺส
ธมฺมสฺส    จิตฺตํ    อภินินฺนาเมติ   อภิญฺญาสจฺฉิกิริยาย   ตตฺร   ตเตฺรว
สกฺขิภพฺพตํ   ปาปุณาติ   สติ   สติ   อายตเน   โส   สเจ   อากงฺขติ
อเนกวิหิตํ     อิทฺธิวิธํ    ปจฺจนุภเวยฺยํ    เอโกปิ    หุตฺวา    พหุธา
อสฺสํ   พหุธาปิ   หุตฺวา   เอโก   อสฺสํ  อาวิภาวํ  ติโรภาวํ  ติโรกุฑฺฑํ
ติโรปาการํ     ติโรปพฺพตํ     อสชฺชมาโน     คจฺเฉยฺยํ    เสยฺยถาปิ
อากาเส   ปฐวิยาปิ  อุมฺมุชฺชนิมุชฺชํ  กเรยฺยํ  เสยฺยถาปิ  อุทเก  อุทเกปิ
อภิชฺชมาเน    คจฺเฉยฺยํ   เสยฺยถาปิ   ปฐวิยํ   อากาเสปิ   ปลฺลงฺเกน
@เชิงอรรถ: ๑ ม. ธมฺมวิตกฺโกวสิสฺสติ ฯ ม. น จ ปณีโต ฯ ๓ ม. นปฺปฏิปฺปสฺสทฺธิลทฺโธ ฯ
@๔ ม. สสงฺขารนิคฺคยฺหวาริตคโต ฯ  ๕ ม. ยุ. เอโกทิ ฯ
กเมยฺยํ   เสยฺยถาปิ   ปกฺขิสกุโณ   อิเมปิ  จนฺทิมสุริเย  เอวํ  มหิทฺธิเก
เอวํมหานุภาเว   ปาณินา   ปริมเสยฺยํ  ปริมชฺเชยฺยํ  ยาว  พฺรหฺมโลกาปิ
กาเยน   วสํ   วตฺเตยฺยนฺติ   ตตฺร  ตเตฺรว  สกฺขิภพฺพตํ  ปาปุณาติ  สติ
สติ อายตเน ฯ
     {๕๔๑.๓}   โส  สเจ  อากงฺขติ  ทิพฺพาย  โสตธาตุยา  วิสุทฺธาย
อติกฺกนฺตมานุสิกาย   อุโภ  สทฺเท  สุเณยฺยํ  ทิพฺเพ  จ  มานุเส  จ  เย
ทูเร  สนฺติเก  จาติ  ๑-  ตตฺร  ตเตฺรว  สกฺขิภพฺพตํ  ปาปุณาติ  สติ สติ
อายตเน   ฯ   โส   สเจ  อากงฺขติ  ปรสตฺตานํ  ปรปุคฺคลานํ  เจตสา
เจโต  ปริจฺจ  ปชาเนยฺยํ  สราคํ  วา  จิตฺตํ  สราคํ  จิตฺตนฺติ ปชาเนยฺยํ
วีตราคํ   วา   จิตฺตํ   วีตราคํ  จิตฺตนฺติ  ปชาเนยฺยํ  สโทสํ  วา  จิตฺตํ
สโทสํ   จิตฺตนฺติ   ปชาเนยฺยํ   วีตโทสํ   วา   จิตฺตํ  วีตโทสํ  จิตฺตนฺติ
ปชาเนยฺยํ   สโมหํ   วา   จิตฺตํ   สโมหํ  จิตฺตนฺติ  ปชาเนยฺยํ  วีตโมหํ
วา   จิตฺตํ   วีตโมหํ  จิตฺตนฺติ  ปชาเนยฺยํ  สงฺขิตฺตํ  วา  จิตฺตํ  สงฺขิตฺตํ
จิตฺตนฺติ   ปชาเนยฺยํ  วิกฺขิตฺตํ  วา  จิตฺตํ  วิกฺขิตฺตํ  จิตฺตนฺติ  ปชาเนยฺยํ
มหคฺคตํ   วา   จิตฺตํ   มหคฺคตํ   จิตฺตนฺติ   ปชาเนยฺยํ   อมหคฺคตํ  วา
จิตฺตํ   อมหคฺคตํ   จิตฺตนฺติ   ปชาเนยฺยํ   สอุตฺตรํ   วา  จิตฺตํ  สอุตฺตรํ
จิตฺตนฺติ   ปชาเนยฺยํ   อนุตฺตรํ  วา  จิตฺตํ  อนุตฺตรํ  จิตฺตนฺติ  ปชาเนยฺยํ
สมาหิตํ   วา  จิตฺตํ  สมาหิตํ  จิตฺตนฺติ  ปชาเนยฺยํ  อสมาหิตํ  วา  จิตฺตํ
อสมาหิตํ   จิตฺตนฺติ   ปชาเนยฺยํ   วิมุตฺตํ   วา   จิตฺตํ  วิมุตฺตํ  จิตฺตนฺติ
ปชาเนยฺยํ    อวิมุตฺตํ   วา   จิตฺตํ   อวิมุตฺตํ   จิตฺตนฺติ   ปชาเนยฺยนฺติ
ตตฺร ตเตฺรว สกฺขิภพฺพตํ ปาปุณาติ สติ สติ อายตเน ฯ
@เชิงอรรถ: ๑ ยุ. ทูเร วา สนฺติเก วาติ ฯ
     {๕๔๑.๔}   โส  สเจ  อากงฺขติ  อเนกวิหิตํ  ปุพฺเพนิวาสํ อนุสฺสเรยฺยํ
เสยฺยถีทํ   เอกมฺปิ   ชาตึ  เทฺวปิ  ชาติโย  ติสฺโสปิ  ชาติโย  จตสฺโสปิ
ชาติโย   ปญฺจปิ   ชาติโย   ทสมฺปิ   ชาติโย   วีสมฺปิ  ชาติโย  ตึสมฺปิ
ชาติโย    จตฺตาฬีสมฺปิ    ชาติโย    ปญฺญาสมฺปิ   ชาติโย   ชาติสตมฺปิ
ชาติสหสฺสมฺปิ    ชาติสตสหสฺสมฺปิ    อเนเกปิ    สํวฏฺฏกปฺเป   อเนเกปิ
วิวฏฺฏกปฺเป    อเนเกปิ    สํวฏฺฏวิวฏฺฏกปฺเป    อมุตฺราสึ    เอวํนาโม
เอวํโคตฺโต      เอวํวณฺโณ      เอวมาหาโร     เอวํสุขทุกฺขปฏิสํเวที
เอวมายุปริยนฺโต    โส   ตโต   จุโต   อมุตฺร   อุทปาที   ตตฺราปาสึ
เอวํนาโม   เอวํโคตฺโต   เอวํวณฺโณ  เอวมาหาโร  เอวํสุขทุกฺขปฏิสํเวที
เอวมายุปริยนฺโต  โส  ตโต  จุโต  อิธูปปนฺโนติ  อิติ  สาการํ  สอุทฺเทสํ
อเนกวิหิตํ   ปุพฺเพนิวาสํ   อนุสฺสเรยฺยนฺติ   ตตฺร   ตเตฺรว   สกฺขิภพฺพตํ
ปาปุณาติ สติ สติ อายตเน ฯ
     {๕๔๑.๕}   โส   สเจ   อากงฺขติ   ทิพฺเพน  จกฺขุนา  วิสุทฺเธน
อติกฺกนฺตมานุสเกน   สตฺเต   ปสฺเสยฺยํ   จวมาเน   อุปปชฺชมาเน  หีเน
ปณีเต   สุวณฺเณ   ทุพฺพณฺเณ   สุคเต   ทุคฺคเต   ยถากมฺมูปเค   สตฺเต
ปชาเนยฺยํ   อิเม   วต   โภนฺโต   สตฺตา  กายทุจฺจริเตน  สมนฺนาคตา
วจีทุจฺจริเตน    สมนฺนาคตา    มโนทุจฺจริเตน    สมนฺนาคตา   อริยานํ
อุปวาทกา    มิจฺฉาทิฏฺฐิกา    มิจฺฉาทิฏฺฐิกมฺมสมาทานา    เต   กายสฺส
เภทา   ปรมฺมรณา  อปายํ  ทุคฺคตึ  วินิปาตํ  นิรยํ  อุปปนฺนา  อิเม  วา
ปน    โภนฺโต    สตฺตา    กายสุจริเตน    สมนฺนาคตา   วจีสุจริเตน
สมนฺนาคตา     มโนสุจริเตน    สมนฺนาคตา    อริยานํ    อนุปวาทกา
สมฺมาทิฏฺฐิกา        สมฺมาทิฏฺฐิกมฺมสมาทานา       เต       กายสฺส
เภทา   ปรมฺมรณา   สุคตึ   สคฺคํ   โลกํ   อุปปนฺนาติ   อิติ   ทิพฺเพน
จกฺขุนา   วิสุทฺเธน   อติกฺกนฺตมานุสเกน   สตฺเต   ปสฺเสยฺยํ   จวมาเน
อุปปชฺชมาเน    หีเน   ปณีเต   สุวณฺเณ   ทุพฺพณฺเณ   สุคเต   ทุคฺคเต
ยถากมฺมูปเค    สตฺเต    ปชาเนยฺยนฺติ    ตตฺร   ตเตฺรว   สกฺขิภพฺพตํ
ปาปุณาติ สติ สติ อายตเน ฯ
     {๕๔๑.๖}   โส  สเจ  อากงฺขติ อาสวานํ ขยา อนาสวํ เจโตวิมุตฺตึ
ปญฺญาวิมุตฺตึ   ทิฏฺเฐว   ธมฺเม   สยํ   อภิญฺญา   สจฺฉิกตฺวา  อุปสมฺปชฺช
วิหเรยฺยนฺติ ตตฺร ตเตฺรว สกฺขิภพฺพตํ ปาปุณาติ สติ สติ อายตเนติ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๒๐ หน้าที่ ๓๒๐-๓๒๙.
http://84000.org/tipitaka/pitaka_item/pali_item_s.php?book=20&item=540&items=2&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=20&item=540&items=2&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=20&item=540&items=2&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=20&item=540&items=2&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=20&i=540
             The Pali Atthakatha in Thai :-
http://84000.org/tipitaka/atthapali/read_th.php?B=15&A=5836
             The Pali Atthakatha in Roman :-
http://84000.org/tipitaka/atthapali/read_rm.php?B=15&A=5836
             สารบัญพระไตรปิฎกเล่มที่ ๒๐
http://84000.org/tipitaka/read/?index_20