พระไตรปิฎกเล่มที่ ๒๒ ภาษาบาลี อักษรไทย
พระสุตตันตปิฎกเล่มที่ ๑๔ สุตฺต. องฺ. (๓): ปญฺจก-ฉกฺกนิปาตา

     [๑๐๐]   เอกํ  สมยํ  ภควา  โกสมฺพิยํ  วิหรติ  โฆสิตาราเม  ฯ
เตน   โข   ปน   สมเยน   กกุโธ   นาม   โกฬิยปุตฺโต   อายสฺมโต
มหาโมคฺคลฺลานสฺส     อุปฏฺฐาโก     อธุนา     กาลกโต     อญฺญตรํ
มโนมยํ   กายํ   อุปปนฺโน   ตสฺส   เอวรูโป   อตฺตภาวปฏิลาโภ  โหติ
เสยฺยถาปิ   นาม  เทฺว  วา  ตีณิ  วา  มาคธกานิ  ๑-  คามกฺเขตฺตานิ
โส   เตน   อตฺตภาวปฏิลาเภน   เนว  อตฺตานํ  พฺยาพาเธติ  โน  ปรํ
พฺยาพาเธติ ฯ
     {๑๐๐.๑}   อถโข  กกุโธ  เทวปุตฺโต เยนายสฺมา มหาโมคฺคลฺลาโน
เตนุปสงฺกมิ   อุปสงฺกมิตฺวา   อายสฺมนฺตํ   มหาโมคฺคลฺลานํ  อภิวาเทตฺวา
เอกมนฺตํ   อฏฺฐาสิ  เอกมนฺตํ  ฐิโต  โข  กกุโธ  เทวปุตฺโต  อายสฺมนฺตํ
มหาโมคฺคลฺลานํ   เอตทโวจ   เทวทตฺตสฺส   ภนฺเต   เอวรูปํ  อิจฺฉาคตํ
อุปฺปชฺชิ   อหํ   ภิกฺขุสงฺฆํ   ปริหริสฺสามีติ   สหจิตฺตุปฺปาทา   จ   ภนฺเต
เทวทตฺโต  ตสฺสา  อิทฺธิยา  ปริหีโนติ  อิทมโวจ  กกุโธ  เทวปุตฺโต  อิทํ
วตฺวา   อายสฺมนฺตํ   มหาโมคฺคลฺลานํ   อภิวาเทตฺวา   ปทกฺขิณํ   กตฺวา
ตตฺเถวนฺตรธายิ   ฯ   อถโข  อายสฺมา  มหาโมคฺคลฺลาโน  เยน  ภควา
@เชิงอรรถ: ๑ ยุ. มาคธิกานิ ฯ
เตนุปสงฺกมิ   อุปสงฺกมิตฺวา   ภควนฺตํ   อภิวาเทตฺวา   เอกมนฺตํ   นิสีทิ
เอกมนฺตํ  นิสินฺโน  โข  อายสฺมา  มหาโมคฺคลฺลาโน  ภควนฺตํ  เอตทโวจ
กกุโธ   นาม   ภนฺเต   โกฬิยปุตฺโต  มมํ  อุปฏฺฐาโก  อธุนา  กาลกโต
อญฺญตรํ  มโนมยํ  กายํ  อุปปนฺโน  [๑]- ตสฺส เอวรูโป อตฺตภาวปฏิลาโภ
เสยฺยถาปิ   นาม   เทฺว   วา   ตีณิ   วา  มาคธกานิ  คามกฺเขตฺตานิ
โส   เตน   อตฺตภาวปฏิลาเภน   เนว  อตฺตานํ  พฺยาพาเธติ  โน  ปรํ
พฺยาพาเธติ ฯ
     {๑๐๐.๒}   อถโข  ภนฺเต  กกุโธ  เทวปุตฺโต  เยนาหํ เตนุปสงฺกมิ
อุปสงฺกมิตฺวา   มํ   อภิวาเทตฺวา   เอกมนฺตํ   อฏฺฐาสิ  เอกมนฺตํ  ฐิโต
โข  ภนฺเต  กกุโธ  เทวปุตฺโต  มํ  เอตทโวจ เทวทตฺตสฺส ภนฺเต เอวรูปํ
อิจฺฉาคตํ    อุปฺปชฺชิ    อหํ   ภิกฺขุสงฺฆํ   ปริหริสฺสามีติ   สหจิตฺตุปฺปาทา
จ  ภนฺเต  เทวทตฺโต  ตสฺสา  อิทฺธิยา  ปริหีโนติ  อิทมโวจ ภนฺเต กกุโธ
เทวปุตฺโต อิทํ วตฺวา มํ อภิวาเทตฺวา ปทกฺขิณํ กตฺวา ตตฺเถวนฺตรธายีติ ฯ
     {๑๐๐.๓}   กึ  ปน เต โมคฺคลฺลาน กกุโธ เทวปุตฺโต เจตสา เจโต
ปริจฺจ  วิทิโต  ยงฺกิญฺจิ  กกุโธ  เทวปุตฺโต  ภาสติ   สพฺพนฺตํ ตเถว โหติ
โน  อญฺญถาติ  เจตสา  เจโต  ปริจฺจ วิทิโต เม ภนฺเต กกุโธ เทวปุตฺโต
ยงฺกิญฺจิ  กกุโธ  เทวปุตฺโต  ภาสติ  สพฺพนฺตํ  ตเถว โหติ โน อญฺญถาติ ฯ
รกฺขสฺเสตํ  โมคฺคลฺลาน  วาจํ  อิทานิ  โส  โมฆปุริโส  อตฺตนาว อตฺตานํ
ปาตุกริสฺสติ ฯ
@เชิงอรรถ: ๑ ม. โหติ ฯ
     {๑๐๐.๔}   ปญฺจิเม   โมคฺคลฺลาน  สตฺถาโร  สนฺโต  สํวิชฺชมานา
โลกสฺมึ  กตเม  ปญฺจ  อิธ  โมคฺคลฺลาน  เอกจฺโจ  สตฺถา  อปริสุทฺธสีโล
สมาโน   ปริสุทฺธสีโลมฺหีติ   ปฏิชานาติ   ปริสุทฺธํ   เม  สีลํ  ปริโยทาตํ
อสงฺกิลิฏฺฐนฺติ   ตเมนํ   สาวกา   เอวํ  ชานนฺติ  อยํ  โข  ภวํ  สตฺถา
อปริสุทฺธสีโล    สมาโน   ปริสุทฺธสีโลมฺหีติ   ปฏิชานาติ   ปริสุทฺธํ   เม
สีลํ  ปริโยทาตํ  อสงฺกิลิฏฺฐนฺติ  มยญฺเจว  โข ปน คิหีนํ อาโรเจสฺสาม ๑-
นาสฺสสฺส   มนาปํ   ยํ   โข  ปนสฺส  อมนาปํ  กถํ  นุ  ๒-  มยํ  เตน
สมุทาจเรยฺยาม    สมฺมนฺนติ    โข   ปน   จีวรปิณฺฑปาตเสนาสนคิลาน-
ปจฺจยเภสชฺชปริกฺขาเรน  ยํ  ตุโม  กริสฺสติ  ตุโมว  เตน  ปญฺญายิสฺสตีติ
เอวรูปํ  โข  โมคฺคลฺลาน  สตฺถารํ  สาวกา  สีลโต  รกฺขนฺติ เอวรูโป จ
ปน สตฺถา สาวเกหิ สีลโต รกฺขํ ปจฺจาสึสติ ฯ
     {๑๐๐.๕}   ปุน  จปรํ  โมคฺคลฺลาน อิเธกจฺโจ สตฺถา อปริสุทฺธาชีโว
สมาโน    ปริสุทฺธาชีโวมฺหีติ    ปฏิชานาติ    ปริสุทฺโธ   เม   อาชีโว
ปริโยทาโต  อสงฺกิลิฏฺโฐติ  ตเมนํ  สาวกา  เอวํ  ชานนฺติ  อยํ  โข ภวํ
สตฺถา     อปริสุทฺธาชีโว    สมาโน    ปริสุทฺธาชีโวมฺหีติ    ปฏิชานาติ
ปริสุทฺโธ   เม  อาชีโว  ปริโยทาโต  อสงฺกิลิฏฺโฐติ  มยญฺเจว  โข  ปน
คิหีนํ  อาโรเจยฺยาม  นาสฺสสฺส  มนาปํ  ยํ  โข ปนสฺส อมนาปํ กถํ นุ ๒-
มยํ   เตน  สมุทาจเรยฺยาม  สมฺมนฺนติ  โข  ปน  จีวรปิณฺฑปาตเสนาสน-
คิลานปจฺจยเภสชฺชปริกฺขาเรน    ยํ    ตุโม   กริสฺสติ   ตุโมว   เตน
@เชิงอรรถ: ๑ ม. ยุ. อาโรเจยฺยาม ฯ  ๒ ม. นํ ฯ
ปญฺญายิสฺสตีติ   เอวรูปํ   โข   โมคฺคลฺลาน  สตฺถารํ  สาวกา  อาชีวโต
รกฺขนฺติ เอวรูโป จ ปน สตฺถา สาวเกหิ อาชีวโต รกฺขํ ปจฺจาสึสติ ฯ
     {๑๐๐.๖}   ปุน จปรํ โมคฺคลฺลาน อิเธกจฺโจ สตฺถา อปริสุทฺธธมฺมเทสโน
สมาโน   ปริสุทฺธธมฺมเทสโนมฺหีติ  ปฏิชานาติ  ปริสุทฺธา  เม  ธมฺมเทสนา
ปริโยทาตา  อสงฺกิลิฏฺฐาติ  ตเมนํ  สาวกา  เอวํ  ชานนฺติ  อยํ  โข ภวํ
สตฺถา      อปริสุทฺธธมฺมเทสโน     สมาโน     ปริสุทฺธธมฺมเทสโนมฺหีติ
ปฏิชานาติ   ปริสุทฺธา   เม   ธมฺมเทสนา   ปริโยทาตา   อสงฺกิลิฏฺฐาติ
มยญฺเจว   โข   ปน   คิหีนํ  อาโรเจยฺยาม  นาสฺสสฺส  มนาปํ  ยํ  โข
ปนสฺส   อมนาปํ   กถํ   นุ  ๑-  มยํ  เตน  สมุทาจเรยฺยาม  สมฺมนฺนติ
โข        ปน       จีวรปิณฺฑปาตเสนาสนคิลานปจฺจยเภสชฺชปริกฺขาเรน
ยํ    ตุโม    กริสฺสติ   ตุโมว   เตน   ปญฺญายิสฺสตีติ   เอวรูปํ   โข
โมคฺคลฺลาน    สตฺถารํ    สาวกา   ธมฺมเทสนโต   รกฺขนฺติ   เอวรูโป
จ ปน สตฺถา สาวเกหิ ธมฺมเทสนโต รกฺขํ ปจฺจาสึสติ ฯ
     {๑๐๐.๗}   ปุน จปรํ โมคฺคลฺลาน อิเธกจฺโจ สตฺถา อปริสุทฺธเวยฺยากรโณ
สมาโน   ปริสุทฺธเวยฺยากรโณมฺหีติ  ปฏิชานาติ  ปริสุทฺธํ  เม  เวยฺยากรณํ
ปริโยทาตํ  อสงฺกิลิฏฺฐนฺติ  ตเมนํ  สาวกา  เอวํ  ชานนฺติ  อยํ  โข  ภวํ
สตฺถา     อปริสุทฺธเวยฺยากรโณ     สมาโน    ปริสุทฺธเวยฺยากรโณมฺหีติ
ปฏิชานาติ    ปริสุทฺธํ    เม   เวยฺยากรณํ   ปริโยทาตํ   อสงฺกิลิฏฺฐนฺติ
มยญฺเจว   โข   ปน   คิหีนํ  อาโรเจยฺยาม  นาสฺสสฺส  มนาปํ  ยํ  โข
ปนสฺส   อมนาปํ   กถํ   นุ  ๑-  มยํ  เตน  สมุทาจเรยฺยาม  สมฺมนฺนติ
โข        ปน       จีวรปิณฺฑปาตเสนาสนคิลานปจฺจยเภสชฺชปริกฺขาเรน
@เชิงอรรถ: ๑ ม. นํ ฯ
ยํ  ตุโม  กริสฺสติ  ตุโมว  เตน  ปญฺญายิสฺสตีติ  เอวรูปํ  โข โมคฺคลฺลาน
สตฺถารํ   สาวกา   เวยฺยากรณโต   รกฺขนฺติ  เอวรูโป  จ  ปน  สตฺถา
สาวเกหิ เวยฺยากรณโต รกฺขํ ปจฺจาสึสติ ฯ
     {๑๐๐.๘}   ปุน  จปรํ  โมคฺคลฺลาน  อิเธกจฺโจ  สตฺถา  อปริสุทฺธ-
ญาณทสฺสโน      สมาโน      ปริสุทฺธญาณทสฺสโนมฺหีติ      ปฏิขานาติ
ปริสุทฺธํ   เม   ญาณทสฺสนํ   ปริโยทาตํ   อสงฺกิลิฏฺฐนฺติ  ตเมนํ  สาวกา
เอวํ   ชานนฺติ   อยํ   โข   ภวํ  สตฺถา  อปริสุทฺธญาณทสฺสโน  สมาโน
ปริสุทฺธญาณทสฺสโนมฺหีติ     ปฏิชานาติ     ปริสุทฺธํ    เม    ญาณทสฺสนํ
ปริโยทาตํ   อสงฺกิลิฏฺฐนฺติ   มยญฺเจว   โข   ปน  คิหีนํ  อาโรเจยฺยาม
นาสฺสสฺส  มนาปํ ยํ โข ปนสฺส อมนาปํ กถํ นุ ๑- มยํ เตน สมุทาจเรยฺยาม
สมฺมนฺนติ   โข   ปน   จีวรปิณฺฑปาตเสนาสนคิลานปจฺจยเภสชฺชปริกฺขาเรน
ยํ  ตุโม  กริสฺสติ  ตุโมว  เตน  ปญฺญายิสฺสตีติ  เอวรูปํ โข โมคฺคลฺลาน
สตฺถารํ   สาวกา   ญาณทสฺสนโต   รกฺขนฺติ   เอวรูโป  จ  ปน  สตฺถา
สาวเกหิ ญาณทสฺสนโต รกฺขํ ปจฺจาสึสติ ฯ
     {๑๐๐.๙}   อิเม  โข  [๒]-  โมคฺคลฺลาน  ปญฺจ  สตฺถาโร สนฺโต
สํวิชฺชมานา   โลกสฺมึ   ฯ  อหํ  โข  โมคฺคลฺลาน  ปริสุทฺธสีโล  สมาโน
ปริสุทฺธสีโลมฺหีติ     ปฏิชานามิ    ปริสุทฺธํ    เม    สีลํ    ปริโยทาตํ
อสงฺกิลิฏฺฐนฺติ   น  จ  มํ  สาวกา  สีลโต  รกฺขนฺติ  น  จาหํ  สาวเกหิ
สีลโต   รกฺขํ  ปจฺจาสึสามิ  ฯ  ปริสุทฺธาชีโว  สมาโน  ปริสุทฺธาชีโวมฺหีติ
ปฏิชานามิ    ปริสุทฺโธ    เม    อาชีโว   ปริโยทาโต   อสงฺกิลิฏฺโฐติ
น    จ    มํ   สาวกา   อาชีวโต   รกฺขนฺติ   น   จาหํ   สาวเกหิ
@เชิงอรรถ: ๑ ม. นํ ฯ  ๒ ม. ยุ. ปน ฯ
อาชีวโต    รกฺขํ    ปจฺจาสึสามิ    ฯ    ปริสุทฺธธมฺมเทสโน   สมาโน
ปริสุทฺธธมฺมเทสโนมฺหีติ    ปฏิชานามิ    ปริสุทฺธา    เม    ธมฺมเทสนา
ปริโยทาตา  อสงฺกิลิฏฺฐาติ  น  จ มํ สาวกา ธมฺมเทสนโต รกฺขนฺติ น จาหํ
สาวเกหิ   ธมฺมเทสนโต   รกฺขํ   ปจฺจาสึสามิ   ฯ  ปริสุทฺธเวยฺยากรโณ
สมาโน   ปริสุทฺธเวยฺยากรโณมฺหีติ  ปฏิชานามิ  ปริสุทฺธํ  เม  เวยฺยากรณํ
ปริโยทาตํ    อสงฺกิลิฏฺฐนฺติ    น    จ   มํ   สาวกา   เวยฺยากรณโต
รกฺขนฺติ   น   จาหํ   สาวเกหิ   เวยฺยากรณโต  รกฺขํ  ปจฺจาสึสามิ  ฯ
ปริสุทฺธญาณทสฺสโน     สมาโน     ปริสุทฺธญาณทสฺสโนมฺหีติ    ปฏิชานามิ
ปริสุทฺธํ   เม  ญาณทสฺสนํ  ปริโยทาตํ  อสงฺกิลิฏฺฐนฺติ  น  จ  มํ  สาวกา
ญาณทสฺสนโต    รกฺขนฺติ   น   จาหํ   สาวเกหิ   ญาณทสฺสนโต   รกฺขํ
ปจฺจาสึสามีติ ฯ
                    กกุธวคฺโค ปญฺจโม ฯ
                        ตสฺสุทฺทานํ
        เทฺว สมฺปทา พฺยากรณํ      ผาสุกุปฺเปน ปญฺจมํ ๑-
        สุตํ กถญฺจ อรญฺญํ            สีหกกุเธน เต ทสาติ ๒- ฯ
                  ทุติโย ปณฺณาสโก สมตฺโต ฯ
                      -----------
@เชิงอรรถ: ๑ ม. ผาสุอกุปฺปปญฺจมํ ฯ  ๒ ม. ... กถา อารญฺญโก สีโห จ กกฺโธ ทสาติ ฯ
                      ตติยปณฺณาสโก
                    ผาสุวิหารวคฺโค ปฐโม
     [๑๐๑]   ปญฺจิเม   ภิกฺขเว   เสขเวสารชฺชกรณา  ธมฺมา  กตเม
ปญฺจ   อิธ   ภิกฺขเว   ภิกฺขุ   สทฺโธ   โหติ   สีลวา  โหติ  พหุสฺสุโต
โหติ   อารทฺธวิริโย   โหติ   ปญฺญวา  โหติ  ฯ  ยํ  โข  ๑-  ภิกฺขเว
อสฺสทฺธสฺส   สารชฺชํ   โหติ   สทฺธสฺส   ตํ  สารชฺชํ  น  โหติ  ตสฺมายํ
ธมฺโม   เสขเวสารชฺชกรโณ   ฯ  ยํ  ภิกฺขเว  ทุสฺสีลสฺส  สารชฺชํ  โหติ
สีลวโต  ตํ  สารชฺชํ  น  โหติ  ตสฺมายํ  ธมฺโม  เสขเวสารชฺชกรโณ  ฯ
ยํ   ภิกฺขเว   อปฺปสฺสุตสฺส   สารชฺชํ   โหติ   พหุสฺสุตสฺส   ตํ  สารชฺชํ
น  โหติ  ตสฺมายํ  ธมฺโม  เสขเวสารชฺชกรโณ  ฯ  ยํ  ภิกฺขเว  กุสีตสฺส
สารชฺชํ   โหติ   อารทฺธวิริยสฺส  ตํ  สารชฺชํ  น  โหติ  ตสฺมายํ  ธมฺโม
เสขเวสารชฺชกรโณ    ฯ   ยํ   ภิกฺขเว   ทุปฺปญฺญสฺส   สารชฺชํ   โหติ
ปญฺญวโต  ตํ  สารชฺชํ  น  โหติ  ตสฺมายํ  ธมฺโม  เสขเวสารชฺชกรโณ ฯ
อิเม โข ภิกฺขเว ปญฺจ เสขเวสารชฺชกรณา ธมฺมาติ ฯ
     [๑๐๒]   ปญฺจหิ ภิกฺขเว ธมฺเมหิ สมนฺนาคโต ภิกฺขุ อุสฺสงฺกิตปริสงฺกิโต
โหติ      ปาปภิกฺขูติ     อปิ     อกุปฺปธมฺโม     กตเมหิ     ปญฺจหิ
อิธ  ภิกฺขเว  ภิกฺขุ  เวสิยโคจโร  ๒-  วา  โหติ วิธวาโคจโร วา โหติ
ถุลฺลกุมารีโคจโร   วา   โหติ   ปณฺฑกโคจโร  วา  โหติ  ภิกฺขุนีโคจโร
วา   โหติ   อิเมหิ   โข  ภิกฺขเว  ปญฺจหิ  ธมฺเมหิ  สมนฺนาคโต  ภิกฺขุ
@เชิงอรรถ: ๑ ม. ยุ. โขสทฺโท นตฺถิ ฯ  ๒ โป. ม. เวสิยาโคจโร ฯ
อุสฺสงฺกิตปริสงฺกิโต โหติ ปาปภิกฺขูติ อปิ อกุปฺปธมฺโมติ ฯ
     [๑๐๓]   ปญฺจหิ  ภิกฺขเว  องฺเคหิ  สมนฺนาคโต  มหาโจโร  สนฺธึปิ
ฉินฺทติ  นิลฺโลปํปิ  หรติ  เอกาคาริกํปิ  กโรติ  ปริปนฺเถปิ  ติฏฺฐติ กตเมหิ
ปญฺจหิ  อิธ  ภิกฺขเว  มหาโจโร  วิสมนิสฺสิโต  จ  โหติ  คหนนิสฺสิโต  จ
พลวนิสฺสิโต จ โภคจาคี จ เอกจารี จ ฯ
     {๑๐๓.๑}   กถญฺจ   ภิกฺขเว  มหาโจโร  วิสมนิสฺสิโต  โหติ  อิธ
ภิกฺขเว   มหาโจโร   นทีวิทุคฺคํ   วา   นิสฺสิโต  โหติ  ปพฺพตวิสมํ  วา
เอวํ โข ภิกฺขเว มหาโจโร วิสมนิสฺสิโต โหติ ฯ
     {๑๐๓.๒}   กถญฺจ   ภิกฺขเว  มหาโจโร  คหนนิสฺสิโต  โหติ  อิธ
ภิกฺขเว    มหาโจโร    ติณคหนํ    วา    นิสฺสิโต   โหติ   รุกฺขคหนํ
วา   โรธํ  ๑-  วา  มหาวนสณฺฑํ  วา  เอวํ  โข  ภิกฺขเว  มหาโจโร
คหนนิสฺสิโต โหติ ฯ
     {๑๐๓.๓}   กถญฺจ   ภิกฺขเว   มหาโจโร   พลวนิสฺสิโต   โหติ
อิธ   ภิกฺขเว   มหาโจโร  ราชานํ  วา  ราชมหามตฺตานํ  วา  นิสฺสิโต
โหติ   ตสฺส   เอวํ  โหติ  สเจ  มํ  โกจิ  กิญฺจิ  วกฺขติ  อิเม  [๒]-
ราชาโน   วา  ราชมหามตฺตา  วา  ปริโยธาย  อตฺถํ  ภณิสฺสนฺตีติ  สเจ
นํ   โกจิ  กิญฺจิ  อาห  ตฺยสฺส  ๓-  ราชาโน  วา  ราชมหามตฺตา  วา
ปริโยธาย   อตฺถํ   ภณนฺติ  เอวํ  โข  ภิกฺขเว  มหาโจโร  พลวนิสฺสิโต
โหติ ฯ
     {๑๐๓.๔}   กถญฺจ  ภิกฺขเว  มหาโจโร  โภคจาคี โหติ อิธ ภิกฺขเว
มหาโจโร  อฑฺโฒ  โหติ  มหทฺธโน  มหาโภโค  ตสฺส  เอวํ  โหติ  สเจ
มํ    โกจิ   กิญฺจิ   วกฺขติ   อิโต   โภเคน   ปฏิสนฺถริสฺสามีติ   สเจ
@เชิงอรรถ: ๑ สี. โคธํ วา ฯ  ๒ ม. เม ฯ  ๓ โป. ม. ยุ. ตฺยาสฺส ฯ อีทิสฏฺฐาเน อีทิสเมว ฯ
นํ  โกจิ  กิญฺจิ  อาห  ตโต  ๑-  โภเคน  ปฏิสนฺถรติ  เอวํ โข ภิกฺขเว
มหาโจโร โภคจาคี โหติ ฯ
     {๑๐๓.๕}   กถญฺจ  ภิกฺขเว  มหาโจโร  เอกจารี โหติ อิธ ภิกฺขเว
มหาโจโร  เอกโก  นิคฺคหณานิ  ๒-  กตฺตา  โหติ  ตํ กิสฺส เหตุ มา เม
คุยฺหมนฺตา   พหิทฺธา   สมฺเภทํ  อคมํสูติ  เอวํ  โข  ภิกฺขเว  มหาโจโร
เอกจารี  โหติ  ฯ  อิเมหิ โข ภิกฺขเว ปญฺจหงฺเคหิ สมนฺนาคโต มหาโจโร
สนฺธึปิ ฉินฺทติ นิลฺโลปํปิ หรติ เอกาคาริกํปิ กโรติ ปริปนฺเถปิ ติฏฺฐติ ฯ
     {๑๐๓.๖}   เอวเมว  โข  ภิกฺขเว  ปญฺจหิ  ธมฺเมหิ  สมนฺนาคโต
ปาปภิกฺขุ  ขตํ  อุปหตํ  อตฺตานํ  ปริหรติ  สาวชฺโช  จ  โหติ  สานุวชฺโช
วิญฺญูนํ   ๓-   พหุญฺจ   อปุญฺญํ   ปสวติ   กตเมหิ  ปญฺจหิ  อิธ  ภิกฺขเว
ปาปภิกฺขุ   วิสมนิสฺสิโต   จ   โหติ   คหนนิสฺสิโต   จ  พลวนิสฺสิโต  จ
โภคจาคี จ เอกจารี จ ฯ
     {๑๐๓.๗}   กถญฺจ  ภิกฺขเว  ปาปภิกฺขุ วิสมนิสฺสิโต โหติ อิธ ภิกฺขเว
ปาปภิกฺขุ   วิสเมน  กายกมฺเมน  สมนฺนาคโต  โหติ  วิสเมน  วจีกมฺเมน
สมนฺนาคโต   โหติ  วิสเมน  มโนกมฺเมน  สมนฺนาคโต  โหติ  เอวํ  โข
ภิกฺขเว ปาปภิกฺขุ วิสมนิสฺสิโต โหติ ฯ
     {๑๐๓.๘}   กถญฺจ   ภิกฺขเว   ปาปภิกฺขุ  คหนนิสฺสิโต  โหติ  อิธ
ภิกฺขเว    ปาปภิกฺขุ    มิจฺฉาทิฏฺฐิโก   โหติ   อนฺตคฺคาหิกาย   ทิฏฺฐิยา
สมนฺนาคโต เอวํ โข ภิกฺขเว ปาปภิกฺขุ คหนนิสฺสิโต โหติ ฯ
     {๑๐๓.๙}   กถญฺจ   ภิกฺขเว   ปาปภิกฺขุ  พลวนิสฺสิโต  โหติ  อิธ
ภิกฺขเว    ปาปภิกฺขุ   ราชานํ   วา   ราชมหามตฺตานํ   วา   นิสฺสิโต
โหติ  ตสฺส  เอวํ  โหติ  สเจ  มํ โกจิ กิญฺจิ วกฺขติ อิเม [๔]- ราชาโน
@เชิงอรรถ: ๑ โป. อิโต ฯ  ๒ ม. เอกโกว คหณานิ ฯ  ๓ โป. สานุวชฺโช จ วิญฺญูนํ ฯ
@อิโต ปรํ อทิสเมว ฯ  ๔ ม. เม ฯ
วา   ราชมหามตฺตา  วา  ปริโยธาย  อตฺถํ  ภณิสฺสนฺตีติ  สเจ  นํ  โกจิ
กิญฺจิ   อาห   ตฺยสฺส   ราชาโน   วา  ราชมหามตฺตา  วา  ปริโยธาย
อตฺถํ ภณนฺติ เอวํ โข ภิกฺขเว ปาปภิกฺขุ พลวนิสฺสิโต โหติ ฯ
     {๑๐๓.๑๐}   กถญฺจ  ภิกฺขเว  ปาปภิกฺขุ  โภคจาคี โหติ อิธ ภิกฺขเว
ปาปภิกฺขุ   ลาภี  โหติ  จีวรปิณฺฑปาตเสนาสนคิลานปจฺจยเภสชฺชปริกฺขารานํ
ตสฺส  เอวํ  โหติ  สเจ  โกจิ  กิญฺจิ วกฺขติ อิโต ลาเภน ปฏิสนฺถิรสฺสามีติ
สเจ  นํ   โกจิ  กิญฺจิ  อาห  ตโต  ลาเภน ปฏิสนฺถรติ เอวํ โข ภิกฺขเว
ปาปภิกฺขุ โภคจาคี โหติ ฯ
     {๑๐๓.๑๑}   กถญฺจ  ภิกฺขเว  ปาปภิกฺขุ  เอกจารี โหติ อิธ ภิกฺขเว
ปาปภิกฺขุ   เอกโก   ๑-   ปจฺจนฺติเมสุ  ชนปเทสุ  นิวาสํ  กปฺเปติ  โส
ตตฺถ   กุลานิ  อุปสงฺกมนฺโต  ลาภํ  ลภติ  เอวํ  โข  ภิกฺขเว  ปาปภิกฺขุ
เอกจารี โหติ ฯ
     {๑๐๓.๑๒}   อิเมหิ   โข  ภิกฺขเว  ปญฺจหิ  ธมฺเมหิ  สมนฺนาคโต
ปาปภิกฺขุ  ขตํ  อุปหตํ  อตฺตานํ  ปริหรติ  สาวชฺโช  จ  โหติ  สานุวชฺโช
วิญฺญูนํ พหุญฺจ อปุญฺญํ ปสวตีติ ฯ
     [๑๐๔]   ปญฺจหิ   ภิกฺขเว   ธมฺเมหิ  สมนฺนาคโต  ภิกฺขุ  สมเณสุ
สมณสุขุมาโล    โหติ    กตเมหิ    ปญฺจหิ    อิธ    ภิกฺขเว    ภิกฺขุ
ยาจิโตว   พหุลํ   จีวรํ   ปริภุญฺชติ   อปฺปํ   อยาจิโต  ยาจิโตว  พหุลํ
ปิณฺฑปาตํ    ปริภุญฺชติ   อปฺปํ   อยาจิโต   ยาจิโตว   พหุลํ   เสนาสนํ
ปริภุญฺชติ   อปฺปํ   อยาจิโต  ยาจิโตว  พหุลํ  คิลานปจฺจยเภสชฺชปริกฺขารํ
ปริภุญฺชติ   อปฺปํ   อยาจิโต   เยหิ   โข   ปน   สพฺรหฺมจารีหิ   สทฺธึ
@เชิงอรรถ: ๑ ม. เอกโกว ฯ
วิหรติ   ตฺยสฺส   มนาเปเนว   พหุลํ   กายกมฺเมน   สมุทาจรนฺติ  อปฺปํ
อมนาเปน  มนาเปเนว  พหุลํ  วจีกมฺเมน  สมุทาจรนฺติ  อปฺปํ  อมนาเปน
มนาเปเนว    พหุลํ    มโนกมฺเมน    สมุทาจรนฺติ   อปฺปํ   อมนาเปน
มนาปํเยว  [๑]-  อุปหารํ  อุปหรนฺติ  อปฺปํ  อมนาปํ  ยานิ โข ปน ตานิ
เวทยิตานิ  ปิตฺตสมุฏฺฐานานิ  วา  เสมฺหสมุฏฺฐานานิ  วา  วาตสมุฏฺฐานานิ
วา   สนฺนิปาติกานิ   วา   อุตุปริณามชานิ   วา   วิสมปริหารชานิ  วา
โอปกฺกมิกานิ  วา  กมฺมวิปากชานิ  วา  ตานิสฺส  น  พหุเทว  อุปฺปชฺชนฺติ
อปฺปาพาโธ   โหติ  จตุนฺนํ  ฌานานํ  อาภิเจตสิกานํ  ทิฏฺฐธมฺมสุขวิหารานํ
นิกามลาภี   โหติ   อกิจฺฉลาภี   อกสิรลาภี   อาสวานํ   ขยา  อนาสวํ
เจโตวิมุตฺตึ   ปญฺญาวิมุตฺตึ   ทิฏฺเฐว   ธมฺเม   สยํ  อภิญฺญา  สจฺฉิกตฺวา
อุปสมฺปชฺช   วิหรติ   อิเมหิ  โข  ภิกฺขเว  ปญฺจหิ  ธมฺเมหิ  สมนฺนาคโต
ภิกฺขุ สมเณสุ สมณสุขุมาโล โหติ ฯ
     {๑๐๔.๑}   ยํ  หิ  ตํ  ภิกฺขเว  สมฺมา  วทมาโน  วเทยฺย สมเณสุ
สมณสุขุมาโลติ   มเมว  ตํ  ภิกฺขเว  สมฺมา  วทมาโน  วเทยฺย  สมเณสุ
สมณสุขุมาโลติ  อหํ  หิ  ๒-  ภิกฺขเว ยาจิโตว พหุลํ จีวรํ ปริภุญฺชามิ อปฺปํ
อยาจิโต  ยาจิโตว  พหุลํ  ปิณฺฑปาตํ  ปริภุญฺชามิ  อปฺปํ อยาจิโต ยาจิโตว
พหุลํ    เสนาสนํ    ปริภุญฺชามิ    อปฺปํ   อยาจิโต   ยาจิโตว   พหุลํ
คิลานปจฺจยเภสชฺชปริกฺขารํ   ปริภุญฺชามิ  อปฺปํ  อยาจิโต  เยหิ  โข  ปน
ภิกฺขูหิ  สทฺธึ วิหรามิ เต มํ มนาเปเนว พหุลํ กายกมฺเมน สมุทาจรนฺติ อปฺปํ
@เชิงอรรถ: ๑ โป. พหุลํ ฯ  ๒ โป. ยุ. หิสทฺโท น ทิสฺสติ ฯ
อมนาเปน  มนาเปเนว  พหุลํ  วจีกมฺเมน  สมุทาจรนฺติ  อปฺปํ  อมนาเปน
มนาเปเนว  พหุลํ  มโนกมฺเมน  สมุทาจรนฺติ  อปฺปํ  อมนาเปน มนาปํเยว
อุปหารํ   อุปหรนฺติ   อปฺปํ   อมนาปํ  ยานิ  โข  ปน  ตานิ  เวทยิตานิ
ปิตฺตสมุฏฺฐานานิ     วา    เสมฺหสมุฏฺฐานานิ    วา    วาตสมุฏฺฐานานิ
วา   สนฺนิปาติกานิ   วา   อุตุปริณามชานิ   วา   วิสมปริหารชานิ  วา
โอปกฺกมิกานิ  วา  กมฺมวิปากชานิ  วา  ตานิ  เม  น พหุเทว อุปฺปชฺชนฺติ
อปฺปาพาโธหมสฺมิ  จตุนฺนํ [๑]- ฌานานํ อาภิเจตสิกานํ ทิฏฺฐธมฺมสุขวิหารานํ
นิกามลาภี   อกิจฺฉลาภี   อกสิรลาภี  อาสวานํ  ขยา  ฯเปฯ  สจฺฉิกตฺวา
อุปสมฺปชฺช  วิหรามิ  ฯ  ยํ  หิ ตํ ภิกฺขเว สมฺมา วทมาโน วเทยฺย สมเณสุ
สมณสุขุมาโลติ   มเมว  ตํ  ภิกฺขเว  สมฺมา  วทมาโน  วเทยฺย  สมเณสุ
สมณสุขุมาโลติ ฯ
     [๑๐๕]   ปญฺจิเม   ภิกฺขเว   ผาสุวิหารา   กตเม   ปญฺจ   อิธ
ภิกฺขเว   ภิกฺขุโน   เมตฺตํ   กายกมฺมํ   ปจฺจุปฏฺฐิตํ  โหติ  สพฺรหฺมจารีสุ
อาวิ   เจว  รโห  จ  เมตฺตํ  วจีกมฺมํ  ปจฺจุปฏฺฐิตํ  โหติ  สพฺรหฺมจารีสุ
อาวิ  เจว  รโห  จ  เมตฺตํ  มโนกมฺมํ  ปจฺจุปฏฺฐิตํ  โหติ  สพฺรหฺมจารีสุ
อาวิ  เจว  รโห  จ  ยานิ  ตานิ  สีลานิ  อขณฺฑานิ อจฺฉิทฺทานิ อสพลานิ
อกมฺมาสานิ        ภุชิสฺสานิ        วิญฺญูปสตฺถานิ       อปรามฏฺฐานิ
สมาธิสํวตฺตนิกานิ     ตถารูเปหิ     สีเลหิ    สีลสามญฺญคโต    วิหรติ
สพฺรหฺมจารีหิ  อาวิ  เจว  รโห  จ  ยายํ ทิฏฺฐิ อริยา นิยฺยานิกา นิยฺยาติ
ตกฺกรสฺส    สมฺมาทุกฺขกฺขยาย    ตถารูปาย   ทิฏฺฐิยา   ทิฏฺฐิสามญฺญคโต
@เชิงอรรถ: ๑ โป. สี. โข ปน ฯ ม. โข ปนสฺมิ ฯ
วิหรติ สพฺรหฺมจารีหิ อาวิ เจว รโห จ อิเม โข ภิกฺขเว ปญฺจ ผาสุวิหาราติ ฯ
     [๑๐๖]   เอกํ  สมยํ  ภควา  โกสมฺพิยํ  วิหรติ  โฆสิตาราเม  ฯ
อถโข   อายสฺมา   อานนฺโท   เยน  ภควา  เตนุปสงฺกมิ  อุปสงฺกมิตฺวา
ภควนฺตํ     อภิวาเทตฺวา    เอกมนฺตํ    นิสีทิ    เอกมนฺตํ    นิสินฺโน
โข   อายสฺมา   อานนฺโท   ภควนฺตํ   เอตทโวจ   กิตฺตาวตา  นุ  โข
ภนฺเต  ภิกฺขุสงฺโฆ  วิหรนฺโต  ผาสุํ  วิหเรยฺยาติ  ฯ  ยโต  โข  อานนฺท
ภิกฺขุ  อตฺตนา  [๑]-  สีลสมฺปนฺโน  โหติ  โน  ปรํ  อธิสีเล  สมฺปวตฺตา
เอตฺตาวตาปิ โข อานนฺท ภิกฺขุสงฺโฆ วิหรนฺโต ผาสุํ วิหเรยฺยาติ ฯ
     {๑๐๖.๑}   สิยา  ปน  ภนฺเต  อญฺโญปิ  ปริยาโย  ยถา ภิกฺขุสงฺโฆ
วิหรนฺโต  ผาสุํ  วิหเรยฺยาติ  ฯ  สิยา  อานนฺทาติ ๒- ภควา อโวจ ยโต
โข   อานนฺท  ภิกฺขุ  อตฺตนา  จ  สีลสมฺปนฺโน  โหติ  โน  ปรํ  อธิสีเล
สมฺปวตฺตา   อตฺตานุเปกฺขี   จ   โหติ   โน  ปรานุเปกฺขี  เอตฺตาวตาปิ
โข อานนฺท ภิกฺขุสงฺโฆ วิหรนฺโต ผาสุํ วิหเรยฺยาติ ฯ
     {๑๐๖.๒}   สิยา  ปน  ภนฺเต  อญฺโญปิ  ปริยาโย  ยถา ภิกฺขุสงฺโฆ
วิหรนฺโต  ผาสุํ  วิหเรยฺยาติ  ฯ  สิยา  อานนฺทาติ ภควา อโวจ ยโต โข
อานนฺท  ภิกฺขุ  อตฺตนา  จ  สีลสมฺปนฺโน  โหติ โน ปรํ อธิสีเล สมฺปวตฺตา
อตฺตานุเปกฺขี  จ  โหติ  โน  ปรานุเปกฺขี  อปฺปญฺญาโต  จ โหติ เตน ๓-
อปฺปญฺญาติเกน    ๔-   โน   ปริตสฺสติ   เอตฺตาวตาปิ   โข   อานนฺท
@เชิงอรรถ: ๑ โป. ยุ. จ ฯ ๒ ม. สิยา อานนฺท ยโต โข ฯ ๓ ม. เตน จ ฯ
@๔ ม. อปุปญฺญาตเกน ฯ อิโต ปรํ อีทิสเมว ฯ
ภิกฺขุสงฺโฆ วิหรนฺโต ผาสุํ วิหเรยฺยาติ ฯ
     {๑๐๖.๓}   สิยา  ปน  ภนฺเต  อญฺโญปิ  ปริยาโย  ยถา ภิกฺขุสงฺโฆ
วิหรนฺโต  ผาสุํ  วิหเรยฺยาติ  ฯ  สิยา  อานนฺทาติ ๑- ภควา อโวจ ยโต
โข   อานนฺท  ภิกฺขุ  อตฺตนา  จ  สีลสมฺปนฺโน  โหติ  โน  ปรํ  อธิสีเล
สมฺปวตฺตา   อตฺตานุเปกฺขี   จ  โหติ  โน  ปรานุเปกฺขี  อปฺปญฺญาโต  จ
โหติ    เตน    อปฺปญฺญาติเกน   โน   ปริตสฺสติ   จตุนฺนญฺจ   ฌานานํ
อาภิเจตสิกานํ    ทิฏฺฐธมฺมสุขวิหารานํ    นิกามลาภี   โหติ   อกิจฺฉลาภี
อกสิรลาภี เอตฺตาวตา ๒- โข อานนฺท ภิกฺขุสงฺโฆ วิหรนฺโต ผาสุํ วิหเรยฺยาติ ฯ
     {๑๐๖.๔}   สิยา  ปน  ภนฺเต  อญฺโญปิ  ปริยาโย  ยถา ภิกฺขุสงฺโฆ
วิหรนฺโต  ผาสุํ  วิหเรยฺยาติ  ฯ  สิยา  อานนฺทาติ ภควา อโวจ ยโต โข
อานนฺท  ภิกฺขุ  อตฺตนา  จ  สีลสมฺปนฺโน  โหติ โน ปรํ อธิสีเล สมฺปวตฺตา
อตฺตานุเปกฺขี   จ  โหติ  โน  ปรานุเปกฺขี  อปฺปญฺญาโต  จ  โหติ  เตน
อปฺปญฺญาติเกน    โน   ปริตสฺสติ   จตุนฺนญฺจ   ฌานานํ   อาภิเจตสิกานํ
ทิฏฺฐธมฺมสุขวิหารานํ     นิกามลาภี    โหติ    อกิจฺฉลาภี    อกสิรลาภี
อาสวานญฺจ   ขยา   อนาสวํ  เจโตวิมุตฺตึ  ปญฺญาวิมุตฺตึ  ทิฏฺเฐว  ธมฺเม
สยํ    อภิญฺญา    สจฺฉิกตฺวา   อุปสมฺปชฺช   วิหรติ   เอตฺตาวตา   โข
อานนฺท   ภิกฺขุสงฺโฆ   วิหรนฺโต   ผาสุํ   วิหเรยฺย   ฯ  อิมมฺหา  จาหํ
อานนฺท   ผาสุวิหารา   อญฺโญ   ผาสุวิหาโร  อุตฺตริตโร  วา  ปณีตตโร
วา นตฺถีติ วทามีติ ฯ
@เชิงอรรถ: ๑ ม. สิยา อานนฺท ยโต โข ฯ  ๒ ม. เอตฺตาวตาปิ ฯ
     [๑๐๗]   ปญฺจหิ  ภิกฺขเว  ธมฺเมหิ  สมนฺนาคโต  ภิกฺขุ  อาหุเนยฺโย
โหติ   ปาหุเนยฺโย   ทกฺขิเณยฺโย   อญฺชลิกรณีโย   อนุตฺตรํ  ปุญฺญกฺเขตฺตํ
โลกสฺส   กตเมหิ   ปญฺจหิ   อิธ   ภิกฺขเว   ภิกฺขุ   สีลสมฺปนฺโน  โหติ
สมาธิสมฺปนฺโน    โหติ   ปญฺญาสมฺปนฺโน   โหติ   วิมุตฺติสมฺปนฺโน   โหติ
วิมุตฺติญาณทสฺสนสมฺปนฺโน   โหติ   อิเมหิ   โข  ภิกฺขเว  ปญฺจหิ  ธมฺเมหิ
สมนฺนาคโต  ภิกฺขุ  อาหุเนยฺโย โหติ ปาหุเนยฺโย ทกฺขิเณยฺโย อญฺชลิกรณีโย
อนุตฺตรํ ปุญฺญกฺเขตฺตํ โลกสฺสาติ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๒๒ หน้าที่ ๑๓๘-๑๕๒.
http://84000.org/tipitaka/pitaka_item/pali_item_s.php?book=22&item=100&items=8&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=22&item=100&items=8&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=22&item=100&items=8&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=22&item=100&items=8&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=22&i=100
             The Pali Atthakatha in Thai :-
http://84000.org/tipitaka/atthapali/read_th.php?B=16&A=1013
             The Pali Atthakatha in Roman :-
http://84000.org/tipitaka/atthapali/read_rm.php?B=16&A=1013
             สารบัญพระไตรปิฎกเล่มที่ ๒๒
http://84000.org/tipitaka/read/?index_22