พระไตรปิฎกเล่มที่ ๒๔ ภาษาบาลี อักษรไทย
พระสุตตันตปิฎกเล่มที่ ๑๖ สุตฺต. องฺ. (๕): ทสก-เอกาทสกนิปาตา

     [๖๙]   เอกํ  สมยํ  ภควา สาวตฺถิยํ วิหรติ เชตวเน อนาถปิณฺฑิกสฺส
อาราเม   ฯ   เตน   โข   ปน  สมเยน  สมฺพหุลา  ภิกฺขู  ปจฺฉาภตฺตํ
ปิณฺฑปาตปฏิกฺกนฺตา      อุปฏฺฐานสาลายํ      สนฺนิสินฺนา     สนฺนิปติตา
อเนกวิหิตํ   ติรจฺฉานกถํ  อนุยุตฺตา  วิหรนฺติ  เสยฺยถีทํ  ราชกถํ  โจรกถํ
มหามตฺตกถํ   เสนากถํ   ภยกถํ   ยุทฺธกถํ   อนฺนกถํ   ปานกถํ  วตฺถกถํ
สยนกถํ  มาลากถํ  คนฺธกถํ  ญาติกถํ  ยานกถํ  คามกถํ  นิคมกถํ  นครกถํ
ชนปทกถํ   อิตฺถีกถํ   สูรกถํ   ๑-  วิสิขากถํ  กุมฺภฏฺฐานกถํ  ปุพฺพเปตกถํ
นานตฺตกถํ โลกกฺขายิกํ สมุทฺทกฺขายิกํ อิติ ภวาภวกถํ อิติ วาติ ฯ
     {๖๙.๑}   อถโข   ภควา   สายณฺหสมยํ   ปฏิสลฺลานา   วุฏฺฐิโต
เยนุปฏฺฐานสาลา    เตนุปสงฺกมิ    อุปสงฺกมิตฺวา    ปญฺญตฺเต   อาสเน
นิสีทิ  นิสชฺช  โข  ภควา  ภิกฺขู  อามนฺเตสิ  กาย  นุตฺถ ภิกฺขเว เอตรหิ
กถาย สนฺนิสินฺนา กา จ ปน โว อนฺตรากถา วิปฺปกตาติ ฯ
     {๖๙.๒}   อิธ   มยํ   ภนฺเต   ปจฺฉาภตฺตํ   ปิณฺฑปาตปฏิกฺกนฺตา
อุปฏฺฐานสาลายํ    สนฺนิสินฺนา    สนฺนิปติตา    อเนกวิหิตํ   ติรจฺฉานกถํ
อนุยุตฺตา  วิหราม  เสยฺยถีทํ  ราชกถํ  โจรกถํ  ฯเปฯ อิติ ภวาภวกถํ อิติ
วาติ  ฯ  น  โข  ปเนตํ  ภิกฺขเว  ตุมฺหากํ  ปฏิรูปํ กุลปุตฺตานํ สทฺธา ๒-
อคารสฺมา   อนคาริยํ   ปพฺพชิตานํ   ยํ  ตุเมฺห  อเนกวิหิตํ  ติรจฺฉานกถํ
อนุยุตฺตา    วิหเรยฺยาถ    เสยฺยถีทํ   ราชกถํ   โจรกถํ   มหามตฺตกถํ
เสนากถํ    ภยกถํ    ยุทฺธกถํ   อนฺนกถํ   ปานกถํ   วตฺถกถํ   สยนกถํ
มาลากถํ    คนฺธกถํ   ญาติกถํ   ยานกถํ   คามกถํ   นิคมกถํ   นครกถํ
ชนปทกถํ    อิตฺถีกถํ    สูรกถํ   วิสิขากถํ   กุมฺภฏฺฐานกถํ   ปุพฺพเปตกถํ
นานตฺตกถํ   โลกกฺขายิกํ   สมุทฺทกฺขายิกํ   อิติ   ภวาภวกถํ   อิติ   วา
ทสยิมานิ   ภิกฺขเว   กถาวตฺถูนิ  กตมานิ  ทส  อปฺปิจฺฉกถา  สนฺตุฏฺฐิกถา
@เชิงอรรถ: ๑ โป. สุรากถํ ฯ   ๒ ม. สทฺธาย ฯ
ปวิเวกกถา     อสํสคฺคกถา    วิริยารมฺภกถา    สีลกถา    สมาธิกถา
ปญฺญากถา   วิมุตฺติกถา   วิมุตฺติญาณทสฺสนกถา  ๑-  อิมานิ  โข  ภิกฺขเว
ทส   กถาวตฺถูนิ   อิเมสํ   เจ   ตุเมฺห   ภิกฺขเว   ทสนฺนํ  กถาวตฺถูนํ
อุปาทายุปาทาย  กถํ  กเถยฺยาถ  อิเมสมฺปิ  จนฺทิมสุริยานํ  เอวํมหิทฺธิกานํ
เอวํมหานุภาวานํ   เตชสา   เตชํ   ปริยาทิเยยฺยาถ   โก  ปน  วาโท
อญฺญติตฺถิยานํ ปริพฺพาชกานนฺติ ฯ
     [๗๐]   เอกํ  สมยํ  ภควา สาวตฺถิยํ วิหรติ เชตวเน อนาถปิณฺฑิกสฺส
อาราเม   ฯ   เตน   โข   ปน  สมเยน  สมฺพหุลา  ภิกฺขู  ปจฺฉาภตฺตํ
ปิณฺฑปาตปฏิกฺกนฺตา      อุปฏฺฐานสาลายํ      สนฺนิสนฺนา     สนฺนิปติตา
อเนกวิหิตํ   ติรจฺฉานกถํ  อนุยุตฺตา  วิหรนฺติ  เสยฺยถีทํ  ราชกถํ  โจรกถํ
มหามตฺตกถํ  ฯเปฯ  อิติ  ภวาภวกถํ อิติ วาติ ฯ อถโข ภควา สายณฺหสมยํ
ปฏิสลฺลานา   วุฏฺฐิโต   เยน  อุปฏฺฐานสาลา  เตนุปสงฺกมิ  อุปสงฺกมิตฺวา
ปญฺญตฺเต  อาสเน  นิสีทิ  นิสชฺช  โข  ภควา  ภิกฺขู อามนฺเตสิ กาย นุตฺถ
ภิกฺขเว เอตรหิ กถาย สนฺนิสินฺนา กา จ ปน โว อนฺตรากถา วิปฺปกตาติ ฯ
     {๗๐.๑}   อิธ   มยํ   ภนฺเต   ปจฺฉาภตฺตํ   ปิณฺฑปาตปฏิกฺกนฺตา
อุปฏฺฐานสาลายํ    สนฺนิสินฺนา    สนฺนิปติตา    อเนกวิหิตํ   ติรจฺฉานกถํ
อนุยุตฺตา วิหราม เสยฺยถีทํ ราชกถํ โจรกถํ ฯเปฯ อิติ ภวาภวกถํ อิติ วา ฯ
     {๗๐.๒}   น   โข  ปเนตํ  ภิกฺขเว  ตุมฺหากํ  ปฏิรูปํ  กุลปุตฺตานํ
สทฺธา    อคารสฺมา   อนคาริยํ   ปพฺพชิตานํ   ยํ   ตุเมฺห   อเนกวิหิตํ
ติรจฺฉานกถํ     อนุยุตฺตา    วิหราม    เสยฺยถีทํ    ราชกถํ    ฯเปฯ
@เชิงอรรถ: ๑ โป. ม. วิมุตฺติ ... กถาติ ฯ
อิติ   ภวาภวกถํ   อิติ   วา   ทสยิมานิ   ภิกฺขเว   ปาสํสานิ  ฐานานิ
กตมานิ   ทส   อิธ   ภิกฺขเว   ภิกฺขุ   อตฺตนา   จ   อปฺปิจฺโฉ  โหติ
อปฺปิจฺฉกถญฺจ     ภิกฺขูนํ    กตฺตา    โหติ    อปฺปิจฺโฉ    จ    ภิกฺขุ
อปฺปิจฺฉกถญฺจ    ภิกฺขูนํ    กตฺตาติ    ปาสํสเมตํ   ฐานํ   อตฺตนา   จ
สนฺตุฏฺโฐ    โหติ    สนฺตุฏฺฐิกถญฺจ   ภิกฺขูนํ   กตฺตา   โหติ   สนฺตุฏฺโฐ
ภิกฺขุ    สนฺตุฏฺฐิกถญฺจ   ภิกฺขูนํ   กตฺตาติ   ปาสํสเมตํ   ฐานํ   อตฺตนา
จ   ปวิวิตฺโต   โหติ   ปวิเวกกถญฺจ   ภิกฺขูนํ   กตฺตา  โหติ  ปวิวิตฺโต
ภิกฺขุ   ปวิเวกกถญฺจ   ภิกฺขูนํ   กตฺตาติ   ปาสํสเมตํ  ฐานํ  อตฺตนา  จ
อสํสฏฺโฐ    โหติ    อสํสฏฺฐกถญฺจ   ภิกฺขูนํ   กตฺตา   โหติ   อสํสฏฺโฐ
ภิกฺขุ   อสํสฏฺฐกถญฺจ   ภิกฺขูนํ   กตฺตาติ   ปาสํสเมตํ  ฐานํ  อตฺตนา  จ
อารทฺธวิริโย     โหติ    วิริยารมฺภกถญฺจ    ภิกฺขูนํ    กตฺตา    โหติ
อารทฺธวิริโย    ภิกฺขุ   วิริยารมฺภกถญฺจ   ภิกฺขูนํ   กตฺตาติ   ปาสํสเมตํ
ฐานํ    อตฺตนา    จ   สีลสมฺปนฺโน   โหติ   สีลสมฺปทากถญฺจ   ภิกฺขูนํ
กตฺตา   โหติ   สีลสมฺปนฺโน   ภิกฺขุ   สีลสมฺปทากถญฺจ   ภิกฺขูนํ  กตฺตาติ
ปาสํสเมตํ   ฐานํ  อตฺตนา  จ  สมาธิสมฺปนฺโน  โหติ  สมาธิสมฺปทากถญฺจ
ภิกฺขูนํ    กตฺตา    โหติ    สมาธิสมฺปนฺโน   ภิกฺขุ   สมาธิสมฺปทากถญฺจ
ภิกฺขูนํ    กตฺตาติ    ปาสํสเมตํ   ฐานํ   อตฺตนา   จ   ปญฺญาสมฺปนฺโน
โหติ    ปญฺญาสมฺปทากถญฺจ    ภิกฺขูนํ    กตฺตา   โหติ   ปญฺญาสมฺปนฺโน
ภิกฺขุ      ปญฺญาสมฺปทากถญฺจ      ภิกฺขูนํ      กตฺตาติ     ปาสํสเมตํ
ฐานํ    อตฺตนา    จ    วิมุตฺติสมฺปนฺโน    โหติ    วิมุตฺติสมฺปทากถญฺจ
ภิกฺขูนํ    กตฺตา    โหติ    วิมุตฺติสมฺปนฺโน   ภิกฺขุ   วิมุตฺติสมฺปทากถญฺจ
ภิกฺขูนํ   กตฺตาติ  ปาสํสเมตํ  ฐานํ  อตฺตนา  จ  วิมุตฺติญาณทสฺสนสมฺปนฺโน
โหติ      วิมุตฺติญาณทสฺสนสมฺปทากถญฺจ     ภิกฺขูนํ     กตฺตา     โหติ
วิมุตฺติญาณทสฺสนสมฺปนฺโน        ภิกฺขุ       วิมุตฺติญาณทสฺสนสมฺปทากถญฺจ
ภิกฺขูนํ    กตฺตาติ    ปาสํสเมตํ   ฐานํ   อิมานิ   โข   ภิกฺขเว   ทส
ปาสํสานิฏฺฐานานีติ ฯ
                    ยมกวคฺโค ทุติโย ฯ
                        ตสฺสุทฺทานํ
         อวิชฺชาตณฺหานิฏฺฐา จ    อเวจฺจ เทฺว สุขานิ จ
         นฬกปาเนน เทฺว จ ๑-    วตฺถุกถา อปเร เทฺว ๒- ฯ
                       ---------


             เนื้อความพระไตรปิฎกฉบับภาษาบาลีอักษรไทย เล่มที่ ๒๔ หน้าที่ ๑๓๗-๑๔๑.
http://84000.org/tipitaka/pitaka_item/pali_item_s.php?book=24&item=69&items=2&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=24&item=69&items=2&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=24&item=69&items=2&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=24&item=69&items=2&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=24&i=69
             The Pali Atthakatha in Thai :-
http://84000.org/tipitaka/atthapali/read_th.php?B=16&A=7956
             The Pali Atthakatha in Roman :-
http://84000.org/tipitaka/atthapali/read_rm.php?B=16&A=7956
             สารบัญพระไตรปิฎกเล่มที่ ๒๔
http://84000.org/tipitaka/read/?index_24