บาลีพระไตรปิฎกเล่มที่ ๓๒ - พระสุตตันตปิฎกเล่มที่ ๒๔

สตฺตมํ ตินฺทุกทายกตฺเถราปทานํ (๑๙๗) [๑๙๙] |๑๙๙.๓๕| คิริทุคฺคจโร อาสึ มกฺกโฏ ถามเวคิโก ผลินํ ตินฺทุกํ ทิสฺวา พุทฺธเสฏฺฐํ อนุสฺสรึ ฯ |๑๙๙.๓๖| นิกฺขมิตฺวา กติปาหํ วิจินึ โลกนายกํ ปสนฺนจิตฺโต สุมโน สิทฺธตฺถํ ติภวนฺตคุํ ฯ |๑๙๙.๓๗| มม สงฺกปฺปมญฺญาย สตฺถา โลเก อนุตฺตโร ขีณาสวสหสฺเสหิ อาคญฺฉิ มม สนฺติเก ฯ |๑๙๙.๓๘| ปามุชฺชํ ชนยิตฺวาน ผลหตฺโถ อุปาคมึ ปฏิคฺคเหสิ ภควา สพฺพญฺญู วทตํ วโร ฯ @เชิงอรรถ: ^๑ ม. สตฺตตึเส ฯ |๑๙๙.๓๙| จตุนวุเต อิโต กปฺเป ยํ ผลํ อททึ ตทา ทุคฺคตึ นาภิชานามิ ผลทานสฺสิทํ ผลํ ฯ |๑๙๙.๔๐| สตฺตปญฺญาสกปฺปมฺหิ อุปนนฺทสนามโก สตฺตรตนสมฺปนฺโน จกฺกวตฺติ มหพฺพโล ฯ |๑๙๙.๔๑| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ตินฺทุกทายโก เถโร อิมา คาถาโย อภาสิตฺถาติ ฯ ตินฺทุกทายกตฺเถรสฺส อปทานํ สมตฺตํ ฯ อฏฺฐมํ คิริเนลมุฏฺฐิปูชกตฺเถราปทานํ ^๑- (๑๙๘) [๒๐๐] |๒๐๐.๔๒| สุเมโธ นาม ภควา โลกเชฏฺโฐ นราสโภ ปจฺฉิเม อนุกมฺปาย ปธานํ ปทหิ ชิโน ฯ |๒๐๐.๔๓| ตสฺส จงฺกมมานสฺส ทิปทินฺทสฺส ตาทิโน คิริเนลสฺส ปุปฺผานํ มุฏฺฐึ พุทฺธสฺส โรปยึ ฯ |๒๐๐.๔๔| เตน จิตฺตปฺปสาเทน สุกฺกมูเลน โจทิโต ตึสกปฺปสหสฺสานิ ทุคฺคตึ นูปปชฺชหํ ฯ |๒๐๐.๔๕| เตวีสติกปฺปสเต สุเนโล นาม ขตฺติโย สตฺตรตนสมฺปนฺโน เอโก อาสึ มหพฺพโล ฯ @เชิงอรรถ: ^๑ ม. ยุ. มุฏฺฐิปูชกตฺเถราปทานํ ฯ |๒๐๐.๔๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา คิริเนลมุฏฺฐิปูชโก เถโร อิมา คาถาโย อภาสิตฺถาติ ฯ คิริเนลมุฏฺฐิปูชกตฺเถรสฺส อปทานํ สมตฺตํ ฯ นวมํ ติกณฺฑิปุปฺผิยตฺเถราปทานํ ^๑- (๑๙๙) [๒๐๑] |๒๐๑.๔๗| สุมงฺคโลติ นาเมน สยมฺภู อปราชิโต ปวนา นิกฺขมิตฺวาน นครํ ปาวิสิ ชิโน ฯ |๒๐๑.๔๘| ปิณฺฑจารํ จริตฺวาน นิกฺขมฺม นครา มุนิ กตกิจฺโจว สมฺพุทฺโธ โส วสิ วนมนฺตเร ฯ |๒๐๑.๔๙| ติกณฺฑิปุปฺผํ ^๒- ปคฺคยฺห พุทฺธสฺส อภิโรปยึ ปสนฺนจิตฺโต สุมโน สยมฺภุสฺส มเหสิโน ฯ |๒๐๑.๕๐| จตุนวุเต อิโต กปฺเป ยํ ปุปฺผมภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ |๒๐๑.๕๑| ฉฬาสีติมฺหิโต กปฺเป อปเสลาสนามโก ^๓- สตฺตรตนสมฺปนฺโน จกฺกวตฺติ มหพฺพโล ฯ |๒๐๑.๕๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ @เชิงอรรถ: ^๑ ม. กึกณิกปุปฺผิยตฺ ... ฯ ^๒ ม. กึกณิปุปฺผํ ฯ ^๓ ม. อปิลาสิสนามโก ฯ @ยุ. อปิลาปิยนามโก ฯ อิตฺถํ สุทํ อายสฺมา ติกณฺฑิปุปฺผิโย เถโร อิมา คาถาโย อภาสิตฺถาติ ฯ ติกณฺฑิปุปฺผิยตฺเถรสฺส อปทานํ สมตฺตํ ฯ

เนื้อความพระไตรปิฎกฉบับภาษาบาลีอักษรไทย เล่มที่ ๓๒ หน้าที่ ๒๙๖-๒๙๙. http://84000.org/tipitaka/pitaka_item/pali_item_s.php?book=32&item=199&items=3&modeTY=2 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=32&item=199&items=3&modeTY=2&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=32&item=199&items=3&modeTY=2 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=32&item=199&items=3&modeTY=2 ศึกษาอรรถกถานี้ได้ที่ :- http://84000.org/tipitaka/attha/attha.php?b=32&i=199 The Pali Atthakatha in Thai :- http://84000.org/tipitaka/atthapali/read_th.php?B=50&A=4875 The Pali Atthakatha in Roman :- http://84000.org/tipitaka/atthapali/read_rm.php?B=50&A=4875 สารบัญพระไตรปิฎกเล่มที่ ๓๒ http://84000.org/tipitaka/read/?index_32