|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
|
พระไตรปิฎกเล่มที่ ๓๒ ภาษาบาลี อักษรไทย พระสุตตันตปิฎกเล่มที่ ๒๔ สุตฺต. ขุ. อปทานํ (๑)
|
|
นวมํ สพฺพทายกตฺเถราปทานํ (๓๙๙) [๔๐๑] |๔๐๑.๔๖๐| มหาสมุทฺทโมคฺคยฺห ภวนํ เม สุนิมฺมิตํ สุนิมฺมิตา โปกฺขรณี จกฺกวากุปกุชฺชิตา ๑- ฯ |๔๐๑.๔๖๑| มนฺทาลเกหิ สญฺฉนฺนา ปทุมุปฺปลเกหิ จ นที จ สนฺทเต ตตฺถ สุปติตฺถา มโนรมา ฯ |๔๐๑.๔๖๒| มจฺฉกจฺฉปสญฺฉนฺนา นานามิคสโมตฺถฏา ๒- มยูรโกญฺจาภิรุทา โกกิลาทีหิ วคฺคุหิ ฯ |๔๐๑.๔๖๓| ปาเรวตา รวิหํสา จกฺกวากา นทีจรา ทินฺทิภา สาลิกา เจตฺถ จปฺปกา ๓- ชีวชีวกา ฯ @เชิงอรรถ: ๑ ม. ยุ. จกฺกวากปกุชฺชิตา ฯ ๒ ม. นานาทิชสโมตฺถฏา ฯ ๓ ม. ปมฺมกา ฯ @ยุ. ปมฺปกา ฯ--------------------------------------------------------------------------------------------- หน้าที่ ๕๒๕.
|๔๐๑.๔๖๔| หํสา โกญฺจาภินทิกา ๑- โกสิยา ๒- สิงฺคลา พหู สตฺตรตนสมฺปนฺนา มณิมุตฺติกวาลุกา ฯ |๔๐๑.๔๖๕| สพฺพโสณฺณมยา ๓- รุกฺขา นานาคนฺธสเมริตา อุชฺโชเตนฺติ ทิวา รตฺตึ ภวนํ สพฺพกาลิกํ ฯ |๔๐๑.๔๖๖| สฏฺฐี ตุริยสหสฺสานิ สายํ ปาโต ปวชฺชเร โสฬสิตฺถีสหสฺสานิ ปริวาเรนฺติ มํ สทา ฯ |๔๐๑.๔๖๗| อภินิกฺขมฺม ภวนา สุเมธํ โลกนายกํ ปสนฺนจิตฺโต สุมโน วนฺทิย ๔- ตํ มหายสํ ฯ |๔๐๑.๔๖๘| สมฺพุทฺธํ อภิวาเทตฺวา สสิสฺสนฺตํ นิมนฺตยึ อธิวาเสสิ โส ธีโร สุเมโธ โลกนายโก ฯ |๔๐๑.๔๖๙| มม ธมฺมกถํ กตฺวา อุยฺโยเชสิ มหามุนิ สมฺพุทฺธํ อภิวาเทตฺวา ภวนํ เม อุปาคมึ ฯ |๔๐๑.๔๗๐| อามนฺตยึ ปริชนํ สพฺเพ สนฺนิปตาถ โว ปุพฺพณฺหสมยํ พุทฺโธ ภวนํ อาคมิสฺสติ ฯ |๔๐๑.๔๗๑| ลาภา อมฺหํ สุลทฺธา โน เย วสาม ตวนฺติเก มยํปิ พุทฺธเสฏฺฐสฺส ปูชํ กสฺสาม สตฺถุโน ฯ |๔๐๑.๔๗๒| อนฺนปานํ ปฏฺฐเปตฺวา กาลํ อาโรจยึ อหํ วสีสตสหสฺเสหิ อุเปสิ โลกนายโก ฯ |๔๐๑.๔๗๓| สงฺคีเตหิ ๕- ตุริเยหิ ปจฺจุคฺคมนกาสหํ สพฺพโสณฺณมเย ปีเฐ นิสีทิ ปุริสุตฺตโม ฯ @เชิงอรรถ: ๑ ม. ... โกญฺจาปินทิตา ฯ ยุ. โกญฺจาภินาทิตา ฯ ๒ ม. โกสิยา ปิงฺคลา พหู ฯ @ยุ. โกสิกา ... ฯ ๓ โป. ยุ. สพฺเพ โสวณฺณยา รุกฺขา ฯ ๔ ม. วนฺทยึ ฯ ยุ. @วนฺทิสฺสํ ฯ ๕ ม. ปญฺจงฺคิเกหิ ... ฯ ยุ. สตงฺคิเกหิ ตูริเยหิ ฯ--------------------------------------------------------------------------------------------- หน้าที่ ๕๒๖.
|๔๐๑.๔๗๔| อุปริจฺฉทนํ อาสิ ๑- สพฺพโสณฺณมยํ ตทา วีชนิโย ปวายนฺติ ภิกฺขุสงฺฆสฺส อนฺตเร ฯ |๔๐๑.๔๗๕| ปหูเตนนฺนปาเนน ภิกฺขุสงฺฆํ อตปฺปยึ ปจฺเจกทุสฺสยุคเล ภิกฺขุสงฺฆสฺสทาสหํ ฯ |๔๐๑.๔๗๖| ยํ วทนฺติ สุเมโธติ โลกาหุติปฏิคฺคโห ๒- ภิกฺขุสงฺเฆ นิสีทิตฺวา อิมา คาถา อภาสถ ฯ |๔๐๑.๔๗๗| โย เม อนฺนญฺจ ๓- ปานญฺจ สพฺพเมเตน ตปฺปยิ ๔- ตมหํ กิตฺตยิสฺสามิ สุณาถ มม ภาสโต ฯ |๔๐๑.๔๗๘| อฏฺฐารเส กปฺปสเต เทวโลเก รมิสฺสติ สหสฺสกฺขตฺตุํ ราชา จ จกฺกวตฺติ ภวิสฺสติ ฯ |๔๐๑.๔๗๙| อุปปชฺชติ ยํ โยนึ เทวตฺตํ อถ มานุสํ สพฺพทา สพฺพโสวณฺณํ ฉทนํ ธารยิสฺสติ ฯ |๔๐๑.๔๘๐| ตึสกปฺปสหสฺสมฺหิ โอกฺกากกุลสมฺภโว โคตโม นาม นาเมน สตฺถา โลเก ภวิสฺสติ ฯ |๔๐๑.๔๘๑| ตสฺส ธมฺเมสุ ทายาโท โอรโส ธมฺมนิมฺมิโต สพฺพาสเว ปริญฺญาย นิพฺพายิสฺสตินาสโว ฯ |๔๐๑.๔๘๒| ภิกฺขุสงฺเฆ นิสีทิตฺวา สีหนาทํ นทิสฺสติ จิตเก ฉตฺตํ ธาเรนฺติ เหฏฺฐาฉตฺตมฺหิ ฑยฺหถ ฯ |๔๐๑.๔๘๓| สามญฺญํ เม อนุปฺปตฺตํ กิเลสา ฌาปิตา มยา มณฺฑเป รุกฺขมูเล วา สนฺตาโป เม น วิชฺชติ ฯ @เชิงอรรถ: ๑ ยุ. กาสึ ฯ ๒ ม. ยุ. โลกาหุตปฏิคฺคหํ ฯ ๓ ม. อนฺเนน ปาเนน ฯ @๔ ม. ... ตปฺปยึ ฯ ยุ. สงฺฆํ เอเตน ตปฺปยึ ฯ--------------------------------------------------------------------------------------------- หน้าที่ ๕๒๗.
|๔๐๑.๔๘๔| ตึสกปฺปสหสฺสมฺหิ ยํ ทานมททินฺตทา ทุคฺคตึ นาภิชานามิ สพฺพทานสฺสิทํ ผลํ ฯ |๔๐๑.๔๘๕| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๔๐๑.๔๘๖| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๔๐๑.๔๘๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สพฺพทายโก เถโร อิมา คาถาโย อภาสิตฺถาติ ฯ สพฺพทายกตฺเถรสฺส อปทานํ สมตฺตํ ฯ ทสมํ อชิตตฺเถราปทานํ (๔๐๐) [๔๐๒] |๔๐๒.๔๘๘| ปทุมุตฺตโร นาม ชิโน สพฺพธมฺมาน ปารคู อชฺโฌคเหตฺวา หิมวนฺตํ นิสีทิ โลกนายโก ฯ |๔๐๒.๔๘๙| นาหํ อทฺทกฺขิ ๑- สมฺพุทฺธํ นปิ สทฺทํ สุโณมหํ มม ภิกฺขํ ๒- คเวสนฺโต อาหิณฺฑามิ วเน อหํ ฯ |๔๐๒.๔๙๐| ตตฺถทฺทสฺสามิ สมฺพุทฺธํ ทฺวตฺตึสวรลกฺขณํ ทิสฺวาน จิตฺตมาปชฺชึ ๓- สตฺโต โก นามยํ ภเว ฯ @เชิงอรรถ: ๑ ม. ยุ. อทฺทกฺขึ ฯ ๒ ม. ภกฺขํ ฯ ๓ ม. วิตฺติมาปชฺชึ ฯ--------------------------------------------------------------------------------------------- หน้าที่ ๕๒๘.
|๔๐๒.๔๙๑| ลกฺขณานิ วิโลเกตฺวา มม วิชฺชํ อนุสฺสรึ สุตํ หิ เมตํ พุทฺธานํ ปณฺฑิตานํ สุภาสิตํ ฯ |๔๐๒.๔๙๒| เตสํ ยถา ๑- ตํ วจนํ อยํ พุทฺโธ ภวิสฺสติ ยนฺนูน ๒- ตํ สกฺกเรยฺยํ คตึ เม โสธยิสฺสติ ฯ |๔๐๒.๔๙๓| ขิปฺปํ อสฺสมมาคนฺตฺวา มธุเตลํ ๓- คหึ อหํ โกลมฺพกํ คเหตฺวาน อุปคญฺฉึ วินายกํ ฯ |๔๐๒.๔๙๔| ติทณฺฑเก คเหตฺวาน อพฺโภกาเส ฐเปสหํ ปทีปํ ปชฺชลิตฺวาน อฏฺฐกฺขตฺตุํ อวนฺทหํ ฯ |๔๐๒.๔๙๕| สตฺตรตฺตินฺทิวํ พุทฺโธ นิสีทิ ปุริสุตฺตโม ตโต รตฺยา วิวสเน วุฏฺฐาสิ โลกนายโก ฯ |๔๐๒.๔๙๖| ปสนฺนจิตฺโต สุมโน สพฺพรตฺตินฺทิวํ อหํ ทีปํ พุทฺธสฺส ปาทาสึ ปสนฺโน เสหิ ปาณิภิ ฯ |๔๐๒.๔๙๗| สพฺเพ คนฺธา ๔- วนมยา ปพฺพเต คนฺธมาทเน พุทฺธสฺส อานุภาเวน อาคญฺฉุํ พุทฺธสนฺติเก ฯ |๔๐๒.๔๙๘| เยเกจิ ปุปฺผคนฺธา เส ปุปฺผิตา ธรณีรุหา พุทฺธสฺส อานุภาเวน สพฺเพ สนฺนิปตุํ ตทา ฯ |๔๐๒.๔๙๙| ยาวตา หิมวนฺตมฺหิ นาคา จ ครุฬา อุโภ ธมฺมญฺจ โสตุกามา เต อาคญฺฉุํ พุทฺธสนฺติเก ฯ |๔๐๒.๕๐๐| เทวโล นาม สมโณ พุทฺธสฺส อคฺคสาวโก วสีสตสหสฺเสหิ พุทฺธสนฺติกุปาคมิ ฯ @เชิงอรรถ: ๑ ยุ. ตถา ฯ ๒ ม. ยุ. ยนฺนูนาหํ ฯ ๓ โป. ยุ. ทุมเตลํ ฯ ๔ ม. ... วนา คนฺธมยา ฯ--------------------------------------------------------------------------------------------- หน้าที่ ๕๒๙.
|๔๐๒.๕๐๑| ปทุมุตฺตโร โลกวิทู อาหุตีนํ ปฏิคฺคโห ภิกฺขุสงฺเฆ นิสีทิตฺวา อิมา คาถา อภาสถ ฯ |๔๐๒.๕๐๒| โย เม ทีปํ ปทีเปสิ ปสนฺโน เสหิ ปาณิภิ ตมหํ กิตฺตยิสฺสามิ สุณาถ มม ภาสโต ฯ |๔๐๒.๕๐๓| สฏฺฐี กปฺปสหสฺสานิ เทวโลเก รมิสฺสติ สหสฺสกฺขตฺตุํ ราชา จ จกฺกวตฺติ ภวิสฺสติ ฯ โสฬสมํ ภาณวารํ ฯ |๔๐๒.๕๐๔| ฉตฺตึสกฺขตฺตุํ เทวินฺโท เทวรชฺชํ กริสฺสติ ปฐวิยํ สตฺตสตํ วิปุลํ รชฺชํ กริสฺสติ ฯ |๔๐๒.๕๐๕| ปเทสรชฺชํ วิปุลํ คณนาโต อสงฺขยํ อิมินา ทีปทาเนน ทิพฺพจกฺขุ ภวิสฺสติ ฯ |๔๐๒.๕๐๖| สมนฺตโต อฑฺฒโกสํ ปสฺสิสฺสติ อยํ สทา เทวโลกา จวนฺตสฺส นิพฺพตฺตนฺตสฺส ชนฺตุโน ฯ |๔๐๒.๕๐๗| ทิวา วา ยทิวา รตฺตึ ปทีปํ ธารยิสฺสติ ชายมานสฺส สนฺตสฺส ปุญฺญกมฺมสมงฺคิโน ฯ |๔๐๒.๕๐๘| ยาวตา นครํ อาสิ ตาวตา โชตยิสฺสติ อุปปชฺชติ ยํ โยนึ เทวตฺตํ อถ มานุสํ ฯ |๔๐๒.๕๐๙| อสฺเสว ทีปทานสฺส อฏฺฐทีปผเลน จ ๑- อุปฏฺฐิสฺสนฺติมํ ๒- ชนฺตุํ ทีปทานสฺสิทํ ผลํ ฯ @เชิงอรรถ: ๑ ม. ยุ. หิ ฯ ๒ ม. ยุ. น จชิสฺสนฺติมํ ชนฺตุํ ฯ--------------------------------------------------------------------------------------------- หน้าที่ ๕๓๐.
|๔๐๒.๕๑๐| กปฺปสตสหสฺสมฺหิ โอกฺกากกุลสมฺภโว โคตโม นาม นาเมน สตฺถา โลเก ภวิสฺสติ ฯ |๔๐๒.๕๑๑| ตสฺส ธมฺเมสุ ทายาโท โอรโส ธมฺมนิมฺมิโต สพฺพาสเว ปริญฺญาย นิพฺพายิสฺสตินาสโว ฯ |๔๐๒.๕๑๒| โตสยิตฺวาน สมฺพุทฺธํ โคตมํ สกฺยปุงฺควํ อชิโต นาม นาเมน เหสฺสติ สตฺถุสาวโก ฯ |๔๐๒.๕๑๓| สฏฺฐิกปฺปสหสฺสานิ เทวโลเก รมึ อหํ ตตฺราปิ เม ทีปสตํ โชตเต ๑- นิจฺจกาลิกํ ฯ |๔๐๒.๕๑๔| เทวโลเก มนุสฺเส วา นิทฺธาวนฺติ ปภา มม พุทฺธเสฏฺฐํ สริตฺวาน ภิยฺโย หาสํ ชเนสหํ ฯ |๔๐๒.๕๑๕| ตุสิตาหํ จวิตฺวาน โอกฺกมึ มาตุกุจฺฉิยา ชายมานสฺส สนฺตสฺส อาโลโก วิปุโล อหุ ฯ |๔๐๒.๕๑๖| อคารา อภินิกฺขมฺม ปพฺพชึ อนคาริยํ พาวรึ อุปสงฺกมฺม สิสฺสตฺตํ อชฺฌุปาคมึ ฯ |๔๐๒.๕๑๗| หิมวนฺเต วสนฺโตหํ อสฺโสสึ โลกนายกํ อุตฺตมตฺถํ คเวสนฺโต อุปคญฺฉึ วินายกํ ฯ |๔๐๒.๕๑๘| ทนฺโต พุทฺโธ ทเมตาปิ ๒- โอฆติณฺโณ นิรูปธิ นิพฺพานํ กถยิ พุทฺโธ สพฺพทุกฺขา ปโมจนํ ฯ |๔๐๒.๕๑๙| ตมฺเม อาคมนํ สิทฺธํ โตสิโตหํ มหามุนึ ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ @เชิงอรรถ: ๑ ยุ. โชตเร ฯ ๒ ม. ทเมตาวี ฯ ยุ ... จ เมธาวี ฯ--------------------------------------------------------------------------------------------- หน้าที่ ๕๓๑.
|๔๐๒.๕๒๐| สตสหสฺเส อิโต กปฺเป ยํ ทีปํ อททินฺตทา ทุคฺคตึ นาภิชานามิ ทีปทานสฺสิทํ ผลํ ฯ |๔๐๒.๕๒๑| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๔๐๒.๕๒๒| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๔๐๒.๕๒๓| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อชิโต เถโร อิมา คาถาโย อภาสิตฺถาติ ฯ อชิตตฺเถรสฺส อปทานํ สมตฺตํ ฯ อุทฺทานํ ปิลินฺทวจฺโฉ เสโล จ สพฺพกิตฺตมธูทโท กูฏาคารี พกุโล จ คิริสลฬสวฺหโย ฯ สพฺพโท อชิโต เจว คาถาโย คณิตา วิสา สตานิ ปญฺจ คาถานํ วีสติ จ ตทุตฺตริ ฯ ปิลินฺทวคฺโค จตฺตาฬีโส ฯ--------------------------------------------------------------------------------------------- หน้าที่ ๕๓๒.
อถ วคฺคุทฺทานํ ปทุมารกฺขโท เจว อุมฺมา คนฺโธทเกน จ เอกปฺปทสทฺทสญฺญี มนฺทารํ โพธิวนฺทโก ฯ อมฺพฏญฺจ ปิลินฺที จ คาถาโย คณิตาปิจ จตุสตฺตติ คาถาโย เอกาทสสตานิ จ ฯ ปทุมวคฺคทสกํ ฯ จตุตฺถํ สตกํ สมตฺตํ ฯ ---------เนื้อความพระไตรปิฎกฉบับภาษาบาลีอักษรไทย เล่มที่ ๓๒ หน้าที่ ๕๒๔-๕๓๒. http://84000.org/tipitaka/pitaka_item/pali_item_s.php?book=32&item=401&items=2&pagebreak=1&modeTY=2 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=32&item=401&items=2&pagebreak=1&modeTY=2&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=32&item=401&items=2&pagebreak=1&modeTY=2 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=32&item=401&items=2&pagebreak=1&modeTY=2 ศึกษาอรรถกถานี้ได้ที่ :- http://84000.org/tipitaka/attha/attha.php?b=32&i=401 สารบัญพระไตรปิฎกเล่มที่ ๓๒ http://84000.org/tipitaka/read/?index_32
       |
|
บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]