พระไตรปิฎกเล่มที่ ๓๓ ภาษาบาลี อักษรไทย
พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

หน้าที่ ๑๓๙.
                                      เอกปญฺญาโส กณิการวคฺโค
                              ปฐมํ ตีณิกณิการปุปฺผิยตฺเถราปทานํ (๕๐๑)
     [๙๑]   |๙๑.๑| สุเมโธ นาม สมฺพุทฺโธ  ทฺวตฺตึสวรลกฺขโณ
                          วิเวกกาโม สมฺพุทฺโธ       หิมวนฺตํ อุปาคมิ ฯ
               |๙๑.๒| อชฺโฌคเหตฺวา หิมวนฺตํ  อคฺโค การุณิโก มุนิ
                          ปลฺลงฺกํ อาภุชิตฺวาน       นิสีทิ ปุริสุตฺตโม ฯ
               |๙๑.๓| วิชฺชาธโร ตทา อาสึ        อนฺตลิกฺขจโร อหํ
                          ติสุลํ สุกตํ คยฺห             คจฺฉามิ อมฺพเร ตทา ฯ
               |๙๑.๔| ปพฺพตคฺเค ยถา อคฺคิ     ปุณฺณมาเยว จนฺทิมา
                          วเน โอภาสเต พุทฺโธ      สาลราชาว ผุลฺลิโต ฯ
               |๙๑.๕| วนโต ๑- นิกฺขมิตฺวาน    พุทฺธรํสาภิธาวเร
                          นฬคฺคิวณฺณสงฺกาสา     ทิสฺวา จิตฺตํ ปสาทยึ ฯ
               |๙๑.๖| วิจินํ อทฺทสํ ปุปฺผํ          กณิการํ เทวคนฺธิกํ
                          ตีณิ ปุปฺผานิ อาทาย      พุทฺธเสฏฺฐํ อปูชยึ ฯ
               |๙๑.๗| พุทฺธสฺส อานุภาเวน       ตีณิ ปุปฺผานิ เม ตทา
                          อุทฺธํวณฺฏา อโธปตฺตา    ฉายํ กุพฺพนฺติ สตฺถุโน ฯ
               |๙๑.๘| เตน กมฺเมน สุกเตน       เจตนาปณิธีหิ จ
                          ชหิตฺวา มานุสํ เทหํ         ตาวตึสํ อคจฺฉหํ ฯ
@เชิงอรรถ: ๑ ยุ. วนคฺคา ฯ
---------------------------------------------------------------------------------------------
หน้าที่ ๑๔๐.
           |๙๑.๙|     ตตฺถ เม สุกตํ พฺยมฺหํ       กณิการีติ ญายติ
                          สฏฺฐิโยชนมุพฺพิทฺธํ         ตึสโยชนวิตฺถตํ ฯ
           |๙๑.๑๐| สหสฺสกณฺฑํ ๑- สตฺตเคณฺฑุ ๒-  ธชาลุ หริตามโย
                         สตสหสฺสนิยฺยูหา            พฺยเมฺห ปาตุภวึสุ เม ฯ
           |๙๑.๑๑| โสณฺณมยา มณิมยา       โลหิตงฺกมยาปิจ
                         ผลิกาปิจ ปลฺลงฺกา          เยนิจฺฉกา ยถิจฺฉกํ ฯ
           |๙๑.๑๒| มหารหญฺจ สยนํ            ตุลิกํ ๓- วิกติสฺสกํ
                         อุทฺธโลมิกเอกนฺตํ           พิพฺโพหนสมายุตํ ฯ
           |๙๑.๑๓| ภวนา นิกฺขมิตฺวาน         จรนฺโต เทวจาริกํ
                         ยทา อิจฺฉามิ คมนํ          เทวสงฺฆปุรกฺขโต ฯ
           |๙๑.๑๔| ปุปฺผสฺส เหฏฺฐา ติฏฺฐามิ  อุปริ ฉทนํ มม
                         สมนฺตา โยชนสตํ            กณิกาเรหิ ฉาทิตํ ฯ
           |๙๑.๑๕| สฏฺฐี ตุริยสหสฺสานิ         สายํ ปาตํ อุปฏฺฐหุํ
                         ปริวาเรนฺติ มํ นิจฺจํ           รตฺตินฺทิวมตนฺทิตา ฯ
           |๙๑.๑๖| ตตฺถ นจฺเจหิ คีเตหิ          ตาเฬหิ วาทิเตหิ จ
                         รมามิ ขิฑฺฑารติยา          โมทามิ กามกามิหํ ฯ
           |๙๑.๑๗| ตตฺถ ภุตฺวา ปิวิตฺวา จ      โมทามิ ติทเส ตทา
                         นารีคเณหิ สหิโต            โมทามิ พฺยมฺหมุตฺตเม ฯ
           |๙๑.๑๘| สตานํ ปญฺจกฺขตฺตุญฺจ     เทวรชฺชมการยึ
                         สตานํ ตีณิกฺขตฺตุญฺจ       จกฺกวตฺติ อโหสหํ ฯ
@เชิงอรรถ: ๑ ยุ. สหสฺสกณฺโฑ ฯ ๒ ม. สตเภณฺฑุ ฯ ๓ ม. ยุ. ตูลิกา วิกตียุตํ ฯ
---------------------------------------------------------------------------------------------
หน้าที่ ๑๔๑.
           |๙๑.๑๙| ปเทสรชฺชํ วิปุลํ               คณนาโต สงฺขยํ
                         ภวาภเว สํสรนฺโต            มหาโภคํ ๑- ลภามหํ ฯ
           |๙๑.๒๐| โภเค เม อูนตา นตฺถิ       พุทฺธปูชายิทํ ผลํ
                         ทุเว ภเว สํสรามิ              เทวตฺเต อถ มานุเส ฯ
           |๙๑.๒๑| อญฺญํ คตึ น ชานามิ       พุทฺธปูชายิทํ ผลํ
                         ทุเว กุเล ปชายามิ           ขตฺติเย จาปิ พฺราหฺมเณ ฯ
           |๙๑.๒๒| นีเจ กุเล น ชายามิ ๒-     พุทฺธปูชายิทํ ผลํ
                         หตฺถิยานํ อสฺสยานํ         สิวิกํ สนฺทมานิกํ ฯ
           |๙๑.๒๓| ลภามิ สพฺพเมเวตํ          พุทฺธปูชายิทํ ผลํ
                         ทาสีคณํ ทาสคณํ            นาริโย สมลงฺกตา ฯ
           |๙๑.๒๔| ลภามิ สพฺพเมเวตํ           พุทฺธปูชายิทํ ผลํ
                         โกเสยฺยกมฺพลิยานิ         โขมกปฺปาสิกานิ จ ฯ
           |๙๑.๒๕| ลภามิ สพฺพเมเวตํ           พุทฺธปูชายิทํ ผลํ
                         นววตฺถํ นวผลํ                 นวคฺครสโภชนํ ฯ
           |๙๑.๒๖| ลภามิ สพฺพเมเวตํ           พุทฺธปูชายิทํ ผลํ
                         อิเม ๓- ขาท อิเม ๓- ภุญฺช  อิมมฺหิ สยเน สย ฯ
           |๙๑.๒๗| ลภามิ สพฺพเมเวตํ           พุทฺธปูชายิทํ ผลํ
                         สพฺพตฺถ ปูชิโต โหมิ        ยโส อจฺจุคฺคโต ๔- มม ฯ
           |๙๑.๒๘| มเหสกฺโข ๕- สทา โหมิ   อเภชฺชปริโส สทา
                         ญาตีนํ อุตฺตโม โหมิ        พุทฺธปูชายิทํ ผลํ ฯ
@เชิงอรรถ: ๑ ยุ. มหาโภเค ฯ ๒ ยุ. ชานามิ ฯ ๓ ม. อิมํ ฯ ๔ ม. อพฺภุคฺคโต ฯ
@๕ ม. ยุ. มหาปกฺโข ฯ
---------------------------------------------------------------------------------------------
หน้าที่ ๑๔๒.
           |๙๑.๒๙| สีตํ อุณฺหํ น ชานามิ        ปริฬาโห น วิชฺชติ
                         อโถ เจตสิกํ ทุกฺขํ            หทเย เม น วิชฺชติ ฯ
           |๙๑.๓๐| สุวณฺณวณฺโณ หุตฺวาน    สํสรามิ ภวาภเว
                         เววณฺณิยํ ๑- น ชานามิ   พุทฺธปูชายิทํ ผลํ ฯ
           |๙๑.๓๑| เทวโลกา จวิตฺวาน          สุกฺกมูเลน โจทิโต
                         สาวตฺถิยํ ปุเร ชาโต         มหาสาเล สุอทฺธเก ฯ
           |๙๑.๓๒| ปญฺจกามคุเณ หิตฺวา      ปพฺพชึ อนคาริยํ
                         ชาติยา สตฺตวสฺโสหํ         อรหตฺตํ อปาปุณึ ฯ
           |๙๑.๓๓| อุปสมฺปาทยิ พุทฺโธ         คุณมญฺญาย จกฺขุมา
                         ตรุโณ ปูชนีโยหํ              พุทฺธปูชายิทํ ผลํ ฯ
           |๙๑.๓๔| ทิพฺพจกฺขุํ วิสุทฺธํ เม        สมาธิกุสโล อหํ
                         อภิญฺญาปารมิปฺปตฺโต    พุทฺธปูชายิทํ ผลํ ฯ
           |๙๑.๓๕| ปฏิสมฺภิทา อนุปฺปตฺโต    อิทฺธิปาเทสุ โกวิโท
                         สทฺธมฺเม ๒- ปารมิปฺปตฺโต  พุทฺธปูชายิทํ ผลํ ฯ
           |๙๑.๓๖| ตึสกปฺปสหสฺสมฺหิ           ยํ พุทฺธมภิปูชยึ
                         ทุคฺคตึ นาภิชานามิ         พุทฺธปูชายิทํ ผลํ ฯ
           |๙๑.๓๗| กิเลสา ฌาปิตา มยฺหํ       ภวา สพฺเพ สมูหตา
                         นาโคว พนฺธนํ เฉตฺวา      วิหรามิ อนาสโว ฯ
           |๙๑.๓๘| สฺวาคตํ วต เม อาสิ          มม พุทฺธสฺส สนฺติเก
                         ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
@เชิงอรรถ: ๑ ยุ. ทุวณฺณิกํ ฯ ๒ ม. ธมฺเมสุ ฯ
---------------------------------------------------------------------------------------------
หน้าที่ ๑๔๓.
           |๙๑.๓๙| ปฏิสมฺภิทา จตสฺโส         วิโมกฺขาปิจ อฏฺฐิเม
                         ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
              อิตฺถํ สุทํ อายสฺมา ตีณิกณิการปุปฺผิโย เถโร อิมา คาถาโย อภาสิตฺถาติ ฯ
                            ตีณิกณิการปุปฺผิยตฺเถรสฺส อปทานํ สมตฺตํ ฯ
                                ทุติยํ เอกปตฺตทายกตฺเถราปทานํ (๕๐๒)
     [๙๒]   |๙๒.๔๐| นคเร หํสวติยา           กุมฺภกาโร อโหสหํ
                         อทฺทสํ วิรชํ พุทฺธํ             โอฆติณฺณมนาสวํ ฯ
           |๙๒.๔๑| สุกตํ มตฺติกาปตฺตํ           พุทฺธเสฏฺฐสฺสทาสหํ
                         ปตฺตํ ทตฺวา ภควโต         อุชุภูตสฺส ตาทิโน ฯ
           |๙๒.๔๒| ภเว นิพฺพตฺตมาโนหํ        โสณฺณถาเล ลภามหํ
                         รูปิมเย จ โสวณฺเณ          ตฏฺฏิเก ๑- จ มณีมเย ฯ
           |๙๒.๔๓| ปาฏิยา ๒- ปริภุญฺชามิ    ปุญฺญกมฺมสฺสิทํ ผลํ
                         ยสสาว ๓- ชนานญฺจ      อคฺคภูโต ๔- จ โหมหํ ฯ
           |๙๒.๔๔| ยถาปิ ภทฺทเก เขตฺเต       วีชํ อปฺปมฺปิ โรปิตํ
                         สมฺมา ธารํ ปวสฺสนฺเต ๕- ผลํ โตเสติ กสฺสกํ ฯ
           |๙๒.๔๕| ตเถวิทํ ปตฺตทานํ            พุทฺธเขตฺตมฺหิ โรปิตํ
                         ปีติธาเร ปวสฺสนฺเต          ผลํ เม ๖- โตสยิสฺสติ ฯ
           |๙๒.๔๖| ยาวตา เขตฺตา วิชฺชนฺติ     สงฺฆาปิจ คณาปิจ
                         พุทฺธเขตฺตสโม นตฺถิ        สุขโท ๗- สพฺพปาณินํ ฯ
@เชิงอรรถ: ๑ โป. ยุ. ตฏฺฏเก ฯ ๒ ม. ยุ. ปาติโย ฯ ๓ ม. ยุ. ยสานญจ ธนานญฺจ ฯ
@๔ ยุ. ปตฺตภูโต ฯ ๕ ม. ยุ. ปวจฺฉนฺเต ฯ ยุ. สมฺมา ธาเร ปเวจฺฉนฺเต ฯ ๖ ม. มํ ฯ
@๗ โป. สุขโท ตตฺถ ปาณินํ ฯ ยุ. สุขทานตฺถปาณินํ ฯ
---------------------------------------------------------------------------------------------
หน้าที่ ๑๔๔.
           |๙๒.๔๗| นโม เต ปุริสาชญฺญ         นโม เต ปุริสุตฺตม
                         เอกปตฺตํ ททิตฺวาน          ปตฺโตมฺหิ อจลํ ปทํ ฯ
           |๙๒.๔๘| เอกนวุเต อิโต กปฺเป        ยํ ปตฺตมททึ ตทา
                         ทุคฺคตึ นาภิชานามิ         ปตฺตทานสฺสิทํ ผลํ ฯ
           |๙๒.๔๙| กิเลสา ฌาปิตา มยฺหํ       ภวา สพฺเพ สมูหตา
                         นาโคว พนฺธนํ เฉตฺวา      วิหรามิ อนาสโว ฯ
           |๙๒.๕๐| สฺวาคตํ วต เม อาสิ          มม พุทฺธสฺส สนฺตเก
                         ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
           |๙๒.๕๑| ปฏิสมฺภิทา จตสฺโส         วิโมกฺขาปิจ อฏฺฐิเม
                         ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
              อิตฺถํ สุทํ อายสฺมา เอกปตฺตทายโก เถโร อิมา คาถาโย อภาสิตฺถาติ ฯ
                                เอกปตฺตทายกตฺเถรสฺส อปทานํ สมตฺตํ ฯ
                              ตติยํ กาสุมาริกผลทายกตฺเถราปทานํ (๕๐๓)
     [๙๓]   |๙๓.๕๒| กณิการํว โชตนฺตํ       นิสินฺนํ ปพฺพตนฺตเร
                         อทฺทสํ วิรชํ พุทฺธํ             โลกเชฏฺฐํ นราสภํ
           |๙๓.๕๓| ปสนฺนจิตฺโต สุมโน          สิเร กตฺวาน อญฺชลึ
                         กาสุมาริกมาทาย           พุทฺธเสฏฺฐสฺสทาสหํ ฯ
           |๙๓.๕๔| เอกตฺตึเส อิโต กปฺเป       ยํ ผลํ อททึ ตทา
                         ทุคฺคตึ นาภิชานามิ         ผลทานสฺสิทํ ผลํ ฯ
---------------------------------------------------------------------------------------------
หน้าที่ ๑๔๕.
           |๙๓.๕๕| กิเลสา ฌาปิตา มยฺหํ      ภวา สพฺเพ สมูหตา
                         นาโคว พนฺธนํ เฉตฺวา      วิหรามิ อนาสโว ฯ
           |๙๓.๕๖| สฺวาคตํ วต เม อาสิ         มม พุทฺธสฺส สนฺติเก
                         ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
           |๙๓.๕๗| ปฏิสมฺภิทา จตสฺโส         วิโมกฺขาปิจ อฏฺฐิเม
                         ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
              อิตฺถํ สุทํ อายสฺมา กาสุมาริกผลทายโก เถโร อิมา คาถาโย อภาสิตฺถาติ ฯ
                            กาสุมาริกผลทายกตฺเถรสฺส อปทานํ สมตฺตํ ฯ
                                    จตุตฺถํ อวฏผลิยตฺเถราปทานํ (๕๐๔)
     [๙๔]   |๙๔.๕๘| สหสฺสรํสี ภควา         สยมฺภู อปราชิโต
                         วิเวกา วุฏฺฐหิตฺวาน          โคจรายาภินิกฺขมิ ฯ
           |๙๔.๕๙| ผลหตฺโถ อหํ ทิสฺวา        อุปคญฺฉึ นราสภํ
                         ปสนฺนจิตฺโต สุมโน         อวฏํ อททึ ผลํ ฯ
           |๙๔.๖๐| จตุนวุเต อิโต กปฺเป         ยํ ผลํ อททึ ตทา
                         ทุคฺคตึ นาภิชานามิ         ผลทานสฺสิทํ ผลํ ฯ
           |๙๔.๖๑| กิเลสา ฌาปิตา มยฺหํ      ภวา สพฺเพ สมูหตา
                         นาโคว พนฺธนํ เฉตฺวา      วิหรามิ อนาสโว ฯ
           |๙๔.๖๒| สฺวาคตํ วต เม อาสิ         มม พุทฺธสฺส สนฺติเก
                         ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
---------------------------------------------------------------------------------------------
หน้าที่ ๑๔๖.
           |๙๔.๖๓| ปฏิสมฺภิทา จตสฺโส         วิโมกฺขาปิจ อฏฺฐิเม
                         ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
              อิตฺถํ สุทํ อายสฺมา อวฏผลิโย เถโร อิมา คาถาโย อภาสิตฺถาติ ฯ
                                 อวฏผลิยตฺเถรสฺส อปทานํ สมตฺตํ ฯ
                              ปญฺจมํ จารผลิยตฺเถราปทานํ ๑- (๕๐๕)
     [๙๕]   |๙๕.๖๔| สุวณฺณวณฺณํ สมฺพุทฺธํ   อาหุตีนํ ปฏิคฺคหํ
                         รถิยํ ปฏิปชฺชนฺตํ             จารผลมทาสหํ ฯ
           |๙๕.๖๕| เอกนวุเต อิโต กปฺเป       ยํ ผลํ อททึ ตทา
                         ทุคฺคตึ นาภิชานามิ         ผลทานสฺสิทํ ผลํ ฯ
           |๙๕.๖๖| กิเลสา ฌาปิตา มยฺหํ      ภวา สพฺเพ สมูหตา
                         นาโคว พนฺธนํ เฉตฺวา      วิหรามิ อนาสโว ฯ
           |๙๕.๖๗| สฺวาคตํ วต เม อาสิ         มม พุทฺธสฺส สนฺติเก
                         ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
           |๙๕.๖๘| ปฏิสมฺภิทา จตสฺโส         วิโมกฺขาปิจ อฏฺฐิเม
                         ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
              อิตฺถํ สุทํ อายสฺมา จารผลิโย เถโร อิมา คาถาโย อภาสิตฺถาติ ฯ
                                  จารผลิยตฺเถรสฺส อปทานํ สมตฺตํ ฯ
@เชิงอรรถ: ๑ ม. ปาทผลิยตฺเถร... ฯ ยุ. ปารผลิยตฺเถร... ฯ
---------------------------------------------------------------------------------------------
หน้าที่ ๑๔๗.
                           ฉฏฺฐํ มาตุลุงฺคผลทายกตฺเถราปทานํ (๕๐๖)
     [๙๖]   |๙๖.๖๙| กณิการํว ชลิตํ         ปุณฺณมาเยว จนฺทิมํ
                         ชลนฺตํ ทีปรุกฺขํว            อทฺทสํ โลกนายกํ ฯ
           |๙๖.๗๐| มาตุลุงฺคผลํ คยฺห          อทาสึ สตฺถุโน อหํ
                         ทกฺขิเณยฺยสฺส วีรสฺส      ปสนฺโน เสหิ ปาณิภิ ฯ
           |๙๖.๗๑| เอกตฺตึเส อิโต กปฺเป      ยํ ผลํ อททึ ตทา
                         ทุคฺคตึ นาภิชานามิ        ผลทานสฺสิทํ ผลํ ฯ
           |๙๖.๗๒| กิเลสา ฌาปิตา มยฺหํ     ภวา สพฺเพ สมูหตา
                         นาโคว พนฺธนํ เฉตฺวา     วิหรามิ อนาสโว ฯ
           |๙๖.๗๓| สฺวาคตํ วต เม อาสิ        มม พุทฺธสฺส สนฺติเก
                         ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
           |๙๖.๗๔| ปฏิสมฺภิทา จตสฺโส        วิโมกฺขาปิจ อฏฺฐิเม
                         ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
              อิตฺถํ สุทํ อายสฺมา มาตุลุงฺคผลทายโก เถโร อิมา คาถาโย อภาสิตฺถาติ ฯ
                            มาตุลุงฺคผลทายกตฺเถรสฺส อปทานํ สมตฺตํ ฯ
                             สตฺตมํ อชฺเชลผลทายกตฺเถราปทานํ (๕๐๗)
     [๙๗]   |๙๗.๗๕| อชิโน ๑- นาม สมฺพุทฺโธ     หิมวนฺเต วสิ ตทา
                         จรเณน จ สมฺปนฺโน       สมาธิกุสโล มุนิ ฯ
@เชิงอรรถ: ๑ ม. ยุ. อชฺชุโน ฯ
---------------------------------------------------------------------------------------------
หน้าที่ ๑๔๘.
           |๙๗.๗๖| กุมฺภมตฺตํ คเหตฺวาน      อญฺชลึ ๑- ชีวชีวกํ
                         ฉตฺตปณฺณํ คเหตฺวาน    อทาสึ สตฺถุโน อหํ ฯ
           |๙๗.๗๗| จตุนวุเต อิโต กปฺเป       ยํ ผลํ อททึ ตทา
                         ทุคฺคตึ นาภิชานามิ        ผลทานสฺสิทํ ผลํ ฯ
           |๙๗.๗๘| กิเลสา ฌาปิตา มยฺหํ     ภวา สพฺเพ สมูหตา
                         นาโคว พนฺธนํ เฉตฺวา    วิหรามิ อนาสโว ฯ
           |๙๗.๗๙| สฺวาคตํ วต เม อาสิ        มม พุทฺธสฺส สนฺติเก
                         ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
           |๙๗.๘๐| ปฏิสมฺภิทา จตสฺโส        วิโมกฺขาปิจ อฏฺฐิเม
                         ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
              อิตฺถํ สุทํ อายสฺมา อชฺเชลผลทายโก เถโร อิมา คาถาโย อภาสิตฺถาติ ฯ
                               อชฺเชลผลทายกตฺเถรสฺส อปทานํ สมตฺตํ ฯ
                               อฏฺฐมํ อโมรผลิยตฺเถราปทานํ ๒- (๕๐๘)
     [๙๘]   |๙๘.๘๑| สุวณฺณวณฺณํ สมฺพุทฺธํ    อาหุตีนํ ปฏิคฺคหํ
                         รถิยํ ปฏิปชฺชนฺตํ           อโมรํ ๓- อททึ ผลํ ฯ
           |๙๘.๘๒| เอกนวุเต อิโต กปฺเป      ยํ ผลํ อททึ ตทา
                         ทุคฺคตึ นาภิชานามิ        ผลทานสฺสิทํ ผลํ ฯ
           |๙๘.๘๓| กิเลสา ฌาปิตา มยฺหํ     ภวา สพฺเพ สมูหตา
                         นาโคว พนฺธนํ เฉตฺวา     วิหรามิ อนาสโว ฯ
@เชิงอรรถ: ๑ ม. ยุ. อเชลํ ฯ ๒ ม. อโมท... ฯ ๓ ม. อโมทมททึ ฯ
---------------------------------------------------------------------------------------------
หน้าที่ ๑๔๙.
           |๙๘.๘๔| สฺวาคตํ วต เม อาสิ        มม พุทฺธสฺส สนฺติเก
                         ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
           |๙๘.๘๕| ปฏิสมฺภิทา จตสฺโส        วิโมกฺขาปิจ อฏฺฐิเม
                         ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
              อิตฺถํ สุทํ อายสฺมา อโมรผลิโย เถโร อิมา คาถาโย อภาสิตฺถาติ ฯ
                                  อโมรผลิยตฺเถรสฺส อปทานํ สมตฺตํ ฯ
                                   นวมํ ตาลผลิยตฺเถราปทานํ (๕๐๙)
     [๙๙]   |๙๙.๘๖| สตรํสี นาม ภควา     สยมฺภู อปราชิโต
                         วิเวกา วุฏฺฐหิตฺวาน        โคจรายาภินิกฺขมิ ฯ
           |๙๙.๘๗| ผลหตฺโถ อหํ ทิสฺวา       อุปคญฺฉึ นราสภํ
                         ปสนฺนจิตฺโต สุมโน        ตาลผลมทาสหํ ฯ
           |๙๙.๘๘| จตุนวุเต อิโต กปฺเป       ยํ ผลํ อททึ ตทา
                         ทุคฺคตึ นาภิชานามิ        ผลทานสฺสิทํ ผลํ ฯ
           |๙๙.๘๙| กิเลสา ฌาปิตา มยฺหํ     ภวา สพฺเพ สมูหตา
                         นาโคว พนฺธนํ เฉตฺวา     วิหรามิ อนาสโว ฯ
           |๙๙.๙๐| สฺวาคตํ วต เม อาสิ        มม พุทฺธสฺส สนฺติเก
                         ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
           |๙๙.๙๑| ปฏิสมฺภิทา จตสฺโส        วิโมกฺขาปิจ อฏฺฐิเม
                         ฉฬภิญฺญา สจฺฉิกตา     กตํ พุทฺธสฺส สาสนนฺติ ฯ
---------------------------------------------------------------------------------------------
หน้าที่ ๑๕๐.
              อิตฺถํ สุทํ อายสฺมา ตาลผลิโย เถโร อิมา คาถาโย อภาสิตฺถาติ ฯ
                                   ตาลผลิยตฺเถรสฺส อปทานํ สมตฺตํ ฯ
                               ทสมํ นาลิเกรผลทายกตฺเถราปทานํ (๕๑๐)
     [๑๐๐]   |๑๐๐.๙๒| นคเร พนฺธุมติยา    อารามิโก อหํ ตทา
                           อทฺทสํ วิรชํ พุทฺธํ         คจฺฉนฺตํ อนิลญฺชเส ฯ
           |๑๐๐.๙๓| นาลิเกรผลํ คยฺห        พุทฺธเสฏฺฐสฺสทาสหํ
                            อากาเส ฐิตโก สนฺโต   ปฏิคฺคณฺหิ มหายโส ฯ
           |๑๐๐.๙๔| ปีติสญฺชนโน ๑- มยฺหํ  ทิฏฺฐธมฺมสุขาวโห
                            ผลํ พุทฺธสฺส ทตฺวาน   วิปฺปสนฺเนน เจตสา ฯ
           |๑๐๐.๙๕| อธิคญฺฉึ ตทา ปีตึ       วิปุลญฺจ สุขุตฺตมํ
                            อุปฺปชฺชเตว รตนํ        นิพฺพตฺตสฺส ตหึ ๒- ตหึ ฯ
           |๑๐๐.๙๖| เอกนวุเต อิโต กปฺเป    ยํ ผลํ อททึ ตทา
                            ทุคฺคตึ นาภิชานามิ     ผลทานสฺสิทํ ผลํ ฯ
           |๑๐๐.๙๗| ทิพฺพจกฺขุํ วิสุทฺธํ เม    สมาธิกุสโล อหํ
                            อภิญฺญาปารมิปฺปตฺโต  ผลทานสฺสิทํ ผลํ ฯ
           |๑๐๐.๙๘| กิเลสา ฌาปิตา มยฺหํ   ภวา สพฺเพ สมูหตา
                            นาโคว พนฺธนํ เฉตฺวา  วิหรามิ อนาสโว ฯ
           |๑๐๐.๙๙| สฺวาคตํ วต เม อาสิ      มม พุทฺธสฺส สนฺติเก
@เชิงอรรถ: ๑ ม. ยุ. สพฺพตฺถ วิตฺตสญฺชนโน ฯ ๒ ยุ. ยหึ ฯ
---------------------------------------------------------------------------------------------
หน้าที่ ๑๕๑.
                            ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
           |๑๐๐.๑๐๐| ปฏิสมฺภิทา จตสฺโส        วิโมกฺขาปิจ อฏฺฐิเม
                            ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
              อิตฺถํ สุทํ อายสฺมา นาลิเกรผลทายโก เถโร อิมา คาถาโย อภาสิตฺถาติ ฯ
                              นาลิเกรผลทายกตฺเถรสฺส อปทานํ สมตฺตํ ฯ
                                                  อุทฺทานํ
                           กณิการญฺจ ปตฺโต จ         กาสุมาริ ตถาวโฏ
                           จารผลิ มาตุลุงฺโค             อชฺเชลาโมรเมว จ ฯ
                           ตาลํ ตถา นาลิเกรํ            คาถาโย คณิตาปิห
                           เอกํ คาถาสตํ โหติ            อูนาธิกวิวชฺชิตํ ฯ
                                     กณิการวคฺโค เอกปญฺญาโส ฯ
                                          ---------------------


             เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๑๓๙-๑๕๑.
http://84000.org/tipitaka/pitaka_item/pali_item_s.php?book=33&item=91&items=10&pagebreak=1&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=33&item=91&items=10&pagebreak=1&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=33&item=91&items=10&pagebreak=1&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=33&item=91&items=10&pagebreak=1&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=33&i=91
             สารบัญพระไตรปิฎกเล่มที่ ๓๓
http://84000.org/tipitaka/read/?index_33