ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๕ ภาษาบาลี อักษรไทย พระอภิธรรมปิฎกเล่มที่ ๒ อภิ. วิภงฺโค
                                     สจฺจวิภงฺโค
     [๑๔๔]   จตฺตาริ   อริยสจฺจานิ   ทุกฺขํ   อริยสจฺจํ   ทุกฺขสมุทโย
อริยสจฺจํ ทุกฺขนิโรโธ อริยสจฺจํ ทุกฺขนิโรธคามินี ปฏิปทา อริยสจฺจํ ฯ
     [๑๔๕]   ตตฺถ   กตมํ   ทุกฺขํ   อริยสจฺจํ  ชาติปิ  ทุกฺขา  ชราปิ
ทุกฺขา    มรณมฺปี    ทุกฺขํ    โสกปริเทวทุกฺขโทมนสฺสุปายาสาปิ   ทุกฺขา
อปฺปิเยหิ   สมฺปโยโค   ทุกฺโข   ปิเยหิ   วิปฺปโยโค   ทุกฺโข   ยมฺปิจฺฉํ
น ลภติ ตมฺปิ ทุกฺขํ สงฺขิตฺเตน ปญฺจุปาทานกฺขนฺธา ทุกฺขา ฯ
     [๑๔๖]   ตตฺถ   กตมา   ชาติ  ยา  เตสํ  เตสํ  สตฺตานํ  ตมฺหิ
ตมฺหิ   สตฺตนิกาเย   ชาติ   สญฺชาติ   โอกฺกนฺติ   อภินิพฺพตฺติ   ขนฺธานํ
ปาตุภาโว อายตนานํ ปฏิลาโภ อยํ วุจฺจติ ชาติ ฯ
     [๑๔๗]   ตตฺถ   กตมา   ชรา  ยา  เตสํ  เตสํ  สตฺตานํ  ตมฺหิ
ตมฺหิ    สตฺตนิกาเย   ชรา   ชีรณตา   ขณฺฑิจฺจํ   ปาลิจฺจํ   วลิตฺตจตา
อายุโน สํหานิ อินฺทฺริยานํ ปริปาโก อยํ วุจฺจติ ชรา ฯ
     [๑๔๘]   ตตฺถ   กตมํ   มรณํ  ยา  เตสํ  เตสํ  สตฺตานํ  ตมฺหา
ตมฺหา   สตฺตนิกายา   จุติ   จวนตา   เภโท   อนฺตรธานํ  มจฺจุ  มรณํ
กาลกิริยา    ขนฺธานํ    เภโท   กเฬวรสฺส   นิกฺเขโป   ชีวิตินฺทฺริยสฺส
อุปจฺเฉโท อิทํ วุจฺจติ มรณํ ฯ
     [๑๔๙]   ตตฺถ   กตโม   โสโก   ญาติพฺยสเนน   วา   ผุฏฺฐสฺส
โภคพฺยสเนน   วา   ผุฏฺฐสฺส   โรคพฺยสเนน  วา  ผุฏฺฐสฺส  สีลพฺยสเนน
วา   ผุฏฺฐสฺส   ทิฏฺฐิพฺยสเนน   วา  ผุฏฺฐสฺส  อญฺญตรญฺญตเรน  พฺยสเนน
สมนฺนาคตสฺส     อญฺญตรญฺญตเรน     ทุกฺขธมฺเมน    ผุฏฺฐสฺส    โสโก
โสจนา   โสจิตตฺตํ   อนฺโตโสโก   อนฺโตปริโสโก  เจตโส  ปริชฺฌายนา
โทมนสฺสํ โสกสลฺลํ อยํ วุจฺจติ โสโก ฯ
     [๑๕๐]   ตตฺถ   กตโม   ปริเทโว   ญาติพฺยสเนน  วา  ผุฏฺฐสฺส
โภคพฺยสเนน   วา   ผุฏฺฐสฺส   โรคพฺยสเนน  วา  ผุฏฺฐสฺส  สีลพฺยสเนน
วา   ผุฏฺฐสฺส   ทิฏฺฐิพฺยสเนน   วา  ผุฏฺฐสฺส  อญฺญตรญฺญตเรน  พฺยสเนน
สมนฺนาคตสฺส    อญฺญตรญฺญตเรน    ทุกฺขธมฺเมน    ผุฏฺฐสฺส    อาเทโว
ปริเทโว  อาเทวนา  ปริเทวนา  อาเทวิตตฺตํ  ปริเทวิตตฺตํ วาจา ปลาโป
วิปฺปลาโป ลาลโป ลาลปนา ลาลปิตตฺตํ อยํ วุจฺจติ ปริเทโว ฯ
     [๑๕๑]   ตตฺถ   กตมํ   ทุกฺขํ   ยํ  กายิกํ  อสาตํ  กายิกํ  ทุกฺขํ
กายสมฺผสฺสชํ   อสาตํ   ทุกฺขํ   เวทยิตํ  กายสมฺผสฺสชา  อสาตา  ทุกฺขา
เวทนา อิทํ วุจฺจติ ทุกฺขํ ฯ
     [๑๕๒]   ตตฺถ   กตมํ   โทมนสฺสํ   ยํ  เจตสิกํ  อสาตํ  เจตสิกํ
ทุกฺขํ   เจโตสมฺผสฺสชํ   อสาตํ  ทุกฺขํ  เวทยิตํ  เจโตสมฺผสฺสชา  อสาตา
ทุกฺขา เวทนา อิทํ วุจฺจติ โทมนสฺสํ ฯ
     [๑๕๓]   ตตฺถ   กตโม   อุปายาโส  ญาติพฺยสเนน  วา  ผุฏฺฐสฺส
โภคพฺยสเนน   วา   ผุฏฺฐสฺส   โรคพฺยสเนน  วา  ผุฏฺฐสฺส  สีลพฺยสเนน
วา   ผุฏฺฐสฺส   ทิฏฺฐิพฺยสเนน   วา  ผุฏฺฐสฺส  อญฺญตรญฺญตเรน  พฺยสเนน
สมนฺนาคตสฺส    อญฺญตรญฺญตเรน    ทุกฺขธมฺเมน    ผุฏฺฐสฺส    อายาโส
อุปายาโส อายาสิตตฺตํ อุปายาสิตตฺตํ อยํ วุจฺจติ อุปายาโส ฯ
     [๑๕๔]   ตตฺถ   กตโม  อปฺปิเยหิ  สมฺปโยโค  ทุกฺโข  อิธ  ยสฺส
เต   โหนฺติ   อนิฏฺฐา   อกนฺตา  อมนาปา  รูปา  สทฺทา  คนฺธา  รสา
โผฏฺฐพฺพา   เย   วา   ปนสฺส   เต   โหนฺติ  อนตฺถกามา  อหิตกามา
อผาสุกามา   อโยคกฺเขมกามา   ยา  เตหิ  สงฺคติ  สมาคโม  สโมธานํ
มิสฺสีภาโว อยํ วุจฺจติ อปฺปิเยหิ สมฺปโยโค ทุกฺโข ฯ
     [๑๕๕]   ตตฺถ  กตโม  ปิเยหิ  วิปฺปโยโค  ทุกฺโข  อิธ  ยสฺส  เต
โหนฺติ   อิฏฺฐา  กนฺตา  มนาปา  รูปา  สทฺทา  คนฺธา  รสา  โผฏฺฐพฺพา
เย   วา   ปนสฺส   เต   โหนฺติ   อตฺถกามา   หิตกามา   ผาสุกามา
โยคกฺเขมกามา  มาตา  วา  ปิตา  วา  ภาตา  วา  ภคินี  วา  มิตฺตา
วา   อมจฺจา  วา  ญาติสาโลหิตา  วา  ยา  เตหิ  อสงฺคติ  อสมาคโม
อสโมธานํ อมิสฺสีภาโว อยํ วุจฺจติ ปิเยหิ วิปฺปโยโค ทุกฺโข ฯ
     [๑๕๖]   ตตฺถ  กตมํ  ยมฺปิจฺฉํ  น  ลภติ  ตมฺปิ  ทุกฺขํ  ชาติธมฺมานํ
สตฺตานํ   เอวํ   อิจฺฉา   อุปฺปชฺชติ   อโห   วต   มยํ  น  ชาติธมฺมา
อสฺสาม  น  จ  วต  โน  ชาติ  อาคจฺเฉยฺยาติ  น  โข  ปเนตํ อิจฺฉาย
ปตฺตพฺพํ    อิทมฺปิ    ยมฺปิจฺฉํ   น   ลภติ   ตมฺปิ   ทุกฺขํ   ชราธมฺมานํ
สตฺตานํ   ฯเปฯ   พฺยาธิธมฺมานํ   สตฺตานํ  ฯเปฯ  มรณธมฺมานํ  สตฺตานํ
ฯเปฯ   โสกปริเทวทุกฺขโทมนสฺสุปายาสธมฺมานํ   สตฺตานํ   เอวํ   อิจฺฉา
อุปฺปชฺชติ   อโห   วต   มยํ   น   โสกปริเทวทุกฺขโทมนสฺสุปายาสธมฺมา
อสฺสาม     น    จ    วต    โน    โสกปริเทวทุกฺขโทมนสฺสุปายาสา
อาคจฺเฉยฺยุนฺติ   น   โข   ปเนตํ   อิจฺฉาย   ปตฺตพฺพํ  อิทมฺปิ  ยมฺปิจฺฉํ
น ลภติ ตมฺปิ ทุกฺขํ ฯ
     [๑๕๗]   ตตฺถ   กตเม   สงฺขิตฺเตน   ปญฺจุปาทานกฺขนฺธา  ทุกฺขา
เสยฺยถีทํ    รูปูปาทานกฺขนฺโธ   เวทนูปาทานกฺขนฺโธ   สญฺญูปาทานกฺขนฺโธ
สงฺขารูปาทานกฺขนฺโธ      วิญฺญาณูปาทานกฺขนฺโธ      อิเม     วุจฺจนฺติ
สงฺขิตฺเตน ปญฺจุปาทานกฺขนฺธา ทุกฺขา ฯ
                            อิทํ วุจฺจติ ทุกฺขํ อริยสจฺจํ ฯ
     [๑๕๘]   ตตฺถ  กตมํ ทุกฺขสมุทโย อริยสจฺจํ ยายํ ตณฺหา โปโนพฺภวิกา
นนฺทิราคสหคตา    ตตฺรตตฺราภินนฺทินี   เสยฺยถีทํ   กามตณฺหา   ภวตณฺหา
วิภวตณฺหา ฯ
     [๑๕๙]   สา  โข  ปเนสา  ตณฺหา  กตฺถ  อุปฺปชฺชมานา  อุปฺปชฺชติ
กตฺถ   นิวิสมานา   นิวิสติ   ฯ  ยํ  โลเก  ปิยรูปํ  สาตรูปํ  เอตฺเถสา
ตณฺหา    อุปฺปชฺชมานา    อุปฺปชฺชติ   เอตฺถ   นิวิสมานา   นิวิสติ   ฯ
กิญฺจ   โลเก   ปิยรูปํ   สาตรูปํ   ฯ   จกฺขุํ   โลเก  ปิยรูปํ  สาตรูปํ
เอตฺเถสา    ตณฺหา    อุปฺปชฺชมานา    อุปฺปชฺชติ   เอตฺถ   นิวิสมานา
นิวิสติ   โสตํ   ฯเปฯ   ฆานํ   ชิวฺหา   กาโย   มโน  โลเก  ปิยรูปํ
สาตรูปํ    เอตฺเถสา    ตณฺหา    อุปฺปชฺชมานา    อุปฺปชฺชติ    เอตฺถ
นิวิสมานา นิวิสติ ฯ
     {๑๕๙.๑}   รูปา   โลเก   ปิยรูปํ   สาตรูปํ  เอตฺเถสา  ตณฺหา
อุปฺปชฺชมานา   อุปฺปชฺชติ   เอตฺถ   นิวิสมานา   นิวิสติ   สทฺทา  ฯเปฯ
คนฺธา   รสา   โผฏฺฐพฺพา   ธมฺมา  โลเก  ปิยรูปํ  สาตรูปํ  เอตฺเถสา
ตณฺหา อุปฺปชฺชมานา อุปฺปชฺชติ เอตฺถ นิวิสมานา นิวิสติ ฯ
     {๑๕๙.๒}   จกฺขุวิญฺญาณํ  โลเก  ปิยรูปํ  สาตรูปํ  เอตฺเถสา ตณฺหา
อุปฺปชฺชมานา    อุปฺปชฺชติ    เอตฺถ   นิวิสมานา   นิวิสติ   โสตวิญฺญาณํ
ฯเปฯ     ฆานวิญฺญาณํ     ชิวฺหาวิญฺญาณํ    กายวิญฺญาณํ    มโนวิญฺญาณํ
โลเก   ปิยรูปํ   สาตรูปํ   เอตฺเถสา   ตณฺหา  อุปฺปชฺชมานา  อุปฺปชฺชติ
เอตฺถ นิวิสมานา นิวิสติ ฯ
     {๑๕๙.๓}   จกฺขุสมฺผสฺโส  โลเก  ปิยรูปํ  สาตรูปํ เอตฺเถสา ตณฺหา
อุปฺปชฺชมานา    อุปฺปชฺชติ   เอตฺถ   นิวิสมานา   นิวิสติ   โสตสมฺผสฺโส
ฯเปฯ    ฆานสมฺผสฺโส    ชิวฺหาสมฺผสฺโส   กายสมฺผสฺโส   มโนสมฺผสฺโส
โลเก   ปิยรูปํ   สาตรูปํ   เอตฺเถสา   ตณฺหา  อุปฺปชฺชมานา  อุปฺปชฺชติ
เอตฺถ นิวิสมานา นิวิสติ ฯ
     {๑๕๙.๔}   จกฺขุสมฺผสฺสชา  เวทนา โลเก ปิยรูปํ สาตรูปํ เอตฺเถสา
ตณฺหา     อุปฺปชฺชมานา    อุปฺปชฺชติ    เอตฺถ    นิวิสมานา    นิวิสติ
โสตสมฺผสฺสชา  เวทนา  ฯเปฯ  ฆานสมฺผสฺสชา  เวทนา  ชิวฺหาสมฺผสฺสชา
เวทนา    กายสมฺผสฺสชา   เวทนา   มโนสมฺผสฺสชา   เวทนา   โลเก
ปิยรูปํ   สาตรูปํ   เอตฺเถสา   ตณฺหา   อุปฺปชฺชมานา  อุปฺปชฺชติ  เอตฺถ
นิวิสมานา นิวิสติ ฯ
     {๑๕๙.๕}   รูปสญฺญา  โลเก  ปิยรูปํ  สาตรูปํ  เอตฺเถสา  ตณฺหา
อุปฺปชฺชมานา    อุปฺปชฺชติ    เอตฺถ   นิวิสมานา   นิวิสติ    สทฺทสญฺญา
ฯเปฯ    คนฺธสญฺญา    รสสญฺญา   โผฏฺฐพฺพสญฺญา   ธมฺมสญฺญา   โลเก
ปิยรูปํ   สาตรูปํ   เอตฺเถสา   ตณฺหา   อุปฺปชฺชมานา  อุปฺปชฺชติ  เอตฺถ
นิวิสมานา นิวิสติ ฯ
     {๑๕๙.๖}   รูปสญฺเจตนา  โลเก  ปิยรูปํ  สาตรูปํ เอตฺเถสา ตณฺหา
อุปฺปชฺชมานา  อุปฺปชฺชติ  เอตฺถ  นิวิสมานา  นิวิสติ  สทฺทสญฺเจตนา ฯเปฯ
คนฺธสญฺเจตนา     รสสญฺเจตนา    โผฏฺฐพฺพสญฺเจตนา    ธมฺมสญฺเจตนา
โลเก   ปิยรูปํ   สาตรูปํ   เอตฺเถสา   ตณฺหา  อุปฺปชฺชมานา  อุปฺปชฺชติ
เอตฺถ นิวิสมานา นิวิสติ ฯ
     {๑๕๙.๗}   รูปตณฺหา    โลเก   ปิยรูปํ   สาตรูปํ   เอตฺเถสา
ตณฺหา       อุปฺปชฺชมานา      อุปฺปชฺชติ      เอตฺถ      นิวิสมานา
นิวิสติ    สทฺทตณฺหา    ฯเปฯ   คนฺธตณฺหา   รสตณฺหา   โผฏฺฐพฺพตณฺหา
ธมฺมตณฺหา   โลเก   ปิยรูปํ   สาตรูปํ  เอตฺเถสา  ตณฺหา  อุปฺปชฺชมานา
อุปฺปชฺชติ เอตฺถ นิวิสมานา นิวิสติ ฯ
     {๑๕๙.๘}   รูปวิตกฺโก  โลเก  ปิยรูปํ  สาตรูปํ  เอตฺเถสา  ตณฺหา
อุปฺปชฺชมานา   อุปฺปชฺชติ  เอตฺถ  นิวิสมานา  นิวิสติ  สทฺทวิตกฺโก  ฯเปฯ
คนฺธวิตกฺโก  รสวิตกฺโก  โผฏฺฐพฺพวิตกฺโก ธมฺมวิตกฺโก โลเก ปิยรูปํ สาตรูปํ
เอตฺเถสา ตณฺหา อุปฺปชฺชมานา อุปฺปชฺชติ เอตฺถ นิวิสมานา นิวิสติ ฯ
     {๑๕๙.๙}   รูปวิจาโร  โลเก  ปิยรูปํ  สาตรูปํ  เอตฺเถสา  ตณฺหา
อุปฺปชฺชมานา   อุปฺปชฺชติ  เอตฺถ  นิวิสมานา  นิวิสติ  สทฺทวิจาโร  ฯเปฯ
คนฺธวิจาโร  รสวิจาโร  โผฏฺฐพฺพวิจาโร ธมฺมวิจาโร โลเก ปิยรูปํ สาตรูปํ
เอตฺเถสา ตณฺหา อุปฺปชฺชมานา อุปฺปชฺชติ เอตฺถ นิวิสมานา  นิวิสติ ฯ
                        อิทํ วุจฺจติ ทุกฺขสมุทโย อริยสจฺจํ ฯ
     [๑๖๐]   ตตฺถ   กตมํ   ทุกฺขนิโรโธ   อริยสจฺจํ  โย  ตสฺสาเยว
ตณฺหาย อเสสวิราคนิโรโธ จาโค ปฏินิสฺสคฺโค มุตฺติ อนาลโย ฯ
     [๑๖๑]   สา   โข   ปเนสา   ตณฺหา  กตฺถ  ปหียมานา  ปหียติ
กตฺถ   นิรุชฺฌมานา  นิรุชฺฌติ  ฯ  ยํ  โลเก  ปิยรูปํ  สาตรูปํ  เอตฺเถสา
ตณฺหา   ปหียมานา   ปหียติ   เอตฺถ   นิรุชฺฌมานา   นิรุชฺฌติ  ฯ  กิญฺจ
โลเก   ปิยรูปํ   สาตรูปํ  ฯ  จกฺขุํ  โลเก  ปิยรูปํ  สาตรูปํ  เอตฺเถสา
ตณฺหา    ปหียมานา    ปหียติ   เอตฺถ   นิรุชฺฌมานา   นิรุชฺฌติ   โสตํ
ฯเปฯ   ฆานํ  ชิวฺหา  กาโย  มโน  โลเก  ปิยรูปํ  สาตรูปํ  เอตฺเถสา
ตณฺหา   ปหียมานา   ปหียติ   เอตฺถ   นิรุชฺฌมานา   นิรุชฺฌติ  ฯ  รูปา
โลเก   ปิยรูปํ   สาตรูปํ  เอตฺเถสา  ตณฺหา  ปหียมานา  ปหียติ  เอตฺถ
นิรุชฺฌมานา    นิรุชฺฌติ    สทฺทา   ฯเปฯ   คนฺธา   รสา   โผฏฺฐพฺพา
ธมฺมา    โลเก    ปิยรูปํ   สาตรูปํ   เอตฺเถสา   ตณฺหา   ปหียมานา
ปหียติ เอตฺถ นิรุชฺฌมานา นิรุชฺฌติ ฯ
     {๑๖๑.๑}   จกฺขุวิญฺญาณํ  โลเก  ปิยรูปํ  สาตรูปํ  เอตฺเถสา ตณฺหา
ปหียมานา   ปหียติ   เอตฺถ   นิรุชฺฌมานา  นิรุชฺฌติ  โสตวิญฺญาณํ  ฯเปฯ
ฆานวิญฺญาณํ   ชิวฺหาวิญฺญาณํ   กายวิญฺญาณํ   มโนวิญฺญาณํ   โลเก  ปิยรูปํ
สาตรูปํ เอตฺเถสา ตณฺหา ปหียมานา ปหียติ เอตฺถ นิรุชฺฌมานา นิรุชฺฌติ ฯ
     {๑๖๑.๒}   จกฺขุสมฺผสฺโส  โลเก  ปิยรูปํ  สาตรูปํ เอตฺเถสา ตณฺหา
ปหียมานา   ปหียติ   เอตฺถ  นิรุชฺฌมานา  นิรุชฺฌติ  โสตสมฺผสฺโส  ฯเปฯ
ฆานสมฺผสฺโส    ชิวฺหาสมฺผสฺโส    กายสมฺผสฺโส   มโนสมฺผสฺโส   โลเก
ปิยรูปํ    สาตรูปํ    เอตฺเถสา   ตณฺหา   ปหียมานา   ปหียติ   เอตฺถ
นิรุชฺฌมานา นิรุชฺฌติ ฯ
     {๑๖๑.๓}   จกฺขุสมฺผสฺสชา  เวทนา โลเก ปิยรูปํ สาตรูปํ เอตฺเถสา
ตณฺหา   ปหียมานา  ปหียติ  เอตฺถ  นิรุชฺฌมานา  นิรุชฺฌติ  โสตสมฺผสฺสชา
เวทนา   ฯเปฯ   ฆานสมฺผสฺสชา   เวทนา   ชิวฺหาสมฺผสฺสชา   เวทนา
กายสมฺผสฺสชา    เวทนา    มโนสมฺผสฺสชา   เวทนา   โลเก   ปิยรูปํ
สาตรูปํ     เอตฺเถสา     ตณฺหา     ปหียมานา     ปหียติ    เอตฺถ
นิรุชฺฌมานา      นิรุชฺฌติ      ฯ     รูปสญฺญา     โลเก     ปิยรูปํ
สาตรูปํ   เอตฺเถสา   ตณฺหา   ปหียมานา   ปหียติ  เอตฺถ  นิรุชฺฌมานา
นิรุชฺฌติ    สทฺทสญฺญา   ฯเปฯ   คนฺธสญฺญา   รสสญฺญา   โผฏฺฐพฺพสญฺญา
ธมฺมสญฺญา   โลเก   ปิยรูปํ   สาตรูปํ   เอตฺเถสา   ตณฺหา  ปหียมานา
ปหียติ เอตฺถ นิรุชฺฌมานา นิรุชฺฌติ ฯ
     {๑๖๑.๔}   รูปสญฺเจตนา  โลเก  ปิยรูปํ  สาตรูปํ เอตฺเถสา ตณฺหา
ปหียมานา    ปหียติ    เอตฺถ   นิรุชฺฌมานา   นิรุชฺฌติ   สทฺทสญฺเจตนา
ฯเปฯ       คนฺธสญฺเจตนา      รสสญฺเจตนา      โผฏฺฐพฺพสญฺเจตนา
ธมฺมสญฺเจตนา   โลเก   ปิยรูปํ  สาตรูปํ  เอตฺเถสา  ตณฺหา  ปหียมานา
ปหียติ เอตฺถ นิรุชฺฌมานา นิรุชฺฌติ ฯ
     {๑๖๑.๕}   รูปตณฺหา  โลเก  ปิยรูปํ  สาตรูปํ  เอตฺเถสา  ตณฺหา
ปหียมานา    ปหียติ    เอตฺถ    นิรุชฺฌมานา    นิรุชฺฌติ    สทฺทตณฺหา
ฯเปฯ      คนฺธตณฺหา     รสตณฺหา     โผฏฺฐพฺพตณฺหา     ธมฺมตณฺหา
โลเก    ปิยรูปํ    สาตรูปํ   เอตฺเถสา   ตณฺหา   ปหียมานา   ปหียติ
เอตฺถ นิรุชฺฌมานา นิรุชฺฌติ ฯ
     {๑๖๑.๖}   รูปวิตกฺโก  โลเก  ปิยรูปํ  สาตรูปํ  เอตฺเถสา  ตณฺหา
ปหียมานา   ปหียติ   เอตฺถ   นิรุชฺฌมานา  นิรุชฺฌติ  สทฺทวิตกฺโก  ฯเปฯ
คนฺธวิตกฺโก   รสวิตกฺโก   โผฏฺฐพฺพวิตกฺโก   ธมฺมวิตกฺโก  โลเก  ปิยรูปํ
สาตรูปํ   เอตฺเถสา   ตณฺหา   ปหียมานา   ปหียติ  เอตฺถ  นิรุชฺฌมานา
นิรุชฺฌติ ฯ
     {๑๖๑.๗}   รูปวิจาโร โลเก ปิยรูปํ สาตรูปํ เอตฺเถสา ตณฺหา ปหียมานา
ปหียติ เอตฺถ นิรุชฺฌมานา นิรุชฺฌติ สทฺทวิจาโร  ฯเปฯ คนฺธวิจาโร รสวิจาโร
โผฏฺฐพฺพวิจาโร  ธมฺมวิจาโร   โลเก  ปิยรูปํ  สาตรูปํ  เอตฺเถสา ตณฺหา
ปหียมานา ปหียติ เอตฺถ นิรุชฺฌมานา นิรุชฺฌติ ฯ
                         อิทํ วุจฺจติ ทุกฺขนิโรโธ อริยสจฺจํ ฯ
     [๑๖๒]   ตตฺถ  กตมํ  ทุกฺขนิโรธคามินี  ปฏิปทา อริยสจฺจํ ฯ อยเมว
อริโย   อฏฺฐงฺคิโก  มคฺโค  ฯ  เสยฺยถีทํ  ฯ  สมฺมาทิฏฺฐิ  สมฺมาสงฺกปฺโป
สมฺมาวาจา   สมฺมากมฺมนฺโต   สมฺมาอาชีโว   สมฺมาวายาโม   สมฺมาสติ
สมฺมาสมาธิ ฯ
     [๑๖๓]   ตตฺถ   กตมา   สมฺมาทิฏฺฐิ   ทุกฺเข  ญาณํ  ทุกฺขสมุทเย
ญาณํ    ทุกฺขนิโรเธ    ญาณํ    ทุกฺขนิโรธคามินิยา    ปฏิปทาย   ญาณํ
อยํ วุจฺจติ สมฺมาทิฏฺฐิ ฯ
     [๑๖๔]   ตตฺถ    กตโม    สมฺมาสงฺกปฺโป    เนกฺขมฺมสงฺกปฺโป
อพฺยาปาทสงฺกปฺโป อวิหึสาสงฺกปฺโป อยํ วุจฺจติ สมฺมาสงฺกปฺโป ฯ
     [๑๖๕]   ตตฺถ  กตมา  สมฺมาวาจา  มุสาวาทา  เวรมณี  ปิสุณาย
วาจาย   เวรมณี   ผรุสาย   วาจาย   เวรมณี  สมฺผปฺปลาปา  เวรมณี
อยํ วุจฺจติ สมฺมาวาจา ฯ
     [๑๖๖]   ตตฺถ   กตโม   สมฺมากมฺมนฺโต   ปาณาติปาตา  เวรมณี
อทินฺนาทานา   เวรมณี   กาเมสุ   มิจฺฉาจารา   เวรมณี   อยํ  วุจฺจติ
สมฺมากมฺมนฺโต ฯ
     [๑๖๗]   ตตฺถ  กตโม  สมฺมาอาชีโว  อิธ  อริยสาวโก มิจฺฉาอาชีวํ
ปหาย สมฺมาอาชีเวน ชีวิตํ กปฺเปติ อยํ วุจฺจติ สมฺมาอาชีโว ฯ
     [๑๖๘]   ตตฺถ   กตโม   สมฺมาวายาโม  อิธ  ภิกฺขุ  อนุปฺปนฺนานํ
ปาปกานํ   อกุสลานํ   ธมฺมานํ   อนุปฺปาทาย   ฉนฺทํ   ชเนติ   วายมติ
วิริยํ    อารภติ   จิตฺตํ   ปคฺคณฺหาติ    ปทหติ   อุปฺปนฺนานํ   ปาปกานํ
อกุสลานํ   ธมฺมานํ   ปหานาย   ฯเปฯ   อนุปฺปนฺนานํ  กุสลานํ  ธมฺมานํ
อุปฺปาทาย   ฯเปฯ   อุปฺปนฺนานํ   กุสลานํ  ธมฺมานํ  ฐิติยา  อสมฺโมสาย
ภิยฺโยภาวาย   เวปุลฺลาย   ภาวนาย  ปาริปูริยา  ฉนฺทํ  ชเนติ  วายมติ
วิริยํ อารภติ จิตฺตํ ปคฺคณฺหาติ ปทหติ อยํ วุจฺจติ สมฺมาวายาโม ฯ
     [๑๖๙]   ตตฺถ  กตมา  สมฺมาสติ  อิธ  ภิกฺขุ  กาเย  กายานุปสฺสี
วิหรติ   อาตาปิ   สมฺปชาโน   สติมา  วิเนยฺย  โลเก  อภิชฺฌาโทมนสฺสํ
เวทนาสุ    ฯเปฯ    จิตฺเต   ฯเปฯ   ธมฺเมสุ   ธมฺมานุปสฺสี   วิหรติ
อาตาปี   สมฺปชาโน   สติมา   วิเนยฺย   โลเก   อภิชฺฌาโทมนสฺสํ  อยํ
วุจฺจติ สมฺมาสติ ฯ
     [๑๗๐]   ตตฺถ   กตโม   สมฺมาสมาธิ   อิธ   ภิกฺขุ   วิวิจฺเจว
กาเมหิ    วิวิจฺจ    อกุสเลหิ   ธมฺเมหิ   สวิตกฺกํ   สวิจารํ   วิเวกชํ
ปีติสุขํ    ปฐมํ   ฌานํ   อุปสมฺปชฺช   วิหรติ   วิตกฺกวิจารานํ   วูปสมา
อชฺฌตฺตํ   สมฺปสาทนํ   เจตโส   เอโกทิภาวํ  อวิตกฺกํ  อวิจารํ  สมาธิชํ
ปิติสุขํ   ทุติยํ  ฌานํ  อุปสมฺปชฺช  วิหรติ  ปีติยา  จ  วิราคา  อุเปกฺขโก
จ   วิหรติ   สโต   จ  สมฺปชาโน  สุขญฺจ  กาเยน  ปฏิสํเวเทติ  ยนฺตํ
อริยา    อาจิกฺขนฺติ    อุเปกฺขโก   สติมา   สุขวิหารีติ   ตติยํ   ฌานํ
อุปสมฺปชฺช   วิหรติ   สุขสฺส  จ  ปหานา  ทุกฺขสฺส  จ  ปหานา  ปุพฺเพว
โสมนสฺสโทมนสฺสานํ     อตฺถงฺคมา    อทุกฺขมสุขํ    อุเปกฺขาสติปาริสุทฺธึ
จตุตฺถํ ฌานํ อุปสมฺปชฺช วิหรติ อยํ วุจฺจติ สมฺมาสมาธิ ฯ
               อิทํ วุจฺจติ ทุกฺขนิโรธคามินี ปฏิปทา อริยสจฺจํ ฯ
                                 สุตฺตนฺตภาชนียํ ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๓๕ หน้าที่ ๑๒๗-๑๓๘. http://84000.org/tipitaka/pitaka_item/pali_item_s.php?book=35&item=144&items=27&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=35&item=144&items=27&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=35&item=144&items=27&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=35&item=144&items=27&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=35&i=144              The Pali Atthakatha in Thai :- http://84000.org/tipitaka/atthapali/read_th.php?B=54&A=2078              The Pali Atthakatha in Roman :- http://84000.org/tipitaka/atthapali/read_rm.php?B=54&A=2078              สารบัญพระไตรปิฎกเล่มที่ ๓๕ http://84000.org/tipitaka/read/?index_35

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :