Atthakatha Book 50 : PALI ROMAN
Apa.A.2 (visuddha.2)

Ropetvā tadeva vanamūlaphalañca khādanto vihāsi. So bahūni lasuṇāni
kājenādāya manussapathaṃ āharitvā pasanno dānaṃ datvā buddhappamukhassa
bhikkhusaṃghassa bhesajjatthāya datvā gacchati. Evaṃ so yāvajīvaṃ puññāni katvā
teneva puññabalena devamanussesu saṃsaranto ubhayasampattiṃ anubhavitvā kamena
imasmiṃ buddhuppāde uppanno paṭiladdhasaddho pabbajitvā vipassanaṃ vaḍḍhetvā
nacirasseva arahattaṃ patto pubbakammavasena lasuṇadāyakattheroti pākaṭo.
     [89] Attano pubbakammaṃ saritvā somanassajāto pubbacaritāpadānaṃ
pakāsento himavantassāvidūretiādimāha. Tattha himālayapabbatassa pariyosāne
manussānaṃ sañcaraṇaṭṭhāne yadā vipassī bhagavā udapādi, tadā ahaṃ tāpaso
ahosinti sambandho. Lasuṇaṃ upajīvāmīti rattalasuṇaṃ ropetvā tadeva gocaraṃ
katvā jīvikaṃ kappemīti attho. Tena vuttaṃ "lasuṇaṃ mayhabhojanan"ti.
     [90] Khāriyo pūrayitvānāti tāpasabhājanāni lasuṇena pūrayitvā
kājenādāya saṃghārāmaṃ saṃghassa vasanaṭṭhānaṃ hemantādīsu tīsu kālesu saṃghassa
catūhi iriyāpathehi vasanavihāraṃ agacchiṃ agamāsinti attho. Haṭṭho haṭṭhena
cittenāti ahaṃ santuṭṭho somanassayuttacittena saṃghassa lasuṇaṃ adāsinti attho.
     [91] Vipassissa .pe. Niratassahanti narānaṃ aggassa seṭṭhassa
assa vipassissa bhagavato sāsane nirato nissesena rato ahanti sambandho.
Saṃghassa .pe. Modahanti ahaṃ saṃghassa lasuṇadānaṃ datvā saggamhi suṭṭhu
aggasmiṃ devaloke āyukappaṃ dibbasampattiṃ anubhavamāno modiṃ, santuṭṭho
bhavāmīti attho. Sesaṃ suviññeyyamevāti.
                  Lasuṇadāyakattherāpadānavaṇṇanā niṭṭhitā.
                           -----------


             The Pali Atthakatha in Roman Book 50 page 75.
http://84000.org/tipitaka/pitaka_item/read_rm.php?B=50&A=1655
             อรรถกถาบาลีอักษรไทย :-
http://84000.org/tipitaka/pitaka_item/read_th.php?B=50&A=1655
             อ่านอรรถกถาแปลไทย :-
http://84000.org/tipitaka/attha/attha.php?b=32&i=39
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=32&A=2049
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=32&A=2631
             The Pali Tipitaka in Roman Character :-
http://84000.org/tipitaka/read/roman_read.php?B=32&A=2631
             Contents of The Tipitaka Volume 32
http://84000.org/tipitaka/read/?index_32