Atthakatha Book 15 : PALI ROMAN
Aṅ.A. (manoratha.2)

      Aññepi gilānā upaṭṭhātabbāti itarepi dve gilānā upaṭṭhāpetabbā.
Kiṃkāraṇā? yopi hi niṭṭhappattagilāno, so anupaṭṭhiyamāno "sace maṃ paṭijaggeyyuṃ,
Phāsukaṃ me 1- bhaveyya. Na kho pana maṃ paṭijaggantī"ti manopadosaṃ katvā apāye
nibbatteyya. Paṭijaggiyamānassa panassa evaṃ hoti "bhikkhusaṃghena yaṃ kātabbaṃ, taṃ
kataṃ. Mayhaṃ pana kammavipāko īdiso"ti so bhikkhusaṃghe mettaṃ paccupaṭṭhāpetvā
sagge nibbattissati. Yo pana appamattakena byādhinā samannāgato labhantopi
alabhantopi vuṭṭhātiyeva, tassa vināpi bhesajjena vūpasamanabyādhi bhesajje kate
khippataraṃ vūpasammati. So tato buddhavacanaṃ vā uggaṇhituṃ sakkhissati, samaṇadhammaṃ
vā kātuṃ sakkhissati. Iminā kāraṇena "aññepi gilānā upaṭṭhātabbā"ti vuttaṃ.
      Neva okkamatīti neva pavisati. Niyāmaṃ kusalesu dhammesu sammattanti kusalesu
dhammesu magganiyāmasaṅkhātaṃ sammattaṃ. Iminā padaparamo puggalo kathito. Dutiyavārena
ugghaṭitaññū gahito sāsane nālakattherasadiso buddhantare ekavāre 2- paccekabuddhānaṃ
santike ovādaṃ labhitvā paṭividdhapaccekabodhiñāṇova. 3- Tatiyavārena
vipacitaññū puggalo kathito, neyyo pana tannissitova hoti.
      Dhammadesanā anuññātāti māsassa aṭṭha vāre dhammakathā anuññātā.
Aññesaṃpi dhammo desetabboti itaresaṃpi dhammo kathetabbo. Kiṃkāraṇā?
Padaparamassa hi imasmiṃ attabhāve dhammaṃ paṭivijjhituṃ asakkontassāpi anāgate
paccayo bhavissati. Yo pana tathāgatassa rūpadassanaṃ labhantopi alabhantopi dhammavinayañca
savanāya labhantopi alabhantopi dhammaṃ abhisameti, so alabhanto tāva abhisameti.
Labhanto pana khippameva abhisamessatīti iminā kāraṇena tesaṃ dhammo desetabbo.
Tatiyassa pana punappunaṃ desetabbova.
@Footnote: 1 Ma. phāsukameva   2 cha.Ma.,i. ekavāraṃ    3 cha.Ma.,i.....ñāṇo ca


             The Pali Atthakatha in Roman Book 15 page 100.
http://84000.org/tipitaka/pitaka_item/read_rm.php?B=15&A=2232
             อรรถกถาบาลีอักษรไทย :-
http://84000.org/tipitaka/pitaka_item/read_th.php?B=15&A=2232
             อ่านอรรถกถาแปลไทย :-
http://84000.org/tipitaka/attha/attha.php?b=20&i=461
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=20&A=3167
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=20&A=3122
             The Pali Tipitaka in Roman Character :-
http://84000.org/tipitaka/read/roman_read.php?B=20&A=3122
             Contents of The Tipitaka Volume 20
http://84000.org/tipitaka/read/?index_20