AtthaPali Vol.55

Tattha dhammatoti:- imesu hi paccayesu hetupaccayo tāva nāmarūpadhammesu nāmadhammekadeso. Ārammaṇapaccayo saddhiṃ paññattiyā ca abhāvena sabbepi nāmarūpadhammā. Adhipatipaccaye sahajātādhipati nāmadhammekadeso. Tathā kammajhāna- maggapaccayā. Ārammaṇādhipati sabbepi garukātabbā ārammaṇadhammā. Anantarasamanantara- pacchājātāsevanavipākasampayuttanatthivigatapaccayā nāmadhammāva. Nibbānassa asaṅgahitattā nāmadhammekadesotipi vattuṃ vaṭṭati. Purejātapaccayo rūpekadeso. Sesā yathālābhavasena nāmarūpadhammāti evaṃ tāvettha dhammato viññātabbo vinicchayo. Kālatoti:- paccuppannāva hontettha paccayā dasa pañca ca atītāeva pañceko te kāle dvepi nissito tayo tikālikā ceva vimuttā cāpi kālatoti. Etesu hi hetupaccayo sahajātaaññamaññanissayapurejātapacchājātavipāka- āhāraindriyajhānamaggasampayuttavippayuttaatthiavigatapaccayoti ime paṇṇarasa paccayā paccuppannadhammāva honti. Anantarapaccayo samanantarāsevananatthivigatapaccayoti ime pañca atītāyeva honti. Eko pana kammapaccayova ^1- te paccuppannātīte dvepi kāle nissito hoti. Sesā ārammaṇapaccayo adhipatipaccayo upanissaya- paccayoti ime tayo paccayā tekālikāpi honti, ime tayo ^2- paññattiyā saddhiṃ nibbānassa saṅgahitattā kālavinimuttāpīti evamettha kālatopi viññātabbo vinicchayo. Nānappakārabhedato paccayuppannatoti imesaṃ pana dvinnaṃ padānaṃ attho niddesavāre āvibhavissatīti. Paccayuddesavaṇṇanā niṭṭhitā. ----------- @Footnote: ¹ cha.Ma. va-saddo na dissati ² cha.Ma. "ime tayo"ti pāṭho na dissati

The Pali Atthakatha in Roman Book 55 page 405. http://84000.org/tipitaka/pitaka_item/read_rm.php?B=55&A=9122 อรรถกถาบาลีอักษรไทย :- http://84000.org/tipitaka/pitaka_item/read_th.php?B=55&A=9122 อ่านอรรถกถาแปลไทย :- http://84000.org/tipitaka/attha/attha.php?b=36&i=1 เนื้อความพระไตรปิฎกฉบับหลวง :- http://84000.org/tipitaka/read/r.php?B=36&A=1 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=36&A=1 The Pali Tipitaka in Roman Character :- http://84000.org/tipitaka/read/roman_read.php?B=36&A=1 Contents of The Tipitaka Volume 36 http://84000.org/tipitaka/read/?index_36