บาลีอรรถกถาเล่มที่ ๓๓

หน้าที่ ๒๐.

คติพลปรกฺกมาทิสมฺปตฺติยา มหานาคสทิสตฺตา นาเคสุปิ ขีณาสเวสุ มหานุภาวตาย จ มหานาคํ. มารเสนาวิมถนโต มหาวิกฺกนฺตตาย จ มหาวีรํ. มหาชุตินฺติ มหาปตาปํ มหาเตชนฺติ อตฺโถ. นตฺถิ เอตสฺส จตฺตาโรปิ อาสวาติ อนาสวํ. สพฺเพ อาสวา สวาสนา ปริกฺขีณา เอตสฺสาติ สพฺพาสวปริกฺขีณํ. กามํ สาวกพุทฺธา ปจฺเจกพุทฺธา จ ขีณาสวาว, สพฺพญฺญุพุทฺธาเอว ปน สวาสเน อาสเว เขเปนฺตีติ ทสฺสนตฺถํ "อนาสวนฺ"ติ วตฺวา ปุน "สพฺพาสวปริกฺขีณนฺ"ติ วุตฺตํ. เตน วุตฺตํ "สพฺเพ อาสวา สวาสนา ปริกฺขีณา เอตสฺสาติ สพฺพาสวปริกฺขีณนฺ"ติ. ทิฏฺฐธมฺมิกสมฺปรายิก- ปรมตฺเถหิ ยถารหํ เวเนยฺยานํ อนุสาสนโต สตฺถารํ จตุเวสารชฺชวิสารทตาย กุโตจิปิ ภยาภาวโต อกุโตภยํ เอวรูปํ สมฺมาสมฺพุทฺธํ ยํ ยสฺมา อทฺทสาสึ, ตสฺมา สฺวาคตํ วต เม อาสีติ โยชนา. อิทานิ สตฺถุ ทสฺสเนน อตฺตนา ลทฺธคุณํ ทสฺเสนฺโต จตุตฺถํ คาถมาห. ตสฺสตฺโถ:- กญฺชิยปุณฺณลาพุ วิย ตกฺกภริตจาฏิ วิย วสาปีตปิโลติกา วิย จ สงฺกิเลสวตฺถูหิ อนมตคฺเค สํสาเร จิรกาลํ สงฺกิลิฏฺฐํ. คทฺทุลพนฺธิตํ วิย ถมฺเภ สารเมยํ สกฺกายถมฺเถ ทิฏฺฐิสนฺทาเนน ทิฏฺฐิพนฺธเนน พนฺธิตํ ^๑- พทฺธํ ตโต วิโมเจนฺโต จ อภิชฺฌาทีหิ สพฺพคนฺเถหิ มํ เสนกํ อริยมคฺคหตฺเถน วิโมจยิ วต โส ภควา มยฺหํ สตฺถาติ ภควติ อภิปฺปสาทํ ปเวเทติ. เสนกตฺเถรคาถาวณฺณนา นิฏฺฐิตา. -----------------

อรรถกถาภาษาบาลีอักษรไทย เล่มที่ ๓๓ หน้า ๒๐. http://84000.org/tipitaka/pitaka_item/read_th.php?B=33&A=434&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=33&A=434&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=26&i=328 เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=6249 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=6362 The Pali Tipitaka in Roman Character :- http://84000.org/tipitaka/read/roman_read.php?B=26&A=6362 สารบัญพระไตรปิฎกเล่มที่ ๒๖ http://84000.org/tipitaka/read/?index_26