ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๘ ภาษาบาลีอักษรไทย ชา.อ.๔ ติก-ปญฺจกนิปาต

                     จุลฺลธนุคฺคหชาตกํ
     สพฺพํ ภณฺฑนฺติ อิทํ สตฺถา เชตวเน วิหรนฺโต ปุราณทุติยิกาย
ปโลภนํ (ภิกฺขุํ) อารพฺภ กเถสิ ฯ
     เกน ภิกฺขุ อุกฺกณฺฐาปิโตติ วุตฺเต ปุราณทุติยิกาย ภนฺเตติ
วุตฺเต สตฺถา เอสา ภิกฺขุ อิตฺถี น อิทาเนว ตุยฺหํ อนตฺถการิกา
ปุพฺเพปิ เต เอตํ นิสฺสาย อสินา สีสํ ฉินฺนนฺติ วตฺวา ภิกฺขูหิ
ยาจิโต อตีตํ อาหริ ฯ
     อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต
สกฺโก อโหสิ ฯ ตทา เอโก พาราณสีวาสี พฺราหฺมณมาณโว
ตกฺกสิลายํ สพฺพสิปฺปานิ อุคฺคณฺหิตฺวา ธนุกมฺเม นิปฺผตฺตึ ปตฺโต
จุลฺลธนุคฺคหปณฺฑิโต นาม อโหสิ ฯ อถสฺส อาจริโย อยํ มยา

--------------------------------------------------------------------------------------------- หน้าที่ ๕๐๗.

สทิสํ สิปฺปํ อุคฺคณฺหีติ อตฺตโน ธีตรํ อทาสิ ฯ โส ตํ คเหตฺวา พาราณสึ คมิสฺสามีติ มคฺคํ ปฏิปชฺชิ ฯ อนฺตรามคฺเค เอโก วารโณ เอกํ ปเทสํ สุญฺญมกาสิ ฯ ตํ ฐานํ อภิรุยฺหิตุํ น โกจิ อุสฺสหติ ฯ จุลฺลธนุคฺคหปณฺฑิโต มนุสฺสานํ วาเรนฺตานญฺเญว ภริยํ คเหตฺวา อฏวีมุขํ อภิรุยฺหิ ฯ อถสฺส อฏวีมชฺเฌ วารโณ อุฏฺฐหิ ฯ โส ตํ กุมฺเภ สเรน วิชฺฌิ ฯ สโร วินิวิชฺฌิตฺวา ปจฺฉาภาเคน นิกฺขมิ ฯ วารโณ ตตฺเถว ปติ ฯ ธนุคฺคหปณฺฑิโต ตํ ฐานํ เขมํ กตฺวา ปุรโต อญฺญํ อฏวึ ปาปุณิ ฯ ตตฺถาปิ ปญฺญาส โจรา มคฺคํ หนนฺติ ฯ ตมฺปิ โส มนุสฺเสหิ วาริยมาโน อภิรุยฺหิ ฯ เตสํ โจรานํ มิเค วธิตฺวา มคฺคสมีเป มํสํ ปจิตฺวา ขาทนฺตานํ ฐิตฏฺฐานํ ปาปุณิ ฯ ตทา ตํ โจรา อลงฺกตปฏิยตฺตาย ภริยาย สทฺธึ อาคจฺฉนฺตํ ทิสฺวา คณฺหิสฺสาม นนฺติ อุสฺสาหํ กรึสุ ฯ โจรเชฏฺฐโก ปุริสลกฺขณกุสโล ฯ โส ตํ โอโลเกตฺวาว อุตฺตมปุริโส อยนฺติ ญตฺวา เอกสฺสปิ อุฏฺฐหิตุํ นาทาสิ ฯ ธนุคฺคหปณฺฑิโต คจฺฉ อมฺหากมฺเปกํ มํสสูลํ เทถาติ วตฺวา มํสํ อาหราติ เตสํ สนฺติกํ ภริยํ เปเสสิ ฯ สา คนฺตฺวา เอกํ กิร มํสสูลํ เทถาติ อาห ฯ โจรเชฏฺฐโก อนคฺโฆ ปุริโสติ มํสสูลํ ทาเปสิ ฯ โจรา อมฺเหหิ กิร ปกฺกํ ขาทิตนฺติ อปกฺกมํสสูลํ อทํสุ ฯ ธนุคฺคโห อตฺตานํ สมฺภาเวตฺวา มยฺหํ อปกฺกมํสํ ททนฺตีติ โจรานํ กุชฺฌิ ฯ โจรา กึ อยเมว เอโก ปุริโส มยํ อิตฺถิโยติ กุชฺฌิตฺวา อุฏฺฐหึสุ ฯ ธนุคฺคโห เอกูนปญฺญาส ชเน

--------------------------------------------------------------------------------------------- หน้าที่ ๕๐๘.

เอกูนปญฺญาสกณฺเฑหิ วิชฺฌิตฺวา ปาเตสิ ฯ โจรเชฏฺฐกํ วิชฺฌิตุํ กณฺฑํ นาโหสิ ฯ ตตฺถ ๑- กิร กณฺฑนาฬิยํ สมปณฺณาสเมว กณฺฑานิ ฯ เตสุ เอเกน วารณํ วิชฺฌิ ฯ เอกูนปญฺญาสกณฺเฑหิ โจเร วิชฺฌิตฺวา โจรเชฏฺฐกํ ปาเตตฺวา ตสฺส อุเร นิสินฺโน สีสมสฺส ฉินฺทิสฺสามีติ ภริยาย หตฺถโต อสึ อาหราเปสิ ฯ สา ตํขณํเยว โจรเชฏฺฐกโลภํ กตฺวา โจรสฺส หตฺเถ ตนุํ ๒- สามิกสฺส หตฺเถ ตลํ ๓- ฐเปสิ ฯ โจโร ตนุทณฺฑํ ปรามสิตฺวา อสึ นีหริตฺวา ธนุคฺคหสฺส สีสํ ฉินฺทิ ฯ โส ตํ ฆาเตตฺวา อิตฺถึ อาทาย คจฺฉนฺโต ชาติโคตฺตํ ปุจฺฉิ ฯ สา ตกฺกสิลายํ ทิสาปาโมกฺขสฺส อาจริยสฺส ธีตามฺหีติ อาห ฯ เกน ตฺวํ อิมินา ลทฺธาติ ฯ มยฺหํ ปิตา อยํ มยา สทิสํ กตฺวา สิปฺปํ สิกฺขตีติ ตุสิตฺวา มมฺปิ อิมสฺส อทาสิ สาหํ ตยิ สิเนหํ กตฺวา อตฺตโน กุลทตฺติยํ สามิกํ มาราเปสินฺติ ฯ โจรเชฏฺฐโก กุลทตฺติยํ ตาเวสา สามิกํ มาราเปสิ อญฺญํ ปเนกํ ทิสฺวา มมฺปิ เอวเมว กริสฺสติ อิมํ ฉฑฺเฑตุํ วฏฺฏตีติ จินฺเตตฺวา คจฺฉนฺโต อนฺตรามคฺเค เอกํ กุนฺนทึ อุตฺตานตลํ ตํขณาคตํ ปูรํ ๔- ทิสฺวา ภทฺเท อิมิสฺสา นทิยา สุํสุมารา กกฺขลา กึ กโรมาติ อาห ฯ สามิ ตฺวํ อาภรณภณฺฑํ มม อุตฺตราสงฺเคน ภณฺฑิกํ กตฺวา ปรตีรํ เนตฺวา ปุน อาคนฺตฺวา มํ คเหตฺวา คจฺฉาติ ฯ โส สาธูติ สพฺพํ อาภรณภณฺฑํ อาทาย นทึ โอตริตฺวา ตรนฺโต วิย ปรตีรํ ปตฺวา ตํ ฉฑฺเฑตฺวา ปายาสิ ฯ สา ตํ ทิสฺวา สามิ กึ มํ @เชิงอรรถ: ตสฺส ฯ ถรุํ ฯ ถลํ ฯ ตํขโณทกปูรํ ฯ

--------------------------------------------------------------------------------------------- หน้าที่ ๕๐๙.

ฉฑฺเฑตฺวา วิย คจฺฉสิ กสฺมา เอวํ กโรสิ เอหิ มมฺปิ อาทาย คจฺฉาติ เตน สทฺธึ สลฺลปนฺตี ปฐมํ คาถมาห สพฺพํ ภณฺฑํ สมาทาย ปารํ ติณฺโณสิ พฺราหฺมณ ปจฺฉา คจฺฉ ลหุํ ขิปฺปํ มมฺปิ ตาเรหิ ทานิ โภติ ๑- ฯ ตตฺถ ลหุํ ขิปฺปนฺติ ลหุํ ปจฺฉา คจฺฉ ขิปฺปํ มมฺปิ ตาเรหิ อิทานิ โภติ อตฺโถ ฯ โจโร ตํ สุตฺวา ปรตีเร ฐิโตเยว ทุติยํ คาถมาห อสนฺถุตํ มํ จิรสนฺถุเตน นิมิสิ โภตี อธุวํ ธุเวน มยาปิ โภตี นิมิเนยฺย อญฺญํ อิโต อหํ ทูรตรํ คมิสฺสนฺติ ฯ สา เหฏฺฐา วุตฺตตฺถาเยว ฯ โจโร ปน อิโตปิ อหํ ทูรตรํ คมิสฺสํ ติฏฺฐ ตฺวนฺติ วตฺวา ตสฺสา วิรวนฺติยาว อาภรณภณฺฑํ อาทาย ปลายิ ฯ ตโต สา พาลา อตฺริจฺฉตาย เอวรูปํ พฺยสนํ ปตฺตา อนาถา หุตฺวา อวิทูเร เอกํ เอฬคณิคุมฺพํ ๒- อุปสงฺกมิตฺวา โรทมานา นิสีทิ ฯ ตสฺมึ ขเณ สกฺโก โลกํ โวโลเกนฺโต ตํ อตฺริจฺฉตาหตํ สามิกา จ โจรา จ ปริหีนํ โรทมานํ ทิสฺวา เอตํ นิคฺคณฺหิตฺวา ลชฺชาเปตฺวา อาคมิสฺสามีติ มาตลิญฺจ ปญฺจสิขญฺจ อาทาย ตตฺถ @เชิงอรรถ: ตาเรหิ ทานิโต ฯ เอฬคลาคุมฺพํ ฯ

--------------------------------------------------------------------------------------------- หน้าที่ ๕๑๐.

อาคนฺตฺวา นทีตีเร ฐตฺวา มาตลิ ตฺวํ มจฺโฉ ภว ปญฺจสิข ตฺวํ สกุโณ ภว อหํ ปน สิคาโล หุตฺวา มุเขน มํสปิณฺฑํ คเหตฺวา เอติสฺสา สมฺมุขฏฺฐานํ คมิสฺสามิ ตฺวํ มยิ ตตฺถ คเต อุทกโต อุลฺลงฺฆิตฺวา มม ปุรโต ปต อถาหํ มุเขน คหิตมํสปิณฺฑํ ฉฑฺเฑตฺวา มจฺฉํ คเหตุํ ปกฺขนฺทิสฺสามิ ตสฺมึ ขเณ ตฺวํ ปญฺจสิข ตํ มํสปิณฺฑํ คเหตฺวา อากาเส อุปฺปติ ตฺวํ มาตลิ อุทเก ปตาติ อาณาเปสิ ฯ สาธุ เทวาติ ฯ มาตลิ มจฺโฉ อโหสิ ฯ ปญฺจสิโข สกุโณ อโหสิ ฯ สกฺโก สิคาโล หุตฺวา มํสปิณฺฑํ มุเขนาทาย ตสฺสา สมฺมุขฏฺฐานํ อคมาสิ ฯ มจฺโฉ อุทกา อุปฺปติตฺวา สิคาลสฺส ปุรโต ปติ ฯ โส มุเขน คหิตํ มํสปิณฺฑํ ฉฑฺเฑตฺวา มจฺฉสฺสตฺถาย ปกฺขนฺทิ ฯ มจฺโฉ อุปฺปติตฺวา อุทเก ปติ ฯ สกุโณ มํสปิณฺฑํ คเหตฺวา อากาเส อุปฺปติ ฯ สิคาโล อุโภปิ อลภิตฺวา เอฬคณิคุมฺพํ โอโลเกนฺโต ทุมฺมุโข นิสีทิ ฯ สา ตํ ทิสฺวา อยํ อตฺริจฺฉตาหโต เนว มํสํ น มจฺฉํ ลภตีติ กูฏํ ภินฺทนฺตี วิย มหาหสิตํ หสิ ฯ ตํ สุตฺวา สิคาโล ตติยํ คาถมาห กายํ เอฬคณิคุมฺเพ กโรติ อหุหาสิยํ นยิธ นจฺจํ วา คีตํ วา ตาฬํ วา สุสมาหิตํ อนมฺหิกาเล สุสฺโสณิ กินฺนุ ชคฺฆสิ โสภเนติ ฯ ตตฺถ กายนฺติ กา อยํ ฯ เอฬคณิคุมฺเพติ คุมฺโพปคุมฺเพ ๑- ฯ อหุหาสิยนฺติ ทนฺตวิทํสกํ มหาหสิตํ วุจฺจติ ฯ ตํ กา เอสา @เชิงอรรถ: คุมฺโพชิคุมฺเพ ฯ

--------------------------------------------------------------------------------------------- หน้าที่ ๕๑๑.

เอตสฺมึ คุมฺเพ กโรตีติ ปุจฺฉติ ฯ นยิธ นจฺจํ วาติ อิมสฺมึ ฐาเน กสฺสจิ นจฺจนฺตสฺส นจฺจํ วา คายนฺตสฺส คีตํ วา หตฺเถ สุสมาหิเต กตฺวา วาเทนฺตสฺส สุสมาหิตํ หตฺถตาฬํ วา นตฺถิ ยํ ทิสฺวา ตฺวํ หเสยฺยาสีติ ทีเปติ ฯ อนมฺหิกาเลติ โรทนกาเล ฯ สุสฺโสณีติ สุนฺทรโสณิ ฯ กินฺนุ ชคฺฆสีติ เกน นุ การเณน ตฺวํ โรทิตุํ ยุตฺตกาเล อโรทมานาว มหาหสิตํ หสิ ฯ โสภเนติ ตํ ปสํสนฺโต อาลปติ ฯ ตํ สุตฺวา สา จตุตฺถํ คาถมาห สิคาล พาล ทุมฺเมธ อปฺปปญฺโญสิ ชมฺพุก ชินฺโน มจฺฉญฺจ เปสิญฺจ กปโณ วิย ฌายสีติ ฯ ตตฺถ ชินฺโนติ ชานิปฺปตฺโต หุตฺวา ฯ เปสิญฺจาติ มํสเปสึ ฯ กปโณ วิย ฌายสีติ สหสฺสภณฺฑิกํ ปราชิโต กปโณ วิย ฌายสิ โสจสิ จินฺเตสิ ฯ ตโต สิคาโล ปญฺจมํ คาถมาห สุทสฺสํ วชฺชมญฺเญสํ อตฺตโน ปน ทุทฺทสํ ชินฺนา ปติญฺจ ชารญฺจ มมฺปิ ตฺวญฺเญว ฌายสีติ ฯ ตตฺถ มมฺปิ ตฺวญฺเญว ฌายสีติ ปาปธมฺเม ทุสฺสีเล อหํ ตาว มม โคจรํ น ลภิสฺสามิ ตฺวํ ปน อตฺริจฺฉตาย หตา ตํ มุหุตฺตทิฏฺฐเก โจเร ปฏิพทฺธจิตฺตา หุตฺวา ตญฺจ ชารํ กุลทตฺติกญฺจ ปตึ ชินฺนา มํ อุปาทาย สตคุเณน สหสฺสคุเณน กปณตรา หุตฺวา ฌายสิ โรทสิ ปริเทวสีติ ลชฺชาเปตฺวา วิปฺปการํ ปาเปนฺโต

--------------------------------------------------------------------------------------------- หน้าที่ ๕๑๒.

มหาสตฺโต เอวมาห ฯ สา ตสฺส วจนํ สุตฺวา คาถมาห เอวเมตํ มิคราช ยถา ภาสสิ ชมฺพุก สา นูนาหํ อิโต คนฺตฺวา ภตฺตุ เหสฺสํ วสานุคาติ ฯ ตตฺถ นูนาติ เอกํสฏฺเฐ นิปาโต ฯ สา อหํ อิโต คนฺตฺวา ปุน อญฺญํ ภตฺตารํ ลภิตฺวา เอกํเสเนว ตสฺส วสานุคา วสวตฺตินี ภวิสฺสามีติ ฯ อถสฺสา อนาจาราย ทุสฺสีลาย กถํ สุตฺวา สกฺโก เทวราชา โอสานคาถมาห โย หเร มตฺติกํ ถาลํ กํสถาลมฺปิ โส หเร กตํเยว ตยา ปาปํ ปุนเปวํ กริสฺสสีติ ฯ ตสฺสตฺโถ อนาจาเร กึ กเถสิ โย มตฺติกํ ถาลํ หรติ สุวณฺณถาลรชตถาลาทิเภทํ กํสถาลมฺปิ โส หรเตว อิทญฺจ ตยา ปาปํ กตเมว น สกฺกา ตว สุทฺธาตุํ ๑- สา ตฺวํ ปุนปิ เอวํ กริสฺสสิเยวาติ ฯ เอวํ โส ตํ ลชฺชาเปตฺวา วิปฺปการํ ปาเปตฺวา สกฏฺฐานเมว อคมาสิ ฯ สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน อุกฺกณฺฐิตภิกฺขุ โสตาปตฺติผเล ปติฏฺฐหิ ฯ ตทา ธนุคฺคโห อุกฺกณฺฐิตภิกฺขุ อโหสิ สา อิตฺถี @เชิงอรรถ: สนฺธาเรตุํ ฯ

--------------------------------------------------------------------------------------------- หน้าที่ ๕๑๓.

ปุราณทุติยิกา สกฺโก เทวราชา ปน อหเมวาติ ฯ จุลฺลธนุคฺคหชาตกํ จตุตฺถํ ------------

             อรรถกถาภาษาบาลีอักษรไทย เล่มที่ ๓๘ หน้า ๕๐๖-๕๑๓. http://84000.org/tipitaka/pitaka_item/read_th.php?B=38&A=10513&modeTY=2&pagebreak=1              The Pali Atthakatha in Roman :- http://84000.org/tipitaka/atthapali/read_rm.php?B=38&A=10513&modeTY=2&pagebreak=1              อ่านอรรถกถาแปลไทย :- http://84000.org/tipitaka/attha/attha.php?b=27&i=818              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=3777              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=3727              The Pali Tipitaka in Roman Character :- http://84000.org/tipitaka/read/roman_read.php?B=27&A=3727              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]