ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๔๙ ภาษาบาลีอักษรไทย อป.อ.๑ (วิสุทฺธ.๑)

     [๑๗๗] อุปฺปาเตสุ นิมิตฺเตสุ      ลกฺขเณสุ จ โกวิทา
           ปฐพฺยา ภูมนฺตลิกฺเข      มม สิสฺสา สุสิกฺขิตา.
     ตตฺถ อุกฺกาปาตภูมิกมฺปาทิเกสุ อุปฺปาเตสุ จ สุภนิมิตฺตาสุภนิมิตฺเตสุ จ
อิตฺถิลกฺขณปุริสลกฺขณมหาปุริสลกฺขเณสุ จ โกวิทา เฉกา. ปฐวิยา จ ภูมิยา จ
สกลโลเก จ อนฺตลิกฺเข อากาเส จาติ สพฺพตฺถ มม สิสฺสา สุสิกฺขิตา.
     [๑๗๘] อปฺปิจฺฉา นิปกา เอเต    อปฺปาหารา อโลลุปา
           อากิญฺจญฺญํ ปตฺถยนฺตา     ปริวาเรนฺติ มํ สทา.
     ตตฺถ อปฺปิจฺฉาติ อปฺปเกนาปิ ยาเปนฺตา. นิปกาติ เนปกฺกสงฺขาตาย
ปญฺญาย สมนฺนาคตา. อปฺปาหาราติ เอกาหารา เอกภตฺติกาติ อตฺโถ. อโลลุปาติ
โลลุปตณฺหาย อปฺปวตฺตนกา. ลาภาลาเภนาติ ลาเภน จ สนฺตุฏฺฐา โสมนสฺสา
เอเต มม สิสฺสา สทา นิจฺจกาลํ มํ ปริวาเรนฺติ อุปฏฺฐหนฺตีติ อตฺโถ.
     [๑๗๙] ฌายี ฌานรตา ธีรา      สนฺตจิตฺตา สมาหิตา
           อากิญฺจญฺญํ ปตฺถยนฺตา     ปริวาเรนฺติ มํ สทา.
     ตตฺถ ฌายีติ ลกฺขณูปนิชฺฌานอารมฺมณูปนิชฺฌาเนหิ สมนฺนาคตา.
ฌายนสีลา วา. ฌานรตาติ เตสุ จ ฌาเนสุ รตา อลฺลีนา. ธีราติ
ธิติสมฺปนฺนา. สนฺตจิตฺตาติ วูปสนฺตมนา. สมาหิตาติ เอกคฺคจิตฺตา. อากิญฺจญฺญนฺติ
นิปฺปลิโพธภาวํ. ปตฺถยนฺตาติ อิจฺฉนฺตา. อิตฺถมฺภูตา เม สิสฺสา สทา มํ
ปริวาเรนฺตีติ สมฺพนฺโธ.
     [๑๘๐] อภิญฺญาปารมิปฺปตฺตา      เปตฺติเก โคจเร รตา
           อนฺตลิกฺขจรา ธีรา       ปริวาเรนฺติ มํ สทา.
     ตตฺถ อภิญฺญาปารมิปฺปตฺตาติ ปญฺจสุ อภิญฺญาสุ ปารมึ ปริโยสานํ
ปตฺตา ปูริตาติ อตฺโถ. เปตฺติเก โคจเร รตาติ พุทฺธานุญฺญาตาย
อวิญฺญตฺติยา ลทฺเธ อาหาเร รตาติ อตฺโถ. อนฺตลิกฺขจราติ อนฺตลิกฺเขน
อากาเสน คจฺฉนฺตา อาคจฺฉนฺตา จาติ อตฺโถ. ธีราติ ถิรภูตา ๑- สีหพฺยคฺฆาทิปริสฺสเย
อจฺฉมฺภิตสภาวาติ อตฺโถ. เอวํภูตา มม ตาปสา สทา มํ ปริวาเรนฺตีติ อตฺโถ.
     [๑๘๑] สํวุตา ฉสุ ทฺวาเรสุ      อเนชา รกฺขิตินฺทฺริยา
           อสํสฏฺฐา จ เต ธีรา     มม สิสฺสา ทุราสทา.
     ตตฺถ จกฺขาทีสุ ฉสุ ทฺวาเรสุ รูปาทีสุ ฉสุ อารมฺมเณสุ สํวุตา ปิหิตา
ปฏิจฺฉนฺนา, รกฺขิตโคปิตทฺวาราติ อตฺโถ. อเนชา นิตฺตณฺหา รกฺขิตินฺทฺริยา
โคปิตจกฺขาทิอินฺทฺริยา อสํสฏฺฐา ญาตีหิ คหฏฺเฐหิ อมิสฺสีภูตาติ อตฺโถ. ทุราสทาติ
ทุฏฺฐุ อาสทา, อาสาเทตุํ ฆฏฺเฏตุํ อสกฺกุเณยฺยา อโยคฺคาติ อตฺโถ.
     [๑๘๒] ปลฺลงฺเกน นิสชฺชาย      ฐานจงฺกมเนน จ
           วีตินาเมนฺติ เต รตฺตึ     มม สิสฺสา ทุราสทา.
     ตตฺถ มม สิสฺสา ปลฺลงฺเกน อูรุพทฺธาสเนน เสยฺยํ วิหาย นิสชฺชาย
จ ฐาเนน จ จงฺกเมน จ สกลํ รตฺตึ วิเสเสน อตินาเมนฺติ อติกฺกาเมนฺตีติ
สมฺพนฺโธ.
     [๑๘๓] รชนีเย น รชฺชนฺติ       ทุสฺสนีเย น ทุสฺสเร
           โมหนีเย น มุยฺหนฺติ      มม สิสฺสา ทุราสทา.
     เต อิตฺถมฺภูตา มม สิสฺสา ตาปสา รชนีเย รชฺชิตพฺเพ วตฺถุสฺมึ
น รชฺชนฺติ รชฺชํ น อุปฺปาเทนฺติ. ทุสฺสนีเย ทุสฺสิตพฺเพ โทสํ
อุปฺปาเทตุํ ยุตฺเต วตฺถุมฺหิ น ทุสฺสเร โทสํ น กโรนฺติ. โมหนีเย โมหิตุํ
ยุตฺเต วตฺถุมฺหิ น มุยฺหนฺติ โมหํ น กโรนฺติ. ปญฺญาสมฺปยุตฺตา ภวนฺตีติ
อตฺโถ.
     [๑๘๔] อิทฺธึ วีมํสมานา เต      วตฺตนฺติ นิจฺจกาลิกํ
           ปฐวึ เต ปกมฺเปนฺติ      สารมฺเภน ทุราสทา.
     เต มม สิสฺสา "เอโกปิ หุตฺวา พหุธา โหติ, พหุธาปิ หุตฺวา เอโก
โหตี"ติอาทิกํ ๒- อิทฺธิวิกุพฺพนํ นิจฺจกาลิกํ วีมํสมานา วตฺตนฺตีติ สมฺพนฺโธ. เต
@เชิงอรรถ:  สี. วีรภูตา.                          ขุ. ปฏิ. ๓๑/๑๐๒/๑๑๕.
มม สิสฺสา อากาเสปิ อุทเกปิ ปฐวึ นิมฺมินิตฺวา อิริยาปถํ ปกมฺเปนฺตีติ อตฺโถ.
สารมฺเภน ยุคคฺคาเหน กลหกรเณน น อาสาเทตพฺพาติ อตฺโถ.
     [๑๘๕] กีฬมานา จ เต สิสฺสา    กีฬนฺติ ฌานกีฬิตํ
           ชมฺพุโต ผลมาเนนฺติ      มม สิสฺสา ทุราสทา.
     เต มม สิสฺสา กีฬมานา ปฐมชฺฌานาทิกีฬํ กีฬนฺติ ลฬนฺติ รมนฺตีติ
อตฺโถ. ชมฺพุโต ผลมาเนนฺตีติ หิมวนฺตมฺหิ สตโยชนุพฺเพธชมฺพุรุกฺขโต
ฆฏปฺปมาณํ ชมฺพุผลํ อิทฺธิยา คนฺตฺวา อาเนนฺตีติ อตฺโถ.
     [๑๘๖] อญฺเญ คจฺฉนฺติ โคยานํ    อญฺเญ ปุพฺพวิเทหกํ
           อญฺเญ จ อุตฺตรกุรุํ       เอสนาย ทุราสทา.
     เตสํ มม สิสฺสานํ อนฺตเร อญฺเญ เอกจฺเจ โคยานํ อปรโคยานํ
ทีปํ คจฺฉนฺติ, เอกจฺเจ ปุพฺพวิเทหกํ ทีปํ คจฺฉนฺติ, เอกจฺเจ อุตฺตรกุรุํ ทีปํ
คจฺฉนฺติ, เต ทุราสทา เอเตสุ ฐาเนสุ เอสนาย คเวสนาย ปจฺจยปริเยสนาย
คจฺฉนฺตีติ สมฺพนฺโธ.
     [๑๘๗] ปุรโต เปเสนฺติ ขารึ     ปจฺฉโต จ วชนฺติ เต
           จตุวีสสหสฺเสหิ          ฉาทิตํ โหติ อมฺพรํ.
     เต มม สิสฺสา อากาเสน คจฺฉมานา ขารึ ตาปสปริกฺขารภริตํ กาชํ
ปุรโต เปเสนฺติ ปฐมํ อภิมุขญฺจ ตํ เปเสตฺวา สยํ ตสฺส ปจฺฉโต คจฺฉนฺตีติ
อตฺโถ. เอวํ คจฺฉมาเนหิ จตุวีสสหสฺเสหิ ตาปเสหิ อมฺพรํ อากาสตลํ ฉาทิตํ
ปฏิจฺฉนฺนํ โหตีติ สมฺพนฺโธ.
     [๑๘๘] อคฺคิปากี อนคฺคี จ       ทนฺโตทุกฺขลิกาปิ จ
           อเสฺมน โกฏฺฏิตา เกจิ    ปวตฺตผลโภชนา.
     ตตฺถ เกจิ เอกจฺเจ มม สิสฺสา อคฺคิปากี ผลาผลปณฺณาทโย ปจิตฺวา
ขาทนฺติ, เอกจฺเจ อนคฺคี อคฺคีหิ อปจิตฺวา อามกเมว ขาทนฺติ, เอกจฺเจ
ทนฺติกา ทนฺเตหิเยว ตจํ อุปฺปาเฏตฺวา ขาทนฺติ. เอกจฺเจ อุทุกฺขลิกา
อุทุกฺขเลหิ โกฏฺเฏตฺวา ขาทนฺติ. เอกจฺเจ อเสฺมน โกฏฺฏิตา ปาสาเณน
โกฏฺเฏตฺวา ขาทนฺติ. เอกจฺเจ สยํปติตผลาหาราติ สมฺพนฺโธ.
     [๑๘๙] อุทโกโรหณา เกจิ       สายํ ปาโต สุจีรตา
           โตยาภิเสจนกรา        มม สิสฺสา ทุราสทา.
     ทุราสทา มม สิสฺสา เกจิ สุจีรตา สุทฺธิกามา สายํ ปาโต จ
อุทโกโรหณา อุทกปเวสกาติ อตฺโถ. เกจิ โตยาภิเสจนกรา อุทเกน อตฺตนิ
อภิสิญฺจนกราติ อตฺโถ.
     [๑๙๐] ปรูฬฺหกจฺฉนขโลมา       ปงฺกทนฺตา รชสฺสิรา
           คนฺธิตา สีลคนฺเธน       มม สิสฺสา ทุราสทา.
     ตตฺถ เต ทุราสทา มม สิสฺสา กจฺเฉสุ อุภยกจฺเฉสุ จ หตฺถปาเทสุ
จ ปรูฬฺหา สญฺชาตา, ทีฆนขโลมาติ อตฺโถ. ขุรกมฺมรหิตตฺตา อมณฺฑิตา
อปสาธิตาติ อธิปฺปาโย. ปงฺกทนฺตาติ อิฏฺฐกจุณฺณขีรปาสาณจุณฺณาทีหิ
ธวลมกตตฺตา มลคฺคหิตทนฺตาติ อตฺโถ. รชสฺสิราติ เตลมกฺขนาทิรหิตตฺตา
ธูลีหิ มกฺขิตสีสาติ อตฺโถ. คนฺธิตา สีลคนฺเธนาติ ฌานสมาธิสมาปตฺตีหิ
สมฺปยุตฺตสีเลน สมงฺคีภูตตฺตา โลกิยสีลคนฺเธน สพฺพตฺถ สุคนฺธีภูตาติ อตฺโถ.
มม สิสฺสา ทุราสทาติ อิเมหิ วุตฺตปฺปการคุเณหิ สมนฺนาคตตฺตา อาสาเทตุํ
ฆฏฺเฏตุํ อสกฺกุเณยฺยา มม สิสฺสาติ สมฺพนฺโธ.
     [๑๙๑] ปาโตว สนฺนิปติตฺวา      ชฏิลา อุคฺคตาปนา
           ลาภาลาภํ ปกิตฺเตตฺวา    คจฺฉนฺติ อมฺพเร ตทา.
     ตตฺถ ปาโตว สนฺนิปติตฺวาติ สตฺตมฺยตฺเถ โตปจฺจโย, ๑- ปาตราสกาเลเยว
มม สนฺติเก ราสิภูตาติ อตฺโถ. อุคฺคตาปนา ปากฏตปา ปตฺถฏตปา ชฏิลา
ชาฏาธาริโน ตาปสา. ลาภาลาภํ ปกิตฺเตตฺวา ขุทฺทเก จ มหนฺเต จ ลาเภ
ปากเฏ กตฺวา ตทา ตสฺมึ กาเล อมฺพเร อากาสตเล คจฺฉนฺตีติ สมฺพนฺโธ.
     [๑๙๒] ปุน เตสํเยว คุเณ ปกาเสนฺโต เอเตสํ ปกฺกมนฺตานนฺติอาทิมาห.
ตตฺถ อากาเส วา ถเล วา ปกฺกมนฺตานํ คจฺฉนฺตานํ เอเตสํ
ตาปสานํ วากจีรชนิโต มหาสทฺโท ปวตฺตตีติ อตฺโถ. มุทิตา โหนฺติ
@เชิงอรรถ:  ม. สตฺตมฺยตฺเถ ปจฺจตฺตวจนํ.
เทวตาติ เอวํ มหาสทฺทํ ปวตฺเตตฺวา คจฺฉนฺตานํ อชินจมฺมสทฺเทน สนฺตุฏฺฐา
"สาธุ สาธุ อยฺยา"ติ โสมนสฺสชาตา เทวตา มุทิตา สนฺตุฏฺฐา โหนฺตีติ
สมฺพนฺโธ.
     [๑๙๓] ทิโสทิสนฺติ เต อิสโย อนฺตลิกฺขจรา อากาสจาริโน
ทกฺขิณาทิสานุทิสํ ปกฺกมนฺติ คจฺฉนฺตีติ สมฺพนฺโธ. สเก พเลนุปตฺถทฺธาติ
อตฺตโน สรีรพเลน วา ฌานพเลน วา สมนฺนาคตา ยทิจฺฉกํ ยตฺถ ยตฺถ
คนฺตุกามา, ตตฺถ ตตฺเถว คจฺฉนฺตีติ สมฺพนฺโธ.
     [๑๙๔] ปุน เตสเมวานุภาวํ ปกาเสนฺโต ปฐวีกมฺปกา เอเตติอาทิมาห.
ตทา เอเต สพฺพตฺถ อิจฺฉาจารา ปฐวีกมฺปกา เมทนีสญฺจลนชาติกา
นภจาริโน อากาสจาริโน. อุคฺคเตชาติ อุคฺคตเตชา ปตฺถฏเตชา ทุปฺปสหา
ปสยฺห อภิภวิตฺวา ปวตฺติตุํ อสกฺกุเณยฺยาติ ทุปฺปสหา. สาคโรว อโขภิยาติ
อญฺเญหิ อโขภิโย อนาลุฬิโต สาคโร อิว สมุทฺโท วิย อญฺเญหิ อโขภิยา
กมฺเปตุํ อสกฺกุเณยฺยา โหนฺตีติ สมฺพนฺโธ.
     [๑๙๕] ฐานจงฺกมิโน เกจีติ เตสํ มม สิสฺสานํ อนฺตเร เอกจฺเจ
อิสโย ฐานิริยาปถจงฺกมนิริยาปถสมฺปนฺนา เอกจฺเจ อิสโย เนสชฺชิกา
นิสชฺชิริยาปถสมฺปนฺนา เอกจฺเจ อิสโย ปวตฺตโภชนา สยํปติตปณฺณาหารา
เอวรูเปหิ คุเณหิ ยุตฺตตฺตา ทุราสทาติ สมฺพนฺโธ.
     [๑๙๖] เต สพฺเพ โถเมนฺโต เมตฺตาวิหาริโนติอาทิมาห. ตตฺถ
"อปริมาเณสุ จกฺกวาเฬสุ อปริมาณา สตฺตา สุขี โหนฺตู"ติอาทินา
สิเนหลกฺขณาย เมตฺตาย ผริตฺวา วิหรนฺติ, อตฺตภาวํ ปวตฺเตนฺตีติ
เมตฺตาวิหาริโน เอเต มม สิสฺสาติ อตฺโถ. สพฺเพ เต อิสโย สพฺพปาณินํ
สพฺเพสํ สตฺตานํ หิเตสี หิตคเวสกา. อนตฺตุกฺกํสกา อตฺตานํ น อุกฺกํสกา
อมานิโน กสฺสจิ กญฺจิ ปุคฺคลํ น วมฺเภนฺติ นีจํ กตฺวา น มญฺญนฺตีติ
อตฺโถ.
     [๑๙๗] เต มม สิสฺสา สีลสมาธิสมาปตฺติคุณยุตฺตตฺตา สีหราชา อิว
อฉมฺภีตา นิพฺภยา คชราชา อิว หตฺถิราชา วิย ถามวา สรีรพลฌานพลสมฺปนฺนา
พฺยคฺฆราชา อิว ทุราสทา ฆฏฺเฏตุมสกฺกุเณยฺยา มม สนฺติเก อาคจฺฉนฺตีติ
สมฺพนฺโธ.
     [๑๙๘] ตโต อตฺตโน อานุภาวสฺส ทสฺสนเลเสน ปกาเสนฺโต
วิชฺชาธราติอาทิมาห. ตตฺถ มนฺตสชฺฌายาทิวิชฺชาธรา จ รุกฺขปพฺพตาทีสุ วสนฺตา
ภุมฺมเทวตา จ ภูมฏฺฐถลฏฺฐา นาคา จ คนฺธพฺพเทวา จ จณฺฑา รกฺขสา
จ กุมฺภณฺฑา เทวา จ ทานวา เทวา จ อิจฺฉิติจฺฉิตนิมฺมานสมตฺถา ครุฬา
จ ตํ สรํ อุปชีวนฺตีติ สมฺพนฺโธ, ตสฺมึ สเร สรสฺส สมีเป วสนฺตีติ อตฺโถ.
     [๑๙๙] ปุนปิ เตสํเยว อตฺตโน สิสฺสตาปสานํ คุเณ วณฺเณนฺโต
เต ชฏา ขาริภริตาติอาทิมาห. ตํ สพฺพํ อุตฺตานตฺถเมว. ขาริภารนฺติ
อุทญฺจนกมณฺฑลุอาทิกํ ตาปสปริกฺขารํ.
     [๒๐๗] ปุนปิ อตฺตโน คุเณ ปกาเสนฺโต อุปฺปาเต สุปิเน จาปีติอาทิมาห.
ตตฺถ พฺราหฺมณสิปฺเปสุ นิปฺผตฺตึ คตตฺตา นกฺขตฺตปาเฐ จ เฉกตฺตา
"อิมสฺส ราชกุมารสฺส อุปฺปนฺนนกฺขตฺตํ สุภํ อสุภนฺ"ติ อุปฺปาตลกฺขเณ
จ สุปิเน จ ปวตฺตึ ปุจฺฉิเตน "อิทํ สุปินํ สุภํ, อิทํ อสุภนฺ"ติ
สุปินนิปฺผตฺติกถเน จ สพฺเพสํ อิตฺถิปุริสานํ หตฺถปาทลกฺขณกถเน จ สุฏฺฐุ
สิกฺขิโต สกลชมฺพุทีเป ปวตฺตมานํ มนฺตปทํ ลกฺขณมนฺตโกฏฺฐาสํ สพฺพํ
อหํ ตทา มม ตาปสกาเล ธาเรมีติ สมฺพนฺโธ.
     [๒๐๘] อตฺตโน พฺยากรณํ พุทฺธคุณปุพฺพงฺคมํ ปกาเสนฺโต อโนมทสฺสีติอาทิมาห.
ตตฺถ น โอมกนฺติ อโนมํ. มํสจกฺขุทิพฺพจกฺขุสมนฺตจกฺขุธมฺมจกฺขุพุทฺธจกฺขูหิ
สพฺพสตฺตานํ ปสฺสนํ ทสฺสนํ นาม, อโนมํ ทสฺสนํ ยสฺส
ภควโต โส ภควา อโนมทสฺสี. ภาคฺยวนฺตตาทีหิ การเณหิ ภควา โลกสฺส
เชฏฺฐเสฏฺฐตฺตา โลกเชฏฺโฐ อุสโภ นิสโภ อาสโภติ ตโย ควเชฏฺฐกา. ตตฺถ
ควสตเชฏฺฐโก อุสโภ, ควสหสฺสเชฏฺฐโก นิสโภ, ควสตสหสฺสเชฏฺฐโก อาสโภ,
นรานํ อาสโภ นราสโภ, ปฏิวิทฺธสพฺพธมฺโม สมฺพุทฺโธ วิเวกกาโม เอกีภาวํ
อิจฺฉนฺโต หิมวนฺตํ หิมาลยปพฺพตํ อุปาคมีติ สมฺพนฺโธ.
     [๒๐๙] อชฺโฌคาเหตฺวา หิมวนฺตนฺติ หิมวนฺตสมีปํ โอคาเหตฺวา
ปวิสิตฺวาติ อตฺโถ. เสสํ อุตฺตานตฺถเมว.
     [๒๑๐-๑] ชลิตํ ชลมานํ อินฺทีวรปุปฺผํ อิว หุตาสนํ โหมสฺส
อาสนํ อาทิตฺตํ อาภายุตํ อคฺคิกฺขนฺธํ อิว คคเน อากาเส โชตมานํ วิชฺชุ
อิว สุฏฺฐุ ผุลฺลํ สาลราชํ อิว นิสินฺนํ โลกนายกํ อทฺทสนฺติ สมฺพนฺโธ.
     [๒๑๓] เทวานํ เทโว เทวเทโว, ตํ เทวเทวํ ทิสฺวาน ตสฺส ลกฺขณํ
ทฺวตฺตึสมหาปุริสลกฺขณสญฺชานนการณํ. "พุทฺโธ นุ โข น วา พุทฺโธ"ติ
อุปธารยึ วิจาเรสึ. จกฺขุมํ ปญฺจหิ จกฺขูหิ จกฺขุมนฺตํ ชินํ เกน การเณน
ปสฺสามีติ สมฺพนฺโธ.
     [๒๑๔] จรณุตฺตเม อุตฺตมปาทตเล สหสฺสารานิ จกฺกลกฺขณานิ
ทิสฺสนฺติ, อหํ ตสฺส ภควโต ตานิ ลกฺขณานิ ทิสฺวา ตถาคเต นิฏฺฐํ คจฺฉึ
สนฺนิฏฺฐานํ อคมาสึ, นิสฺสนฺเทโห อาสินฺติ อตฺโถ. เสสํ อุตฺตานตฺถเมว.
     [๒๑๘] สยมฺภู สยเมว ภูตา. อมิโตทย อมิตานํ อปริมาณานํ
คุณานํ อุทย อุฏฺฐานฏฺฐาน, อิทํ ปททฺวยํ อาลปนเมว. อิมํ โลกํ อิมํ
สตฺตโลกํ สํ สุฏฺฐุ อุทฺธรสิ สํสารโต อุทฺธริตฺวา นิพฺพานถลํ ปาเปสีติ
อตฺโถ. เต สพฺเพ สตฺตา ตว ทสฺสนํ อาคมฺม อาคนฺตฺวา กงฺขาโสตํ
วิจิกิจฺฉามโหฆํ ตรนฺติ อติกฺกมนฺตีติ สมฺพนฺโธ.
     [๒๑๙] ภควนฺตํ โถเมนฺโต ตาปโส ตุวํ สตฺถาติอาทิมาห. ตตฺถ
ภนฺเต สพฺพญฺญุ ตุวํ สเทวกสฺส โลกสฺส สตฺถา อาจริโย อุตฺตมฏฺเฐน
ตฺวเมว เกตุ อุจฺโจ, สกลโลเก ปกาสนฏฺเฐน ตฺวเมว ธโช, โลกตฺตเย
อุคฺคตตฺตา ตฺวเมว ยูโป อุสฺสาปิตถมฺภสทิโส, ปาณินํ สพฺพสตฺตานํ ตฺวเมว
ปรายโน อุตฺตมคมนียฏฺฐานํ ๑- ตฺวเมว ปติฏฺฐา ปติฏฺฐฏฺฐานํ โลกสฺส
โมหนฺธการวิธมนโต ตฺวเมว ทีโป เตลปทีโป วิย ทฺวิปทุตฺตโม ทฺวิปทานํ
เทวพฺรหฺมมนุสฺสานํ อุตฺตโม เสฏฺโฐติ สมฺพนฺโธ.
@เชิงอรรถ:  สี. อุตฺตมปติฏฺฐานํ.
     [๒๒๐] ปุน ภควนฺตํเยว โถเมนฺโต สกฺกา สมุทฺเท อุทกนฺติอาทิมาห.
ตตฺถ จตุราสีติโยชนสหสฺสคมฺภีเร สมุทฺเท อุทกํ อาฬฺหเกน ปเมตุํ มินิตุํ
สกฺกา ภเวยฺย, ภนฺเต สพฺพญฺญุ ตว ญาณํ "เอตฺตกํ ปมาณนฺ"ติ ปเมตเว
มินิตุํ น เตฺวว สกฺกาติ อตฺโถ.
     [๒๒๑] ตุลมณฺฑเล ตุลปญฺชเร ฐเปตฺวา ปฐวึ เมทนึ ธาเรตุํ สกฺกา,
ภนฺเต สพฺพญฺญุ ตว ญาณํ ธาเรตุํ น ตุ เอว สกฺกาติ สมฺพนฺโธ.
     [๒๒๒] ภนฺเต สพฺพญฺญุ อากาโส ๑- สกลนฺตลิกฺขํ รชฺชุยา วา
องฺคุเลน วา มินิตุํ สกฺกา ภเวยฺย, ตว ปน ญาณํ ญาณากาสํ น ตุ เอว
ปเมตเว มินิตุํ สกฺกาติ อตฺโถ.
     [๒๒๓] มหาสมุทฺเท อุทกนฺติ จตุราสีติโยชนสหสฺสคมฺภีเร สาคเร
อขิลํ อุทกญฺจ, จตุนหุตาธิกทฺวิโยชนสตสหสฺสพหลํ อขิลํ ปฐวิญฺจ ชเห
ชเหยฺย อติกฺกเมยฺย สมํ กเรยฺย พุทฺธสฺส ญาณํ อุปาทาย คเหตฺวา ตุเลยฺย
สมํ กเรยฺย. อุปมาโต อุปมาวเสน น ยุชฺชเร น โยเชยฺยุํ. ๒- ญาณเมว
อธิกนฺติ อตฺโถ.
     [๒๒๔] จกฺขุม ปญฺจหิ จกฺขูหิ จกฺขุมนฺต, อาลปนเมตํ. สห เทเวหิ
ปวตฺตสฺส โลกสฺส, ภุมฺมตฺเถ สามิวจนํ. สเทวเก โลกสฺมึ อนฺตเร เยสํ
ยตฺตกานํ สตฺตานํ จิตฺตํ ปวตฺตติ. เอเต ตตฺตกา สจิตฺตกา สตฺตา ตว
ญาณมฺหิ อนฺโตชาลคตา ญาณชาลสฺมึ อนฺโต ปวิฏฺฐาติ สมฺพนฺโธ, ญาณชาเลน
สพฺพสตฺเต ปสฺสสีติ อตฺโถ.
     [๒๒๕] ภนฺเต สพฺพญฺญุ สพฺพธมฺมชานนก ตฺวํ เยน ญาเณน
จตุมคฺคสมฺปยุตฺเตน สกลํ อุตฺตมํ โพธึ นิพฺพานํ ปตฺโต อธิคโต อสิ ภวสิ,
เตน ญาเณน ปรติตฺถิเย อญฺญติตฺถิเย มทฺทสี อภิภวสีติ สมฺพนฺโธ.
     [๒๒๖] เตน ตาปเสน โถมิตาการํ ปกาเสนฺตา ธมฺมสงฺคาหกา เถรา
อิมา คาถา ถวิตฺวานาติ อาหํสุ. ตตฺถ อิมา คาถาติ เอตฺตกาหิ คาถาหิ
@เชิงอรรถ:  สี., อิ. อากาสํ.                       สี., อิ. น โยเชยฺย.
ถวิตฺวาน โถมนํ กตฺวาน นาเมน สุรุจิ นาม ตาปโส เสสฏฺฐกถาสุ ๑- ปน
"สรทมาณโว"ติ อาคโต. โส อฏฺฐกถานยโต ปาโฐเยว ปมาณํ, อถ วา
สุนฺทรา รุจิ อชฺฌาสโย นิพฺพานาลโย อสฺสาติ สุรุจิ. สรติ คจฺฉติ
อินฺทฺริยทมนาย ปวตฺตตีติ สรโท, อิติ ทฺวยมฺปิ ตสฺเสว นามํ. โส สุรุจิตาปโส
อชินจมฺมํ ปตฺถริตฺวาน ปฐวิยํ นิสีทิ, อจฺจาสนฺนาทโย ฉ นิสชฺชโทเส
วชฺเชตฺวา สรโท นิสีทีติ อตฺโถ.
     [๒๒๗] ตตฺถ นิสินฺโน ตาปโส ตสฺส ภควโต ญาณเมว โถเมนฺโต
จุลฺลาสีติสหสฺสานีติอาทิมาห. ตตฺถ จุลฺลาสีติสหสฺสานีติ จตุราสีติสหสฺสานิ
คิริราชา เมรุปพฺพตราชา มหณฺณเว สาคเร อชฺโฌคาโฬฺห อธิโอคาโฬฺห
ปวิฏฺโฐ ตาวเทว ตตฺตกานิ จตุราสีติสหสฺสานิ อจฺจุคฺคโต อติอุคฺคโต อิทานิ
ปวุจฺจตีติ สมฺพนฺโธ.
     [๒๒๘] ตาว อจฺจุคฺคโต ตถา อติอุคฺคโต เนรุ, โส มหาเนรุ
อายโต อุจฺจโต จ วิตฺถารโต จ เอวํ มหนฺโต เนรุราชา โกฏิสตสหสฺสิโย
สงฺขาณุเภเทน จุณฺณิโต จุณฺณวิจุณฺณํ กโต อสิ.
     [๒๒๙] ภนฺเต สพฺพญฺญุ ตว ญาณํ ลกฺเข ฐปิยมานมฺหิ ญาเณ สตํ
วา สหสฺสํ วา สตสหสฺสํ วา เอเกกํ พินฺทุํ กตฺวา ฐปิเต ตเทว มหาเนรุสฺส
จุณฺณํ ขยํ คจฺเฉยฺย, ตว ญาณํ ปเมตเว ปมาณํ กาตุํ เอว น สกฺกาติ
สมฺพนฺโธ.
     [๒๓๐] สุขุมจฺฉิเกน สุขุมจฺฉิทฺเทน ชาเลน โย สกลมหาสมุทฺเท อุทกํ
ปริกฺขิเป สมนฺตโต ปริกฺขํ กเรยฺย, เอวํ ปริกฺขิเต เย เกจิ ปาณา อุทเก
ชาตา สพฺเพ เต อนฺโตชาลคตา สิยุํ ภเวยฺยุนฺติ อตฺโถ.
     [๒๓๑] ตมุปเมยฺยํ ทสฺเสนฺโต ตเถว หีติอาทิมาห. ตตฺถ ยถา อุทชา
ปาณา อนฺโตชาลคตา โหนฺติ, ตเถว มหาวีร มหาโพธิอธิคมาย วีริยกร. เย
เกจิ ปุถุ อเนกา ติตฺถิยา มิจฺฉา ติตฺถกรา ทิฏฺฐิคหณปกฺขนฺทา ทิฏฺฐิสงฺขาตคหณํ
@เชิงอรรถ:   มโน. ปู. ๑/๑๓๕.
ปวิฏฺฐา ปรามาเสน สภาวโต ปรโต อามสนลกฺขณาย ทิฏฺฐิยา โมหิตา
ปิหิตา สนฺติ.
     [๒๓๒] ตว สุทฺเธน นิกฺกิเลเสน ญาเณน อนาวรณทสฺสินา สพฺพธมฺมานํ
อาวรณรหิตทสฺสนสีเลน เอเต สพฺเพ ติตฺถิยา อนฺโตชาลคตา ญาณชาลสฺสนฺโต
ปเวสิตา วา ตเถวาติ สมฺพนฺโธ. ญาณํ เต นาติวตฺตเรติ ตว ญาณํ เต
ติตฺถิยา นาติกฺกมนฺตีติ อตฺโถ.
     [๒๓๓] เอวํ วุตฺตโถมนาวสาเน ภควโต อตฺตโน พฺยากรณารพฺภํ ทสฺเสตุํ
ภควา ตมฺหิ สมเยติอาทิมาห. ตตฺถ ยสฺมึ สมเย ตาปโส ภควนฺตํ โถเมสิ,
ตสฺมึ โถมนาย ปริโยสานกาเล สงฺขฺยาติกฺกนฺตปริวารตาย มหายโส อโนมทสฺสี
ภควา กิเลสมาราทีนํ ชิตตฺตา ชิโน. สมาธิมฺหา อปฺปิตสมาธิโต วุฏฺฐหิตฺวา
สกลชมฺพุทีปํ ทิพฺพจกฺขุนา โอโลเกสีติ สมฺพนฺโธ.
     [๒๓๔-๕] ตสฺส อโนมทสฺสิสฺส ภควโต มุนิโน โมนสงฺขาเตน ญาเณน
สมนฺนาคตสฺส นิสโภ นาม สาวโก สนฺตจิตฺเตหิ วูปสนฺตกิเลสมานเสหิ
ตาทีหิ อิฏฺฐานิฏฺเฐสุ อกมฺปิยสภาวตฺตา ตาทิภิ ขีณาสเวหิ สุทฺเธหิ
ปริสุทฺธกายกมฺมาทิยุตฺเตหิ ฉฬภิญฺเญหิ ตาทีหิ อฏฺฐหิ โลกธมฺเมหิ อกมฺปนสภาเวหิ
สตสหสฺเสหิ ปริวุโต พุทฺธสฺส จิตฺตํ อญฺญาย ชานิตฺวา โลกนายกํ อุเปสิ,
ตาวเทว สมีปํ อคมาสีติ สมฺพนฺโธ.
     [๒๓๖] เต ตถา อาคตา สมานา ตตฺถ ภควโต สมีเป. อนฺตลิกฺเข
อากาเส ฐิตา ภควนฺตํ ปทกฺขิณํ อกํสุ. เต สพฺเพ ปญฺชลิกา นมสฺสมานา
อากาสโต พุทฺธสฺส สนฺติเก โอตรุํ โอโรหึสูติ สมฺพนฺโธ.
     [๒๓๗] ปุน พฺยากรณทานสฺส ปุพฺพภาคการณํ ปกาเสนฺโต สิตํ
ปาตุกรีติอาทิมาห. ตํ สพฺพํ อุตฺตานตฺถเมว.
     [๒๔๑] โย มํ ปุปฺเผนาติ โย ตาปโส มยิ จิตฺตํ ปสาเทตฺวา
อเนกปุปฺเผน มํ ปูเชสิ, ญาณญฺจ เม อนุ ปุนปฺปุนํ ถวิ โถเมสิ, ตมหนฺติ
ตํ ตาปสํ อหํ กิตฺตยิสฺสามิ ปากฏํ กริสฺสามิ, มม ภาสโต ภาสนฺตสฺส วจนํ
สุโณถ สวนวิสยํ กโรถ มนสิ กโรถ.
     [๒๕๐] ปจฺฉิเม ภวสมฺปตฺเตติ พฺยากรณํ ททมาโน ภควา อาห. ตตฺถ
ปจฺฉิเม ปริโยสานภูเต ภเว สมฺปตฺเต สติ. มนุสฺสตฺตํ มนุสฺสชาตึ คมิสฺสติ,
มนุสฺสโลเก อุปฺปชฺชิสฺสตีติ อตฺโถ. รูปสารธนสารวยสารกุลสารโภคสาร ๑-
ปุญฺญสาราทีหิ สาเรหิ สารวนฺตตาย สารี นาม พฺราหฺมณี กุจฺฉินา ธารยิสฺสติ.
     [๒๕๓] พฺยากรณมูลมารภิ อปริเมยฺเย อิโต กปฺเปติ. เอตฺถ ทฺวินฺนํ
อคฺคสาวกานํ เอกํ อสงฺเขฺยยฺยํ กปฺปสตสหสฺสญฺจ ปารมี ปูริตา, ตถาปิ
คาถาพนฺธสุขตฺถํ อนฺตรกปฺปานิ อุปาทาย เอวํ วุตฺตนฺติ ทฏฺฐพฺพํ.
     [๒๕๔] "สาริปุตฺโตติ นาเมน, เหสฺสติ อคฺคสาวโก"ติ พฺยากรณมทาสิ,
พฺยากรณํ ทตฺวา ตํ โถเมนฺโต โส ภควา อยํ ภาคีรถีติอาทิมาห. คงฺคา
ยมุนา สรภู มหี อจิรวตีติ อิมาสํ ปญฺจนฺนํ คงฺคานํ อนฺตเร อยํ ภาคีรถี
นาม ปฐมมหาคงฺคา หิมวนฺตา ปภาวิตา หิมวนฺตโต อาคตา อโนตตฺตทหโต
ปภวา ๒- มโหทธึ มหาอุทกกฺขนฺธํ อปฺปยนฺติ ปาปุณนฺติ มหาสมุทฺทํ มหาสาครํ
อปฺเปติ อุปคจฺฉติ ยถา, ตถา เอว อยํ สาริปุตฺโต สเก ตีสุ วิสารโท อตฺตโน
กุเล ปวตฺตมาเนสุ ตีสุ เวเทสุ วิสารโท อปกฺขลิตญาโณ ปตฺถฏญาโณ.
ปญฺญาย ปารมึ คนฺตฺวา อตฺตโน สาวกญาณสฺส ปริโยสานํ คนฺตฺวา, ปาณิเน
สพฺพสตฺเต ตปฺปยิสฺสติ สนฺตปฺเปสฺสติ สุหิตภาวํ กริสฺสตีติ อตฺโถ.
     [๒๕๗] หิมวนฺตมุปาทายาติ หิมาลยปพฺพตํ อาทึ กตฺวา มโหทธึ
มหาสมุทฺทํ อุทกภารํ ๓- สาครํ ปริโยสานํ กตฺวา เอตฺถนฺตเร เอเตสํ ทฺวินฺนํ
ปพฺพตสาครานํ มชฺเฌ ยํ ปุลินํ ยตฺตกา วาลุกราสิ อตฺถิ, คณนาโต คณนวเสน
อสงฺขิยํ สงฺขฺยาติกฺกนฺตํ.
     [๒๕๘] ตมฺปิ สกฺกา อเสเสนาติ ตํ ปุลินมฺปิ นิเสเสน สงฺขาตุํ สกฺกา
สกฺกุเณยฺย ภเวยฺย, สา คณนา ยถา โหตีติ สมฺพนฺโธ. ตถา สาริปุตฺตสฺส
ปญฺญาย อนฺโต ปริโยสานํ น เตฺวว ภวิสฺสตีติ อตฺโถ.
@เชิงอรรถ:  สี...เกสสาร...        สี. ปภูตา.        ม. อุทกธารํ.
     [๒๕๙] ลกฺเข ฯเปฯ ภวิสฺสตีติ ลกฺเข ญาณลกฺเข ญาณสฺส เอกสฺมึ
กาเล ๑- ฐปิยมานมฺหิ ฐปิเต สติ คงฺคาย วาลุกา ขีเย ปริกฺขยํ คจฺเฉยฺยาติ
อตฺโถ.
     [๒๖๐] มหาสมุทฺเทติ จตุราสีติโยชนสหสฺสคมฺภีเร จตุมหาสาคเร อูมิโย
คาวุตาทิเภทา ตรงฺคราสโย คณนาโต อสงฺขิยา สงฺขฺยาวิรหิตา ยถา โหนฺติ,
ตเถว สาริปุตฺตสฺส ปญฺญาย อนฺโต ปริโยสานํ น เหสฺสติ น ภวิสฺสตีติ
สมฺพนฺโธ.
     [๒๖๑] โส เอวํ ปญฺญา สาริปุตฺโต โคตมโคตฺตตฺตา โคตมํ สกฺยกุเล
เชฏฺฐกํ สกฺยปุงฺควํ สมฺพุทฺธํ อาราธยิตฺวา วตฺตปฏิปตฺติสีลาจาราทีหิ จิตฺตาราธนํ
กตฺวา ปญฺญาย สาวกญาณสฺส ปารมึ ปริโยสานํ คนฺตฺวา ตสฺส ภควโต
อคฺคสาวโก เหสฺสตีติ สมฺพนฺโธ.
     [๒๖๒] โส เอวํ อคฺคสาวกฏฺฐานํ ปตฺโต สกฺยปุตฺเตน ภควตา
อิฏฺฐานิฏฺเฐสุ อกมฺปิยสภาเวน ปวตฺติตํ ปากฏํ กตํ ธมฺมจกฺกํ สทฺธมฺมํ
อนุวตฺเตสฺสติ อวินสฺสมานํ ธาเรสฺสติ. ธมฺมวุฏฺฐิโย ธมฺมเทสนาสงฺขาตา
วุฏฺฐิโย วสฺเสนฺโต เทเสนฺโต ปกาเสนฺโต วิวรนฺโต วิภชนฺโต อุตฺตานีกโรนฺโต
ปวตฺติสฺสตีติ อตฺโถ.
     [๒๖๓] โคตโม สกฺยปุงฺคโว ภควา เอตํ สพฺพํ อภิญฺญาย วิเสเสน
ญาเณน ชานิตฺวา ภิกฺขุสํเฆ อริยปุคฺคลมชฺเฌ นิสีทิตฺวา อคฺคฏฺฐาเน
สกลปญฺญาทิคุณคณาภิรเม อุจฺจฏฺฐาเน ฐเปสฺสตีติ สมฺพนฺโธ.
     [๒๖๔] เอวํ โส ลทฺธพฺยากรโณ โสมนสฺสปฺปตฺโต ปีติโสมนสฺสวเสน
อุทานํ อุทาเนนฺโต อโห เม สุกตํ กมฺมนฺติอาทิมาห. ตตฺถ อโหติ วิมฺหยตฺเถ
นิปาโต. อโนมทสฺสิสฺส ภควโต สตฺถุโน ครุโน สุกตํ สุฏฺฐุ กตํ สทฺทหิตฺวา
กตํ กมฺมํ ปุญฺญโกฏฺฐาสํ อโห วิมฺหยํ อจินฺเตยฺยานุภาวนฺติ อตฺโถ. ยสฺส ภควโต
@เชิงอรรถ:                 สี., อิ. ภาเค.
อหํ การํ ปุญฺญสมฺภารํ กตฺวา สพฺพตฺถ สกลคุณคเณ ปารมึ ปริโยสานํ
คโต ปรมํ โกฏึ สมฺปตฺโต, โส ภควา อโห วิมฺหโยติ สมฺพนฺโธ.
     [๒๖๕] อปริเมยฺเยติ สงฺขฺยาติกฺกนฺตกาลสฺมึ กตํ กุสลกมฺมํ เม มยฺหํ
อิธ อิมสฺมึ ปจฺฉิมตฺตภาเว ผลํ วิปากํ ทสฺเสสิ. สุมุตฺโต สุฏฺฐุ วิมุตฺโต
เฉเกน ธนุคฺคเหน ขิตฺโต สรเวโค อิว อหํ เตน ปุญฺญผเลน กิเลเส ฌาปยึ
ฌาเปสินฺติ อตฺโถ.
     [๒๖๖] อตฺตโน เอว วีริยํ ๑- ปกาเสนฺโต อสงฺขตนฺติอาทิมาห. ตตฺถ
อสงฺขตนฺติ น สงฺขตํ, ปจฺจเยหิ สมาคมฺม น กตนฺติ อตฺโถ. ตํ อสงฺขตํ
นิพฺพานํ กิเลสกาลุสฺสิยาภาเวน อจลํ กตสมฺภารานํ ปติฏฺฐฏฺเฐน ปทํ คเวสนฺโต
ปริเยสนฺโต สพฺเพ ติตฺถิเย สกเล ติตฺถกเร ทิฏฺฐุปฺปาทเก ปุคฺคเล วิจินํ
อุปปริกฺขนฺโต เอสาหํ เอโส อหํ ภเว กามภวาทิเก ภเว สํสรึ ปริพฺภมินฺติ
สมฺพนฺโธ.
     [๒๖๗-๘] อตฺตโน อธิปฺปายํ ปกาเสนฺโต ยถาปิ พฺยาธิโต โปโสติอาทิมาห.
ตตฺถ พฺยาธิโต พฺยาธินา ปีฬิโต โปโส ปุริโส โอสธํ ปริเยเสยฺย
ยถา, ตถา อหํ อสงฺขตํ อมตํ ปทํ นิพฺพานํ คเวสนฺโต อพฺโพกิณฺณํ ๒-
อวิจฺฉินฺนํ นิรนฺตรํ ปญฺจสตํ ชาติปญฺจสเตสุ อตฺตภาเวสุ อิสิปพฺพชฺชํ ปพฺพชินฺติ
สมฺพนฺโธ.
     [๒๗๑] กุติตฺเถ สญฺจรึ อหนฺติ ลามเก ติตฺเถ คมนมคฺเค อหํ สญฺจรึ.
     [๒๗๒] สารตฺถิโก โปโส สารคเวสี ปุริโส. กทลึ เฉตฺวาน ผาลเยติ
กทลิกฺขนฺธํ เฉตฺวา เทฺวธา ผาเลยฺย. น ตตฺถ สารํ วินฺเทยฺยาติ ผาเลตฺวา
จ ปน ตตฺถ กทลิกฺขนฺเธ สารํ น วินฺเทยฺย น ลเภยฺย, โส ปุริโส สาเรน
ริตฺตโก ตุจฺโฉติ สมฺพนฺโธ.
     [๒๗๓] ยถา กทลิกฺขนฺโธ สาเรน ริตฺโต ตุจฺโฉ, ตเถว ตถา เอว
โลเก ติตฺถิยา นานาทิฏฺฐิคติกา พหุชฺชนา อสงฺขเตน นิพฺพาเนน ริตฺตา
ตุจฺฉาติ สมฺพนฺโธ. เสติ นิปาตมตฺตํ.
@เชิงอรรถ:  สี. กิริยํ.    สี. อพฺโพจฺฉินฺนํ.
     [๒๗๔] ปจฺฉิมภเว ปริโยสานชาติยํ พฺรหฺมพนฺธุ พฺราหฺมณกุเล ชาโต
อหํ อโหสินฺติ อตฺโถ. มหาโภคํ ฉฑฺเฑตฺวานาติ ๑- มหนฺตํ โภคกฺขนฺธํ เขฬปิณฺฑํ
อิว ฉฑฺเฑตฺวา อนคาริยํ กสิวาณิชฺชาทิกมฺมวิรหิตํ ตาปสปพฺพชฺชํ ปพฺพชึ
ปฏิปชฺชินฺติ อตฺโถ.
                      ปฐมภาณวารวณฺณนา สมตฺตา.
     [๒๗๕-๗] อชฺฌายโก ฯเปฯ มุนึ โมเน สมาหิตนฺติ โมนํ วุจฺจติ
ญาณํ, เตน โมเนน สมนฺนาคโต มุนิ, ตสฺมึ โมเน สมฺมา อาหิตํ ฐปิตํ
สมาหิตํ จิตฺตนฺติ อตฺโถ. อาคุสงฺขาตํ ปาปํ น กโรตีติ นาโค, อสฺสชิตฺเถโร,
ตํ มหานาคํ สุฏฺฐุ ผุลฺลํ วิกสิตปทุมํ ยถา วิโรจมานนฺติ อตฺโถ.
     [๒๗๘-๘๑] ทิสฺวา เม ฯเปฯ ปุจฺฉิตุํ อมตํ ปทนฺติ อุตฺตานตฺถเมว.
     [๒๘๒] วีถินฺตเรติ วีถิอนฺตเร อนุปฺปตฺตํ สมฺปตฺตํ อุปคตํ ตํ เถรํ
อุปคนฺตฺวาน สมีปํ คนฺตฺวา อหํ ปุจฺฉินฺติ สมฺพนฺโธ.
     [๒๘๔] กีทิสนฺเต มหาวีราติ สกลธิติปุริสสาสเน อรหนฺตานมนฺตเร
ปฐมํ ธมฺมจกฺกปฺปวตฺตเน อรหตฺตปฺปตฺตมหาวีร, อนุชาตปริวารพหุลตาย มหายส เต
ตว พุทฺธสฺส กีทิสํ สาสนํ ธมฺมํ ธมฺมเทสนาสงฺขาตํ สาสนนฺติ สมฺพนฺโธ.
โภ ภทฺรมุข เม มยฺหํ สาธุ ภทฺทกํ สาสนํ กถยสฺสุ กเถหีติ อตฺโถ.
     [๒๘๕] ตโต กถิตาการํ ทสฺเสนฺโต โส เม ปุฏฺโฐติอาทิมาห. ตตฺถ
โสติ อสฺสชิตฺเถโร, เม มยา ปุฏฺโฐ "สาสนํ กีทิสนฺ"ติ กถิโต สพฺพํ กถํ
กเถสิ. สพฺพํ สาสนํ อตฺถคมฺภีรตาย คมฺภีรํ เทสนาธมฺมปฏิเวธคมฺภีรตาย คมฺภีรํ
ปรมตฺถสจฺจวิภาวิตาทิวเสน นิปุณํ ปทํ นิพฺพานํ ตณฺหาสลฺลสฺส หนฺตารํ
วินาสกรํ สพฺพสฺส สํสารทุกฺขสฺส อปนุทนํ เขปนกรํ ธมฺมนฺติ สมฺพนฺโธ.
     [๒๘๖] เตน กถิตาการํ ทสฺเสนฺโต เย ธมฺมาติอาทิมาห. เหตุปฺปภวา
เหตุโต การณโต อุปฺปนฺนา ชาตา ภูตา สญฺชาตา นิพฺพตฺตา อภินิพฺพตฺตา
@เชิงอรรถ:   ปาฬิ. ฉฑฺฑยิตฺวานาติ.
เย ธมฺมา เย สปฺปจฺจยา สภาวธมฺมา ๑- สนฺติ สํวิชฺชนฺติ อุปลภนฺตีติ สมฺพนฺโธ.
เตสํ ธมฺมานํ เหตุํ การณํ ตถาคโต อาห กเถสิ. เตสญฺจ โย นิโรโธติ
เตสํ เหตุธมฺมานํ โย นิโรโธ นิรุชฺฌนสภาโว, เอวํวาที มหาสมโณติ
สีลสมาธิปญฺญาทิคุณปริวารมหนฺตตาย สมิตปาปตฺตา วิทฺธํสิตปาปตฺตา จ มหาสมโณ
ภควา เอวํวาที เหตุวูปสมนาทิวทนสีโล กเถตาติ อตฺโถ.
     [๒๘๗] ตโต วุตฺตธมฺมํ สุตฺวา อตฺตนา ปจฺจกฺขกตปฺปการํ ทสฺเสนฺโต
โสหนฺติอาทิมาห. ตํ อุตฺตานเมว.
     [๒๘๙] เอเสว ธมฺโม ยทิ ตาวเทวาติ สเจปิ อิโต อุตฺตรึ นตฺถิ,
เอตฺตกเมว อิทํ โสตาปตฺติผลเมว ปตฺตพฺพํ. ตถา เอโส เอว ธมฺโมติ อตฺโถ.
ปจฺจพฺยถ ปฏิวิทฺธถ ตุเมฺห อโสกํ ปทํ นิพฺพานํ. อเมฺหหิ นาม อิทํ ปทํ
พหุเกหิ กปฺปนหุเตหิ อทิฏฺฐเมว อพฺภตีตํ.
     [๒๙๐] ยฺวาหํ ธมฺมํ คเวสนฺโตติ โย อหํ ธมฺมํ สนฺติปทํ คเวสนฺโต
ปริเยสนฺโต กุติตฺเถ กุจฺฉิตติตฺเถ นินฺทิตพฺพติตฺเถ สญฺจรึ ปริพฺภมินฺติ อตฺโถ.
โส เม อตฺโถ อนุปฺปตฺโตติ โส ปริเยสิตพฺโพ อตฺโถ มยา อนุปฺปตฺโต
สมฺปตฺโต, อิทานิ ปน เม มยฺหํ นปฺปมชฺชิตุํ อปฺปมาเทน ภวิตุํ กาโลติ อตฺโถ.
     [๒๙๑] อหํ อสฺสชินา เถเรน โตสิโต กตโสมนสฺโส อจลํ นิจฺจลํ
นิพฺพานปทํ ปตฺวาน ปาปุณิตฺวา สหายกํ โกลิตมาณวํ คเวสนฺโต ปริเยสนฺโต
อสฺสมปทํ อคมาสินฺติ อตฺโถ.
     [๒๙๒] ทูรโตว มมํ ทิสฺวาติ อสฺสมปทโต ทูรโตว อาคจฺฉนฺตํ มมํ
ทิสฺวา สุสิกฺขิโต เม มม สหาโย ฐานนิสชฺชาทิอิริยาปเถหิ สมฺปนฺโน สมงฺคีภูโต
อิทํ อุปริ วุจฺจมานวจนํ อพฺรวิ กเถสีติ อตฺโถ.
     [๒๙๓] โภ สหาย ปสนฺนมุขเนตฺโตสิ ปสนฺเนหิ โสภเนหิ ททฺทลฺลมาเนหิ
มุขเนตฺเตหิ สมนฺนาคโต อสิ. มุนิภาโว อิว เต ทิสฺสติ ปญฺญายติ. อิตฺถมฺภูโต
@เชิงอรรถ:  สี., อิ. สปฺปจฺจยา สงฺขารธมฺมา.
ตฺวํ อมตาธิคโต อมตํ นิพฺพานํ อธิคโต อสิ, กจฺจิ อจฺจุตํ นิพฺพานปทํ อธิคโต
อธิคจฺฉีติ ปุจฺฉามีติ อตฺโถ.
     [๒๙๔] สุภานุรูโป อายาสีติ สุภสฺส ปสนฺนวณฺณสฺส อนุรูโป หุตฺวา
อายาสิ อาคจฺฉสิ. อาเนญฺชการิโต วิยาติ โตมราทีหิ การิโต อาเนญฺโช
หตฺถี วิย ทนฺโตว ตีหิ มาเสหิ สุสิกฺขิโต อิว พาหิตปาปตฺตา พฺราหฺมณ
ทนฺตทมโถ สิกฺขิตสิกฺโข นิพฺพานปเท อุปสนฺโต อสีติ ปุจฺฉิ.
     [๒๙๕] เตน ปุฏฺโฐ อมตํ มยาติอาทิมาห. ตํ อุตฺตานตฺถเมว.
     [๒๙๙] อปริโยสิตสงฺกปฺโปติ "อนาคเต เอกสฺส พุทฺธสฺส อคฺคสาวโก
ภเวยฺยน"ติ ปตฺถิตปตฺถนาย โกฏึ อปฺปตฺตสงฺกปฺโปติ อตฺโถ. กุติตฺเถ อคนฺตพฺพมคฺเค
อหํ สญฺจรึ ปริพฺภมึ. ภนฺเต โคตม โลกเชฏฺฐ ตว ทสฺสนํ อาคมฺม ปตฺวา
มม สงฺกปฺโป มยฺหํ ปตฺถนา ปูริโต อรหตฺตมคฺคาธิคเมน สาวกปารมีญาณสฺส
ปาปุณเนน ปริปุณฺโณติ อธิปฺปาโย.
     [๓๐๐] ปฐวิยํ ปติฏฺฐายาติ ปฐวิยํ นิพฺพตฺตา สมเย เหมนฺตกาเล
ปุปฺผนฺติ วิกสนฺติ, ทิพฺพคนฺธา สุคนฺธา สุฏฺฐุ ปวนฺติ ปวายนฺติ, สพฺพปาณินํ
สพฺเพ เทวมนุสฺเส โตเสนฺติ โสมนสฺสยุตฺเต กโรนฺติ ยถา.
     [๓๐๑] ตเถวาหํ มหาวีราติ มหาวีริยวนฺต สกฺยกุลปสุตมหาปริวาร
เต ตว สาสเน ปติฏฺฐาย อหํ ปติฏฺฐหิตฺวา ปุปฺผิตุํ อรหตฺตมคฺคญาเณน
วิกสิตุํ สมยํ กาลํ เอสามิ คเวสามิ ตเถวาติ สมฺพนฺโธ.
     [๓๐๒] วิมุตฺติปุปฺผนฺติ สพฺพกิเลเสหิ วิมุจฺจนโต วิโมจนโต วา วิมุตฺติ
อรหตฺตผลวิมุตฺติสงฺขาตํ ปุปฺผํ เอสนฺโต คเวเสนฺโต, ตญฺจ โข ภวสํสารโมจนํ
กามภวาทิภเวสุ สํสรณํ คมนํ ภวสํสารํ, ตโต โมจนํ ภวสํสารโมจนํ.
วิมุตฺติปุปฺผลาเภนาติ วิมุจฺจนํ วิมุจฺจนฺติ วา กตสมฺภารา เอตายาติ วิมุตฺติ,
อคฺคผลํ. ปุปฺผนฺติ วิกสนฺติ เวเนยฺยา เอเตนาติ ปุปฺผํ. วิมุตฺติ เอว ปุปฺผํ
วิมุตฺติปุปฺผํ. ลภนํ ลาโภ, วิมุตฺติปุปฺผสฺส ลาโภ วิมุตฺติปุปฺผลาโภ. เตน
วิมุตฺติปุปฺผลาเภน อธิคมเนน สพฺพปาณินํ สพฺพสตฺเต โตเสมิ โสมนสฺสํ
ปาเปมีติ อตฺโถ.
     [๓๐๓] "ยาวตา พุทฺธเขตฺตมฺหี"ติอาทีสุ จกฺขุม ปญฺจหิ จกฺขูหิ
จกฺขุมนฺต ยตฺตเก ฐาเน รตนสุตฺตาทีนํ ปริตฺตานํ อาณา อานุภาโว ปวตฺตติ,
ตตฺตเก สตสหสฺสโกฏิจกฺกวาฬสงฺขาเต พุทฺธเขตฺเต ฐเปตฺวาน มหามุนึ
สมฺมาสมฺพุทฺธํ วชฺเชตฺวา อวเสเสสุ สตฺเตสุ อญฺโญ โกจิ ตว ปุตฺตสฺส ตุยฺหํ
ปุตฺเตน มยา ปญฺญาย สทิโส สโม นตฺถีติ สมฺพนฺโธ. เสสํ อุตฺตานเมว.
     [๓๐๘] ปฏิปนฺนาติ จตุมคฺคสมงฺคิโน จ ผลฏฺฐา อรหตฺตผเล ฐิตา จ
เสขา ผลสมงฺคิโน เหฏฺฐิเมหิ ตีหิ ผเลหิ สมนฺนาคตา จ เอเต อฏฺฐ อริยภิกฺขู
อุตฺตมตฺถํ นิพฺพานํ อาสึสกา ๑- คเวสกา ตํ ปญฺญวนฺตํ ปริวาเรนฺติ สทา
สพฺพกาลํ เสวนฺติ ภชนฺติ ปยิรุปาสนฺตีติ อตฺโถ.
     [๓๑๐] กายเวทนาจิตฺตธมฺมานุปสฺสนาสงฺขาตานํ จตุนฺนํ สติปฏฺฐานานํ
กุสลา เฉกา สติสมฺโพชฺฌงฺคาทีนํ สตฺตนฺนํ สมฺโพชฺฌงฺคานํ ภาวนาย วฑฺฒนาย
รตา อลฺลีนา.
     [๓๑๔] อุฬุราชาว ตารกราชา อิว จ โสภสิ.
     [๓๑๕] รุกฺขปพฺพตรตนสตฺตาทโย ธาเรตีติ ธรณี, ธรณิยํ รุหา สญฺชาตา
วฑฺฒิตา จาติ ธรณีรุหา รุกฺขา. ปฐวิยํ ปติฏฺฐาย รุหนฺติ วฑฺฒนฺติ วุฑฺฒึ
วิรุฬฺหึ อาปชฺชนฺติ. เวปุลฺลตํ วิปุลฺลภาวํ ปริปูรภาวํ ปาปุณนฺติ, เต รุกฺขา
กเมน ผลํ ทสฺสยนฺติ ผลธาริโน โหนฺติ.
     [๓๑๗-๙] ปุนปิ ภควนฺตเมว โถเมนฺโต สินฺธุ สรสฺสตีติอาทิมาห. ตตฺถ
สินฺธุวาทิ ๒- นาม คงฺคา จ, สรสฺสตี นาม คงฺคา จ, นนฺทิยคงฺคา จ จนฺทภาคาคงฺคา
จ, คงฺคา นาม คงฺคา จ, ยมุนา นาม คงฺคา จ, สรภู นาม คงฺคา จ, มหี
นาม คงฺคา จ. สนฺทมานานํ คจฺฉนฺตีนํ เอตาสํ คงฺคานํ สาคโรว สมุทฺโท เอว
สมฺปฏิจฺฉติ ปฏิคฺคณฺหาติ ธาเรติ. ตทา เอตา สพฺพคงฺคา ปุริมํ นามํ
@เชิงอรรถ:  ฉ.ม. อาสีสกา.    สี. สินฺธุวาร.
สินฺธุวาทิคงฺคาตฺยาทิกํ ปุริมํ นามปญฺญตฺติโวหารํ ชหนฺติ ฉฑฺเฑนฺติ สาคโรเตว
สาคโร อิติ เอว ญายติ ปากฏา ภวติ ยถา. ตเถว ตถา เอว อิเม จตุพฺพณฺณา
ขตฺติยพฺราหฺมณเวสฺสสุทฺทสงฺขาตา จตฺตาโร กุลา ตวนฺติเก ตว อนฺติเก สมีเป
ปพฺพชิตฺวา ปตฺตกาสายจีวรธาริโน ปริจรนฺตา ปุริมํ นามํ ขตฺติยาทินามเธยฺยํ
ปญฺญตฺติโวหารํ ชหนฺติ จชนฺติ, พุทฺธปุตฺตาติ พุทฺธสฺส โอรสาติ ฌายเร
ปากฏา ภเวยฺยุํ.
     [๓๒๐-๔] จนฺโท จนฺทมณฺฑโล อพฺภา มหิกา รโช ธุโม ราหูติ
ปญฺจหิ อุปกฺกิเลเสหิ วิรหิตตฺตา วิมโล วิคตมโล นิมฺมโล อากาสธาตุยา
อากาสคพฺเภ คจฺฉํ คจฺฉนฺโต สพฺเพ ตารกสมูเห อาภาย มทฺทมาโน โลเก
อติโรจติ ททฺทลฺลติ ยถา. ตเถว ตถา เอว ตฺวํ ฯเปฯ.
     [๓๒๕-๗] อุทเก ชาตา อุทเก สํวฑฺฒา กุมุทา มนฺทาลกา จ พหู
สงฺขาติกฺกนฺตา โตเยน อุทเกน กทฺทมกลเลน จ อุปลิมฺปนฺติ อลฺลียนฺติ ยถา,
ตเถว พหุกา สตฺตา อปริมาณา สตฺตา โลเก ชาตา สํวฑฺฒา ราเคน จ
โทเสน จ อฏฺฏิตา พนฺธิตา วิรูหเร วิรุหนฺติ. กทฺทเม กุมุทํ ยถา วิรุหติ
สญฺชายติ. เกสรีติ ปทุมํ.
     [๓๒๙-๓๐] รมฺมเก มาเสติ กตฺติกมาเส "โกมุทิยา จาตุมาสินิยา"ติ
วุตฺตตฺตา. วาริชา ปทุมปุปฺผาทโย พหู ปุปฺผา ปุปฺผนฺติ วิกสนฺติ, ตํ มาสํ
ตํ กตฺติกมาสํ นาติวตฺตนฺติ วาริชาติ สมฺพนฺโธ. สมโย ปุปฺผนาย โสติ
โส กตฺติกมาโส ปุปฺผนาย วิกสนาย สมโย กาโลติ อตฺโถ. ยถา ปุปฺผนฺติ
ตเถว ตฺวํ สกฺยปุตฺต ปุปฺผิโต วิกสิโต อสิ. ปุปฺผิโต เต วิมุตฺติยาติ เต
ตุยฺหํ สิสฺสา กตสมฺภารา ภิกฺขู วิมุตฺติยา อรหตฺตผลญาเณน ปุปฺผิโต วิกสิโต.
ยถา วาริชํ ปทุมํ ปุปฺผนสมยํ นาติกฺกมติ, ตถา เต สาสนํ โอวาทานุสาสนึ
นาติวตฺตนฺติ นาติกฺกมนฺตีติ อตฺโถ.
     [๓๓๓-๔] ยถาปิ เสโล หิมวาติ หิมวา นาม เสลมยปพฺพโต.
สพฺพปาณินํ สพฺเพสํ พฺยาธิตานํ สตฺตานํ โอสโธ โอสธวนฺโต สพฺพนาคานํ
สพฺพอสุรานํ สพฺพเทวานญฺจ อาลโย อคารภูโต ยถา, ตเถว ตฺวํ มหาวีร
สพฺพปาณินํ ชราพฺยาธิมรณาทีหิ ปโมจนโต โอสโธ วิย. ยถา โส หิมวา
นาคาทีนํ อาลโย, ตถา, ตเถว ตฺวํ มหาวีร สพฺพปาณินํ ชราพฺยาธิมรณาทีหิ
ปโมจนโต โอสโธ วิย. ยถา โส หิมวา นาคาทีนํ อาลโย, ตถา เตวิชฺชาย
จ ฉฬภิญฺญาย จ อิทฺธิยา จ ปารมึ ปริโยสานํ คตา ปตฺตา ตุวํ นิสฺสาย
วสนฺตีติ สมฺพนฺโธ. เหฏฺฐา วา อุปริ วา อุปมาอุปเมยฺยวเสน คาถานํ
สมฺพนฺธนยา สุวิญฺเญยฺยาว.
     [๓๔๒] อาสยานุสยํ ญตฺวาติ เอตฺถ อาสโยติ อชฺฌาสโย จริยา,
อนุสโยติ ถามคตกิเลโส. "อยํ ราคจริโต อยํ โทสจริโต อยํ โมหจริโต"ติอาทินา
อาสยญฺจ อนุสยํ กิเลสปวตฺติญฺจ ชานิตฺวาติ อตฺโถ. อินฺทฺริยานํ พลาพลนฺติ
สทฺธินฺทฺริยาทีนํ ปญฺจนฺนํ อินฺทฺริยานํ ติกฺขินฺทฺริโย มุทินฺทฺริโย สฺวากาโร
ทฺวากาโร สุวิญฺญาปโย ทุวิญฺญาปโยติ เอวํ พลาพลํ ชานิตฺวา. ภพฺพาภพฺเพ
วิทิตฺวานาติ "มยา เทสิตํ ธมฺมํ ปฏิวิชฺฌิตุํ อยํ ปุคฺคโล ภพฺโพ สมตฺโถ อยํ
ปุคฺคโล อภพฺโพ"ติ วิทิตฺวา ปจฺจกฺขํ กตฺวา ภนฺเต สพฺพญฺญุ ตฺวํ
จาตุทฺทีปิกมหาเมโฆ วิย ธมฺมเทสนาสีหนาเทน อภีตนาเทน คชฺชสิ สกลํ จกฺกวาฬํ
เอกนินฺนาทํ กโรสิ.
     [๓๔๓-๔] จกฺกวาฬปริยนฺตาติ สมนฺตา จกฺกวาฬคพฺภํ ปูเรตฺวา ปริสา
นิสินฺนา ภเวยฺย. เต เอวํ นิสินฺนา นานาทิฏฺฐี อเนกทสฺสนคาหิโน วิวทมาโน
เทฺวฬฺหกชาโต วิวทนฺติ, ตํ เตสํ วิมติจฺเฉทนาย ทุพุทฺธิฉินฺทนตฺถาย สพฺเพสํ
สตฺตานํ จิตฺตมญฺญาย จิตฺตาจารํ ญตฺวา โอปมฺมกุสโล อุปมาอุปเมยฺเยสุ ทกฺโข
ตฺวํ มุนิ เอกํ ปญฺหํ กเถนฺโตว เอเกเนว ปญฺหกถเนน สกลจกฺกวาฬคพฺเภ
นิสินฺนานํ ปาณีนํ วิมตึ สํสยํ ฉินฺทสิ นิกฺกงฺขํ กโรตีติ อตฺโถ.
     [๓๔๕] อุปทิสสทิเสเหวาติ เอตฺถ อุทกสฺส อุปริ ทิสฺสนฺติ ปากฏา
โหนฺตีติ อุปทิสา, เสวาลา. อุปทิเสหิ สทิสา อุปทิสสทิสา, มนุสฺสา. ยถา
หิ อุปทิสา เสวาลา อุทกํ อทิสฺสมานํ กตฺวา ตสฺสุปริ ปตฺถริตฺวา ฐิตาโหนฺติ,
ตถา วสุธา ปฐวี เตหิ อุปทิสสทิเสหิ เอว มนุสฺเสหิ นิรนฺตรํ ปตฺถริตฺวา
ฐิเตหิ ปูริตา ภเวยฺย. เต สพฺเพว ปฐวึ ปูเรตฺวา ฐิตา มนุสฺสา ปญฺชลิกา สิรสิ
อญฺชลึ ปคฺคหิตา กิตฺตยุํ โลกนายกํ โลกนายกสฺส พุทฺธสฺส คุณํ กเถยฺยุํ.
     [๓๔๖] เต สพฺเพ เทวมนุสฺสา กปฺปํ วา สกลํ กปฺปํ กิตฺตยนฺตา
คุณํ กเถนฺตาปิ นานาวณฺเณหิ นานปฺปกาเรหิ คุเณหิ กิตฺตยุํ. ตถาปิ เต สพฺเพ
ปริเมตุํ คุณปมาณํ กเถตุํ น ปปฺเปยฺยุํ น สมฺปาปุเณยฺยุํ น สกฺกุเณยฺยุํ.
อปฺปเมยฺโย ตถาคโต สมฺมาสมฺพุทฺโธ อปริเมยฺโย คุณาติเรโก. เอเตน
คุณมหนฺตตํ ทีเปติ.
     [๓๔๗] สเกน ถาเมน อตฺตโน พเลน เหฏฺฐา อุปมาอุปเมยฺยวเสน
ชิโน ชิตกิเลโส พุทฺโธ มยา กิตฺติโต โถมิโต ยถา อโหสิ, เอวเมว สพฺเพ
เทวมนุสฺสา กปฺปโกฏีปิ ๑- กปฺปโกฏิสเตปิ กิตฺเตนฺตา ปกิตฺตยุํ กเถยฺยุนฺติ อตฺโถ.
     [๓๔๘] ปุนปิ คุณานํ อปฺปมาณตํ ทีเปตุํ สเจ หิ โกจิ เทโว วาติอาทิมาห.
ปูริตํ ปริกฑฺเฒยฺยาติ มหาสมุทฺเท ปูริตอุทกํ สมนฺตโต อากฑฺเฒยฺย. โส ปุคฺคโล
วิฆาตํ ทุกฺขเมว ลเภยฺย ปาปุเณยฺยาติ อตฺโถ.
     [๓๕๐] วตฺเตมิ ชินสาสนนฺติ ชิเนน ภาสิตํ สกลํ ปิฏกตฺตยํ. วตฺเตมิ
ปวตฺเตมิ รกฺขามีติ อตฺโถ. ธมฺมเสนาปตีติ ธมฺเมน ปญฺญาย ภควโต
จตุปริสสงฺขาตาย ปริสาย ปติ ปธาโนติ ธมฺมเสนาปติ. สกฺยปุตฺตสฺส ภควโต
สาสเน อชฺช อิมสฺมึ วตฺตมานกาเล จกฺกวตฺติรญฺโญ เชฏฺฐปุตฺโต วิย สกลํ
พุทฺธสาสนํ ปาเลมีติ อตฺโถ.
     [๓๕๒-๓] อตฺตโน สํสารปริพฺภมํ ทสฺเสนฺโต โย โกจิ มนุโช ภารนฺติอาทิมาห.
โย โกจิ มนุโช มานุโส ภารํ สีสภารํ มตฺถเก สีเส ฐเปตฺวา
ธาเรยฺย วเหยฺย, สทา สพฺพกาลํ โส มนุโช เตน ภาเรน ทุกฺขิโต ปีฬิโต
อภิภูโต อสฺส ภเวยฺย. ภาโร ภริตภาโร ภริโต อตีว ภาริโต. ตถา เตน
ปกาเรน อหํ ราคคฺคิโทสคฺคิโมหคฺคิสงฺขาเตหิ ตีหิ อคฺคีหิ ฑยฺหมาโน คิรึ
อุทฺธริโต ยถา มหาเมรุปพฺพตํ อุทฺธริตฺวา อุกฺขิปิตฺวา สีเส ฐปิโต ภวภาเรน
ภวสํสารุปฺปตฺติภาเรน ภริโต ทุกฺขิโต ภเวสุ สํสรึ ปริพฺภมินฺติ สมฺพนฺโธ.
@เชิงอรรถ:  สี. กปฺปโกฏึ.
     [๓๕๔] โอโรปิโต จ เม ภาโรติ อิทานิ ปพฺพชิตกาลโต ปฏฺฐาย
โส ภวภาโร มยา โอโรปิโต นิกฺขิตฺโต. ภวา อุคฺฆาฏิตา มยาติ สพฺเพ นว
ภวา มยา วิทฺธํสิตา. สกฺยปุตฺตสฺส ภควโต สาสเน ยํ กรณียํ กตฺตพฺพํ
มคฺคปฏิปาฏิยา กิเลสวิทฺธํสนกมฺมํ อตฺถิ, ตํ สพฺพํ มยา กตนฺติ อตฺโถ.
     [๓๕๕] ปุน อตฺตโน วิเสสํ ทสฺเสนฺโต ยาวตา พุทฺธเขตฺตมฺหีติอาทิมาห.
ตตฺถ ยาวตา ยตฺตเก ทสสหสฺสจกฺกวาฬสงฺขาเต พุทฺธเขตฺเต สกฺยปุงฺควํ
สกฺยกุลเชฏฺฐกํ ภควนฺตํ ฐเปตฺวา อวเสสสตฺเตสุ โกจิปิ ปญฺญาย เม มยา สโม
นตฺถีติ ทีเปติ. เตนาห "อหํ อคฺโคมฺหิ ปญฺญาย, สทิโส เม น วิชฺชตี"ติ.
     [๓๕๖] ปุน อตฺตโน อานุภาวํ ปกาเสนฺโต สมาธิมฺหีตฺยาทิมาห. ตํ
สุวิญฺเญยฺยเมว.
     [๓๖๐] ฌานวิโมกฺขานขิปฺปปฏิลาภีติ ปฐมชฺฌานาทีนํ ฌานานํ โลกโต
วิมุจฺจนโต "วิโมกฺขนฺ"ติ สงฺขํ คตานํ อฏฺฐนฺนํ โลกุตฺตรวิโมกฺขานญฺจ ขิปฺปลาภี
สีฆํ ปาปุณาตีติ อตฺโถ.
     [๓๖๒] เอวํ มหานุภาวสฺสาปิ อตฺตโน สพฺรหฺมจารีสุ คารวพหุมานตํ
ปกาเสนฺโต อุทฺธตวิโสวาติอาทิมาห. ๑- ตตฺถ อุทฺธตวิโส อุปฺปาฏิตโฆรวิโส สปฺโป
อิว ฉินฺนวิสาโณว ฉินฺทิตสิงฺโค อุสโภ อิว อหํ อิทานิ นิกฺขิตฺตมานทปฺโปว
ฉฑฺฑิตโคตฺตมทาทิมานทปฺโปว คณํ สํฆสฺส สนฺติกํ ครุคารเวน อาทรพหุมาเนน
อุเปมิ อุปคจฺฉามิ.
     [๓๖๓] อิทานิ อตฺตโน ปญฺญาย มหตฺตตํ ปกาเสนฺโต ยทิ รูปินีติอาทิมาห.
เอวรูปา เม มหตี ปญฺญา อรูปินี สมานา ยทิ รูปินี ภเวยฺย, ตทา เม มม
ปญฺญา วสุปตีนํ ปฐวิสฺสรานํ ราชูนํ สเมยฺย สมา ภเวยฺยาติ อธิปฺปาโย.
เอวํ อตฺตโน ปญฺญาย มหตฺตภาวํ ทสฺเสตฺวา ตโต ปุพฺเพนิวาสานุสฺสติญาเณน
ปุพฺเพ กมฺมํ สริตฺวา อโนมทสฺสิสฺสาติอาทิมาห. ตตฺถ อโนมทสฺสิสฺส ภควโต
มยา กตาย ญาณโถมนาย ผลํ เอตํ มม ปญฺญามหตฺตนฺติ อตฺโถ.
@เชิงอรรถ:  ปาฬิ. อุทฺธฏทาโฒว.
     [๓๖๔] ปวตฺติตํ ธมฺมจกฺกนฺติ เอตฺถ จกฺกสทฺโท ปนายํ "จตุจกฺกยานนฺ"ติอาทีสุ
วาหเน วตฺตติ. "ปวตฺติเต จ ปน ภควตา ธมฺมจกฺเก"ติอาทีสุ ๑-
เทสนายํ. "จกฺกํ วตฺตย สพฺพปาณินนฺ"ติอาทีสุ ๒- ทานมยปุญฺญกิริยายํ. "จกฺกํ
วตฺเตติ อโหรตฺตนฺ"ติอาทีสุ อิริยาปเถ. "อิจฺฉาหตสฺส โปสสฺส, จกฺกํ ภมติ
มตฺถเก"ติอาทีสุ ๓- ขุรจกฺเก. "ราชา จกฺกวตฺตี จกฺกานุภาเวน วตฺตนโก"ติอาทีสุ ๔-
รตนจกฺเก. อิธ ปนายํ เทสนายํ. ตาทินา ตาทิคุณสมนฺนาคเตน สกฺยปุตฺเตน
โคตมสมฺพุทฺเธน ปวตฺติตํ เทสิตํ ปิฏกตฺตยสงฺขาตํ ธมฺมจกฺกํ อหํ สมฺมา
อวิปรีเตน อนุวตฺเตมิ อนุคนฺตฺวา วตฺเตมิ, เทเสมิ เทสนํ กโรมิ. อิทํ อนุวตฺตนํ
เทสิตสฺส อนุคนฺตฺวา ปจฺฉา เทสนํ ปุริมพุทฺธานํ กตาย ญาณโถมนาย
ผลนฺติ สมฺพนฺโธ.
     [๓๖๕] ตโต สปฺปุริสูปนิสฺสยโยนิโสมนสิการาทิปุญฺญผลํ ทสฺเสนฺโต
มา เม กทาจิ ปาปิจฺโฉติอาทิมาห. ตตฺถ ปาปิจฺโฉ ลามกาย อิจฺฉาย
สมนฺนาคโต ปาปจารี ปุคฺคโล จ ฐานนิสชฺชาทีสุ วตฺตปฏิวตฺตกรเณ กุสีโต จ
ฌานสมาธิมคฺคภาวนาทีสุ หีนวีริโย จ คนฺถธุรวิปสฺสนาธุรวิรหิตตฺตา อปฺปสฺสุโต
จ อาจริยุปชฺฌายาทีสุ อาจารวิรหิตตฺตา อนาจาโร จ ปุคฺคโล กทาจิ กาเล
กตฺถจิ ฐาเน เม มยา สห สเมโต สมาคโต มา อหุ มา ภวตูติ สมฺพนฺโธ.
     [๓๖๖] พหุสฺสุโตติ ปริยตฺติปฏิเวธวเสน ทุวิโธ พหุสฺสุโต จ ปุคฺคโล.
เมธาวีติ เมธาย ปญฺญาย สมนฺนาคโต จ. สีเลสุ สุสมาหิโตติ
จตุปาริสุทฺธิสีลมคฺคสมฺปยุตฺตสีลอฏฺฐงฺคุโปสถสีลาทีสุ สุฏฺฐุ อาหิโต ฐปิตจิตฺโต
จ. เจโตสมถานุยุตฺโตติ จิตฺตสฺส เอกีภาวมนุยุตฺโต จ ปุคฺคโล. อปิ มุทฺธนิ ติฏฺฐตุ
เอวรูโป ปุคฺคโล มยฺหํ มุทฺธนิ สิรสิ อปิ ติฏฺฐตูติ อตฺโถ.
     [๓๖๗] อตฺตโน ลทฺธผลานิสํสํ วตฺวา ตตฺถญฺเญ นิโยเชนฺโต ตํ โว
วทามิ ภทฺทนฺเตติอาทิมาห. ตํ สุวิญฺเญยฺยเมว.
@เชิงอรรถ:  วิ. มหา. ๔/๑๗/๑๕, สํ. มหา. ๑๙/๑๐๘๑/๓๖๙.   ขุ. ชา. ๒๗/๑๔๙/๑๘๑.
@ ขุ. ชา. ๒๗/๑๐๓/๑๓๗.   ที.สี. ๙/๒๕๘/๘๘, ขุ. อิติ. ๒๕/๒๒/๒๔๖.
     [๓๖๘-๙] ยมหนฺติ ยํ อสฺสชิตฺเถรํ อหํ ปฐมํ อาทิมฺหิ ทิสฺวา
โสตาปตฺติมคฺคปฏิลาเภน สกฺกายทิฏฺฐาทีนํ กิเลสานํ ปหีนตฺตา วิมโล มลรหิโต
อหุํ อโหสิ, โส อสฺสชิตฺเถโร เม มยฺหํ อาจริโย โลกุตฺตรธมฺมสิกฺขาปโก
อหุํ. อหํ ตสฺส สวนาย อนุสาสเนน อชฺช ธมฺมเสนาปติ อหุํ. สพฺพตฺถ
สพฺเพสุ คุเณสุ ปารมึ ปตฺโต ปริโยสานํ ปตฺโต อนาสโว นิกฺกิเลโส วิหรามิ.
     [๓๗๐] อตฺตโน อาจริเย สคารวํ ทสฺเสนฺโต โย เม อาจริโยติอาทิมาห.
โย อสฺสชิ นาม เถโร สตฺถุ สาวโก เม มยฺหํ อาจริโย อาสิ อโหสิ, โส
เถโร ยสฺสํ ทิสายํ ยสฺมึ ทิสาภาเค วสติ, อหํ ตํ ทิสาภาคํ อุสฺสีสมฺหิ
สีสุปริภาเค กโรมีติ สมฺพนฺโธ.
     [๓๗๑] ตโต อตฺตโน ฐานนฺตรปฺปตฺตภาวํ ทสฺเสนฺโต มม กมฺมนฺติอาทิมาห.
โคตโม ภควา สกฺยปุงฺคโว สกฺยกุลเกตุ สพฺพญฺญุตญฺญาเณน มม
ปุพฺเพ กตกมฺมํ สริตฺวาน ญตฺวา ภิกฺขุสํฆมชฺเฌ นิสินฺโน อคฺคฏฺฐาเน
อคฺคสาวกฏฺฐาเน มํ ฐเปสีติ สมฺพนฺโธ.
     อตฺถปฏิสมฺภิทา ธมฺมปฏิสมฺภิทา นิรุตฺติปฏิสมฺภิทา ปฏิภานปฏิสมฺภิทาติ
อิมา จตสฺโส ปฏิสมฺภิทา จ, ตาสํ เภโท ปฏิสมฺภิทามคฺเค ๑- วุตฺโตเยว.
จตุมคฺคจตุผลวเสน วา รูปารูปฌานวเสน วา อฏฺฐ วิโมกฺขา สํสารวิมุจฺจนธมฺมา จ
อิทฺธิวิธาทโย ฉ อภิญฺญาโย จ สจฺฉิกตา ปจฺจกฺขํ กตา. กตํ พุทฺธสฺส สาสนนฺติ
พุทฺธสฺส อนุสิฏฺฐิ โอวาทสงฺขาตํ สาสนํ กตํ อรหตฺตมคฺคญาเณน นิปฺผาทิตนฺติ
อตฺโถ.
     อิตฺถํ สุทนฺติ เอตฺถ อิตฺถนฺติ นิทสฺสนตฺเถ นิปาโต. อิมินา ปกาเรนาติ
อตฺโถ. เตน สกลสาริปุตฺตาปทานํ นิทสฺเสติ สุทนฺติ ปทปูรเณ นิปาโต.
อายสฺมาติ ครุคารวาธิวจนํ. สาริปุตฺโตติ มาตุนามวเสน กตนามเธยฺโย เถโร.
อิมา คาถาโยติ อิมา สกลา สาริปุตฺตตฺเถราปทานคาถาโย อภาสิ กเถสิ.
อิติ-สทฺโท ปริสมาปนตฺเถ นิปาโต, สกลํ สาริปุตฺตาปทานํ นิฏฺฐิตนฺติ อตฺโถ.
               สาริปุตฺตตฺเถราปทานวณฺณนา นิฏฺฐิตา. ๒-
@เชิงอรรถ:  ขุ. ปฏิ. ๓๑/๒๘/๙๒, อภิ. วิ. ๓๕/๗๑๘/๓๕๙.   ฉ.ม. สมตฺตา, เอวมุปริปิ.


             อรรถกถาภาษาบาลีอักษรไทย เล่มที่ ๔๙ หน้า ๒๖๔-๒๘๖. http://84000.org/tipitaka/pitaka_item/read_th.php?B=49&A=6580&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=49&A=6580&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=32&i=3              เนื้อความพระไตรปิฎกฉบับหลวง :- http://84000.org/tipitaka/read/r.php?B=32&A=290              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=32&A=438              The Pali Tipitaka in Roman Character :- http://84000.org/tipitaka/read/roman_read.php?B=32&A=438              สารบัญพระไตรปิฎกเล่มที่ ๓๒ http://84000.org/tipitaka/read/?index_32

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]