Catutthaṃ sattavassasuttaṃ
[496] Evamme sutaṃ ekaṃ samayaṃ bhagavā uruvelāyaṃ viharati
najjā nerañjarāya tīre ajapālanigrodhe . tena kho pana samayena
māro pāpimā satta vassāni bhagavantaṃ anubandho hoti otārāpekkho
otāraṃ alabhamāno.
[497] Atha kho māro pāpimā yena bhagavā tenupasaṅkami
upasaṅkamitvā bhagavantaṃ gāthāya ajjhabhāsi
sokāvatiṇṇo nu vanasmiṃ jhāyasi
vittaṃ nu jinno uda patthayāno
āgunnu gāmasmimakāsi kiñci
@Footnote: 1 Ma. Yu. beluvapaṇḍuvīṇaṃ. 2 Yu. so. 3 Po. Ma. Yu. kacchā. 4 Ma. Yu.
@tatthevantaradhāyathāti.
Kasmā janena 1- karosi sakkhiṃ
sakkhī na sampajjati kenaci teti.
[498] Sokassa mūlaṃ palikhāya sabbaṃ
anāgu jhāyāmi asocamāno
jetvāna sabbaṃ bhavalobhajappaṃ
anāsavo jhāyāmi pamattabandhūti.
[499] Yaṃ vadanti mamayidanti ye vadanti mamanti ca
ettha cete mano atthi na me samaṇa mokkhasīti.
[500] Yaṃ vadanti na taṃ mayhaṃ ye vadanti na te ahaṃ
evaṃ pāpima jānāhi na me maggampi dakkhasīti.
[501] Sace maggaṃ anubuddhaṃ khemaṃ amatagāminiṃ 2-
apehi gaccha tvameko 3- kimaññamanusāsasīti.
[502] Amaccudheyyaṃ muñcanti ye janā pāragāmino
tesāhaṃ puṭṭho akkhāmi yaṃ saccaṃ taṃ nirūpadhinti.
[503] Seyyathāpi bhante gāmassa vā nigamassa vā avidūre
pokkharaṇī tatrassa kakkaṭako atha kho bhante sambahulā
kumārakā vā kumārikāyo vā tamhā gāmā vā nigamā vā
nikkhamitvā yena sā pokkharaṇī tenupasaṅkameyyuṃ upasaṅkamitvā
taṃ kakkaṭakaṃ udakā uddharitvā thale patiṭṭhāpeyyuṃ yaṃ yadeva hi
so bhante kakkaṭako aḷaṃ abhininnāmeyya taṃ tadeva te kumārakā
@Footnote: 1 Ma. Yu. jane. 2 Po. Ma. Yu. amatagāminaṃ. 3 Ma. tavameveko.
Vā kumārikāyo vā kaṭṭhena vā kaṭhalāya vā sañchindeyyuṃ
sambhañjeyyuṃ sampalibhañjeyyuṃ evaṃ hi so bhante kakkaṭako sabbehi
aḷehi sañchinnehi sambhaggehi sampalibhaggehi abhabbo taṃ pokkharaṇiṃ
puna otarituṃ seyyathāpi 1- pubbe evameva kho bhante yānikānici
visūkāyitāni 2- visevitāni vipphanditāni sabbāni tāni bhagavatā
pacchinnāni 3- sambhaggāni sampalibhaggāni abhabbodānāhaṃ
bhante puna bhagavantaṃ upasaṅkamituṃ yadidaṃ otārāpekkhoti.
[504] Atha kho māro pāpimā bhagavato santike imā
nibbejanīyā gāthāyo abhāsi
medavaṇṇañca pāsāṇaṃ vāyaso anupariyagā
apettha mudu vindema api assādanā siyā
aladdhā tattha assādaṃ vāyamanto 4- apakkame
kākova selaṃ āsajja nibbijjāpema gotamāti.
Atha kho māro pāpimā bhagavato santike imā nibbejanīyā
gāthāyo bhāsitvā 5- tamhā ṭhānā apakkamma bhagavato avidūre
paṭhaviyaṃ pallaṅkena nisīdi tuṇhībhūto maṅkubhūto pattakkhandho adhomukho
pajjhāyanto appaṭibhāṇo kaṭṭhena bhūmiṃ vilikhanto.
Pañcamaṃ māradhītusuttaṃ
[505] Atha kho taṇhā ca aratī ca rāgā ca māradhītaro
yena māro pāpimā tenupasaṅkamiṃsu upasaṅkamitvā māraṃ pāpimantaṃ
@Footnote: 1 Ma. seyyathāpi pubbeti pāṭhadvayaṃ natthi. 2 Po. Ma. visūkāyikāni. Yu.
@sukāyikāni. 3 Ma. Yu. sañchinnāni. 4 Ma. Yu. vāyasetto. 5 Ma. Yu. abhāsitvā.
Gāthāya ajjhabhāsiṃsu
kenāsi dummano tāta purisaṃ kaṃ nu socasi
mayaṃ taṃ rāgapāsena araññamiva kuñjaraṃ
bandhitvā ānayissāma vasago te bhavissatīti.
[506] Arahaṃ sugato loke na rāgena suvānayo
māradheyyaṃ atikkanto tasmā socāmahaṃ bhusanti.
[507] Atha kho taṇhā ca aratī ca rāgā ca māradhītaro
yena bhagavā tenupasaṅkamiṃsu upasaṅkamitvā bhagavantaṃ etadavocuṃ
pāde te samaṇa paricāremāti . atha kho bhagavā na manasākāsi
yathātaṃ anuttare upadhisaṅkhaye vimutto.
[508] Atha kho taṇhā ca aratī ca rāgā ca māradhītaro ekamantaṃ
apakkamma evaṃ samacintesuṃ uccāvacā kho purisānaṃ adhippāyā
yannūna mayaṃ ekasataekasataṃ kumārīvaṇṇasataṃ abhinimmineyyāmāti .
Atha kho taṇhā ca aratī ca rāgā ca māradhītaro ekasataekasataṃ
kumārīvaṇṇasataṃ abhinimminitvā yena bhagavā tenupasaṅkamiṃsu
upasaṅkamitvā bhagavantaṃ etadavocuṃ pāde te samaṇa paricāremāti .
Tampi bhagavā na manasākāsi yathātaṃ anuttare upadhisaṅkhaye vimutto.
[509] Atha kho taṇhā ca aratī ca rāgā ca māradhītaro
ekamantaṃ apakkamma evaṃ samacintesuṃ uccāvacā kho purisānaṃ
Adhippāyā yannūna mayaṃ ekasataekasataṃ avijātavaṇṇasataṃ
abhinimmineyyāmāti . atha kho taṇhā ca aratī ca rāgā ca māradhītaro
ekasataekasataṃ avijātavaṇṇasataṃ abhinimminitvā yena bhagavā
tenupasaṅkamiṃsu upasaṅkamitvā bhagavantaṃ etadavocuṃ pāde te samaṇa
paricāremāti . tampi bhagavā na manasākāsi yathātaṃ anuttare
upadhisaṅkhaye vimutto.
[510] Atha kho taṇhā ca aratī ca rāgā ca māradhītaro
ekamantaṃ apakkamma evaṃ samacintesuṃ uccāvacā kho purisānaṃ
adhippāyā yannūna mayaṃ ekasataekasataṃ sakiṃ vijātavaṇṇasataṃ
abhinimmineyyāmāti . atha kho taṇhā ca .pe. sakiṃ vijātavaṇṇasataṃ
abhinimminitvā yena bhagavā .pe. yathātaṃ anuttare upadhisaṅkhaye
vimutto.
[511] Atha kho taṇhā ca .pe. duvijātavaṇṇasataṃ
abhinimminitvā yena bhagavā .pe. yathātaṃ anuttare upadhisaṅkhaye
vimutto.
[512] Atha kho taṇhā ca .pe. majjhimitthīvaṇṇasataṃ
abhinimmineyyāmāti . atha kho taṇhā ca .pe. majjhimitthīvaṇṇasataṃ
abhinimminitvā yena bhagavā .pe. yathātaṃ anuttare upadhisaṅkhaye
vimutto.
[513] Atha kho taṇhā ca .pe. Mahitthīvaṇṇasataṃ abhinimmineyyāmāti.
Atha kho taṇhā ca .pe. mahitthīvaṇṇasataṃ abhinimminitvā yena bhagavā
.pe. Yathātaṃ anuttare upadhisaṅkhaye vimutto.
[514] Atha kho taṇhā ca aratī ca rāgā ca māradhītaro
ekamantaṃ apakkamma etadavocuṃ saccaṃ kira no pitā avoca
arahaṃ sugato loke na rāgena suvānayo
māradheyyaṃ atikkanto tasmā socāmahaṃ bhusanti.
Yañhi mayaṃ samaṇaṃ vā brāhmaṇaṃ vā avītarāgaṃ iminā upakkamena
upakkameyyāma hadayaṃ vāssa phaleyya uṇhaṃ vā lohitaṃ mukhato
uggaccheyya ummādaṃ vā pāpuṇeyya cittavikkhepaṃ 1- vā seyyathāpi
pana naḷo harito luto ussussati visussati milāyati evameva
ussusseyya visusseyya milāyeyyāti . atha kho taṇhā ca
aratī ca rāgā ca māradhītaro yena bhagavā tenupasaṅkamiṃsu
upasaṅkamitvā ekamantaṃ aṭṭhaṃsu.
[515] Ekamantaṃ ṭhitā kho taṇhā māradhītā bhagavantaṃ gāthāya
ajjhabhāsi
sokāvatiṇṇo nu vanasmiṃ jhāyasi
vittaṃ nu jinno uda patthayāno
āgunnu gāmasmimakāsi kiñci
kasmā janena karosi sakkhiṃ
sakkhī na sampajjati kenaci teti.
@Footnote: 1 Po. Ma. cittakkhepaṃ.
[516] Atthassa pattiṃ hadayassa santiṃ
jetvāna senaṃ piyasātarūpaṃ
ekāhaṃ jhāyaṃ sukhamānubodhyaṃ
tasmā janena na karomi sakkhiṃ
sakkhī na sampajjati kenaci meti.
[517] Atha kho aratī māradhītā bhagavantaṃ gāthāya ajjhabhāsi
kathaṃvihārībahulodha bhikkhu
pañcoghatiṇṇo atarīdha chaṭṭhaṃ
kathaṃ jhāyaṃ 1- bahulaṃ kāmasaññā
paribāhirā honti aladdhayo tanti.
[518] Passaddhakāyo suvimuttacitto
asaṅkharāno satimā anoko
aññāya dhammaṃ avitakkajhāyī
na kuppati na sarati na thino
evaṃvihārībahulodha bhikkhu
pañcoghatiṇṇo atarīdha chaṭṭhaṃ
evaṃ jhāyaṃ bahulaṃ kāmasaññā
paribāhirā honti aladdhayo tanti.
[519] Atha kho rāgā māradhītā bhagavantaṃ gāthāya ajjhabhāsi
@Footnote: 1 Ma. Yu. jhāyiṃ.
Acchejja taṇhaṃ taṇasaṅghavārī 1-
addhā carissanti 2- bahū ca saddhā
bahuṃ vatāyaṃ janataṃ anoko
acchejja 3- nessati maccurājassa pāranti.
[520] Nayanti ve mahāvīrā saddhammena tathāgatā
dhammena nayamānānaṃ kā ussuyā 4- vijānatanti.
[521] Atha kho taṇhā ca aratī ca rāgā ca māradhītaro
yena māro pāpimā tenupasaṅkamiṃsu . addasā kho māro pāpimā
taṇhañca aratiñca rāgañca māradhītaro dūratova āgacchantiyo
disvāna gāthāhi ajjhabhāsi
bālā kumudanāḷehi pabbataṃ abhimatthatha
giriṃ nakhena khanatha ayodantebhi khādatha
selaṃva sirasi ohacca pātāle gādhamesatha
khāṇuṃva urasāsajja nibbijjāpetha gotamanti.
Daddalhamānā 5- āgañchuṃ taṇhā ca aratī rāgā
tā tattha panudī satthā tulaṃ bhaṭṭhaṃva mālutoti 6-.
Tatiyo vaggo.
@Footnote: 1 Ma. gaṇasaṅghacārī. 2 Sī. tarissanti. 3 Yu. acchijja. 4 Ma. Yu. usūyā.
@5 Ma. Yu. daddallamānāti dissati. 6 Sī. Yu. māruto.
Tassuddānaṃ bhavati
sambahulā samiddhi ca godhikasattavassāni
dhītaraṃ desitaṃ buddha seṭṭhena imaṃ mārapañcakanti.
Mārasaṃyuttaṃ samattaṃ.
-------
The Pali Tipitaka in Roman Character Volume 15 page 179-187.
https://84000.org/tipitaka/pitaka_item/roman_item.php?book=15&item=496&items=26
Classified by [Item Number] :-
http://84000.org/tipitaka/pitaka_item/roman_item.php?book=15&item=496&items=26&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=15&item=496&items=26
Compare with The Royal Version of Thai Tipitaka :-
https://84000.org/tipitaka/read/byitem.php?book=15&item=496&items=26
Study Atthakatha :-
https://84000.org/tipitaka/attha/attha.php?b=15&i=496
Contents of The Tipitaka Volume 15
https://84000.org/tipitaka/read/?index_15
https://84000.org/tipitaka/english/?index_15
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
