[382] |382.659| 2 Yathāpi bhaddo 1- ājañño dhure yutto dhurassaho
@Footnote: 1 Po. bhadro.
Mathito atibhārena saṃyuttaṃ 1- nātivattati
|382.660| evaṃ paññāya ye tittā samuddo vārinā yathā
na pare atimaññanti ariyadhammova pāṇinaṃ.
|382.661| Kāle kālavasampattā bhavābhavavasaṃ gatā
narā dukkhaṃ nigacchanti te ca 2- socanti māṇavā.
|382.662| Unnatā sukhadhammena dukkhadhammena vonatā
dvayena bālā haññanti yathābhūtaṃ adassino.
|382.663| Ye ca dukkhe sukhamhi ca majjhe sibbanimaccagū 3-
ṭhitā te indakhīlova na te unnataonatā.
|382.664| Na heva lābhe nālābhe na yase na ca kittiyā
na nindāya pasaṃsāya na te dukkhe sukhamhi ca
|382.665| sabbattha te na lippanti udabinduva pokkhare
sabbattha sukhitā dhīrā 4- sabbattha aparājitā.
|382.666| Dhammena ca alābho yo yo ca lābho adhammiko
alābho dhammiko seyyo yañce lābho adhammiko.
|382.667| Yaso ca appabuddhīnaṃ viññūnaṃ ayaso ca yo
ayaso ca 5- seyyo viññūnaṃ na yaso appabuddhinaṃ.
|382.668| Dummedhehi pasaṃsā ca viññūhi garahā ca yā
garahāva seyyo viññūhi yañce bālappasaṃsanā.
@Footnote: 1 Yu. saṃyugaṃ . 2 Yu. tedha . 3 Yu. sibbanimajjhagū . 4 Yu. vīrā . 5 Ma. va.
|382.669| Sukhañca kāmamayikaṃ dukkhañca pavivekiyaṃ
pavivekiyaṃ dukkhaṃ seyyo yañce kāmamayaṃ sukhaṃ.
|382.670| Jīvitañca adhammena dhammena maraṇañca yaṃ
maraṇaṃ dhammikaṃ seyyo yañce jīve adhammikaṃ.
|382.671| Kāmakodhappahīnā 1- ye santacittā bhavābhave
caranti loke asitā natthi tesaṃ piyāpiyaṃ.
|382.672| Bhāvayitvāna bojjhaṅge indriyāni balāni ca
pappuyya 2- paramaṃ santiṃ parinibbanti anāsavāti.
Godatto thero.
Uddānaṃ
revato ceva godatto therā dvete mahiddhikā
cuddasamhi nipātamhi gāthāyo aṭṭhavīsatīti.
Cuddasakanipāto niṭṭhito.
----------------
Theragāthāya soḷasakanipāto
[383] |383.673| 1 Esa bhiyyo pasīdāmi sutvā dhammaṃ mahārasaṃ
virāgo desito dhammo anupādāya sabbaso.
|383.674| Bahūni loke citrāni asmiṃ paṭhavimaṇḍale 3-
@Footnote: 1 Ma. kāmakopappahīnā. Yu. kāmakopapahīnā . 2 Po. pappeyya . 3 Po. Yu.
@puthuvimaṇḍale.
Mathenti maññe saṅkappaṃ subhaṃ rāgūpasaṃhitaṃ.
|383.675| Rajamuhataṃ vātena yathā meghopasāmaye
evaṃ sammanti saṅkappā yadā paññāya passati.
|383.676| Sabbe saṅkhārā aniccāti yadā paññāya passati
atha nibbindati dukkhe esa maggo visuddhiyā.
|383.677| Sabbe saṅkhārā dukkhāti yadā paññāya passati
atha nibbindati dukkhe esa maggo visuddhiyā.
|383.678| Sabbe dhammā anattāti yadā paññāya passati
atha nibbindati dukkhe esa maggo visuddhiyā.
|383.679| Buddhānubuddho yo thero koṇḍañño tibbanikkamo 1-
pahīnajātimaraṇo brahmacariyassa kevalī.
|383.680| Oghapāso daḷho khīlo pabbato duppadāliyo
chetvā khīlañca pāsañca selaṃ chetvāna 2- dubbhidaṃ
tiṇṇo pāraṅgato jhāyī mutto so mārabandhanā.
|383.681| Uddhato capalo bhikkhu mitte āgamma pāpake
saṃsīdati mahoghasmiṃ ummiyā paṭikujjito.
|383.682| Anuddhato acapalo nipako saṃvutindriyo
kalyāṇamitto medhāvī dukkhassantakaro siyā.
|383.683| Kālāpabbaṅgasaṅkāso kīso dhamanisaṇṭhito 3-
@Footnote: 1 Po. Yu. tibbanikkhamo . 2 Po. Ma. bhetvāna . 3 Yu. dhamanisanthato.
Mattaññū annapānasmiṃ adīnamanaso naro
|383.684| phuṭṭho ḍaṃsehi makasehi araññasmiṃ brahāvane
nāgo saṅgāmasīseva sato tatrādhivāsaye.
|383.685| Nābhinandāmi maraṇaṃ nābhinandāmi jīvitaṃ
kālañca paṭikaṅkhāmi nibbisaṃ bhatako yathā.
|383.686| Nābhinandāmi maraṇaṃ nābhinandāmi jīvitaṃ
kālañca paṭikaṅkhāmi sampajāno patissato.
|383.687| Pariciṇṇo mayā satthā kataṃ buddhassa sāsanaṃ
ohito garuko bhāro bhavanetti samūhatā.
|383.688| Yassa catthāya pabbajito agārasmā anagāriyaṃ
so me attho anuppatto kiṃ me saddhivihārināti 1-.
Aññākoṇḍañño thero.
[384] |384.689| 2 Manussabhūtaṃ sambuddhaṃ attadantaṃ samāhitaṃ
iriyamānaṃ brahmapathe cittassūpasame rataṃ
|384.690| yaṃ manussā namassanti sabbadhammāna pāraguṃ
devāpi naṃ namassanti iti me arahato sutaṃ
|384.691| sabbasaṃyojanātītaṃ vanā nibbānamāgataṃ
kāmehi nekkhammarataṃ muttaṃ selāva kañcanaṃ
|384.692| sa ve accaruci 2- nāgo himavāvaññe siluccaye
@Footnote: 1 Yu. sandavihārenāti . 2 Yu. accantarucī.
Sabbesaṃ nāganāmānaṃ saccanāmo anuttaro
|384.693| nāgaṃ vo kittayissāmi na hi āguṃ karoti so.
Soraccaṃ avihiṃsā ca pādā nāgassa te duve.
|384.694| Sati ca sampajaññañca caraṇā nāgassa te 1- pare.
Saddhāhattho mahānāgo upekkhāsetadantavā.
|384.695| Sati gīvā siro paññā vīmaṃsā dhammacintanā
dhammakucchisamāvāso 2- viveko tassa vāladhi.
|384.696| So jhāyī assāsarato ajjhattaṃ susamāhito
gacchaṃ samāhito nāgo ṭhito nāgo samāhito
|384.697| sayaṃ samāhito nāgo nisinnopi samāhito
sabbattha saṃvuto nāgo esā nāgassa sampadā.
|384.698| Bhuñjati anavajjāni sāvajjāni na bhuñjati
ghāsaṃ acchādanaṃ laddhā sannidhiṃ parivajjayaṃ
|384.699| saṃyojanaṃ aṇuṃ thūlaṃ sabbaṃ chetvāna bandhanaṃ
yena yeneva gacchati anapekkhova gacchati.
|384.700| Yathāpi udake jātaṃ puṇḍarīkaṃ pavaḍḍhati
nopalippati toyena sucigandhaṃ manoramaṃ
|384.701| tatheva ca loke jāto buddho loke viharati
nopalippati lokena toyena padumaṃ yathā.
|384.702| Mahāggini 3- pajjalito anāhāropasammati
@Footnote: 1 tyāparetipi . 2 dhammakucchisamātapotipi . 3 Yu. mahāgini.
Aṅgāresu ca santesu nibbutoti pavuccati.
|384.703| Atthassāyaṃ viññāpanī upamā viññūhi desitā
viññissanti mahānāgā nāgaṃ nāgena desitaṃ.
|384.704| Vītarāgo vītadoso vītamoho anāsavo
sarīraṃ vijahaṃ nāgo parinibbissatyanāsavoti.
Udāyī thero.
Tatruddānaṃ bhavati
koṇḍañño ca udāyī ca therā dve te mahiddhikā
soḷasamhi nipātamhi gāthāyo dve ca tiṃsa cāti.
Soḷasakanipāto niṭṭhito.
--------------
Theragāthāya vīsatinipāto
[385] |385.705| 1 Yaññatthaṃ vā dhanatthaṃ vā ye hanāma mayaṃ pure
avasesaṃ bhayaṃ hoti vedhanti vilapanti ca.
|385.706| Tassa te natthi bhītattaṃ bhiyyo vaṇṇo pasīdati
kasmā na paridevesi evarūpe mahabbhaye.
|385.707| Natthi cetasikaṃ dukkhaṃ anapekkhassa gāmaṇi
atikkantā bhayā sabbe khīṇasaṃyojanassa ve.
|385.708| Khīṇāya bhavanettiyā diṭṭhe dhamme yathātathā 1-
@Footnote: 1 Po. Ma. Yu. yathātathe.
Na bhayaṃ maraṇe hoti bhāranikkhepane yathā.
|385.709| Suciṇṇaṃ brahmacariyaṃ me maggo cāpi subhāvito
maraṇe me bhayaṃ natthi rogānamiva saṅkhaye.
|385.710| Suciṇṇaṃ brahmacariyaṃ me maggo cāpi subhāvito
nirassādā bhavā diṭṭhā visaṃ pitvāna chaḍḍitaṃ.
|385.711| Pāragū anupādāno katakicco anāsavo
tuṭṭho āyukkhayā hoti mutto āghātanā yathā.
|385.712| Uttamaṃ dhammataṃ patto sabbaloke anatthiko
ādittāva gharā mutto maraṇasmiṃ na socati.
|385.713| Yadatthi saṅkhataṃ kiñci bhavo ca yattha labbhati
sabbaṃ anissaraṃ etaṃ idaṃ 1- vuttaṃ mahesinā.
|385.714| Yo taṃ tathā pajānāti yathā buddhena desitaṃ
na gaṇhāti bhavaṃ kiñci sutattaṃva ayoguḷaṃ.
|385.715| Na me hoti ahosinti bhavissanti na hoti me
saṅkhārā vibhavissanti tattha kā paridevanā.
|385.716| Suddhaṃ dhammasamuppādaṃ suddhaṃ saṅkhārasantatiṃ
passantassa yathābhūtaṃ na bhayaṃ hoti gāmaṇi.
|385.717| Tiṇakaṭṭhasamaṃ lokaṃ yadā paññāya passati
mamattaṃ so asaṃvindaṃ natthi meti na socati.
|385.718| Ukkaṇṭhāmi sarīrena bhavenamhi anatthiko
@Footnote: 1 Po. Ma. Yu. iti.
Soyaṃ bhijjissati kāyo añño ca na bhavissati.
|385.719| Yaṃ vo kiccaṃ sarīrena taṃ karotha yadicchatha
na me tappaccayā tattha doso pemaṃ ca hehiti.
|385.720| Tassa taṃ vacanaṃ sutvā abbhūtaṃ lomahaṃsanaṃ
satthāni nikkhipitvāna māṇavā etadabravuṃ.
|385.721| Kiṃ bhadante karitvāna ko vā ācariyo tava
kassa sāsanamāgamma labbhate taṃ asokatā.
|385.722| Sabbaññū sabbadassāvī jino ācariyo mama
mahākāruṇiko satthā sabbalokatikicchako.
|385.723| Tenāyaṃ desito dhammo khayagāmī anuttaro
tassa sāsanamāgamma labbhate taṃ asokatā.
|385.724| Sutvāna corā isino subhāsitaṃ
nikkhippa satthāni ca āvudhāni ca
tamhā ca kammā viramiṃsu eke
eke ca pabbajjamarocayiṃsu.
|385.725| Te pabbajitvā sugatassa sāsane
bhāvetvā bojjhaṅgabalāni paṇḍitā
udaggacittā sumanā katindriyā
phusiṃsu nibbānapadaṃ asaṅkhatanti.
Adhimutto thero.
[386] |386.726| 2 Samaṇassa ahū cintā pārāsariyassa 1- bhikkhuno
ekakassa nisinnassa pavivittassa jhāyino
|386.727| kimānupubbaṃ puriso kiṃ vattaṃ kiṃ samācāraṃ 2-
attano kiccakārissa na ca kiñci viheṭhaye.
|386.728| Indriyāni manussānaṃ hitāya ahitāya ca
arakkhitāni ahitāya rakkhitāni hitāya ca.
|386.729| Indriyāneva sārakkhaṃ indriyāni ca gopayaṃ
attano kiccakārissa na ca kiñci viheṭhaye.
|386.730| Cakkhundriyañca rūpesu gacchantaṃ anivārayaṃ
anādīnavadassāvī so dukkhā na hi muccati.
|386.731| Sotindriyañca 3- saddesu gacchantaṃ anivārayaṃ
anādīnavadassāvī so dukkhā na hi muccati.
|386.732| Anissaraṇadassāvī gandhe ce paṭisevati
na so muccati dukkhamhā gandhesu adhimucchito.
|386.733| Ambilamadhuraggañca tittakaggamanussaraṃ
rasataṇhāya gadhito hadayaṃ nāvabujjhati.
|386.734| Subhānayappaṭikūlāni phoṭṭhabbāni anussaraṃ
ratto rāgādhikaraṇaṃ vividhaṃ vindate dukkhaṃ 4-.
|386.735| Manañcetehi dhammehi yo na sakkoti rakkhituṃ
@Footnote: 1 Yu. pārāpariyassa . 2 Po. Yu. samācaraṃ . 3 Po. Ma. ce . 4 Ma. Yu. dukhaṃ.
Tato naṃ dukkhamanveti sabbasotehi pañcahi.
|386.736| Pubbalohitasampuṇṇaṃ bahussa kuṇapassa ca
naravīrakataṃ vagguṃ samuggamiva cittitaṃ.
|386.737| Kaṭukaṃ madhurassādaṃ piyanibandhanaṃ dukkhaṃ 1-
khuraṃva madhunālittaṃ ullittaṃ nāvabujjhati.
|386.738| Itthirūpe itthirase phoṭṭhabbepica itthiyā
itthigandhesu sāratto vividhaṃ vindate dukkhaṃ 1-.
|386.739| Itthisotāni sabbāni sandanti pañcapañcasu
tesamāvaraṇaṃ kātuṃ yo sakkoti viriyavā.
|386.740| So atthavā so dhammaṭṭho so dakkho so vicakkhaṇo
kareyya ramamāno hi kiccaṃ dhammatthasaṃhitaṃ.
|386.741| Atho sīdati saññuttaṃ vajje kiccaṃ niratthakaṃ
na taṃ kiccanti maññitvā appamatto vicakkhaṇo.
|386.742| Yañca atthena saññuttaṃ yā ca dhammagatā rati
taṃ samādāya vattetha sā hi ve uttamā rati.
|386.743| Uccāvacehupāyehi paresamabhijigīsāti
hantvā vadhitvā atha socayitvā
ālopati sāhasā yo paresaṃ.
|386.744| Tacchanto āṇiyā āṇiṃ nihanti balavā yathā
@Footnote: 1 Ma. Yu. dukhaṃ.
Indriyānindriyeheva nihanti kusalā tathā.
|386.745| Saddhaṃ viriyaṃ samādhiñca satipaññañca bhāvayaṃ
pañca pañcahi hantvāna anīgho yāti brāhmaṇo.
|386.746| So atthavā so dhammaṭṭho katvā vākyānusāsaniṃ
sabbena sabbaṃ buddhassa so naro sukhamedhatīti.
Pārāsariyo 1- thero.
[387] |387.747| 3 Cirarattaṃ vatātāpī dhammaṃ anuvicintayaṃ
samaṃ cittassa nālatthaṃ pucchaṃ samaṇabrāhmaṇe.
|387.748| Ko so pāragato 2- loke ko patto amatogadhaṃ
kassa dhammaṃ paṭicchāmi paramatthavijānanaṃ.
|387.749| Antovaṅkagato āsiṃ macchova ghasamāmisaṃ
baddho mahindapāsena vepacityāsuro yathā.
|387.750| Añchāmi naṃ na muñcāmi asmā sokapariddavā
ko me bandhaṃ muñcaṃ loke sambodhiṃ vedayissati.
|387.751| Samaṇaṃ brāhmaṇaṃ vā kaṃ ādisantaṃ pabhaṅguṇaṃ
kassa dhammaṃ paṭicchāmi jarāmaccupavāhanaṃ.
|387.752| Vicikicchākaṅkhāgadhitaṃ 3- sārambhabalasaññutaṃ
kodhappattamanatthaddhaṃ abhijappapadāraṇaṃ.
|387.753| Taṇhādhanusamuṭṭhānaṃ dve ca pannarasāyutaṃ
@Footnote: 1 Yu. pārāpariyo . 2 Ma. Yu. pāraṅgato . 3 Ma. vicikicchākaṅkhāganthitaṃ.
@Yu. ...gathitaṃ.
Passa orasikaṃ bālaṃ bhetvāna yadi tiṭṭhati.
|387.754| Anudiṭṭhīnaṃ appahānaṃ saṅkappasaratejitaṃ
tena viddho pavedhāmi pattaṃva māluteritaṃ.
|387.755| Ajjhattaṃ me samuṭṭhāya khippaṃ pacceti 1- pāpakaṃ
chaphassāyatanī kāyo yattha sarati sabbadā.
|387.756| Taṃ na passāmi tekicchaṃ yo me taṃ sallamuddhare
nānārajjena satthena nāññena vicikicchitaṃ.
|387.757| Ko me asattho avaṇo sallamabbhantarāpassayaṃ
ahiṃsaṃ sabbagattāni lallaṃ me uddharissati.
|387.758| Dhammappati hi so seṭṭho visadosapavāhako
gambhīre patitassa me thalaṃ pāṇiva dassaye.
|387.759| Rahadehamasmi ogāḷho ahāriyarajamantike
māyāussuyyasārambha thīnamiddhamapatthaṭe.
|387.760| Uddhaccameghathanitaṃ saṃyojanavalāhakaṃ
vāhā vahanti kuddiṭṭhiṃ saṅkappā rāganissitā.
|387.761| Savanti sabbadhī sotā latā ubbhijja tiṭṭhati
te sote ko nivāreyya taṃ lataṃ ko hi checchati.
|387.762| Velaṃ karotha bhadante sotānaṃ sannivāraṇaṃ
mā te manomayo soto rukkhaṃva sahasā luve.
@Footnote: 1 Ma. Yu. paccati māmakaṃ.
|387.763| Evaṃ me bhayajātassa apārā pāramesato
tāṇo paññāvudho satthā isisaṅghanisevito.
|387.764| Sopāṇaṃ sukataṃ suddhaṃ dhammasāramayaṃ daḷhaṃ
pādāsi vuyhamānassa mā bhāyīti ca mabravī.
|387.765| Satipaṭṭhānapāsādaṃ āruyha paccavekkhisaṃ
yantaṃ pubbe amaññissaṃ sakkāyābhirataṃ pajaṃ.
|387.766| Yadā ca maggamaddakkhiṃ nāvāya abhirūhanaṃ
anadhiṭṭhāya attānaṃ titthamaddakkhimuttamaṃ.
|387.767| Sallaṃ attasamuṭṭhānaṃ bhavanettipabhāvitaṃ
etesaṃ appavattāya desesi maggamuttamaṃ.
|387.768| Dīgharattānusayitaṃ cirarattapatiṭṭhitaṃ
buddho me pānudī gandhaṃ visadosapavāhanoti.
Telukāni 1- thero.
[388] |388.769| 4 Passa cittakataṃ bimbaṃ arukāyaṃ samussitaṃ
āturaṃ bahusaṅkappaṃ yassa natthi dhuvaṃ ṭhiti.
|388.770| Passa cittakataṃ rūpaṃ maṇinā kuṇḍalena ca
aṭṭhitacena 2- onaddhaṃ saha vatthehi sobhati.
|388.771| Alattakakatā pādā mukhaṃ cuṇṇakamakkhitaṃ
alaṃ bālassa mohāya no ca pāragavesino.
@Footnote: 1 Yu. telakāni . 2 Ma. aṭṭhiṃ tacena.
|388.772| Aṭṭhapadakatā kesā nettā añjanamakkhitā
alaṃ bālassa mohāya no ca pāragavesino.
|388.773| Añjanīva navā cittā pūtikāyo alaṅkato
alaṃ bālassa mohāya no ca pāragavesino.
|388.774| Odahi migavo pāsaṃ nāsādā vākuraṃ migo
bhutvā nivāpaṃ gacchāma kandante migabandhake.
|388.775| Chinnā pāsā migavassa nāsādā vākuraṃ migo
bhutvā nivāpaṃ gacchāma socante migaluddake.
|388.776| Passāmi loke sadhane manusse
laddhāna vittaṃ na dadanti mohā.
Laddhā dhanaṃ sannicayaṃ karonti
bhiyyo ca kāme abhipatthayanti.
|388.777| Rājā pasayhappaṭhaviṃ vijetvā
sasāgarantaṃ mahimāvasanto
oraṃ samuddassa atittarūpo
pāraṃ samuddassapi patthayetha.
|388.778| Rājā ca aññe ca bahū manussā
avītataṇhā maraṇaṃ upenti
ūnāva hutvāna jahanti dehaṃ
kāmehi lokamhi na hatthi titti.
|388.779| Kandantī naṃ ñātī pakiriya kese
aho vatā no amarāti cāhu
vatthena naṃ pārutaṃ nīharitvā
citaṃ samodhāya tato dahanti.
|388.780| So ḍayhati sūlehi tujjamāno
ekena vatthena pahāya bhoge
na miyyamānassa bhavanti tāṇā
ñātī ca mittā atha vā sahāyā.
|388.781| Dāyādakā tassa dhanaṃ haranti
satto pana gacchati yena kammaṃ
na miyyamānaṃ dhanamanveti kiñci
puttā ca dārā ca dhanañca raṭṭhaṃ.
|388.782| Na dīghamāyuṃ labhate dhanena
na cāpi vittena jaraṃ vihanti
appañhi naṃ jīvitamāhu dhīrā
asassataṃ vippariṇāmadhammaṃ.
|388.783| Addhā 1- daliddā ca phusanti phassaṃ
bālo ca dhīro ca tatheva phuṭṭho
bālo hi bālyā vadhitova seti
@Footnote: 1 aḍḍhātipi.
Dhīro ca na vedhati phassaphuṭṭho.
|388.784| Tasmā hi paññāva dhanena seyyo
yāya vosānamidhādhigacchati
abyositattā hi bhavābhavesu
pāpāni kammāni karonti mohā.
|388.785| Upeti gabbhañca parañca lokaṃ
saṃsāramāpajja paramparāya
tassappapañño abhisaddahanto
upeti gabbhañca parañca lokaṃ.
|388.786| Coro yathā sandhimukhe gahīto
sakammunā haññati pāpadhammo
evaṃ pajā pecca paramhi loke
sakammunā haññati pāpadhammo.
|388.787| Kāmā hi citrā madhurā manoramā
virūparūpena mathenti cittaṃ
ādīnavaṃ kāmaguṇesu disvā
tasmā ahaṃ pabbajitomhi rāja.
|388.788| Dumapphalānīva patanti māṇavā
daharā ca vuḍḍhā ca sarīrabhedā
Etampi disvā pabbajitomhi rāja
apaṇṇakaṃ sāmaññameva seyyo.
|388.789| Saddhāyāhaṃ pabbajito upeto jinasāsane
avajjā mayhaṃ pabbajjā anaṇo bhuñjāmi bhojanaṃ.
|388.790| Kāme ādittato disvā jātarūpāni satthato
gabbhe vokkantito dukkhaṃ nirayesu mahabbhayaṃ.
|388.791| Etamādīnavaṃ disvā saṃvegaṃ alabhiṃ tadā
sohaṃ viddho tadā santo sampatto āsavakkhayaṃ.
|388.792| Pariciṇṇo mayā satthā kataṃ buddhassa sāsanaṃ
ohito garuko bhāro bhavanetti samūhatā.
|388.793| Yassa catthāya pabbajito agārasmā anagāriyaṃ
so me attho anuppatto sabbasaṃyojanakkhayoti.
Raṭṭhapālo thero.
[389] |389.794| 5 Rūpaṃ disvā sati muṭṭhā piyanimittaṃ manasikaroto
sārattacitto vedeti tañca ajjhosa tiṭṭhati.
|389.795| Tassa vaḍḍhanti vedanā anekā rūpasambhavā
abhijjhā ca vihesā ca cittamassūpahaññati
evamācinato dukkhaṃ ārā nibbāna vuccati.
|389.796| Saddaṃ sutvā sati muṭṭhā piyanimittaṃ manasikaroto
sārattacitto vedeti tañca ajjhosa tiṭṭhati.
|389.797| Tassa vaḍḍhanti vedanā anekā saddasambhavā
abhijjhā ca vihesā ca cittamassūpahaññati
evamācinato dukkhaṃ ārā nibbāna vuccati.
|389.798| Gandhaṃ ghatvā sati muṭṭhā piyanimittaṃ manasikaroto
sārattacitto vedeti tañca ajjhosa tiṭṭhati.
|389.799| Tassa vaḍḍhanti vedanā anekā gandhasambhavā
abhijjhā ca vihesā ca cittamassūpahaññati
evamācinato dukkhaṃ ārā nibbāna vuccati.
|389.800| Rasaṃ bhotvā sati muṭṭhā piyanimittaṃ manasikaroto
sārattacitto vedeti tañca ajjhosa tiṭṭhati.
|389.801| Tassa vaḍḍhanti vedanā anekā rasasambhavā
abhijjhā ca vihesā ca cittamassūpahaññati
evamācinato dukkhaṃ ārā nibbāna vuccati.
|389.802| Phassaṃ phussa sati muṭṭhā piyanimittaṃ manasikaroto
sārattacitto vedeti tañca ajjhosa tiṭṭhati.
|389.803| Tassa vaḍḍhanti vedanā anekā phassasambhavā
abhijjhā ca vihesā ca cittamassūpahaññati
evamācinato dukkhaṃ ārā nibbāna vuccati.
|389.804| Dhammaṃ ñatvā sati muṭṭhā piyanimittaṃ manasikaroto
sārattacitto vedeti tañca ajjhosa tiṭṭhati.
|389.805| Tassa vaḍḍhanti vedanā anekā dhammasambhavā
abhijjhā ca vihesā ca cittamassūpahaññati
evamācinato dukkhaṃ ārā nibbāna vuccati.
|389.806| Na so rajjati rūpesu rūpaṃ disvā patissato
virattacitto vedeti tañca nājjhosa 1- tiṭṭhati.
|389.807| Yathāssa passato rūpaṃ sevato vāpi vedanaṃ
khiyyati nopaciyyati evaṃ so caratī sato
evaṃ apacinato dukkhaṃ santike nibbāna vuccati.
|389.808| Na so rajjati saddesu saddaṃ sutvā patissato
virattacitto vedeti tañca nājjhosa tiṭṭhati.
|389.809| Yathāssa suṇato saddaṃ sevato vāpi vedanaṃ
khiyyati nopaciyyati evaṃ so caratī sato
evaṃ apacinato dukkhaṃ santike nibbāna vuccati.
|389.810| Na so rajjati gandhesu gandhaṃ ghatvā patissato
virattacitto vedeti tañca nājjhosa tiṭṭhati.
|389.811| Yathāssa ghāyato gandhaṃ sevato vāpi vedanaṃ
khiyyati nopaciyyati evaṃ so caratī sato
evaṃ apacinato dukkhaṃ santike nibbāna vuccati.
@Footnote: 1 Yu. najjhosa .pe..
|389.812| Na so rajjati rasesu rasaṃ bhotvā patissato
virattacitto vedeti tañca nājjhosa tiṭṭhati.
|389.813| Yathāssa sāyato rasaṃ sevato vāpi vedanaṃ
khiyyati nopaciyyati evaṃ so caratī sato
evaṃ apacinato dukkhaṃ santike nibbāna vuccati.
|389.814| Na so rajjati phassesu phassaṃ phussa patissato
virattacitto vedeti tañca nājjhosa tiṭṭhati.
|389.815| Yathāssa phusato phassaṃ sevato vāpi vedanaṃ
khiyyati nopaciyyati evaṃ so caratī sato
evaṃ apacinato dukkhaṃ santike nibbāna vuccati.
|389.816| Na so rajjati dhammesu dhammaṃ ñatvā patissato
virattacitto vedeti tañca nājjhosa tiṭṭhati.
|389.817| Yathāssa vijānato dhammaṃ sevato vāpi vedanaṃ
khiyyati nopaciyyati evaṃ so caratī sato
evaṃ apacinato dukkhaṃ santike nibbāna vuccati.
Māluṅkayaputto thero.
[390] |390.818| 6 Paripuṇṇakāyo suruci sujāto cārudassano
suvaṇṇavaṇṇosi bhagavā susukkadāṭhosi viriyavā.
|390.819| Narassa hi sujātassa ye bhavanti viyañjanā
Sabbe te tava kāyasmiṃ mahāpurisalakkhaṇā.
|390.820| Pasannanetto sumukho brahā uju patāpavā
majjhe samaṇasaṅghassa ādiccova virocasi.
|390.821| Kalyāṇadassano bhikkhu kañcanasannibhattaco
kiṃ te samaṇabhāvena evaṃ uttamavaṇṇino.
|390.822| Rājā arahasi bhavituṃ cakkavatti rathesabho
cāturanto vijitāvī jambusaṇḍassa issaro.
|390.823| Khattiyā bhojarājāno anuyantā bhavanti te
rājābhirājā manujindo rajjaṃ kārehi gotama.
|390.824| Rājāhamasmi selāti (bhagavā) dhammarājā anuttaro
dhammena cakkaṃ vattemi cakkaṃ appaṭivattiyaṃ.
|390.825| Sambuddho paṭijānāsi (iti selo brāhmaṇo) dhammarājā anuttaro
dhammena cakkaṃ vattemi iti bhāsasi gotama.
|390.826| Ko nu senāpati bhoto sāvako satthuranvayo
ko imaṃ anuvatteti dhammacakkaṃ pavattitaṃ.
|390.827| Mayā pavattitaṃ cakkaṃ (selāti bhagavā) dhammacakkamanuttaraṃ
sārīputtonuvatteti anujāto tathāgataṃ.
|390.828| Abhiññeyyaṃ abhiññātaṃ bhāvetabbañca bhāvitaṃ
pahātabbaṃ pahīnaṃ me tasmā buddhosmi brāhmaṇa.
|390.829| Vinayassu mayi kaṅkhaṃ adhimuccassu brāhmaṇa
dullabhaṃ dassanaṃ hoti sambuddhānaṃ abhiṇhaso.
|390.830| Yesaṃ ve dullabho loke pātubhāvo abhiṇhaso
sohaṃ brāhmaṇa buddhosmi sallakatto anuttaro.
|390.831| Brahmabhūto atitulo mārasenappamaddano
sabbāmitte vasīkatvā modāmi akutobhayo.
|390.832| Idaṃ bhonto nisāmetha yathā bhāsati cakkhumā
sallakatto mahāvīro sīhova nadatī vane.
|390.833| Brahmabhūtaṃ atitulaṃ mārasenappamaddanaṃ
ko disvā nappasīdeyya api kaṇhābhijātiko.
|390.834| Yo maṃ icchati anvetu yo vā nicchati gacchatu
idhāhaṃ pabbajissāmi varapaññassa santike.
|390.835| Etañce ruccatī bhoto sammāsambuddhasāsanaṃ
mayampi pabbajissāma varapaññassa santike.
|390.836| Brāhmaṇā tisatā ime yācanti pañjalīkatā
brahmacariyaṃ carissāma bhagavā tava santike.
|390.837| Svākkhātaṃ brahmacariyaṃ (selāti bhagavā) sandiṭṭhikamakālikaṃ
yattha amoghā pabbajjā appamattassa sikkhato.
|390.838| Yantaṃ saraṇamāgamma ito aṭṭhami 1- cakkhuma
sattarattena bhagavā dantamha tava sāsane.
@Footnote: 1 Ma. aṭṭhame.
|390.839| Tuvaṃ buddho tuvaṃ satthā tuvaṃ mārābhibhū muni
tuvaṃ anusaye chetvā tiṇṇo tāresimaṃ pajaṃ.
|390.840| Upadhī te samatikkantā āsavā te padālitā
sīhova anupādāno pahīnabhayabheravo.
|390.841| Bhikkhavo tisatā ime tiṭṭhantī pañjalīkatā
pāde vīra pasārehi nāgā vandantu satthunoti.
Selo thero.
[391] |391.842| 7 Yā taṃ me hatthigīvāya sukhumā vatthā padhāritā
sālīnaṃ odano bhutto sucimaṃsūpasecano.
|391.843| Sojja bhaddo sātatiko uñchāpattāgate rato
jhāyati anupādāno putto godhāya bhaddiyo.
|391.844| Paṃsukūlī sātatiko uñchāpattāgate rato
jhāyati anupādāno putto godhāya bhaddiyo.
|391.845| Piṇḍapātī sātatiko .................
|391.846| Tecīvarī sātatiko .................
|391.847| Sapadānacārī sātatiko .................
|391.848| Ekāsanī sātatiko .................
|391.849| Pattapiṇḍī sātatiko .................
|391.850| Khalupacchābhattī sātatiko .................
|391.851| Āraññiko sātatiko .................
|391.852| Rukkhamūliko sātatiko .................
|391.853| Abbhokāsī sātatiko .................
|391.854| Sosāniko sātatiko .................
|391.855| Yathāsanthatiko sātatiko .................
|391.856| Nesajjiko sātatiko .................
|391.857| Appiccho sātatiko .................
|391.858| Santuṭṭho sātatiko .................
|391.859| Pavivitto sātatiko .................
|391.860| Asaṃsaṭṭho sātatiko .................
|391.861| Āraddhaviriyo sātatiko uñchāpattāgate rato
jhāyati anupādāno putto godhāya bhaddiyo.
|391.862| Hitvā satapalaṃ kaṃsaṃ sovaṇṇaṃ satarājikaṃ
aggahiṃ mattikāpattaṃ idaṃ dutiyābhisecanaṃ.
|391.863| Ucce maṇḍalipākāre daḷhamaṭṭālakoṭṭhake
rakkhito khaggahatthehi uttasaṃ vihariṃ pure.
|391.864| Sojja bhaddo anutrāsī pahīnabhayabheravo
jhāyati vanamogayha putto godhāya bhaddiyo.
|391.865| Sīlakkhandhe patiṭṭhāya satiṃ paññañca bhāvayaṃ
pāpuṇiṃ anupubbena sabbasaṃyojanakkhayanti.
Bhaddiyo kāligodhāya putto thero.
[392] |392.866| 8 Gacchaṃ vadesi samaṇa ṭhitomhi
mamañca brūsi ṭhitamaṭṭhitoti
pucchāmi taṃ samaṇa etamatthaṃ
kasmā ṭhito tvaṃ ahamaṭṭhitomhi.
|392.867| Ṭhito ahaṃ aṅgulimāla sabbadā
sabbesu bhūtesu nidhāya daṇḍaṃ
tuvañca pāṇesu asaññatosi
tasmā ṭhitohaṃ tuvamaṭṭhitosi.
|392.868| Cirassaṃ vata me mahito mahesi
mahāvanaṃ samaṇo paccupādi
sohaṃ cajissāmi sahassapāpaṃ
sutvāna gāthaṃ tava dhammayuttaṃ.
|392.869| Icceva coro asimāvudhañca
sobbhe papāte narake anvakāsi
avandi coro sugatassa pāde
tattheva pabbajjamayāci buddhaṃ.
|392.870| Buddho ca kho kāruṇiko mahesi
yo satthā lokassa sadevakassa
tamehi bhikkhūti tadā avoca
eseva tassa ahu bhikkhubhāvo.
|392.871| Yo ca pubbe pamajjitvā 1- pacchā so nappamajjati
somaṃ lokaṃ pabhāseti abbhā muttova candimā.
|392.872| Yassa pāpaṃ kataṃ kammaṃ kusalena pithīyati
somaṃ lokaṃ pabhāseti abbhā muttova candimā.
|392.873| Yo have daharo bhikkhu yuñjatī buddhasāsane
somaṃ lokaṃ pabhāseti abbhā muttova candimā.
|392.874| Disā hi me dhammakathaṃ suṇantu
disā hi me yuñjantu buddhasāsane ca 2-
disā hi me te manusse bhajantu
ye dhammamevādapayanti santo.
|392.875| Disā hi me khantivādānaṃ avirodhappasaṃsinaṃ
suṇantu dhammaṃ kālena tañca anuvidhīyantu.
|392.876| Na hi jātu so mamaṃ hiṃse aññaṃ vā pana kañcinaṃ 3-
pappuyya paramaṃ santiṃ rakkheyya tasathāvare.
|392.877| Udakaṃ hi nayanti nettikā
usukārā namayanti tejanaṃ
dāruṃ namayanti tacchakā
attānaṃ damayanti paṇḍitā.
|392.878| Daṇḍeneke damayanti aṅkusehi kasāhi ca
adaṇḍena asatthena ahaṃ dantomhi tādinā.
@Footnote: 1 Yu. yo pubbe pamajjitvāna . 2 Ma. Yu. casaddo natthi . 3 po Ma. kiñcanaṃ.
|392.879| Ahiṃsakoti me nāmaṃ hiṃsakassa pure sato
ajjāhaṃ saccanāmomhi na naṃ hiṃsāmi kañcinaṃ.
|392.880| Coro ahaṃ pure āsiṃ aṅgulimāloti vissuto
vuyhamāno mahoghena buddhaṃ saraṇamāgamaṃ.
|392.881| Lohitapāṇī pure āsiṃ aṅgulimāloti vissuto
saraṇāgamanaṃ passa bhavanetti samūhatā.
|392.882| Tādisaṃ kammaṃ katvāna bahuṃ duggatigāminaṃ
phuṭṭho kammavipākena anaṇo bhuñjāmi bhojanaṃ.
|392.883| Pamādamanuyuñjanti bālā dummedhino janā
appamādañca medhāvī dhanaṃ seṭṭhaṃva rakkhati.
|392.884| Mā pamādamanuyuñjetha mā kāmaratisanthavaṃ
appamatto hi jhāyanto pappoti paramaṃ sukhaṃ.
|392.885| Svāgataṃ nāpagataṃ netaṃ dummantitaṃ mama
saṃvibhattesu dhammesu yaṃ seṭṭhaṃ tadupāgamaṃ.
|392.886| Svāgataṃ nāpagataṃ netaṃ dummantitaṃ mama
tisso vijjā anuppattā kataṃ buddhassa sāsanaṃ.
|392.887| Araññe rukkhamūle vā pabbatesu guhāsu vā
tattha tattheva aṭṭhāsiṃ ubbiggamanaso tadā.
|392.888| Sukhaṃ sayāmi ṭhāyāmi sukhaṃ kappemi jīvitaṃ
ahatthapāso mārassa aho satthānukampito.
|392.889| Brahmajacco pure āsiṃ udicco ubhato ahuṃ 1-
sojja putto sugatassa dhammarājassa satthuno.
|392.890| Vītataṇho anādāno guttadvāro susaṃvuto
aghamūlaṃ vadhitvāna 2- patto me āsavakkhayo.
|392.891| Pariciṇṇo mayā satthā kataṃ buddhassa sāsanaṃ
ohito garuko bhāro bhavanetti samūhatāti.
Aṅgulimālo thero.
[393] |393.892| 9 Pahāya mātāpitaro bhaginīñātibhātaro
pañca kāmaguṇe hitvā anuruddhova jhāyati.
|393.893| Sameto naccagītehi sammatāḷappabodhano
na tena suddhimajjhagamā mārassa visaye rato.
|393.894| Etañca samatikkamma rato buddhassa sāsane
sabboghaṃ samatikkamma anuruddhova jhāyati.
|393.895| Rūpā saddā rasā gandhā phoṭṭhabbā ca manoramā
ete ca samatikkamma anuruddhova jhāyati.
|393.896| Piṇḍapātapaṭikkanto eko adutiyo muni
esati paṃsukūlāni anuruddho anāsavo.
|393.897| Vicini 3- aggahī dhovi rajayī dhārayī muni
paṃsukūlāni matimā anuruddho anāsavo.
@Footnote: 1 Ma. ahu . 2 Yu. vamitvāna . 3 Ma. vicinī.
|393.898| Mahiccho ca asantuṭṭho saṃsaṭṭho yo ca uddhato
tassa dhammā ime honti pāpakā saṅkilesikā.
|393.899| Sato ca hoti appiccho santuṭṭho avighātavā
pavivekarato vitto niccamāraddhavīriyo.
|393.900| Tassa dhammā ime honti kusalā bodhipakkhikā
anāsavo ca so hoti iti vuttaṃ mahesinā.
|393.901| Mama saṅkappamaññāya satthā loke anuttaro
manomayena kāyena iddhiyā upasaṅkami.
|393.902| Yadā me ahu saṅkappo tato uttariṃ 1- desayi
nippapañcarato buddho nippapañcamadesayi.
|393.903| Tassāhaṃ dhammamaññāya vihāsiṃ sāsane rato
tisso vijjā anuppattā kataṃ buddhassa sāsanaṃ.
|393.904| Pañcapaññāsa vassāni yato nesajjiko ahaṃ
pañcavīsati vassāni yato middhaṃ samūhataṃ.
|393.905| Nāhu assāsapassāso ṭhitacittassa tādino
anejo santimārabbha cakkhumā parinibbuto.
|393.906| Asallīnena cittena vedanaṃ ajjhavāsayi
pajjotasseva nibbānaṃ vimokkho cetaso ahu.
|393.907| Ete pacchimakā dāni munino phassapañcamā
@Footnote: 1 Ma. Yu. uttari.
Nāññe dhammā bhavissanti sambuddhe parinibbute.
|393.908| Natthi dāni punāvāso devakāyasmiṃ 1- jālini
vikkhīṇo jātisaṃsāro natthi dāni punabbhavo.
|393.909| Yassa muhuttena sahassadhā
loko saṃvidito sabrahmakappo
vasī iddhiguṇe cutūpapāte
kāle passati devatā sa bhikkhu.
|393.910| Annabhāro pure āsiṃ daliddo ghāsahārako
samaṇaṃ paṭipādesiṃ upariṭṭhaṃ yasassinaṃ.
|393.911| Somhi sakyakule jāto anuruddhoti maṃ vidū
upeto naccagītehi sammatāḷappabodhano.
|393.912| Athaddasāsiṃ sambuddhaṃ satthāraṃ akutobhayaṃ
tasmiṃ cittaṃ pasādetvā pabbajiṃ anagāriyaṃ.
|393.913| Pubbenivāsaṃ jānāmi yattha me vusitaṃ pure
tāvatiṃsesu devesu aṭṭhāsiṃ sakkajātiyā.
|393.914| Sattakkhattuṃ manussindo ahaṃ rajjamakārayiṃ
cāturanto vijitāvī jambusaṇḍassa issaro
adaṇḍena asatthena dhammena anusāsayiṃ.
|393.915| Ito satta ito satta saṃsārāni catuddasa
nivāsamabhijānissaṃ devaloke ṭhito tadā.
@Footnote: 1 Ma. Yu. devakāyasmi.
|393.916| Pañcaṅgike samādhimhi sante ekodibhāvite
paṭippassaddhiladdhamhi dibbacakkhuṃ visujjhi me.
|393.917| Cutūpapātaṃ jānāmi sattānaṃ āgatiṃ gatiṃ
itthabhāvaññathābhāvaṃ jhāne pañcaṅgike ṭhito.
|393.918| Pariciṇṇo mayā satthā .pe. bhavanetti samūhatā.
|393.919| Vajjīnaṃ veḷuvagāme ahaṃ jīvitasaṅkhayā
heṭṭhato veḷugumbasmiṃ nibbāyissaṃ anāsavoti.
Anuruddho thero.
The Pali Tipitaka in Roman Character Volume 26 page 363-394.
https://84000.org/tipitaka/pitaka_item/roman_item.php?book=26&item=382&items=12&mode=bracket
Classified by content :-
https://84000.org/tipitaka/pitaka_item/roman_item.php?book=26&item=382&items=12
Compare with The Pali Tipitaka in Thai Character :-
https://84000.org/tipitaka/read/pali_item.php?book=26&item=382&items=12&mode=bracket
Compare with The Royal Version of Thai Tipitaka :-
https://84000.org/tipitaka/read/byitem.php?book=26&item=382&items=12&mode=bracket
Study Atthakatha :-
https://84000.org/tipitaka/attha/attha.php?b=26&i=382
Contents of The Tipitaka Volume 26
https://84000.org/tipitaka/read/?index_26
https://84000.org/tipitaka/english/?index_26
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
