paliTIPITAKA Volume 25 - Sutta Pitaka 17

[157] ¹⁰ Evamme sutaṃ . ekaṃ samayaṃ bhagavā kosambiyaṃ viharati ghositārāme . tena kho pana samayena rañño udenassa uyyānagatassa antepuraṃ daḍḍhaṃ hoti pañca itthisatāni kālakatāni honti sāmāvatīpamukhāni . atha kho sambahulā bhikkhū pubbaṇhasamayaṃ nivāsetvā pattacīvaramādāya kosambiṃ piṇḍāya pāvisiṃsu . kosambiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu. {157.1} Ekamantaṃ nisinnā kho te bhikkhū bhagavantaṃ etadavocuṃ idha bhante rañño udenassa uyyānagatassa antepuraṃ daḍḍhaṃ pañca itthisatāni kālakatāni honti sāmāvatīpamukhāni tāsaṃ bhante upāsikānaṃ gati ko abhisamparāyoti . santettha bhikkhave upāsikāyo sotāpannā santi sakadāgāminiyo santi anāgāminiyo sabbā tā bhikkhave upāsikāyo anipphalā kālakatāti . atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi mohasambandhano loko bhabbarūpova dissati upadhibandhano bālo tamasā parivārito Sassatoriva ^1- khāyati passato natthi kiñcananti. Dasamaṃ. Cūḷavaggo sattamo. Tassuddānaṃ honti ^2- duve tathā bhaddiyā honti duve kāmesu sattā lakuṇṭho taṇhākhayo ca papañcakhayo ca kaccāno udapānaṃ udenoti. ----------- Udāne aṭṭhamo pāṭaligāmivaggo [158] 1 Evamme sutaṃ . ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tena kho pana samayena bhagavā bhikkhūnaṃ ^3- nibbānapaṭisaṃyuttāya dhammiyā kathāya sandasseti samādapeti samuttejeti sampahaṃseti te ^4- ca bhikkhū aṭṭhikatvā manasikatvā sabbañcetaso samannāharitvā ohitasotā dhammaṃ suṇanti. {158.1} Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi atthi bhikkhave tadāyatanaṃ yattha neva paṭhavī na āpo na tejo na vāyo na ākāsānañcāyatanaṃ na viññāṇañcāyatanaṃ na ākiñcaññāyatanaṃ na nevasaññānāsaññāyatanaṃ nāyaṃ loko na paraloko na ubho candimasuriyā tamahaṃ ^5- bhikkhave neva āgatiṃ @Footnote: ¹ aṭṭhakathāyaṃ sassati viya . ² Ma. dve bhaddiyā dve ca sattā lakuṇḍako @taṇhākhayo papañcakhayo ca kaccāno udapānañca udenoti . ³ Ma. Yu. bhikkhū. @⁴ Ma. tedha bhikkhū aṭṭhiṃ katvā . ⁵ aṭṭhakathāyaṃ tatrapāhaṃ. Ma. tatrāpāhaṃ. Vadāmi na gatiṃ na ṭhitiṃ na cutiṃ na upapattiṃ appatiṭṭhaṃ appavattaṃ anārammaṇameva taṃ esevanto dukkhassāti. Suttaṃ paṭhamaṃ.

The Pali Tipitaka in Roman Character Volume 25 page 205-207. http://84000.org/tipitaka/pitaka_item/roman_item_s.php?book=25&item=157&items=2 Classified by [Item Number] :- http://84000.org/tipitaka/pitaka_item/roman_item_s.php?book=25&item=157&items=2&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=25&item=157&items=2 Compare with The Royal Version of Thai Tipitaka :- http://84000.org/tipitaka/read/byitem_s.php?book=25&item=157&items=2 Study Atthakatha :- http://84000.org/tipitaka/attha/attha.php?b=25&i=157 The Pali Atthakatha in Thai :- http://84000.org/tipitaka/atthapali/read_th.php?B=26&A=9156 The Pali Atthakatha in Roman :- http://84000.org/tipitaka/atthapali/read_rm.php?B=26&A=9156 Contents of The Tipitaka Volume 25 http://84000.org/tipitaka/read/?index_25