3. Asurindakasuttavaṇṇanā
[189] Tatiye asurindakabhāradvājoti akkosakabhāradvājassa kaniṭṭho.
Kupitoti teneva kāraṇena kuddho. Jayañcevassa taṃ hotīti asseva taṃ jayaṃ
hoti, so jayo hotīti attho. Katamassāti? yā titikkhā vijānato, sā 1-
adhivāsanāya guṇaṃ vijānantassa titikkhā adhivāsanā, ayaṃ tassa vijānatova jayo.
Bālo pana pharusaṃ bhaṇanto "mayhaṃ jayo"ti kevalaṃ jayaṃ maññati. Tatiyaṃ.
4. Bilaṅgikasuttavaṇṇanā
[190] Catutthe bilaṅgikabhāradvājoti bhāradvājova so, nānappakāraṃ
pana suddhañca sambhārayuttañca kañjikaṃ kāretvā vikiṇāpento bahuddhanaṃ saṅgharīti 2-
"bilaṅgikabhāradvājo"ti tassa saṅgītikārehi nāmaṃ gahitaṃ. Tuṇhībhūtoti "tayo me
jeṭṭhabhātaro iminā pabbājitā"ti ativiya kuddho kiñci vattuṃ asakkonto
tuṇhībhūto aṭṭhāsi. Gāthā pana devatāsaṃyutte kathitāva. Catutthaṃ.
5. Ahiṃsakasuttavaṇṇanā
[191] Pañcame ahiṃsakabhāradvājoti ahiṃsakabhāradvājovesa, 3- ahiṃsakapañhaṃ
pana pucchi, tenassetaṃ saṅgītikārehi nāmaṃ gahitaṃ. Nāmena vā esa ahiṃsako,
gottena bhāradvājo. Ahiṃsakāhanti 4- ahiṃsako ahaṃ, iti me bhavaṃ gotamo
jānātūti āha. Tathā cassāti tathā ce assa, bhaveyyāsīti attho. Na hiṃsatīti
na viheṭheti na dukkhāpeti. pañcamaṃ.
6. Jaṭāsuttavaṇṇanā
[192] Chaṭṭhe jaṭābhāradvājoti bhāradvājoveso, 5- jaṭāpañhassa pana
pucchitattā saṅgītikārehi evaṃ vutto. Sesaṃ devatāsaṃyutte kathitameva. Chaṭṭhaṃ.
@Footnote: 1 cha.Ma. ayaṃ pāṭho na dissati 2 cha.Ma., i. saṅkharīti 3 cha.Ma., i. bhāradvājovesa
@4 Sī. ahiṃsakvāhanti 5 i. bhāradvājo vaso
The Pali Atthakatha in Roman Character Volume 11 Page 218.
http://84000.org/tipitaka/read/attha_page.php?book=11&page=218&pages=1&edition=roman
ศึกษาพระสูตร (เนื้อความ) นี้แยกตามสารบัญ :-
http://84000.org/tipitaka/pitaka_item/read_rm.php?B=11&A=5658&pagebreak=1
http://84000.org/tipitaka/atthapali/rm_line.php?B=11&A=5658&pagebreak=1#p218
