อรรถกถาเล่มที่ ๑๑ หน้าที่ ๑๖๔.

ปริโยสานํ. สีลสมาธโย วา อาทิ, วิปสฺสนามคฺคา มชฺฌํ, ผลนิพฺพานานิ ปริโยสานํ. สีลสมาธิวิปสฺสนา วา อาทิ, มคฺโค มชฺฌํ, ผลนิพฺพานานิ ปริโยสานํ. เทสนาย ปน จตุปฺปทิกาย คาถาย ตาว ปฐมปโท ^๑- อาทิ. ทุติยตติยา มชฺฌํ, จตุตฺโถ ปริโยสานํ. ปญฺจปทฉปฺปทานํ ปฐมปโท ^๑- อาทิ, อวสานปโท ^๑- ปริโยสานํ, เสสา ^๒- มชฺฌํ. เอกานุสนฺธิกสุตฺตสฺส นิทานํ อาทิ, "อิทมโวจา"ติ ปริโยสานํ, เสสํ มชฺฌํ. อเนกอนุสนฺธิกสฺส มชฺเฌ พหูปิ อนุสนฺธิเมว ^๓- นิทานํ อาทิ, "อิทมโวจา"ติ ปริโยสานํ. สาตฺถนฺติ สาตฺถกํ กตฺวา เทเสถ. สพฺยญฺชนนฺติ พฺยญฺชเนหิ เจว ปเทหิ จ ปริปูรํ กตฺวา เทเสถ. เกวลปริปุณฺณนฺติ สกลปริปุณฺณํ. ปริสุทฺธนฺติ นิรูปกฺกิเลสํ. พฺรหฺมจริยนฺติ สิกฺขตฺตยสงฺคหสาสนพฺรหฺมจริยํ. ปกาเสถาติ อาวิกโรถ. อปฺปรชกฺขชาติกาติ ปญฺญาจกฺขุมฺหิ อปฺปกิเลสรชสภาวา, ทุกูลสาณิยา ปฏิจฺฉนฺนา วิย จตุปฺปทิกคาถาปริโยสาเน อรหตฺตปฺปตฺตสมตฺถา สตฺตา ^๔- สนฺตีติ อตฺโถ. อสฺสวนตาติ อสฺสวนตาย. ปริหายนฺตีติ อลาภปริหานิยา ธมฺมโต ปริหายนฺติ. เสนานิคโมติ ปฐมกปฺปิกานํ เสนาย นิวิฏฺโฐกาเส ปติฏฺฐิตคาโม, สุชาตาย วา ปิตุ เสนานิคโม. ^๕- เตนุปสงฺกมิสฺสามีติ นาหํ ตุเมฺห อุยฺโยเชตฺวา ปริเวณาทีนิ กาเรตฺวา อุปฏฺฐากาทีหิ ปริจริยมาโน วิหริสฺสามิ, ติณฺณํ ปน ชฏิลานํ อฑฺฒุฑฺฒานิ ปาฏิหาริยสหสฺสานิ ทสฺเสตฺวา ธมฺมเมว เทเสตุํ อุปสงฺกมิสฺสามิ. ^๖- อุปสงฺกมีติ ^๗- "อยํ สมโณ โคตโม มหายุทฺธํ วิย ^๘- `มา เอเกน เทฺว อคมิตฺถ, ธมฺมํ เทเสถา'ติ สฏฺฐี ชเน อุยฺโยเชติ, อิมสฺมึ ปน เอกสฺมึปิ ธมฺมํ เทเสนฺเต มยฺหํ จิตฺตสฺส สาตํ ^๙- นตฺถิ, เอวํ พหูสุ เทเสนฺเตสุ กุโต ภวิสฺสติ, ปฏิพาหามิ นนฺ"ติ จินฺเตตฺวา อุปสงฺกมิ. ปญฺจมํ. @เชิงอรรถ: ^๑ ฉ.ม., อิ......ปาโท ^๒ ฉ.ม., อิ. อวเสสา ^๓ ฉ.ม., อิ. อนุสนฺธิ มชฺฌเมว @^๔ ฉ.ม., อิ. อรหตฺตํ ปตฺตุํ สมตฺถา ^๕ ฉ.ม., อิ. เสนานี นาม นิคโม @^๖ ฉ.ม., อิ. อุปสงฺกมิสฺสามีติ ^๗ ฉ.ม., อิ. เตนุปสงฺกมีติ @^๘ ฉ.ม., อิ, มหายุทฺธํ วิจาเรนฺโต วิย ^๙ ฉ.ม., อิ. จิตฺตสฺสาทํ

เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๑๖๔. http://84000.org/tipitaka/read/attha_page.php?book=11&page=164&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=4277&modeTY=2&pagebreak=1 http://84000.org/tipitaka/atthapali/th_line.php?B=11&A=4277&modeTY=2&pagebreak=1#p164