อรรถกถาเล่มที่ ๑๑ ภาษาบาลี อักษรไทย
สํ.อ. (สารตฺถ.๑)
หน้าที่ ๑๖๙.

ปฏิโฆ อุปฺปชฺชติ. อิติ ธมฺมกถิโก อนุโรธวิโรเธสุ สชฺชติ นาม. ตุวํ เอวํ มา
สชฺชิตฺถาติ ๑- วทติ. ยทญฺญมนุสาสตีติ ยํ อญฺญํ อนุสาสติ, ตํ. สมฺพุทฺโธ
หิตานุกมฺปี หิเตน อนุกมฺปติ. ยสฺมา จ หิตานุกมฺปี, ตสฺมา อนุโรธวิโรเธหิ
วิปฺปมุตฺโต ตถาคโตติ. จตุตฺถํ.
                         ๕. มานสสุตฺตวณฺณนา
       [๑๕๑] ปญฺจเม อากาเส จรนฺเตปิ พนฺธตีติ อนฺตลิกฺขจโร. ปาโสติ
ราคปาโส. มานโสติ มนสมฺปยุตฺโต. ปญฺจมํ.
                         ๖. ปุตฺตสุตฺตวณฺณนา
       [๑๕๒] ฉฏฺเฐ ปญฺจนฺนํ อุปาทานกฺขนฺธานํ อุปาทายาติ ปญฺจ
อุปาทานกฺขนฺเธ อาทิยิตฺวา, สภาวสามญฺญลกฺขณวเสน นานปฺปการโต วิภชิตฺวา
ทสฺเสนฺโต. สนฺทสฺเสตีติ ขนฺธานํ สภาวลกฺขณาทีนิ ทสฺเสติ. สมาทเปตีติ
คณฺหาเปติ. สมุตฺเตเชตีติ สมาทานมฺหิ อุสฺสาหํ ชเนติ. สมฺปหํเสตีติ ปฏิวิทฺธคุเณน
โวทาเปติ โชตาเปติ. อฏฺฐิกตฺวาติ  ๒- อตฺถิกตฺวา, ๓- "อยนฺโน อธิคนฺตพฺโพ
อตฺโถ"ติ เอวํ สลฺลกฺเขตฺวา ตาย เทสนาย อตฺถิกา หุตฺวา. มนสิกตฺวาติ จิตฺเต
ฐเปตฺวา. สพฺพเจตโส ๔- สมนฺนาหริตฺวาติ สพฺเพน เตน กมฺมการกจิตฺเตน
สมนฺนาหริตฺวา. โอหิตโสตาติ ฐปิตโสตา. อพฺโภกาเส นิกฺขิตฺตาติ โอตาปนตฺถาย
ฐปิตา.
        รูปํ เวทยิตํ สญฺญนฺติ ๕- เอเต รูปาทโย ตโย ขนฺเธ. ๖- ยญฺจ สงฺขตนฺติ
อิมินา สงฺขารกฺขนฺโธ คหิโต. เอวํ ตตฺถ วิรชฺชตีติ "เอโส อหํ น โหมิ,
เอตํ มยฺหํ น โหตี"ติ ปสฺสนฺโต เอวํ เตสุ ขนฺเธสุ วิรชฺชติ. เขมตฺตนฺติ เขมีภูตํ
อตฺตภาวํ. อิมินา ผลกฺขณํ ๗- ทสฺเสติ. อเนฺวสนฺติ ภวโยนิคติฐิติสตฺตาวาสสงฺขาเตสุ
สพฺพฏฺฐาเนสุ ปริเยสมานา. นาชฺฌคาติ น ปสฺสีติ. ฉฏฺฐํ.
@เชิงอรรถ: ๑ ฉ.ม. ลชฺชิตฺโถ  ๒ ฉ.ม. อฏฺฐึ กตฺวา  ๓ ฉ.ม. อตฺถิกํ กตฺวา  ๔ ฉ.ม. สพฺพเจตสา
@๕ ฉ.ม. สญฺญาติ     ๖ ฉ.ม. ขนฺธา      ๗ สี. ผลลกฺขณํ


เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๑๖๙.
http://84000.org/tipitaka/read/attha_page.php?book=11&page=169&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=11&A=4409&modeTY=2&pagebreak=1
http://84000.org/tipitaka/atthapali/th_line.php?B=11&A=4409&modeTY=2&pagebreak=1#p169