อรรถกถาเล่มที่ ๑๑ หน้าที่ ๒๑๘.

๓. อสุรินฺทกสุตฺตวณฺณนา [๑๘๙] ตติเย อสุรินฺทกภารทฺวาโชติ อกฺโกสกภารทฺวาชสฺส กนิฏฺโฐ. กุปิโตติ เตเนว การเณน กุทฺโธ. ชยญฺเจวสฺส ตํ โหตีติ อสฺเสว ตํ ชยํ โหติ, โส ชโย โหตีติ อตฺโถ. กตมสฺสาติ? ยา ติติกฺขา วิชานโต, สา ^๑- อธิวาสนาย คุณํ วิชานนฺตสฺส ติติกฺขา อธิวาสนา, อยํ ตสฺส วิชานโตว ชโย. พาโล ปน ผรุสํ ภณนฺโต "มยฺหํ ชโย"ติ เกวลํ ชยํ มญฺญติ. ตติยํ. ๔. พิลงฺคิกสุตฺตวณฺณนา [๑๙๐] จตุตฺเถ พิลงฺคิกภารทฺวาโชติ ภารทฺวาโชว โส, นานปฺปการํ ปน สุทฺธญฺจ สมฺภารยุตฺตญฺจ กญฺชิกํ กาเรตฺวา วิกิณาเปนฺโต พหุทฺธนํ สงฺฆรีติ ^๒- "พิลงฺคิกภารทฺวาโช"ติ ตสฺส สงฺคีติกาเรหิ นามํ คหิตํ. ตุณฺหีภูโตติ "ตโย เม เชฏฺฐภาตโร อิมินา ปพฺพาชิตา"ติ อติวิย กุทฺโธ กิญฺจิ วตฺตุํ อสกฺโกนฺโต ตุณฺหีภูโต อฏฺฐาสิ. คาถา ปน เทวตาสํยุตฺเต กถิตาว. จตุตฺถํ. ๕. อหึสกสุตฺตวณฺณนา [๑๙๑] ปญฺจเม อหึสกภารทฺวาโชติ อหึสกภารทฺวาโชเวส, ^๓- อหึสกปญฺหํ ปน ปุจฺฉิ, เตนสฺเสตํ สงฺคีติกาเรหิ นามํ คหิตํ. นาเมน วา เอส อหึสโก, โคตฺเตน ภารทฺวาโช. อหึสกาหนฺติ ^๔- อหึสโก อหํ, อิติ เม ภวํ โคตโม ชานาตูติ อาห. ตถา จสฺสาติ ตถา เจ อสฺส, ภเวยฺยาสีติ อตฺโถ. น หึสตีติ น วิเหเฐติ น ทุกฺขาเปติ. ปญฺจมํ. ๖. ชฏาสุตฺตวณฺณนา [๑๙๒] ฉฏฺเฐ ชฏาภารทฺวาโชติ ภารทฺวาโชเวโส, ^๕- ชฏาปญฺหสฺส ปน ปุจฺฉิตตฺตา สงฺคีติกาเรหิ เอวํ วุตฺโต. เสสํ เทวตาสํยุตฺเต กถิตเมว. ฉฏฺฐํ. @เชิงอรรถ: ^๑ ฉ.ม. อยํ ปาโฐ น ทิสฺสติ ^๒ ฉ.ม., อิ. สงฺขรีติ ^๓ ฉ.ม., อิ. ภารทฺวาโชเวส @^๔ สี. อหึสกฺวาหนฺติ ^๕ อิ. ภารทฺวาโช วโส

เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๒๑๘. http://84000.org/tipitaka/read/attha_page.php?book=11&page=218&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=5658&modeTY=2&pagebreak=1 http://84000.org/tipitaka/atthapali/th_line.php?B=11&A=5658&modeTY=2&pagebreak=1#p218