อรรถกถาเล่มที่ ๑๑ หน้าที่ ๘๒.

๓. อนฺนสุตฺตวณฺณนา [๔๓] ตติเย อภินนฺทนฺตีติ ปตฺเถนฺติ. ภชตีติ อุปคจฺฉติ, จิตฺตคหปติสีวลิตฺเถราทิเก วิย ปจฺฉโต ปจฺฉโต อนุพนฺธติ. ตสฺมาติ ยสฺมา อิธโลเก ปรโลเก จ อนฺนทายกเมว อนุคจฺฉติ, ตสฺมา. เสสํ อุตฺตานเมวาติ. ตติยํ. ๔. เอกมูลสุตฺตวณฺณนา [๔๔] จตุตฺเถ เอกมูลนฺติ อวิชฺชา ตณฺหาย มูลํ, ตณฺหา อวิชฺชาย. อิธ ปน ตณฺหา อธิปฺเปตา. สา จ ^๑- ทฺวีหิ สสฺสตุจฺเฉททิฏฺฐีหิ อาวฏฺฏตีติ ทฺวาวฏฺฏา. ^๒- สา จ ราคาทีหิ ตีหิ มเลหิ ติมลา. ตตฺราสฺสา โมโห สหชาตโกฏิยา มลํ โหติ, ราคโทสา อุปนิสฺสยโกฏิยา. ปญฺจ ปน กามคุณา อสฺสา ปตฺถรา, ^๓- เตสุ สา ปตฺถรตีติ ปญฺจปตฺถรา. สา จ อปูรณียฏฺเฐน สมุทฺโท. อชฺฌตฺติกพาหิเรสุ ปเนสา ทฺวาทสสุ อายตเนสุ อาวฏฺฏติ ปริวฏฺฏตีติ ทฺวาทสาวฏฺฏา อปติฏฺฐฏฺเฐน ปน ปาตาโลติ วุจฺจตีติ. ตํ ^๔- เอกมูลํ ฯเปฯ ปาตาลํ อตริ อิสิ, อุตฺตริ สมติกฺกมีติ อตฺโถ. จตุตฺถํ. ๕. อโนมสุตฺตวณฺณนา [๔๕] ปญฺจเม อโนมนามนฺติ สพฺพคุณสมนฺนาคตตฺตา อเวกลฺลนามํ, ปริปูรนามนฺติ อตฺโถ. นิปุณตฺถทสฺสินฺติ ภควา สณฺหสุขุเม ขนฺธนฺตราทโย อตฺเถ ปสฺสตีติ นิปุณตฺถทสฺสี. ปญฺญาททนฺติ ปญฺญาธิคมาย ^๕- ปฏิปทํ กถนวเสน ปญฺญาทายกํ. กามาลเย อสตฺตนฺติ ปญฺจกามคุณาลเย อลคฺคํ. กมฺมานนฺติ ภควา มหาโพธิมณฺเฑเยว อริยมคฺเคน คโต, น อิทานิ คจฺฉตีติ, ^๖- อตีตํ ปน อุปาทาย อิทํ วุตฺตํ. มเหสินฺติ มหนฺตานํ สีลกฺขนฺธาทีนญฺจ ^๗- เอสิตารํ ปริเยสิตารนฺติ. ปญฺจมํ. @เชิงอรรถ: ^* ปาลิ. อโนมิยสุตฺต ^๑ ฉ.ม. สา จาติ ปาโฐ น ทิสฺสติ ^๒ ฉ.ม. ทฺวิราวฏฺฏา @^๓ ฉ.ม. ปตฺถรณฏฺฐานา, สี. ปตฺถนา ^๔ ฉ.ม. ตนฺติ ปาโฐ น ทิสฺสติ @^๕ ฉ.ม. อนฺวยปญฺญาธิคมาย ^๖ ฉ.ม. คจฺฉติ ^๗ ฉ.ม. สีลกฺขนฺธาทีนํ

เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๘๒. http://84000.org/tipitaka/read/attha_page.php?book=11&page=82&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=2152&modeTY=2&pagebreak=1 http://84000.org/tipitaka/atthapali/th_line.php?B=11&A=2152&modeTY=2&pagebreak=1#p82