2. Phassanānattasuttavaṇṇanā
[86] Dutiye uppajjati phassanānattanti nānāsabhāvo phasso uppajjati. Tattha
cakkhusamphassādayo cakkhuviññāṇādisampayuttā, manosamphasso manodvāre
paṭhamajavanasampayutto, tasmā manodhātuṃ paṭiccāti manodvārāvajjanaṃ
kiriyāmanoviññāṇadhātuṃ paṭicca paṭhamajavanasamphasso uppajjatīti ayamettha attho.
Dutiyaṃ.
3. Nophassanānattasuttavaṇṇanā
[87] Tatiye no manosamphassaṃ paṭicca uppajjati manodhātūti manodvāre
paṭhamajavanasampayuttaṃ phassaṃ paṭicca āvajjanakiriyāmanoviññāṇadhātu no uppajjatīti
evamattho daṭṭhabbo. Tatiyaṃ.
4. Vedanānānattasuttavaṇṇanā
[88] Catutthe cakkhusamphassajā vedanāti sampaṭicchannamanodhātuto paṭṭhāya
sabbāpi tasmiṃ dvāre vedanā vatteyyuṃ, nibbattiphāsukatthaṃ 1- pana anantaraṃ
sampaṭicchannavedanameva gahetuṃ vaṭṭatīti vuttaṃ. Manosamphassaṃ paṭiccāti manodvāre
āvajjanasamphassaṃ paṭicca paṭhamajavanavedanā, paṭhamajavanasamphassaṃ paṭicca dutiyajavanavedanāti
ayamadhippāyo. Catutthaṃ.
5. Dutiyavedanānānattasuttavaṇṇanā
[89] Pañcame tatiyacatutthesu vuttanayo ekato katvā desito. 2- Iti
dutiyādīsu catūsu suttesu manodhātuṃ manodhātūti agahetvā manodvārāvajjanaṃ
manodhātūti gahitaṃ. Sabbāni cetāni tathā tathā kathite bujjhanakānaṃ ajjhāsayena
desitāni. Ito paresupi eseva nayo. Pañcamaṃ.
@Footnote: 1 Sī.,i. nipphattiphāsukatthaṃ 2 cha.Ma., i. vuttanayāva ekato katvā desitāti
The Pali Atthakatha in Roman Character Volume 12 Page 148.
http://84000.org/tipitaka/read/attha_page.php?book=12&page=148&pages=1&edition=roman
ศึกษาพระสูตร (เนื้อความ) นี้แยกตามสารบัญ :-
http://84000.org/tipitaka/pitaka_item/read_rm.php?B=12&A=3308&pagebreak=1
http://84000.org/tipitaka/atthapali/rm_line.php?B=12&A=3308&pagebreak=1#p148
