อรรถกถาเล่มที่ ๑๔ หน้าที่ ๗๔.

อิทานิ อปฺปญาติกํ อปฺปปกฺขํ ชาตนฺ"ติ. อถ ภควา เตสํ จิตฺตวารํ ^๑- ญตฺวา "มยิ คเต มหตี เทสนา ภวิสฺสตี"ติ ญตฺวา คนฺธกุฏิโต นิกฺขมฺม ธมฺมสภายํ ปญฺญตฺตปวรพุทฺธาสเน นิสีทิตฺวา "กาย นุตฺถ ภิกฺขเว เอตรหิ กถาย สนฺนิสินฺนา"ติ อาห. อถ ^๒- ภควา อญฺญา คามนิคมาทิกถา นตฺถิ, อสุกํ ปน กุลํ ^๓- ปุพฺเพ พหุญาติกํ อโหสิ พหุปกฺขํ, อิทานิ อปฺปญาติกํ อปฺปปกฺขํ ชาตนฺติ วทนฺตา นิสินฺนมฺหาติ. สตฺถา อิมิสฺสา อตฺถุปฺปตฺติยา อปฺปมตฺติกา เอสา ภิกฺขเว ปริหานีติ อิทํ สุตฺตํ อารภิ. ตตฺถ อปฺปมตฺติกาติ ปริตฺตา ปริตฺตปฺปมาณา. เอตาย หิ ปริหานิยา สคฺคโต วา มคฺคโต วา ปริหานิ นาม นตฺถิ, ทิฏฺฐธมฺมิกปริหานิมตฺตเมเวตนฺติอาทิมาห. เอตํ ปติกิฏฺฐนฺติ เอตํ ปจฺฉิมํ เอตํ ลามกํ. ยทิทํ ปญฺญาปริหานีติ ยา เอสา มม สาสเน กมฺมสฺสกตปญฺญาย ฌานปญฺญาย วิปสฺสนาปญฺญาย มคฺคปญฺญาย ผลปญฺญาย จ ปริหานิ, เอสา ปจฺฉิมา เอสา ลามกา เอสา ฉฑฺฑนียาติ อตฺโถ. [๗๗] สตฺตมํปิ อตฺถุปฺปตฺติยเมว กถิตํ. ธมฺมสภายํ กิร นิสินฺเนสุ ภิกฺขุสํเฆสุ เอกจฺเจ เอวมาหํสุ "อสุกํ นาม กุลํ ปุพฺเพ อปฺปญาติกํ อปฺปปกฺขํ อโหสิ, ตํ อิทานิ พหุญาติกํ พหุปกฺกํ ชาตนฺ"ติ. กํ สนฺธาย เอวมาหํสูติ. วิสาขํ อุปาสิกํ เวสาลิยญฺจ ลิจฺฉวี. สตฺถา เตสํ จิตฺตวารํ ญตฺวา ปุริมนเยเนว อาคนฺตฺวา ธมฺมาสเน นิสินฺโน "กาย นุตฺถ ภิกฺขเว เอตรหิ กถาย สนฺนิสินฺนา"ติ ปุจฺฉิ. เต ยถาภูตํ กถยึสุ. สตฺถา อิมิสฺสา อตฺถุปฺปตฺติยา ^๔- อิมํ สุตฺตํ อารภิ. ตตฺถ อปฺปมตฺติกาติ ตํ สมฺปตฺตึ นิสฺสาย สคฺคํ วา มคฺคํ วา สมฺปตฺตานํ อภาวโต ปริตฺตา. ยทิทํ ปญฺญาวุฑฺฒีติ กมฺมสฺสกตปญฺญาทีนํ วุฑฺฒิ. ตสฺมาติ ยสฺมา ญาตีนํ วุฑฺฒิ นาม ทิฏฺฐธมฺมิกมตฺตา อปฺปา ปริตฺตา, สคฺคํ วา มคฺคํ วา ปาเปตุํ อสมตฺถา, ตสฺมา. ปญฺญาวุฑฺฒิยาติ กมฺมสฺสกตาทิปญฺญาวุฑฺฒิยา. @เชิงอรรถ: ^๑ ฉ.ม.,อิ. จิตฺตาจารํ. เอวมุปริปิ ^๒ ฉ.ม.,อิ. อยํ สทฺโท น ทิสฺสติ @^๓ ฉ.ม.,อิ. อสุกํ นาม ^๔ ฉ.ม. อฏฺฐุปฺปตฺติยา. เอวมุปริปิ

เนื้อความอรรถกถาฉบับภาษาบาลี อักษรไทย เล่มที่ ๑๔ หน้าที่ ๗๔. http://84000.org/tipitaka/read/attha_page.php?book=14&page=74&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=14&A=1731&modeTY=2&pagebreak=1 http://84000.org/tipitaka/atthapali/th_line.php?B=14&A=1731&modeTY=2&pagebreak=1#p74