บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 15 : PALI ROMAN Aṅ.A. (manoratha.2) Page 349.
Bahubheravanti bahubheravārammaṇehi samannāgataṃ. Ratanavarānanti 1- sattannaṃ pavararatanānaṃ. Ālayanti nivāsaṭṭhānaṃ. Puthū savantīti bahukā hutvā sandamānā. Sesamettha uttānameva. 2. Dutiyapuññābhisandasuttavaṇṇanā [52] Dutiye ariyakantehīti maggaphalasampayuttehi. Tāni hi ariyānaṃ kantāni honti piyāni manāpāni. Sesaṃ suttante tāva yaṃ vattabbaṃ siyā, taṃ visuddhimagge 2- vuttameva. Gāthāsu pana saddhāti sotāpannassa saddhā adhippetā. Sīlanti sotāpannassa sīlameva. Ujubhūtañca dassananti kāyavaṅkādīnaṃ abhāvena khīṇāsavassa dassanaṃ ujubhūtadassanannāma. Āhūti kathayanti. Pasādanti buddhadhammasaṃghesu pasādaṃ. Dhammadassananti catusaccadhammadassanaṃ. 3. Paṭhamasaṃvāsasuttavaṇṇanā [53] Tatiye sambahulāpi kho gahapatī ca gahapatāniyo cāti bahukā gahapatayo ca gahapatāniyo ca āvāhavivāhakaraṇatthāya gacchantā tameva maggaṃ paṭipannā honti. Saṃvāsāti sahavāsā ekatovāsā. Chavo chavāyāti guṇamaraṇena matattā chavo guṇamaraṇeneva matāya chavāya saddhiṃ. Deviyā saddhinti guṇehi devibhūtāya saddhiṃ. Dussīloti nissīlo. Pāpadhammoti lāmakadhammo. Akkosakaparibhāsakoti dasahi akkosavatthūhi akkosako bhayaṃ dassetvā tajjanena paribhāsako. Evaṃ sabbattha attho veditabbo. Kadariyāti thaddhamaccharino. Jānipatayoti jāyapatikā. 3- Vadaññūti yācakavacanassa atthaṃ jānantā. Saññatāti sīlasaññamena samannāgatā. Dhammajīvinoti dhamme ṭhatvā @Footnote: 1 Sī.,ka. ratanagaṇānanti 2 visuddhi. 1/192 3 cha.Ma. jayampatikāThe Pali Atthakatha in Roman Character Volume 15 Page 349. http://84000.org/tipitaka/read/attha_page.php?book=15&page=349&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=15&A=8077&pagebreak=1 http://84000.org/tipitaka/atthapali/rm_line.php?B=15&A=8077&pagebreak=1#p349
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]