Parikkhīṇabhavasaṃyojanoti khīṇabhavabandhano. Sammadaññā vimuttoti sammā hetunā
kāraṇena jānitvā vimutto. Tassa na evaṃ hoti atthi me seyyoti
vātiādīhipi seyyassa seyyohamasmīti mānādayo tayo mānā paṭikkhittā. Na
hi khīṇāsavassa "atthi mayhaṃ seyyo, atthi sadiso, atthi hīno"ti māno
hoti. Natthi me seyyotiādīhipi teyeva paṭikkhittā. Na hi khīṇāsavassa "ahameva
seyyo, ahaṃ sadiso, ahaṃ hīno, aññe seyyādayo atthī"ti evaṃ māno hoti.
Acirapakkantesūti arahattaṃ byākaritvā acirasseva 1- pakkantesu. Aññaṃ
byākarontīti arahattaṃ kathenti. Hasamānakā maññe aññaṃ byākarontīti hasamānā
viya kathenti. Vighātaṃ āpajjantīti dukkhaṃ āpajjanti.
Na ussesu na omesu, samatte nopaniyyareti ettha ussāti ussitatā
seyyapuggalā. Omāti hīnā. Samattoti sadiso. Iti imesu tīsupi seyyahīnasadisesu
khīṇāsavā mānena na upaniyyare na upanenti, na upagacchantīti attho. Khīṇā
sañjātīti 2- khīṇā tesaṃ jāti. Vusitaṃ brahmacariyanti vuṭṭhaṃ maggabrahmacariyaṃ.
Caranti saññojanavippamuttāti sabbasaṃyojanehi vimuttā hutvā caranti. Suttepi
gāthāyapi khīṇāsavova kathito.
8. Indriyasaṃvarasuttavaṇṇanā
[50] Aṭṭhame hatūpanisaṃ hotīti hatūpanissayaṃ hoti. Sīlavipannassāti
vipannasīlassa. Yathābhūtañāṇadassananti taruṇavipassanāñāṇaṃ. Nibbidā virāgoti
ettha nibbidā balavavipassanā, virāgo ariyamaggo. Vimuttiñāṇadassananti ettha
vimuttīti arahattaphalaṃ, ñāṇadassananti paccavekkhaṇañāṇaṃ. Upanissayasampannaṃ hotīti
sampannaupanissayaṃ hoti. Imasmiṃ sutte sīlānurakkhanaindriyasaṃvaro kathito.
@Footnote: 1 cha.Ma. aciraṃyeva 2 cha.Ma. khīṇā jātīti
The Pali Atthakatha in Roman Character Volume 16 Page 129.
http://84000.org/tipitaka/read/attha_page.php?book=16&page=129&pages=1&edition=roman
ศึกษาพระสูตร (เนื้อความ) นี้แยกตามสารบัญ :-
http://84000.org/tipitaka/pitaka_item/read_rm.php?B=16&A=2908&pagebreak=1
http://84000.org/tipitaka/atthapali/rm_line.php?B=16&A=2908&pagebreak=1#p129
