อรรถกถาเล่มที่ ๑๖ ภาษาบาลี อักษรไทย
องฺ.อ. (มโนรถ.๓)
หน้าที่ ๓.

สกฺกา ลภิตุํ. หีนา กามาติ ปญฺจนฺนํ นีจกุลานํ กามา. มชฺฌิมา กามาติ
มชฺฌิมสตฺตานํ กามา. ปณีตา กามาติ ราชราชมหามตฺตานํ กามา. กามาเตฺวว
สงฺขํ ๑- คจฺฉนฺตีติ กามนวเสน กาเมตพฺพวเสน จ กามาอิจฺเจว สงฺขํ คจฺฉนฺติ.
วุฑฺโฒ โหตีติ มหลฺลโก โหติ. อลํปญฺโญติ ยุตฺตปญฺโญ. อตฺตคุตฺโตติ อตฺตนาว
คุตฺโต รกฺขิโต, อตฺตานํ วา โคเปตุํ รกฺขิตุํ สมตฺโถ. นาลํ ปมาทายาติ น ยุตฺโต
ปมชฺชิตุํ. สทฺธาย อกตํ โหตีติ ยํ สทฺธาย กุสเลสุ ธมฺเมสุ กาตุํ ยุตฺตํ,
ตํ น กตํ โหติ. เสสปเทสุปิ เอเสว นโย. อนเปกฺโข ปนาหํ ภิกฺขเว ตสฺมึ
ภิกฺขุสฺมึ โหมีติ เอวํ สทฺธาทีหิ กาตพฺพํ กตฺวาว โสตาปตฺติผเล ปติฏฺฐิเต ตสฺมึ
ปุคฺคเล อนเปกฺโข โหมีติ ทสฺเสติ. อิมสฺมึ สุตฺเต โสตาปตฺติมคฺโค กถิโต.
                         ๘. วจนสุตฺตวณฺณนา
    [๘] อฏฺฐเม สทฺธมฺเมติ สาสนสทฺธมฺเม. อสฺสทฺโธติ โอกปฺปนสทฺธาย จ
ปจฺจกฺขสทฺธาย ๒- จาติ ทฺวีหิปิ สทฺธาหิ วิรหิโต. จวติ น ปติฏฺฐาตีติ อิมสฺมึ
สาสเน คุเณหิ จวติ, ปติฏฺฐาตุํ น สกฺโกติ. อิติ อิมสฺมึ สุตฺเต อปฺปติฏฺฐานญฺจ
ปติฏฺฐานญฺจ กถิตํ.
                       ๙. ปฐมอคารวสุตฺตวณฺณนา
    [๙] นวเม นาสฺส คารโวติ อคารโว. นาสฺส ปติสฺโสติ ๓- อปฺปติสฺโส,
อเชฏฺฐโก อนีจวุตฺติ. เสสเมตฺถ ปุริมสทิสเมว.
                      ๑๐. ทุติยอคารวสุตฺตวณฺณนา
    [๑๐] ทสเม อภพฺโพติ อภพฺพตํ ปตฺโต. ๔- วุฑฺฒินฺติ วฑฺฒึ. วิรุฬฺหินฺติ
วิรุฬฺหตาย นิจฺจลภาวํ. เวปุลฺลนฺติ มหนฺตภาวํ. เสสํ สพฺพตฺถ อุตฺตานเมวาติ.
                         เสขพลวคฺโค ปฐโม.
@เชิงอรรถ: ๑ ก. สํขยํ. เอวมุปริปิ  ๒ ฉ.ม. ปกฺขนฺทนสทฺธาย
@๓ ก. ปฏิสฺสโยติ  ๔ ฉ.ม. อภาชนํ


เนื้อความอรรถกถาฉบับภาษาบาลี อักษรไทย เล่มที่ ๑๖ หน้าที่ ๓.
http://84000.org/tipitaka/read/attha_page.php?book=16&page=3&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=16&A=45&modeTY=2&pagebreak=1
http://84000.org/tipitaka/atthapali/th_line.php?B=16&A=45&modeTY=2&pagebreak=1#p3