อรรถกถาเล่มที่ ๑๖ ภาษาบาลี อักษรไทย
องฺ.อ. (มโนรถ.๓)
หน้าที่ ๓๔๗.

                    ๕. ราชนฺเตปุรปฺปเวสนสุตฺตวณฺณนา
     [๔๕] ปญฺจเม กตํ วา กริสฺสนฺติ วาติ เมถุนวีติกฺกมํ กรึสุ วา ตํ ๑-
กริสฺสนฺติ วา. รตนนฺติ มณิรตนาทีสุ ยงฺกิญฺจิ. ปตฺเถตีติ มาเรตุํ อิจฺฉติ.
หตฺถิสมฺพาธนฺติ หตฺถีหิ สมฺพาธํ. หตฺถิสมฺมทฺทนฺติ วา ปาโฐ, ตสฺสตฺโถ:- หตฺถีหิ
สมฺมทฺโท เอตฺถาติ หตฺถิสมฺมทฺทํ. เสเสสุปิ เอเสว นโย. รชนียานิ
รูปสทฺทคนฺธรสโผฏฺฐพฺพานีติ เอตานิ ราคชนกานิ รูปาทีนิ ตตฺถ มธุรานิ ๒- โหนฺติ.
                         ๖. สกฺกสุตฺตวณฺณนา
     [๔๖] ฉฏฺเฐ โสกสภเยติ โสเกน สภเย. โสกภเยติ วา ปาโฐ, อยเมวตฺโถ.
ทุติยปเทปิ เอเสว นโย. เยน เกนจิ กมฺมฏฺฐาเนนาติ กสิวณิชฺชาทิกมฺเมสุ เยน
เกนจิ กมฺเมน. อนาปชฺช อกุสลนฺติ กิญฺจิ อกุสลํ อนาปชฺชิตฺวา. นิพฺพิเสยฺยาติ
อุปฺปาเทยฺย อวินสฺเสยฺย. ๓- ทกฺโขติ เฉโก. อุฏฺฐานสมฺปนฺโนติ อุฏฺฐานวิริเยน
สมนฺนาคโต. อลํ วจนายาติ ยุตฺโต วจนาย. เอกนฺตสุขปฏิสํเวที วิหเรยฺยาติ
เอกนฺตเมว กายิกเจตสิกสุขํ ญาเณน ปฏิสํเวเทนฺโต วิหเรยฺย. อนิจฺจาติ หุตฺวา
อภาวโต. ตุจฺฉาติ สารรหิตา. มุสาติ นิจฺจสุภสุขา วิย ขายมานาปิ ตถา น
โหนฺตีติ มุสา. โมสธมฺมาติ นสฺสนสภาวา. ๔- ตสฺมา เต ปฏิจฺจ ทุกฺขํ อุปฺปชฺชตีติ
สนฺทสฺเสติ. อิธ โข ปน โวติ เอตฺถ โวติ นิปาตมตฺตํ. อปณฺณกํ วา โสตาปนฺโนติ
อวิราธิกํ ๕- เอกํเสน โสตาปนฺโน วา โหติ. โสปิ ฌานํ นิพฺพตฺเตตฺวา ๖- พฺรหฺมโลกํ
วา คนฺตฺวา ฉสุ วา กามสคฺเคสุ เอกนฺตสุขปฺปฏิสํเวที หุตฺวา วิหเรยฺย. อิมสฺมึ
สุตฺเต สตฺถา อฏฺฐงฺคิกุโปสถสฺส ๗- คุณํ กเถสิ.
@เชิงอรรถ: ๑ ฉ.ม. อยํ ปาโฐ น ทิสฺสติ  ๒ ฉ.ม. ปริปูรานิ
@๓ ฉ.ม. อาจิเนยฺย  ๔ ฏีกา. นปสฺสนสภาวา
@๕ ฉ.ม. อวิราธิตํ  ๖ ฉ.ม. นิพฺพตฺเตติ  ๗ ฉ.ม. อฏฺฐงฺคุโปสถสฺส


เนื้อความอรรถกถาฉบับภาษาบาลี อักษรไทย เล่มที่ ๑๖ หน้าที่ ๓๔๗.
http://84000.org/tipitaka/read/attha_page.php?book=16&page=347&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=16&A=7805&modeTY=2&pagebreak=1
http://84000.org/tipitaka/atthapali/th_line.php?B=16&A=7805&modeTY=2&pagebreak=1#p347