ATTHAKATHA Book 16 : PALI ROMAN
Aṅ.A. (manoratha.3)
Page 4.

                            2. Balavagga
                        1. Ananussutasuttavaṇṇanā
    [11] Dutiyassa paṭhame pubbāhaṃ bhikkhave ananussutesu dhammesūti ahaṃ
bhikkhave pubbe ananussutesu dhammesu catusaccadhammesu. Abhiññāvosānapāramippatto
paṭijānāmīti catūsu saccesu catūhi maggehi soḷasavidhassa kiccassa karaṇena
abhijānitvā vosānapāramiṃ sabbesaṃ kiccānaṃ niṭṭhitattā katakiccabhāvaṃ pāraṃ
patto paṭijānāmīti mahābodhipallaṅke attano āgamanīyaguṇaṃ dasseti. Tathāgatassāti
aṭṭhahi kāraṇehi tathāgatassa. Tathāgatabalānīti yathā tehi gantabbaṃ, tatheva gatāni
pavattāni ñāṇabalāni. Āsabhaṇṭhānanti seṭṭhaṭṭhānaṃ. Sīhanādanti abhītanādaṃ.
Brahmacakkanti seṭṭhacakkaṃ. Pavattetīti katheti. 1-
                          2. Kūṭasuttavaṇṇanā
    [12] Dutiye sekhabalānīti sekhānaṃ ñāṇabalāni. Agganti uttamaṃ. Sesabalāni
gopānasiyo kūṭaṃ viya saṅgaṇhātīti saṅgāhikaṃ. Tāneva balāni saṃhatāni karotīti
saṅghātaniyaṃ.
                        3. Saṅkhittasuttavaṇṇanā
    [13] Tatiye tattha muṭṭhasaccena 2- na kampatīti satibalaṃ. Uddhaccena 3- na
kampatīti samādhibalaṃ.
                         4. Vitthatasuttavaṇṇanā
    [14] Catutthe satinepakkenāti ettha nepakkaṃ vuccati paññā, sā satiyā
upakārabhāvena gahitā.
@Footnote: 1 Sī.,Ma. pavattetīti pavatteti katheti  2 cha.Ma. muṭṭhassacce  3 cha.Ma. uddhacce


The Pali Atthakatha in Roman Character Volume 16 Page 4.
http://84000.org/tipitaka/read/attha_page.php?book=16&page=4&pages=1&edition=roman
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_rm.php?B=16&A=68&pagebreak=1
http://84000.org/tipitaka/atthapali/rm_line.php?B=16&A=68&pagebreak=1#p4