อรรถกถาเล่มที่ ๒ หน้าที่ ๑๕๔.

ปฏิชานาติ ฯ สลากภตฺตาทินา อตฺตโน กมฺเมน คโตมฺหิ สา ปน มยฺหํ นิสินฺนฏฺฐานํ อาคตาติ วทติ ฯ เสสเมตฺถาปิ อุตฺตานาธิปฺปายเมว ฯ อยํ ปน สพฺพตฺถ วินิจฺฉโย เวทิตพฺโพ ฯ รโหนิสชฺชสฺสาโทติ เมถุนธมฺมสนฺนิสฺสิตกิเลโส วุจฺจติ ฯ โย ภิกฺขุ เตนสฺสาเทน มาตุคามสฺส สนฺติกํ คนฺตุกาโม อกฺขึ อญฺเชติ ทุกฺกฏํ ฯ นิวาสนํ นิวาเสติ กายพนฺธนํ พนฺธติ จีวรํ ปารุปติ สพฺพตฺถ ปโยเค ปโยเค ทุกฺกฏํ ฯ คจฺฉโต ปทวาเร ปทวาเร ทุกฺกฏํ ฯ คนฺตฺวา นิสีทติ ทุกฺกฏเมว ฯ มาตุคาเม อาคนฺตฺวา นิสินฺนมตฺเต ปาจิตฺติยํ ฯ สเจ สา อิตฺถี เกนจิเทว กรณีเยน อุฏฺฐาย ปุนปฺปุนํ นิสีทติ นิสชฺชาย นิสชฺชาย ปาจิตฺติยํ ฯ ยํ สนฺธาย คโต สา น ทิฏฺฐา อญฺญา อาคนฺตฺวา นิสีทติ อสฺสาเท อุปฺปนฺเน ปาจิตฺติยํ ฯ มหาปจฺจริยํ ปน คมนกาลโต ปฏฺฐาย อสุทฺธจิตฺตตฺตา อาปตฺติเยวาติ วุตฺตํ ฯ สเจ สมฺพหุลา อาคจฺฉนฺติ มาตุคามคณนาย ปาจิตฺติยานิ ฯ สเจ อุฏฺฐาย อุฏฺฐาย ปุนปฺปุนํ นิสีทนฺติ นิสชฺชาคณนาย ปาจิตฺติยานิ ฯ อนิยเมตฺวา ทิฏฺฐทิฏฺฐาย สทฺธึ รหสฺสาทํ กปฺเปสฺสามีติ คนฺตฺวา นิสินฺนสฺสาปิ อาคตาคตานํ วเสน ปุนปฺปุนํ นิสชฺชาวเสน จ วุตฺตนเยเนว อาปตฺติโย เวทิตพฺพา ฯ สเจปิ สุทฺธจิตฺเตน คนฺตฺวา นิสินฺนสฺส สนฺติกํ อาคนฺตฺวา นิสินฺนาย อิตฺถิยา รหสฺสาโท อุปฺปชฺชติ อนาปตฺติเยว ฯ สมุฏฺฐานาทีนิ ปฐมปาราชิกสทิสาเนวาติ ฯ ปฐมานิยตวณฺณนา นิฏฺฐิตา ฯ

เนื้อความอรรถกถาฉบับภาษาบาลี อักษรไทย เล่มที่ ๒ หน้าที่ ๑๕๔. http://84000.org/tipitaka/read/attha_page.php?book=2&page=154&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=2&A=3217&modeTY=2&pagebreak=1 http://84000.org/tipitaka/atthapali/th_line.php?B=2&A=3217&modeTY=2&pagebreak=1#p154