อรรถกถาเล่มที่ ๒ หน้าที่ ๔๔๖.

สมุฏฺฐาติ กิริยา สญฺญาวิโมกฺขํ สจิตฺตกํ โลกวชฺชํ กายกมฺมํ วจีกมฺมํ อกุสลจิตฺตํ ติเวทนนฺติ ฯ อุยฺโยชนสิกฺขาปทํ ทุติยํ ฯ {๒๗๙} ตติยสิกฺขาปเท ฯ สยนีฆเรติ สยนฆเร ฯ ยโต อยฺยสฺส ภิกฺขา ทินฺนาติ ยสฺมา ภิกฺขา ทินฺนา ฯ ยํ อาคเตน ลทฺธพฺพํ ตํ โว ลทฺธํ คจฺฉถาติ อธิปฺปาโย ฯ ปริยุฏฺฐิโตติ ราคาปริยุฏฺฐิโต เมถุนาธิปฺปาโยติ อตฺโถ ฯ {๒๘๐} สโภชเนติ สห อุโภหิ ชเนหิ สโภชนํ ฯ ตสฺมึ สโภชเน ฯ อถวา สโภชเนติ สโภเค ฯ ราคปริยุฏฺฐิตสฺส ปุริสสฺส หิ อิตฺถี โภคา อิตฺถิยา จ ปุริโส ฯ เตเนวสฺส ปทภาชเน อิตฺถี เจว โหติ ปุริโส จาติอาทิ วุตฺตํ ฯ มหลฺลเก ฆเรติ มหลฺลเก สยนีฆเร ฯ ปิฏฺฐิสงฺฆาฏสฺส หตฺถปาสํ วิชหิตฺวาติ ตสฺส สยนีฆเร คพฺภสฺส โย ปิฏฺฐิสงฺฆาโฏ ตสฺส หตฺถปาสํ วิชหิตฺวา อนฺโตสยนสฺส อาสนฺเน ฐาเน นิสีทตีติ อตฺโถ ฯ อีทิสํ จ สยนีฆรํ มหาจตุสฺสาลาทีสุ โหติ ฯ ปิฏฺฐิวํสํ อติกฺกมิตฺวาติ อิมินา มชฺฌาติกฺกมํ ทสฺเสติ ฯ ตสฺมา ยถา วา ตถา วา กตสฺส ขุทฺทกสฺส สยนีฆรสฺส มชฺฌาติกฺกเม อาปตฺติ เวทิตพฺพา ฯ เสสเมตฺถ อุตฺตานเมว ฯ ปฐมปาราชิกสมุฏฺฐานํ กิริยา สญฺญาวิโมกฺขํ สจิตฺตกํ โลกวชฺชํ กายกมฺมํ อกุสลจิตฺตํ ทฺวิเวทนนฺติ ฯ สโภชนสิกฺขาปทํ ตติยํ ฯ {๒๘๔} จตุตฺถปญฺจมสิกฺขาปเทสุ ยํ วตฺตพฺพํ สิยา ตํ สพฺพํ อนิยตทฺวเย วุตฺตนยเมว ฯ ยถา จ สโภชนสิกฺขาปทํ เอวเมตานิปิ

เนื้อความอรรถกถาฉบับภาษาบาลี อักษรไทย เล่มที่ ๒ หน้าที่ ๔๔๖. http://84000.org/tipitaka/read/attha_page.php?book=2&page=446&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=2&A=9407&modeTY=2&pagebreak=1 http://84000.org/tipitaka/atthapali/th_line.php?B=2&A=9407&modeTY=2&pagebreak=1#p446