บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 2 : PALI ROMAN Vinaya.A. (samanta.2) Page 539.
Āpatti. Pāṭekkaṃ chaḍḍentiyā vatthugaṇanāya āpattiyo. Āṇattiyaṃpi eseva nayo. Dantakaṭṭhachaḍḍanepi bhikkhuniyā pācittiyameva. Bhikkhussa sabbattha dukkaṭaṃ. Sesaṃ uttānameva. Chassamuṭṭhānaṃ kiriyākiriyaṃ nosaññāvimokkhaṃ acittakaṃ paṇṇattivajjaṃ kāyakammaṃ vacīkammaṃ ticittaṃ tivedananti. Aṭṭhamasikkhāpadaṃ. {830-832} Navame. Yaṃ manussānaṃ upabhogaparibhogaṃ ropitanti khettaṃ vā hotu nāḷikerādiārāmo vā yatthakatthaci ropitaharitaṭṭhāne etāni vatthūni chaḍḍentiyā purimanayeneva āpattibhedo veditabbo. Khette vā ārāme vā nisīditvā bhuñjamānā ucchuādīni khādati gacchamānā ucchiṭṭhodakacalakādīni haritaṭṭhāne chaḍḍeti antamaso udakaṃ pivitvā matthakacchinnanāḷikeraṃpi chaḍḍeti pācittiyameva. Bhikkhuno dukkaṭaṃ. Kasitaṭṭhāne pana nikkhittabīje yāva aṅkuraṃ na uṭṭhahati tāva sabbesaṃ dukkaṭaṃ. Anikkhittabījesu khettakoṇādīsu vā asañjātaropitesu khettamariyādādīsu vā chaḍḍetuṃ vaṭṭati. Manussānaṃ kacavarachaḍḍanaṭṭhānepi vaṭṭati. Chaḍḍitakkhetteti manussesu sassaṃ uddharitvā gatesu chaḍḍitakkhettaṃ nāma hoti tattheva vaṭṭati. Yattha pana lāyitaṃ pubbaṇṇādi puna uṭṭhahissatīti rakkhanti tattha yathāvatthukameva. Sesaṃ uttānameva. Chassamuṭṭhānaṃ kiriyākiriyaṃ .pe. Tivedananti. Navamasikkhāpadaṃ.The Pali Atthakatha in Roman Character Volume 2 Page 539. http://84000.org/tipitaka/read/attha_page.php?book=2&page=539&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=2&A=11343&pagebreak=1 http://84000.org/tipitaka/atthapali/rm_line.php?B=2&A=11343&pagebreak=1#p539
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]