อรรถกถาเล่มที่ ๒ หน้าที่ ๕๕๗.

{๑๐๕๘} นวเม สพฺพํ อุตฺตานเมว ฯ อิมิสฺสาปิ วิตฺถาโร ภิกฺขุโนวาทเก วุตฺโตเยว ฯ ธุรนิกฺเขปสมุฏฺฐานํ อกิริยา สญฺญาวิโมกฺขํ สจิตฺตกํ โลกวชฺชํ กายกมมํ วจีกมฺมํ อกุสลจิตฺตํ ทุกฺขเวทนนฺติ ฯ นวมํ ฯ {๑๐๖๒} ทสเม ฯ ปสาเขติ อโธกาเย ฯ อโธกาโย หิ ยสฺมา ตโต รุกฺขสฺส สาขา วิย อุโภ อูรู ปภิชฺชิตฺวา คตา ตสฺมา ปสาขาติ วุจฺจติ ฯ {๑๐๖๕} ภินฺทาติอาทีสุ สเจ ภินฺท ผาเลหีติ สพฺพานิ อาณาเปติ โส จ ตเถว กโรติ ฉ อาณตฺติทุกฺกฏานิ ฉ จ ปาจิตฺติยานิ อาปชฺชติ ฯ อถาปิ เอวํ อาณาเปติ อุปาสก ยงฺกิญฺจิ เอตฺถ กาตพฺพํ ตํ สพฺพํ กโรหีติ ฯ โส จ สพฺพานิปิ เภทนาทีนิ กโรติ ฯ เอกวาจาย ฉ ทุกฺกฏานิ ฉ ปาจิตฺติยานีติ ทฺวาทส อาปตฺติโย ฯ สเจ ปน เภทนาทีสุ เอกํเยว วตฺวา อิมํ กโรหีติ อาณาเปติ โส จ สพฺพานิ กโรติ ยํ อาณตฺตํ ตสฺเสว กรเณ ปาจิตฺติยํ เสเสสุ อนาปตฺติ ฯ เสสํ อุตฺตานเมว ฯ กฐินสมุฏฺฐานํ กิริยากิริยํ โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ ทสมํ ฯ อารามวคฺโค ฉฏฺโฐ ฯ {๑๐๖๙} คพฺภินีวคฺคสฺส ปฐมสิกฺขาปเท ฯ อาปนฺนสตฺตาติ กุจฺฉึ ปวิฏฺฐสตฺตา ฯ ปฐมํ ฯ

เนื้อความอรรถกถาฉบับภาษาบาลี อักษรไทย เล่มที่ ๒ หน้าที่ ๕๕๗. http://84000.org/tipitaka/read/attha_page.php?book=2&page=557&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=2&A=11721&modeTY=2&pagebreak=1 http://84000.org/tipitaka/atthapali/th_line.php?B=2&A=11721&modeTY=2&pagebreak=1#p557