romanATTHA book 2 Page 562.

Sokavasā nāma paresaṃ dukkhaṃ uppādetīti. Athavā gharaṃ viya gharasāmikā ayaṃpi purisasamāgamaṃ alabhamānā sokaṃ āvisati iti yaṃ āvisati svāssā āvāso hotīti sokāvāsā. Tenāha sokaṃ āvisatīti. Ajānantīti īdisā ayanti ajānamānā. Sesaṃ uttānameva. Tisamuṭṭhānaṃ kiriyā saññāvimokkhaṃ sacittakaṃ paṇṇattivajjaṃ kāyakammaṃ vacīkammaṃ ticittaṃ tivedananti. Navamaṃ. {1164} Dasame. Anāpucchāti anāpucchitvā. Bhikkhunīhi dvikkhattuṃ āpucchitabbaṃ pabbajjakāle ca upasampadakāle ca. Bhikkhūnaṃ pana sakiṃ āpucchitepi vaṭṭati. {1165} Ajānantīti mātādīnaṃ atthibhāvaṃ ajānantī. Sesaṃ uttānameva. Apubbasamuṭṭhānasīsaṃ catussamuṭṭhānaṃ vācato kāyavācato vācācittato kāyavācācittato ca samuṭṭhāti. Kathaṃ. Abbhānakammādīsu kenacideva karaṇīyena khaṇḍasīmāyaṃ nisinnā pakkosatha sikkhamānaṃ idheva naṃ upasampādessāmāti upasampādeti evaṃ vācato ca samuṭṭhāti. Upassayato paṭṭhāya upasampādessāmīti vatvā khaṇḍasīmaṃ gacchantiyā kāyavācato ca samuṭṭhāti. Dvasupi ṭhānesu paṇṇattibhāvaṃ jānitvāva vītikkamaṃ karontiyā vācācittato kāyavācācittato ca samuṭṭhāti. Ananujānāpetvā upasampādanato kiriyākiriyaṃ nosaññāvimokkhaṃ acittakaṃ paṇṇattivajjaṃ kāyakammaṃ vacīkammaṃ ticittaṃ tivedananti. Dasamaṃ.

The Pali Atthakatha in Roman Character Volume 2 Page 562. http://84000.org/tipitaka/read/attha_page.php?book=2&page=562&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=2&A=11825&pagebreak=1 http://84000.org/tipitaka/atthapali/rm_line.php?B=2&A=11825&pagebreak=1#p562